Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  yanuari 2013

 ABI BRIBI NELEKI DEN

„Abel e taki te now ete, aladi a dede kaba”

„Abel e taki te now ete, aladi a dede kaba”

ABEL e luku fa na ipi skapu fu en e nyan grasi so switi na a bergiskin. Kande a e luku pasa den skapu go na wan presi farawe pe a ben kan si wan sani e brenki. A ben sabi taki leti drape wan feti-owru di ben e bron nanga faya ben e drai lontu doronomo. A feti-owru disi ben e tapu a pasi di e go na a dyari fu Eden. Fosi, en papa nanga mama ben e libi drape, ma now den nanga den pikin fu den no ben man go drape moro. Prakseri fa a winti fu a lati bakadina e wai Abel wiwiri te a e luku go na loktu e prakseri en Mekiman. Libisma nanga Gado o kon bun baka wan dei? Na dati nomo Abel ben wani.

Abel e taki nanga yu tide. Yu man yere en? Kande yu e denki taki dati no kan. Wi sabi taki a di fu tu manpikin disi fu Adam dede langa ten kaba. Noti fu en no tan abra moro. Pikinmoro 6000 yari kaba a tron doti. Luku san Bijbel e taki fu den dedewan: „Den dedewan no sabi notinoti” (Preikiman 9:5, 10). Boiti dati, nowan enkri wortu di Abel taki skrifi na ini Bijbel. Sobun, fa a kan taki nanga wi?

Gado ben meki na apostel Paulus skrifi a sani disi fu Abel: „Na so fasi Abel e taki te now ete, aladi a dede kaba” (Hebrewsma 11:4). Fa a e taki nanga wi? A e taki nanga wi nanga yepi fu a bribi fu en. Abel ben de a fosi libisma di ben kweki a tumusi moi fasi dati. A ben abi so wan tranga bribi, taki a de wan moi eksempre gi wi na ini a ten disi. Te wi e pruberi fu sori a srefi bribi fu Abel, dan a sa de neleki a e taki nanga wi.

Ma efu Bijbel no e taki furu fu Abel, dan san wi kan leri fu en èn fu a bribi fu en? Meki wi go luku.

A GRO KON BIGI NA WAN TEN DI WAN TU SMA NOMO BEN DE

Abel ben gebore syatu baka di Gado meki den fosi libisma. Bakaten, wan sani di Yesus ben taki, ben sori taki Abel ben gebore na „a ten di grontapu seti” (Lukas 11:50, 51). Soleki fa a sori, dan a grontapu di Yesus ben taki fu en, na den sma di abi a howpu fu kisi frulusu fu sondu. Abel ben de a di fu fo sma di ben libi na grontapu èn soleki fa a sori, dan a ben de a fosi sma di Gado ben si leki wan sma di ben warti fu kisi frulusu. * A de krin taki Abel no ben gro kon bigi na ini wan bun situwâsi.

Aladi libisma no ben de na grontapu langa ete, toku tumusi sari sani ben miti den kaba. A no de fu taki dati Abel papa nanga mama, Adam nanga Eva, ben de moi sma di ben man du furu sani. Ma den ben meki wan bigi fowtu na ini den libi èn den ben sabi dati. Fosi, den no ben abi sondu èn den ben abi a howpu fu libi fu têgo. Ne den opo densrefi teige Yehovah Gado, èn a puru den na ini a Dyari fu Eden, a Paradijs pe den ben e tan. Fu di den ben denki densrefi nomo, èn fu di den no ben e broko den ede srefi nanga den pikin fu den, meki den tron sondusma èn den lasi a howpu fu libi fu têgo.Genesis 2:15–3:24.

 Di Adam nanga Eva ben musu go tan na dorosei fu a dyari, den kon si taki a libi ben tranga. Toku di Kain, a fosi pikin fu den gebore, Eva bari taki: „Yehovah yepi mi fu kisi wan manpikin.” A sani di a taki e sori taki kande a ben e prakseri san Gado ben pramisi na ini a dyari fu Eden. Gado ben taki dati wan uma ben o kisi wan „pikin” di ben o pori na ogriwan di ben meki Adam nanga Eva drai baka gi Gado (Genesis 3:15; 4:1). A de so taki Eva ben denki taki na en na a uma dati èn taki Kain ben de a pramisi „pikin”?

