Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2013

 KON KROSIBEI NA GADO

’A de a Gado fu den wan di de na libi.’

’A de a Gado fu den wan di de na libi.’

Dede tranga moro Gado? Kwetikweti! Fa dede noso iniwan tra „feanti” kan tranga moro „Gado na Almaktiwan”? (1 Korentesma 15:26; Eksodes 6:3) Gado abi a makti fu tyari wan kaba kon na dede nanga yepi fu na opobaka èn a e pramisi fu du dati na ini a nyun grontapu fu en. * Wi kan bribi a sani dati? We, den sani di Gado en eigi Manpikin, Yesus, e taki e gi wi furu howpu.Leisi Mateyus 22:31, 32.

Di Yesus ben taki nanga den Saduseiman di no ben bribi na ini na opobaka, dan a taki: „Unu no leisi san Gado ben taigi unu fu na opobaka fu den dede sma? A ben taki: ’Mi na a Gado fu Abraham, a Gado fu Isak, èn a Gado fu Yakob.’ A no de a Gado fu den dede sma, ma a Gado fu den wan di de na libi.” Dyaso Yesus ben taki fu a takimakandra di Gado ben abi nanga Moses na a makabusi di ben e bron. A sani disi pasa na a ten fu 1514 Fosi Krestes (Eksodes 3:1-6). Yehovah ben taigi Moses: „Mi na a Gado fu Abraham, a Gado fu Isak, èn a Gado fu Yakob.” Soleki fa Yesus ben taki, dan den wortu disi e sori taki dedesma o kisi wan opobaka seiker. Fa so?

Di Yehovah taki nanga Moses, dan den famiri-edeman Abraham, Isak nanga Yakob ben dede omeni yari kaba. Abraham ben dede 329 yari, Isak ben dede 224 yari, èn Yakob ben dede 197 yari. Toku Yehovah ben taki: „Mi na” den Gado, a no ben taki: „Mi ben de” den Gado. Yehovah ben taki fu den dri famiri-edeman disi neleki den ben de na libi ete. Fu san ede?

Yesus ben taki: „A [Yehovah] no de a Gado fu den dede sma, ma a Gado fu den wan di de na libi.” Prakseri san den wortu disi wani taki. Efu wan opobaka no o de, dan Abraham, Isak nanga Yakob ben o tan na ini a makti fu dede ala ten. Efu na so, dan Yehovah ben o de a Gado fu den dedewan. A sani disi ben o sori taki dede tranga moro Yehovah. Iya, a ben o de neleki Yehovah no abi a makti fu lusu den reti-ati futuboi fu en puru na ini a makti fu dede.

Sobun, san wi kan taki fu Abraham, Isak, Yakob nanga ala den reti-ati futuboi fu Yehovah di dede? Yesus taki a moi sani disi: „Gi en den alamala e libi” (Lukas 20:38). Iya, fu di Yehovah sabi seiker taki a o gi den reti-ati futuboi fu en wan opobaka, meki a e taki fu den neleki den de na libi (Romesma 4:16, 17). Yehovah di man memre ala sani heri bun, noiti no o frigiti den sortu sma disi, teleki a ten doro fu tyari den kon na libi baka.

Yehovah tranga omeni tron moro dede

Yu e angri fu miti baka nanga den lobiwan fu yu di dede? Efu dati de so, dan hori na prakseri taki Yehovah tranga omeni tron moro dede. Noti no kan tapu pasi gi en fu gi den dedewan wan opobaka, soleki fa a pramisi. Fu san ede yu no e leri moro fu na opobaka howpu èn fu a Gado di o meki a howpu dati kon tru? Te yu du dati, dan seiker yu o kon moro krosibei na Yehovah, „a Gado fu den wan di de na libi”.

A bun fu leisi a pisi disi fu Bijbel na ini februari

Mateyus 22-28Markus 1-8

^ paragraaf 3 Efu yu wani sabi moro fu na opobaka di Gado o gi sma na ini a nyun grontapu pe retidu sa de, dan luku kapitel 7 fu a buku San Bijbel e leri wi trutru? Yehovah Kotoigi tyari en kon na doro.