Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2013

 BIJBEL E KENKI SMA LIBI

„Mi ben ogri kefalek”

„Mi ben ogri kefalek”
  • A GEBORE NA INI: 1960
  • KONDRE: FENSIKONDRE
  • MI BEN E PREI HEBI ROCK POKU

A LIBI FU MI FOSI:

Mi gro kon bigi na ini wan birti fu a foto Turku di de krosibei fu a se. Den sma fu a birti dati no ben de gudusma. Mi papa ben de kampioen boksman, èn mi nanga mi pikin brada ben e du a sport dati tu. Na skoro mi no ben e frede fu naki kofu te den pikin ben e suku trobi nanga mi. Di mi ben yongu, mi bigin waka nanga wan grupu ogri boi èn a sani dati tyari mi go na ini moro bigi feti. Mi kon lobi hebi rock poku tu èn mi bigin dren fu tron wan pôpi rock singiman.

Mi bai wan tu dron èn mi seti wan band. Fosi yu denki mi tron singiman fu a band. Mi ben lobi rigeri na tapu podium. Fu di a band fu wi ben e rigeri kefalek, meki te fu kaba moro sma kon lobi den poku fu wi. Wi bigin prei na fesi bigi grupu sma. Wi meki wan tu plaat èn furu sma ben lobi a lastiwan di wi meki. Na ini den yari baka 1985, wi go na Amerkankondre so taki moro sma ben kan kon sabi a band fu wi. Wi prei na ini New York nanga Los Angeles wan tu leisi, èn wi kon sabi wan tu bigi pokuman na ini a poku bisnis. Baka dati wi drai go baka na Fensikondre.

Aladi mi ben lobi prei na ini a band, toku mi no ben de koloku trutru. Te fu kaba mi no ben man moro nanga a fasi fa pokuman ben e strei nanga makandra, èn mi ben kon weri tu fu a bruya libi fu mi. Mi ben sabi taki mi ben ogri èn mi ben e frede taki mi ben o bron na ini hèl. Mi leisi ala sortu kerki buku fu feni piki tapu den aksi fu mi. Mi begi Gado fayafaya tu fu yepi mi, aladi mi ben denki taki noiti a ben o feni mi bun.

A FASI FA BIJBEL KENKI MI LIBI:

Fu man sorgu misrefi, mi ben wroko na a postkantoro na ini a birti pe mi ben e tan. Wan dei mi kon sabi taki wan fu den wrokoman na wan Yehovah Kotoigi. Mi poti wan lo aksi gi en. Mi ben lobi den bun piki di a gi mi nanga yepi fu Bijbel èn dati meki mi ben feni en bun taki a studeri Bijbel nanga mi. Baka di mi studeri wan tu wiki, a band fu mi kisi wan moi okasi fu tyari wan tu poku kon na doro na  ini Amerkankondre. Mi ben e si a sani disi leki wan bigi sani.

Mi taigi a Kotoigi di ben e studeri nanga mi taki mi ben o meki wan lasti plaat èn taki baka dati mi ben o bigin seryusu now fu fiti den rai fu Bijbel na ini mi libi. A no taki san a ben feni fu a tori, ma a aksi mi nomo fu leisi den wortu fu Yesus na Mateyus 6:24. A tekst e taki: „Nowan sma kan dini tu masra leki srafu.” Mi skreki di mi kon frustan san den wortu dati wani taki. Ma baka wan tu dei, na a sma di ben e studeri Bijbel nanga mi, skreki. Mi taigi en taki mi gowe libi a band fu di mi ben wani tron wan bakaman fu Yesus.

Bijbel ben de leki wan spikri di ben e sori mi sortu fowtu mi abi (Yakobus 1:22-25). Mi ben si taki mi ben ogri kefalek: Mi ben abi bigifasi èn mi ben gridi fu kisi biginen. Mi ben e taki dotitaki, mi ben e feti, mi ben e smoko, èn mi ben e dringi furu sopi. Mi ben bruya srefisrefi di mi kon si taki a fasi fa mi ben e libi ben de heri tra fasi leki san Bijbel e leri. Ma toku mi ben de klariklari fu tyari kenki kon na ini mi libi.Efeisesma 4:22-24.

„Wi hemel Tata abi sari-ati èn a wani trowstu den wan di abi berow fu den sondu fu den”

Na ini a bigin a ben hati mi srefisrefi taki mi ben du so furu ogri na ini mi libi. Ma a Kotoigi di ben e studeri nanga mi, yepi mi furu. A sori mi san Bijbel e taki na Yesaya 1:18: „Awinsi den sondu fu unu redi leki brudu, toku den o kon weti leki snew.” A tekst disi nanga trawan, meki mi si krin taki wi hemel Tata abi sari-ati èn taki a wani trowstu den wan di abi berow fu den sondu fu den.

Di mi kon sabi Yehovah, dan mi bigin lobi en tu. Dati meki mi ben wani gi mi libi abra na en (Psalm 40:8). Mi teki dopu na ini 1992 na wan internationaal kongres fu Yehovah Kotoigi di ben hori na ini Sint Petersburg na Rosiakondre.

DEN WINI DI MI KISI:

Mi meki omeni bun mati na mindri den anbegiman fu Yehovah. Ten na ten, wi e kon makandra fu prei bun poku èn fu prisiri nanga a kado disi di Gado gi wi (Yakobus 1:17). Wan moi blesi di mi kisi, na taki mi trow nanga mi lobi wefi Kristina. Mi nanga en pasa bun ten nanga muilek ten, èn a sabi sosrefi den dipi firi fu mi ati.

Efu mi no ben tron wan Yehovah Kotoigi, dan kande mi no ben o de na libi tide. Fosi, a wán problema baka a trawan ben e miti mi. Ma now mi de koloku trutru, èn mi libi e waka bun.