Efu dati de so, dan na kori a ben e kori ensrefi. Boiti dati, efu na den sani dati en nanga Adam ben e leri Kain di a ben e gro kon bigi, dan a no de fu taki dati a sani dati meki Kain kisi bigifasi. Baka wan pisi ten, Eva kisi ete wan boi, ma Bijbel no e sori taki a ben taki den sortu kefalek sani dati fu en. Den kari en Abel, san wani taki „Bro” noso „Fu soso” (Genesis 4:2). A de so taki a nen fu Abel ben e sori taki den no ben e fruwakti bigi sani fu en neleki fa den ben e fruwakti dati fu Kain? We, wi no sabi.

Awansi fa a no fa, papa nanga mama na ini a ten disi kan leri furu fu a fosi papa nanga mama dati. Den sani di unu e taki èn e du o meki taki den pikin fu unu kisi bigifasi? Den o suku biginen, noso den o denki densrefi nomo? Noso unu o leri den fu lobi Yehovah Gado èn fu suku fu tron mati fu en? A de wan sari sani taki a fosi papa nanga mama no tyari a frantwortu fu den na a yoisti fasi. Toku howpu ben de gi den bakapikin fu den.

SAN YEPI ABEL FU KON ABI BRIBI?

Di den tu boi ben e gro kon moro bigi, dan a musu de so taki Adam leri den fu wroko fu man sorgu na osofamiri. Kain tron wan gronman, èn Abel tron wan skapuman.

Ma Abel ben du wan sani di prenspari moro ala tra sani. Na ini den yari di a ben e gro kon bigi, Abel kon abi bribi, a moi fasi di Paulus ben skrifi fu en bakaten. Denki a tori. Abel no ben abi nowan libisma di a ben kan teki leki eksempre. Dan fa a kon abi bribi na ini Yehovah Gado? Meki wi go luku dri prenspari sani di kande yepi en fu kon abi bribi.

Den sani di Yehovah meki.

Soleki fa wi sabi, dan Yehovah ben fluku a gron, so taki soso makabon nanga takru wiwiri ben e gro na tapu. A sani disi ben e meki en muilek fu prani gron. Toku a gron ben e gi furu nyanyan di ben e hori Abel en famiri na libi. Ma Gado no ben fluku den meti, den fowru, noso den fisi. Boiti dati, a no ben fluku den bergi, den liba, den se, a loktu, den wolku, a son, a mun nanga den stari. Ala sei pe Abel ben e luku, a ben e si krin taki Yehovah Gado di meki ala sani, abi trutru lobi, koni nanga bun-ati (Romesma 1:20). Fu di Abel ben e denki dipi fu den sani disi, meki a bribi fu en ben e kon moro tranga.

A musu de so taki Abel ben e teki en ten fu prakseri Yehovah. Pruberi fu si fa a ben e luku den skapu fu en. Wan skapuman ben musu waka furu. A ben e tyari den tiri meti fu en abra bergi, pasa na ini lagipresi, èn abra liba. Doronomo a ben e suku den moro grun grasi, den moro bun watra-olo nanga  den moro bun presi pe den ben kan rostu. Fu ala den sani di Gado meki, a gersi leki skapu na wan meti di a meki fu libisma tiri èn kibri den. Kande Abel ben si tu taki ensrefi ben abi tiri nanga kibri fanowdu fu wan sma di ben koni èn makti moro iniwan libisma. A no de fu taki dati a begi furu fu a sani dati, èn dati meki a bribi fu en ben e kon tranga moro nanga moro.

Den sani di Gado meki ben yepi Abel fu poti bribi na ini en lobi-ati Mekiman

Den pramisi fu Yehovah.

