Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2013

 KON KROSIBEI NA GADO

„Tan aksi, dan unu sa kisi”

„Tan aksi, dan unu sa kisi”

„Masra, leri wi fa fu begi” (Lukas 11:1). Na a sani dati wan fu den disipel ben aksi Yesus. Di Yesus piki en, a fruteri en tu agersitori di e leri wi fa fu begi so taki Gado e arki den begi fu wi. Efu oiti yu ben aksi yusrefi efu Gado e arki den begi fu yu, dan yu o wani sabi san Yesus piki a disipel disi.Leisi Lukas 11:5-13.

A fosi agersitori e taki fu a sma di e begi (Lukas 11:5-8). Na ini a tori disi, wan fisitiman e kon na a oso fu wan man latilati na neti, èn a man no abi nowan nyanyan fu gi en. A man e si a sani disi leki wan seryusu sani. Aladi a lati kaba, toku a e go na a oso fu wan mati fu go leni wan tu brede. Na a bigin, a mati no wani opo fu di en osofamiri e sribi kaba. Sondro fu syen, a man e tan aksi en mati teleki a e opo fu gi en wan tu brede. *

San na agersitori e leri wi te a abi fu du nanga begi? Yesus e leri wi taki wi musu horidoro. Wi musu tan aksi, tan suku, èn tan naki na tapu a doro (Lukas 11:9, 10). Fu san ede? Yu denki taki Yesus e leri wi taki te wi e begi dan fu taki en leti wi e naki na a doro fu wan Gado di no wani yepi wi? Nôno. Yesus e leri wi taki tra fasi leki a mati di no ben wani yepi a man na a bigin, Gado de klariklari fu piki den begi fu den sma di e bribi taki a o arki den. Te wi e horidoro na ini begi, dan wi e sori taki wi abi a bribi dati. Te wi e tan aksi Gado wan sani, dan wi e sori taki wi abi a sani dati tranga fanowdu èn taki wi e bribi trutru taki A kan gi wi a sani dati, efu dati e kruderi nanga a wani fu en.Markus 11:24; 1 Yohanes 5:14.

A di fu tu agersitori e taki fu a „sma di e arki begi” (Psalm 65:2). Yesus e aksi: „Suma fu unu di de wan papa o gi en manpikin wan sneki te a pikin aksi en wan fisi? Sosrefi, te a e aksi wan eksi, dan unu no o gi en wan kruktutere, a no so?” A piki de krin. Nowan lobi-ati papa ben o gi en pikin wan sani di no bun gi den. Baka dati, Yesus e sori san na agersitori wani taki: Efu sondu papa e gi den pikin fu den „bun sani”, dan „a no abi misi taki a Tata di de na hemel sa gi santa yeye”, a moro bun sani, na den pikin fu en na grontapu di e aksi en! *Lukas 11:11-13; Mateyus 7:11.

Gado de klariklari fu piki den begi fu den wan di e bribi taki a e arki den

San na agersitori disi e leri wi fu Yehovah, a „sma di e arki begi”? Yesus e gi wi deki-ati fu si Yehovah leki wan lobi-ati Papa di de klariklari fu yepi den pikin fu en te dati de fanowdu. Fu dati ede, anbegiman fu Yehovah no abi fu frede fu aksi en sani. Fu di den sabi taki a abi a bun fu den na prakseri, meki den e warderi a fasi fa a piki a begi fu den, awansi dati no de san den ben fruwakti. *

A bun fu leisi a pisi disi fu Bijbel na ini april

Lukas 7-21

^ paragraaf 4 Na agersitori fu Yesus e sori fa a gwenti ben de na ini a ten dati. Den Dyu ben e si en leki wan tumusi prenspari sani fu sori switifasi gi trawan. Wan osofamiri ben e baka nofo brede fu wan dei, sobun, sma ben gwenti leni brede na trawan te den srefi no ben abi moro. Efu na osofamiri ben pôti, dan a heri famiri ben e sribi na gron na ini a srefi kamra.

^ paragraaf 6 Yesus e gersi a wan sani nanga a trawan fu sori taki Gado bun omeni leisi moro libisma.

^ paragraaf 7 Efu yu wani sabi fa fu begi so taki Gado e arki den begi fu yu, dan luku kapitel 17 fu a buku San Bijbel e leri wi trutru?, di Yehovah Kotoigi tyari kon na doro.