Go na content

Go na table of contents

Yehovah Kotoigi

Tongo Sranantongo

Moses—Wan man di ben abi sakafasi

Moses—Wan man di ben abi sakafasi

SAN NA SAKAFASI?

Wan sma di abi sakafasi no abi heimemre èn a no e denki taki a bun moro trawan. Boiti dati, wan sondu sma di abi sakafasi no e denki tumusi furu fu en srefi. Dati wani taki dati a sabi san a man èn san a no man.

FA MOSES SORI SAKAFASI?

Moses no ben meki a makti di a ben abi frei go na en ede. Nofo tron te wan man e kisi pikinso makti, dan heri esi yu o man si efu a abi sakafasi noso efu a no abi dati. Robert, G. Ingersoll, wan skrifiman fu a di fu 19 yarihondro, ben taki en so: „Furu sma man horidoro na ini muilek situwâsi. Ma efu yu wani sabi fa wan sma de trutru, dan yu musu gi en makti.” Fu di Moses ben abi sakafasi, meki a de wan heri bun eksempre gi wi. Fa so?

Moses ben kisi furu makti fu di Yehovah ben poti en leki fesiman fu Israel. Ma toku Moses noiti no kisi bigifasi. Luku fa a sori sakafasi di a ben musu lusu wan muilek problema di ben abi fu du nanga famirigudu (Numeri 27:1-11). Na afersi disi ben de wan prenspariwan fu di a bosroiti di a ben o teki, ben o leri sma bakaten fa den ben musu lusu den sortu afersi disi.

San Moses ben o du? A ben o feni taki leki fesiman fu Israel a ben sabi krin sortu bosroiti a ben musu teki na ini a tori disi? A ben o feni taki a ben abi nofo ondrofeni nanga koni, èn taki a ben sabi heri bun fa Yehovah ben e denki?

Kande wan man di ben abi heimemre ben o du dati. Ma a no Moses. Bijbel e taki: „Moses go aksi Yehovah fa a ben musu krutu a tori disi” (Numeri 27:5). Denki a tori! Aladi a ben de fesiman fu Israel 40 yari kaba, toku a no frutrow tapu ensrefi, ma a frutrow tapu Yehovah. A sani disi e sori krin taki Moses ben abi sakafasi.

Moses no ben feni tu taki na en wawan ben musu abi makti. A ben breiti di Yehovah meki tra man fu Israel wroko leki profeiti makandra nanga en (Numeri 11:24-29). Di a papa fu en wefi taigi en taki a ben musu suku wan tu man di ben kan yepi en nanga a wroko fu en, dan Moses sori sakafasi èn a teki a rai dati (Eksodes 18:13-24). Aladi Moses ben de steifisteifi ete na a kabapisi fu en libi, toku a aksi Yehovah fu poti wan sma di ben o teki a presi fu en. Di Yehovah teki Yosua, dan Moses ben de klariklari fu horibaka gi a yonguman disi. A gi a pipel deki-ati fu teki a tiri fu Yosua di ben o tyari den go na ini a Pramisi Kondre (Numeri 27:15-18; Deuteronomium 31:3-6; 34:7). A de krin taki Moses ben e si en leki wan grani fu de fesiman fu den Israelsma. Ma gi en, a tanbun fu den sma ben prenspari moro leki a posisi fu en.

SAN WI E LERI FU DEN SANI DISI?

Noiti wi musu gi pasi taki makti, posisi, noso den koni di wi abi e frei go na wi ede. Hori a sani disi na prakseri: Efu wi wani du a wroko fu Yehovah bun, dan a moro prenspari fu abi sakafasi, leki fu abi koni (1 Samuel 15:17). Te wi abi trutru sakafasi, dan wi o du muiti fu fiti a koni rai disi di Bijbel e gi: „Frutrow na tapu Yehovah nanga yu heri ati. No frutrow na tapu yu eigi frustan.”Odo 3:5, 6.

Na eksempre fu Moses e leri wi tu fu no denki tumusi furu fu a makti noso a posisi di wi abi.

Wi kan leri wan sani fu a sakafasi fu Moses? Seiker! Te wi e kweki trutru sakafasi dan wi sa meki a libi moro makriki gi sma na wi lontu, èn na so den o kon lobi wi. San moro prenspari, na taki Yehovah Gado o kon lobi wi tu fu di ensrefi e sori a moi fasi disi (Psalm 18:35). Bijbel e taki: „Gado e kakafutu gi den wan di abi heimemre, ma a e sori bun-ati gi den sma di abi sakafasi” (1 Petrus 5:5). A sani disi e gi wi bun reide fu sori sakafasi neleki Moses!