A ben musu de so taki Adam nanga Eva fruteri den manpikin fu den san ben pasa na ini a Dyari fu Eden, di meki taki Gado puru den drape. Sobun, Abel ben abi furu sani di a ben kan denki dipi fu den.

Yehovah ben taki dati a ben o fluku a gron. Abel ben man si dati krin na den makabon nanga den takru wiwiri. Yehovah ben taki tu dati Eva ben o abi pen te a ben o de nanga bere èn taki a ben o meki pikin nanga skin-ati. Kande Abel ben si tu fa a sani disi kon tru. Kande a ben si fa en mama meki pikin. Yehovah ben taki dati Eva ben o angri fu a lobi fu en masra èn taki en masra, Adam, ben o basi en. Abel ben si krin fa a sani disi ben pasa. Awansi fa a no fa, Abel ben si taki a ben kan bribi ala den sani di Yehovah ben taki. Sobun, Abel ben abi bun reide fu bribi Gado di a taki dati wan dei wan „pikin” ben o lusu den problema di ben bigin na ini Eden.Genesis 3:15-19.

Den futuboi fu Yehovah.

Abel no feni nowan bun eksempre na ini a libisma famiri, ma libisma no ben de den wan-enkri sma di ben e libi na grontapu na a ten dati. Di Yehovah puru Adam nanga Eva na ini a dyari, dan A sorgu taki den nanga den pikin fu den no ben o man poti futu na ini a Paradijs dati. Na mofodoro fu a dyari, Yehovah poti makti kerub-engel èn sosrefi na feti-owru tu di ben e bron nanga faya èn di ben e drai lontu doronomo.Genesis 3:24.

Prakseri fa a ben de te Abel ben e si den engel dati di a ben de wan yongu boi. Fu di den ben teki libisma skin, meki Abel ben man si taki den ben makti srefisrefi. Boiti dati, a „feti-owru” di ben e bron èn ben e drai lontu doronomo ben abi krakti tu na en tapu. Di Abel ben e gro kon, dan yu denki taki oiti a si taki den kerub-engel kon weri èn taki den gowe libi a presi pe den ben musu tanapu? Nôno. Den makti engel disi tan tanapu leti na a presi dati, dei nanga neti, yari-go-yari-kon, omeni tenti yari langa. Na so Abel kon si taki Yehovah Gado ben abi reti-ati futuboi di ben e tan gi yesi na en. Abel ben si taki den kerub-engel dati ben e dini Yehovah doronomo èn taki den ben e gi yesi na en. En eigi famiri no ben abi den fasi dati. A no de fu taki dati na eksempre fu den engel disi tranga a bribi fu en.

En heri libi langa Abel ben kan si taki den kerub-engel ben e dini Yehovah doronomo èn taki den ben e gi yesi na en

Den sani di Yehovah ben meki, den pramisi fu en, nanga den eksempre fu den futuboi fu en, yepi Abel fu kon sabi furu fu a Gado disi. Fu di Abel ben e denki dipi fu den sani dati, meki a bribi fu en ben e kon tranga moro nanga moro. A no de fu taki dati wi kan leri furu fu Abel, a no so? Spesrutu yonguwan kan kisi deki-ati te den sabi taki den kan kon abi trutru bribi na ini Yehovah Gado, awansi san tra sma na ini na osofamiri e du. Wi abi so furu moi sani na wi lontu di Gado meki, wi abi a heri Bijbel, èn wi abi furu eksempre fu sma di ben abi wan tranga bribi. Ala den sani disi e tranga a bribi fu wi na ini a ten disi.

FU SAN EDE NA OFRANDI FU ABEL BEN MORO BUN?

Di a bribi di Abel ben abi na ini Yehovah ben e kon moro tranga, dan a ben wani feni wan fasi fu sori a bribi dati. Ma san wan pôti man ben kan gi a Mekiman fu hemel nanga grontapu? A no de fu taki dati Gado no abi nowan kado èn nowan yepi fanowdu fu libisma. Te fu kaba Abel kon frustan wan prenspari sani: Efu a ben e gi Yehovah a moro bun sani di a ben abi, èn te a ben e du dati nanga wan krin ati, dan en lobi Tata na hemel ben o breiti.

