„Waka neleki fa Yesus ben e waka.”1 Yohanes 2:6.

SOLEKI FA wi si na ini na artikel na fesi, dan Yesus ben abi wan trutru koloku libi. Sobun, efu wi wani de koloku, dan wi musu teki na eksempre fu en èn wi musu gi yesi na den rai fu en.

Fu taki en leti, na dati Yehovah e taigi wi fu du, soleki fa a tekst na tapusei e sori. Te wi wani waka soleki fa Yesus ben e waka, dan wi musu teki na eksempre fu en èn wi musu fiti den leri fu en na ini wi libi. Te wi e du dati, dan Gado o feni wi bun èn wi o abi wan trutru koloku libi.

Yesus ben e leri sma sani di kan yepi wi fu waka neleki fa en ben e waka. Wi e feni difrenti fu den leri disi na ini a prenspari taki di a ben hori na tapu wan bergi. Meki wi luku wan tu fu den leri dati fu man si fa wi kan fiti den na ini wi libi.

BIJBEL E LERI: „Koloku fu den sma di sabi taki den abi Gado fanowdu.”Mateyus 5:3.

A FASI FA A LERI DISI E YEPI WI FU ABI WAN TRUTRU KOLOKU LIBI:

Yesus ben sori taki ala libisma gebore nanga na angri fu kon sabi Gado. Wi wani kisi piki tapu aksi soleki: Fu san ede so furu pina de na grontapu? Gado e broko en ede trutru nanga wi? Wan sma di dede kan libi baka? Wi musu kisi piki tapu den aksi disi fu man abi wan trutru koloku libi. Yesus ben sabi taki wán presi nomo de pe wi kan feni krin piki tapu den aksi dati. Iya, wi kan feni den na ini Gado Wortu. Na ini begi, Yesus ben taigi en Tata: „Yu wortu e taki san tru” (Yohanes 17:17). Gado Wortu kan yepi wi trutru fu kon sabi Gado èn fu de koloku?

ONDROFENITORI:

Esa di ben e singi na ini wan pôpi band, ben de kaba fu tron wan bigi rock singiman. Toku Esa no ben de koloku trutru. A e taki: „Aladi mi ben lobi prei na ini a band, toku mi no ben de koloku trutru.” Ma baka wan pisi ten, Esa miti wan Yehovah Kotoigi. Esa e taki: „Mi poti wan lo aksi gi en. Mi ben lobi den bun piki di a gi mi nanga yepi fu Bijbel, èn fu dati ede mi ben feni en bun taki a studeri Bijbel nanga mi.” Den sani di Esa leri di a studeri Bijbel, naki en ati èn te fu kaba a gi en libi abra na Yehovah. A e taki: „Fosi, a wán problema baka a trawan ben e miti mi. Ma now mi de koloku trutru.” *

BIJBEL E LERI: „Koloku fu den sma di abi sari-ati gi trawan.”Mateyus 5:7.

A FASI FA A LERI DISI E YEPI WI FU ABI WAN TRUTRU KOLOKU LIBI:

Wan sma di abi sari-ati gi trawan, e sori taki a e firi gi den. Dati meki a e sori switifasi gi den sma dati èn a e hori den firi fu den na prakseri. Yesus ben e sori sari-ati gi sma di ben de na nowtu. Fu di a ben e firi gi den, meki a du wan sani fu yepi den (Mateyus 14:14; 20:30-34). Te wi e sori sari-ati neleki Yesus, dan a bakapisi o de taki wi o de koloku (Tori fu den apostel 20:35). Wan fasi fa wi kan sori sari-ati gi trawan, na te wi e taki èn e du sani di e tyari frulekti kon gi den wan di abi yepi fanowdu. Wi sa de koloku te wi e sori sari-ati gi sma?

