Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yanuari 2013

 BIJBEL E KENKI SMA LIBI

„Mi kon fri trutru.”

„Mi kon fri trutru.”
  • A GEBORE NA INI: 1981
  • KONDRE: AMERKANKONDRE
  • A BEN DE: WAN MANPIKIN DI BEN LASI

A LIBI FU MI FOSI:

Mi gebore na Moundsville, wan tiri foto. A foto disi de na Ohio-liba na noordsei fu West Virginia, na Amerkankondre. Mi ben de a di fu tu pikin fu mi papa nanga mama. Den ben abi fo pikin, èn dri fu den ben de boi. Dati meki noiti a ben soi na oso. Mi papa nanga mama ben e wroko tranga. Den ben de reti-ati sma di ben abi lobi gi trawan. Wi no ben abi furu moni, ma ala ten wi ben abi san de fanowdu. Leki Yehovah Kotoigi, mi papa nanga mama ben du muiti fu gi wi leri fu Bijbel di wi ben pikin.

Ma di mi kon moro bigi, sani ben bigin hari mi prakseri puru kaba fu den sani di mi ben leri. Mi ben e aksi misrefi efu mi ben kan de koloku trutru te mi e hori misrefi na den leri fu Bijbel. Mi ben denki taki mi ben o de koloku trutru, soso te mi ben e du san misrefi wani. Fosi yu denki mi no ben e go na den Kresten konmakandra moro. Mi bigi brada nanga mi pikin sisa du a srefi sani tu. Wi papa nanga mama du ala san den man fu yepi wi, ma wi no ben wani teki a yepi fu den.

Mi no ben sabi taki a fri di mi ben wani ben o meki mi tron wan srafu fu takru gwenti. Wan dei baka skoro, di mi ben e waka go na oso, dan wan mati fu mi gi mi wan sikaret, èn mi teki en. Sensi a dei dati, mi bigin du wan lo tra sani di no ben bun. Te fu kaba mi bigin gebroiki drugs, mi bigin dringi sopi pasa marki, èn mi bigin libi wan yayolibi. Na ini den yari baka dati, mi bigin gebroiki moro hebi drugs èn mi no ben man tapu nanga a gwenti dati. Fu di mi ben e kon abi takru gwenti moro nanga moro, meki mi bigin seri drugs fu man tan libi a libi dati.

Aladi mi du tranga muiti fu no arki a konsensi fu mi, toku a ben e piki mi doronomo taki a fasi fa mi ben e libi no bun. Ma mi ben feni taki mi libi ben pori kaba èn taki mi no ben man kenki en moro. Mi ben gwenti go na fesa èn na presi pe band ben e prei poku. Aladi wan lo tra sma ben de drape, toku furu tron mi ben e firi leki mi de mi wawan èn mi ben e firi brokosaka. Son leisi, mi ben e prakseri mi papa nanga mama di ben e libi wan krin libi èn di ben de bunbun sma. Na den ten dati, mi ben e aksi misrefi fa a du kon taki mi libi kon tan so.

 A FASI FA BIJBEL KENKI MI LIBI:

Aladi mi ben denki taki noiti mi ben o man kenki, toku trawan no ben lasi howpu gi mi. Na ini a yari 2000, mi papa nanga mama aksi mi fu go nanga den na wan kongres fu Yehovah Kotoigi. Aladi mi no ben wani, toku mi go. Mi fruwondru di mi si taki a brada nanga a sisa fu mi di ben drai baka tu gi a tru bribi, ben de tu na a kongres disi.

Di mi ben de na a kongres, dan mi memre taki wán yari na fesi mi ben de na ini a srefi presi disi èn taki wan rock band ben e prei poku drape. Di mi si a bigi difrenti, dan a sani dati naki mi ati trutru. Na a show dati, a heri presi ben lai nanga sani di sma ben trowe èn nanga sikaret smoko. Furu fu den sma di ben de na a show disi ben grofu, èn a poku ben e meki mi firi brokosaka. Ma na a kongres, mi ben de na mindri sma di ben de koloku trutru, èn den sma disi ben gi mi wan waran switikon aladi mi no ben si den omeni yari langa. A presi ben krin èn den sani di mi ben yere drape ben e gi mi howpu. Di mi si fa den tru tori fu Bijbel ben e meki mi firi bun, dan mi aksi misrefi fu san ede mi no ben wani arki den fosi!Yesaya 48:17, 18.

„Bijbel gi mi a krakti fu no gebroiki èn fu no seri drugs moro, èn a gi mi a krakti tu fu tron wan moro bun sma”

Baka a kongres, mi no draidrai, ma mi bosroiti fu go baka na a Kresten gemeente. Den sani di mi brada nanga mi sisa ben ondrofeni na a kongres ben naki den ati tu, èn fu dati ede den bosroiti tu fu drai go baka na a gemeente. Wi ala dri bigin studeri Bijbel baka.

A Bijbeltekst di naki mi ati trutru na Yakobus 4:8 pe skrifi: „Kon krosibei na Gado èn a o kon krosibei na unu.” Mi kon frustan taki efu mi ben wani kon krosibei na Gado, dan mi ben o abi fu kenki mi libi. Wan fu den kenki di mi ben musu tyari kon, na taki mi ben musu tapu nanga smoko, fu gebroiki drugs, èn fu dringi sopi pasa marki.2 Korentesma 7:1.

Mi tapu nanga den mati di mi ben abi èn mi suku nyun mati na mindri den anbegiman fu Yehovah. Wan sma di ben de wan bigi yepi gi mi, na a Kresten owruman di studeri Bijbel nanga mi. A ben gwenti bèl mi èn a ben e kon na mi oso fu kon luku fa a ben go nanga mi. Te nanga a dei fu tide, en na wan fu den moro bun mati fu mi.

Na a bigin fu 2001, mi teki dopu fu sori taki mi gi misrefi abra na Gado. Mi brada nanga mi sisa teki dopu tu. Now fosi mi famiri ben e anbegi Yehovah leki wán man. Yu kan frustan fa mi papa, mi mama, nanga mi pikin brada di ben tan dini Yehovah, ben breiti fu a sani disi.

DEN WINI DI MI KISI:

Mi ben gwenti denki taki a hebi tumusi fu libi soleki fa Bijbel e taki, ma now mi e si den leri fu Bijbel leki warti sani di e kibri mi. Bijbel gi mi a krakti fu no gebroiki èn fu no seri drugs moro, èn a gi mi a krakti tu fu tron wan moro bun sma.

Mi e si en leki wan grani taki mi na wan fu den someni sma na heri grontapu di e anbegi Yehovah leki wán famiri. Den sma disi lobi makandra trutru èn den e dini Gado na ini wánfasi (Yohanes 13:34, 35). Na ini a famiri dati mi feni mi wefi, Adrianne, di mi lobi srefisrefi. Dati ben de wan bigi blesi di mi kisi. A e gi wi furu prisiri fu dini wi Mekiman makandra.

Mi no e suku mi eigi bun moro na ini a libi, ma mi e dini now leki furuten preikiman, èn mi e leri sma fa den srefi kan kisi wini fu Gado Wortu. A wroko disi e meki mi firi koloku srefisrefi. Mi kan taki nanga ala overtoigi taki Bijbel kenki mi libi. Now fosi mi kon fri trutru.