Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  februari 2013

 BIJBEL E KENKI SMA LIBI

„Den ben wani taki mi srefi kon sabi san Bijbel e leri trutru”

„Den ben wani taki mi srefi kon sabi san Bijbel e leri trutru”
  • A GEBORE NA INI: 1982
  • KONDRE: DOMINIKAN REPUBLIEK
  • A BEN DE: WAN SMA DI KWEKI NA INI A MORMOON BRIBI

A LIBI FU MI FOSI:

Mi gebore na ini Santo Domingo, na Dominikan Republiek. Mi na a lastiwan fu den fo pikin fu mi papa nanga mama. Mi papa nanga mama kisi hei skoroleri, èn den ben wani taki den pikin fu den kweki na mindri bun sma. Fo yari fosi mi gebore, mi papa nanga mama miti zendeling fu a Mormoon kerki. Den ben lobi fa den yonguman disi ben krin èn fa den ben abi bun maniri. Dati meki heri esi mi papa nanga mama bosroiti fu tron wan fu den fosi famiri fu Dominikan Republiek di ben o teki a Mormoon bribi.

Di mi ben e gro kon bigi, mi ben lobi den sani di wi ben e du makandra na kerki. Boiti dati, mi ben lobi fa a Mormoon kerki ben e leri sma fu abi wan bun osofamiri-libi èn fu libi na wan bun fasi. Mi ben si en leki wan grani fu de na ini a Mormoon kerki èn mi ben abi na prakseri fu tron wan zendeling.

Di mi ben abi 18 yari, mi famiri froisi go na Amerkankondre fu di den ben wani taki mi go na wan bun universiteit. Pikinmoro wán yari baka dati, mi tanta nanga mi omu di de Yehovah Kotoigi, kon luku wi na Florida. Den aksi wi fu go nanga den na wan bigi konmakandra pe sma ben e kisi leri fu Bijbel. Mi ben fruwondru taki ala sma na mi lontu ben e suku den tekst di kari èn den ben e skrifi san den ben e yere. Dati meki mi aksi pen nanga papira èn mi bigin skrifi tu.

Fu di mi ben wani tron wan zendeling, meki baka a konmakandra mi tanta nanga mi omu taigi mi taki den kan yepi mi fu kon sabi wan tu sani fu Bijbel. Mi ben feni a sani dati bun, fu di na a ten dati mi ben sabi moro fu a Buku fu Mormon leki fu Bijbel.

A FASI FA BIJBEL KENKI MI LIBI:

Te wi ben e studeri Bijbel nanga yepi fu telefon, dan ala ten mi tanta nanga mi omu ben e taigi mi fu luku efu den sani di mi ben e bribi ben e  kruderi nanga san Bijbel e leri. Den ben wani taki mi srefi kon sabi san Bijbel e leri trutru.

Mi ben bribi furu fu den leri fu a Mormoon kerki, ma mi no ben sabi seiker efu den sani dati ben e kruderi nanga Bijbel. Mi tanta seni na Ontwaakt! fu 8 november 1995 gi mi. Na Ontwaakt! disi di Yehovah Kotoigi tyari kon na doro, ben abi wan tu artikel di ben e taki fu a Mormoon bribi. Mi ben fruwondru taki mi no ben sabi furu fu den leri fu a Mormoon kerki. A sani dati meki taki mi go tapu a website fu a Mormoon kerki fu luku efu den sani di ben skrifi na ini na Ontwaakt! ben tru. Mi si taki den sani dati ben tru èn mi kisi moro buweisi srefi di mi go na den Mormoon museum na ini a distrikt Utah.

Ala ten mi ben denki taki a Buku fu Mormon nanga Bijbel ben e kruderi nanga makandra. Ma di mi bigin leisi Bijbel moro fini, mi kon si taki wan difrenti de na mindri den leri fu a Mormoon kerki èn den sani di skrifi na ini Bijbel. Fu eksempre, na Esekièl 18:4, Bijbel e taki dati a sili e dede. Ma a Buku fu Mormon e taki na Alma 42:9: „A sili noiti no kan dede.”

Boiti den difrenti dati, wan tra sani di ben e trobi mi, na taki a Mormoon kerki ben e leri sma fu abi tranga lobi gi a mamakondre. Fu eksempre, a kerki e leri taki a dyari fu Eden ben de na ini Jackson County, Missouri, na Amerkankondre. Boiti dati, den profeiti fu a kerki e taki dati te „Gado Kownukondre o tiri, a o poti a tirimakti fu Amerkankondre fu tiri heri grontapu”.

Mi ben aksi misrefi san ben o pasa nanga a kondre pe mi gebore, noso nanga iniwan tra kondre. Wan neti mi taki fu a tori disi nanga wan yonguman fu a Mormoon kerki di ben bèl mi. A yonguman disi ben e kisi leri fu tron wan zendeling. Mi aksi en efu a ben o feti nanga tra sma fu a Mormoon kerki efu a kondre fu en ben e feti nanga di fu den. Mi skreki di a taigi mi taki seiker a ben o du dati. Mi go ondrosuku den leri fu a bribi fu mi moro fini èn mi taki nanga wan tu fesiman fu a Mormoon kerki. Den taigi mi taki den sani di mi aksi den na kibritori di ben o kon na krin wan dei te den ben o frustan sani moro bun.

Fu di mi no ben lobi a sani di den taigi mi, meki mi bigin aksi misrefi san mi ben wani èn fu san ede mi ben wani tron wan zendeling fu a Mormoon kerki. Mi kon si taki wan reide fu san ede mi ben wani tron wan zendeling, na taki mi ben wani yepi tra sma. Wan tra reide, na taki sma ben o lespeki mi. Ma fu taki en leti, mi no ben sabi furu fu Gado. Fosi, mi ben e leisileisi Bijbel furu, ma toku mi no ben abi so furu warderi gi en. Mi no ben sabi srefisrefi san Gado ben abi na prakseri gi grontapu èn gi libisma.

DEN WINI DI MI KISI:

Mi leri furu sani di mi ben e studeri Bijbel nanga Yehovah Kotoigi. Mi leri san na a nen fu Gado, san e pasa nanga den dedewan, èn fa Yesus o yepi fu meki a wani fu Gado kon tru. Te fu kaba mi kon frustan a moi buku disi èn mi ben lobi fruteri trawan san mi ben e leri. Ala ten mi ben sabi taki wan Gado de, ma now en na mi moro bun Mati èn mi man taki nanga en na ini begi. Mi teki dopu tron wan Yehovah Kotoigi tapu 12 yuli 2004, èn siksi mun baka dati mi bigin wroko furuten na ini a Kresten diniwroko.

Feifi yari langa, mi wroko na a edekantoro fu Yehovah Kotoigi na Brooklyn, New York. A gi mi prisiri trutru taki mi ben man yepi fu meki Bijbel nanga tra buku nanga tijdschrift di e tyari wini kon gi milyunmilyun sma na heri grontapu. A e tan gi mi prisiri taki mi man yepi tra sma fu kon sabi Gado.