Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2013

 TORI FU A KAFTI: SAN WI E LERI FU MOSES?

Suma ben de Moses?

Suma ben de Moses?

San yu e prakseri te yu e yere a nen Moses? Yu e prakseri . . .

  • a beibi di wan mama ben kibri na ini wan baskita di a poti na ini Nijl-liba?
  • a boi di na umapikin fu Farao kweki leki wan gudusma pikin na ini Egepte, ma di noiti frigiti taki a ben de wan Israelsma?
  • a man di ben e libi leki wan skapuman na ini Midian 40 yari langa?
  • a man di ben taki nanga Yehovah * na fesi wan makabusi di ben e bron?
  • a man di no ben frede fu aksi a kownu fu Egepte fu lusu den Israelsma di a ben e hori na ini katibo?
  • a man di ben meki bekènti taki Tin Rampu ben o miti Egepte, fu di a kownu fu den ben trangayesi a tru Gado?
  • a man di tyari a heri pipel fu Israel komoto na ini Egepte?
  • a man di Gado gebroiki fu prati a Redi Se?
  • a man di gi den Israelsma den Tin Komando fu Gado?

MOSES ben du ala den sani disi èn moro sani srefi. Dati meki a no e fruwondru wi taki Kresten, Dyu, nanga Moslimsma abi furu lespeki gi a reti-ati man disi!

A no de fu taki dati Moses ben de wan profeiti di „du ala sortu kefalek sani” (Deuteronomium 34:10-12). A meki Gado gebroiki en fu du bigi sani. Toku Moses ben de leki ala tra sma. Na a ten fu Yesus en diniwroko na grontapu, a profeiti Elia ben de fu si na sei Moses na ini wan fisyun. Neleki a profeiti dati, Moses ben de wan man „di ben abi den srefi firi leki wi” (Yakobus 5:17; Mateyus 17:1-9). Moses ben kisi fu du nanga den srefi problema di e miti wi, èn a ben man pasa den alamala.

Yu wani kon sabi fa a du dati? Wi o poti prakseri na dri fu den bun fasi di Moses ben abi èn wi o luku tu san wi kan leri fu en.

^ paragraaf 7 Yehovah na a nen fu Gado, soleki fa Bijbel e tyari kon na krin.