Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  april 2013

 TORI FU A KAFTI: YU KAN ABI WAN TRUTRU KOLOKU LIBI

A tru taki wi kan abi wan trutru koloku libi?

A tru taki wi kan abi wan trutru koloku libi?

„Wi kan libi seibitenti yari èn efu wi tranga wi kan libi aititenti yari. Toku den yari dati lai soso broko-ede nanga pina.”Psalm 90:10.

DEN wortu disi tru. Nofo tron a libi na ini a grontapu disi lai nanga „broko-ede nanga pina”. Kande yu aksi yusrefi a sani disi: ’Wi kan abi wan trutru koloku libi nownow kaba?’

Luku na eksempre fu Maria. Ala ten a ben gwenti du ala sortu sani, ma now di a kon abi 84 yari, a kon swaki so te taki pikinmoro a no man komoto na oso. A e frustan sani bunbun ete, ma a gersi leki en skin no wani moro. Toku Maria feni taki a de koloku. Fa dati kan?

Fa a de nanga yu? Kande yu aksi yusrefi wan leisi efu yu de koloku trutru. Kande yu abi wan wroko di e weri yu skin, di soi, noso pe yu musu du a srefi sani ibri leisi baka. A kan taki sma no abi warderi gi a muiti di yu e du. Awansi sani e waka bun gi yu, toku yu ben kan broko yu ede nanga a tamara fu yu. Son leisi yu ben kan firi tu leki yu de yu wawan, noso yu e firi brokosaka. Kande sma na ini yu famiri lobi meki trobi noso strei nanga makandra. Kande wan lobiwan fu yu kon dede. Wan man di nen André ben lobi en papa srefisrefi, ma wantronso en papa kon siki èn a dede. A sani dati broko André èn a ben denki taki noiti a ben o man kisi ensrefi baka.

Awansi sortu problema e miti wi, toku wan prenspari sani de di wi musu aksi wisrefi: A tru taki wi kan abi wan trutru koloku libi? Wi o kisi piki tapu na aksi dati te wi e luku a libi fu wan man di ben e libi na grontapu sowan 2000 yari pasa. A man dati na Yesus Krestes. Aladi furu tesi ben miti Yesus, toku a ben abi wan trutru koloku libi. Wi kan abi dati tu te wi e teki na eksempre fu en.