Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2013

Moses—Wan man di ben abi bribi

Moses—Wan man di ben abi bribi

SAN NA BRIBI?

Bijbel e sori taki wan sma di abi „bribi”, abi krinkrin buweisi taki den sani di a e bribi de so trutru. Wan sma di abi bribi na ini Gado abi a frutrow taki A o du ala san a pramisi.

FA MOSES SORI BRIBI?

Moses ben e teki bosroiti di ben e sori taki a ben e bribi den pramisi fu Gado (Genesis 22:15-18). A ben abi na okasi fu libi wan switi libi na mindri den gudusma fu Egepte, ma a no teki na okasi dati. Na presi fu dati a „bosroiti fu nyan pina makandra nanga a pipel fu Gado, na presi fu nyan bun fu sondu fu wan pisi ten nomo” (Hebrewsma 11:25). Yu denki taki a ben o hati en bakaten taki a ben teki a bosroiti dati? Nôno, fu di Bijbel e taki dati Moses „horidoro neleki a ben e si a sma di wi no man si nanga wi ai” (Hebrewsma 11:27). Noiti a ben hati Moses taki a ben teki den sortu bosroiti dati.

Moses ben suku fu tranga a bribi fu tra sma. Fu eksempre, luku san pasa di a ben gersi leki a Redi Se ben e tapu pasi gi a pipel Israel fu lowe gi a legre fu Farao. Fu di den Israelsma ben frede taki rampu ben de fu miti den, meki den bari suku yepi na Yehovah nanga Moses. San Moses ben o du?

Kande Moses no ben sabi srefisrefi taki syatu baka dati, Gado ben o prati a Redi Se, so taki den Israelsma ben kan lowe. Ma Moses ben abi a frutrow taki Gado ben o du wan sani fu kibri a pipel fu en. Bijbel e taki: „Moses taigi a pipel: „No frede. Tanapu kánkan èn luku fa Yehovah o frulusu unu tide’” (Eksodes 14:13). Moses ben man tranga a bribi fu den tra Israelsma? Iya, fu di Bijbel e taki disi fu Moses èn fu ala den Israelsma: „Na fu di den Israelsma ben abi bribi, meki den waka pasa na ini a Redi Se neleki te den ben o waka na tapu drei gron” (Hebrewsma 11:29). A bribi fu Moses no tyari wini kon gi en wawan, ma gi ala sma di ben teki leri fu en.

SAN WI E LERI FU DEN SANI DISI?

Wi kan teki na eksempre fu Moses te wi e teki bosroiti di e sori taki wi e bribi den sani di Gado pramisi wi. Fu eksempre, Gado pramisi taki a o gi wi den sani di wi abi fanowdu efu wi e poti na anbegi fu en na a fosi presi na ini wi libi (Mateyus 6:33). Ma furu sma na ini a ten disi e feti baka gudu, èn dati kan meki en muilek gi wi fu no du a srefi. Toku wi kan de seiker taki te wi e du ala san wi man fu tan poti na anbegi na a fosi presi, dan Yehovah o gi wi ala san wi abi fanowdu. A e gi wi a dyaranti disi: „Mi no o libi yu kwetikweti èn noiti mi o gowe fu yu.”Hebrewsma 13:5.

Wi e du muiti tu fu yepi trawan fu kon abi wan tranga bribi. Fu eksempre, koni papa nanga mama sabi taki den abi a bigi frantwortu fu yepi den pikin fu den fu kon abi bribi na ini Gado. Te den pikin e gro kon bigi, dan a prenspari taki den sabi taki wan Gado de èn taki a e leri wi san bun èn san no bun. Boiti dati, den musu abi na overtoigi taki te den e hori densrefi na den leri fu Gado, dan dati na a moro bun fasi fu libi (Yesaya 48:17, 18). Papa nanga mama e gi den pikin fu den wan warti kado te den e yepi den fu kon abi a bribi taki Gado „de trutru èn taki a e pai den wan di e suku en fayafaya”.Hebrewsma 11:6.