Maria nanga Carlos

ONDROFENITORI:

Maria nanga en masra Carlos na sma di e sori sari-ati gi trawan. Maria en papa wefi dede kaba, èn wan tu yari kaba a man disi e didon na bedi fu di a siki. Maria nanga Carlos teki en na ini den oso èn den e sorgu en. Nofo tron den no man sribi te neti èn son leisi  den musu lon tyari en go na ati-oso te a sukru fu en e naki en. Den srefi e taki dati son leisi den e weri srefisrefi. Ma den de koloku soleki fa Yesus ben taki, fu di den sabi taki den e gi a papa fu Maria a yepi di a abi fanowdu.

BIJBEL E LERI: „Koloku fu den sma di e suku fu libi bun nanga trawan.”Mateyus 5:9.

A FASI FA A LERI DISI E YEPI WI FU ABI WAN TRUTRU KOLOKU LIBI:

Fu san ede wan sma de koloku te a e suku fu libi bun nanga trawan? Wán sani, na taki wi o man feni en moro bun nanga sma na wi lontu. A bun fu gi yesi na a rai disi fu Bijbel: „Du ala san yu man fu libi bun nanga ala sma” (Romesma 12:18). Den wortu „ala sma”, abi fu du nanga famiriman nanga tra sma di no abi a srefi bribi leki wi. Wi sa de koloku trutru te wi e libi bun nanga „ala sma”?

Nair

ONDROFENITORI:

Luku a tori fu wan uma di nen Nair. Fu di furu sani miti en na ini en libi, meki a ben muilek gi en fu libi bun nanga trawan, spesrutu nanga den famiriman fu en. En masra gowe libi en sowan 15 yari pasa, èn sensi a ten dati en wawan e kweki den pikin fu en. Wan fu den boi fu en ben e gebroiki drugs, èn nofo tron a boi dati ben e rigeri èn a ben wani du ogri nanga Nair èn nanga na umapikin fu en. Nair e bribi taki den sani di a leri fu Bijbel yepi en fu tan libi bun nanga a boi fu en, srefi di a situwâsi ben muilek so. A e pruberi fu no haritaki nanga trawan, èn a e luku bun tu fu no meki trobi. A e du muiti fu sori switifasi gi trawan, èn fu hori den firi fu den na prakseri (Efeisesma 4:31, 32). A sabi seiker taki na fu di a leri fu libi bun nanga trawan, meki a man feni en nanga den famiriman fu en èn nanga tra sma.

PRAKSERI A TEN DI E KON

Te wi e teki a bun rai fu Yesus, dan wi o de koloku. Ma efu wi wani de koloku trutru, dan wi musu sabi san o pasa na ini a ten di e kon. Ma fa wi kan de koloku trutru te wi sabi taki wi o kon owru, siki, èn dede te fu kaba? Toku na disi e miti wi alamala.

Ma bun nyunsu de! Den wan di e du muiti fu „waka neleki fa Yesus ben e waka”, o kisi furu blesi fu Yehovah. Yehovah pramisi taki heri esi a o seti wan nyun grontapu pe retidu o de èn pe reti-ati libisma o libi fu têgo sondro sondu, soleki fa Gado ben wani dati biginbigin. A Wortu fu en e taki: „Luku, a tenti fu Gado de na libisma. Gado o tan nanga den èn den o de en pipel. Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”Openbaring 21:3, 4.

Maria, na uma fu 84 yari di kari na ini a fosi artikel fu a tijdschrift disi, e prisiri taki a o si fa den wortu dati o kon tru. Fa a de nanga yu? Yu wani kon sabi moro fu „a trutru libi” di wi o abi te Gado Kownukondre o tiri? (1 Timoteyus 6:19) Efu yu wani sabi moro, dan aksi Yehovah Kotoigi na ini a kontren fu yu, noso skrifi go na den sma di e tyari a tijdschrift disi kon na doro. *

^ paragraaf 8 Yu kan leisi a heri tori fu Esa na ini na artikel di nen „Bijbel e kenki sma libi—Mi ben ogri kefalek”.

^ paragraaf 18 A buku San Bijbel e leri wi trutru?, di Yehovah Kotoigi tyari kon na doro, yepi furu sma fu kon sabi san Bijbel e taki fu difrenti tori.