Dati meki Abel bosroiti fu tyari wan tu skapu fu en leki ofrandi. A teki den moro bunwan, noso den fosi pikin skapu di gebore èn a tyari den moro bun pisi fu den leki ofrandi. Na a srefi ten, Kain ben wani tu taki Gado blesi en èn taki a feni en bun. Dati meki a bosroiti fu tyari wan tu fu den nyanyan fu en gron leki ofrandi. Ma a no ben abi a srefi denki leki Abel. A sani dati kon na krin di den brada tyari na ofrandi fu den.

Abel tyari wan ofrandi nanga bribi. Kain no du dati

 A kan taki ala tu manpikin fu Adam ben bron den ofrandi fu den na tapu altari. Kande den kerub-engel ben man si fa den ben e tyari den ofrandi dati. Den engel dati ben de den wan-enkri sma di ben e teki presi gi Yehovah na grontapu na a ten dati. Fa Yehovah ben feni den ofrandi dati? Bijbel e taki: „Yehovah ben e prisiri nanga Abel èn nanga na ofrandi fu en” (Genesis 4:4). Bijbel no e taki fa Gado sori dati. Ma fu san ede a ben feni Abel bun?

Na fu na ofrandi fu en? Te yu e luku en bun, dan Abel ben tyari wan libilibi skapu leki ofrandi èn a meki a warti brudu fu a skapu dati lon. A de so taki Abel ben sabi o warti so wan ofrandi ben o de? Furu hondrohondro yari baka a ten fu Abel, Gado gebroiki na ofrandi fu wan pikin skapu di no abi nowan mankeri, fu prenki na ofrandi fu en eigi Manpikin „a Pikin Skapu fu Gado” di no ben abi sondu èn di ben o dede fu a bun fu trawan (Yohanes 1:29; Eksodes 12:5-7). Ma a no de fu taki dati Abel no ben sabi notinoti fu den sani dati èn a no ben frustan den tu.

San wi sabi na disi: Abel ben gi a moro bun sani di a ben abi. A no na ofrandi wawan Yehovah ben feni bun, ma na Abel srefi. Abel ben tyari na ofrandi fu en fu di a ben lobi Gado èn fu di a ben e frutrow na en tapu nanga en heri ati.

Ma Kain no ben de so. Yehovah „no ben e prisiri nanga Kain èn nanga na ofrandi fu en” (Genesis 4:5). A no taki na ofrandi fu Kain no ben bun, bika bakaten a Wèt fu Gado ben e gi pasi taki sma tyari den nyanyan fu den gron fu den leki ofrandi (Lefitikus 6:14, 15). Ma Bijbel e taki dati Kain „ben e du ogri” (1 Yohanes 3:12). Neleki furu sma na ini a ten disi, a de krin taki Kain ben denki taki te a ben e du neleki a ben e dini Gado, dan dati ben nofo kaba. Ma heri esi den sani di a ben e du sori taki a no ben e bribi trutru na ini Yehovah èn taki a no ben lobi en tu.

Di Kain si taki Yehovah no ben feni en bun, dan san a du? A suku fu teki leri fu na eksempre fu Abel? Nôno. A ben e teige en brada srefisrefi. Yehovah ben si san ben e pasa na ini na ati fu Kain èn na wan lobi-ati fasi a taki nanga en. A warskow Kain taki efu a ben e go so doro, dan a ben o du seryusu sondu. A taigi Kain tu taki efu a ben o kenki den fasi fu en, dan A ben o „prisiri” baka nanga en.Genesis 4:6, 7.

Kain no gi yesi na a warskow fu Gado. Na presi fu dati a kari en yongu brada di ben e frutrow en, fu go teki wan waka nanga en na ini a gron. Drape Kain naki Abel kiri (Genesis 4:8). Fu taki en leti, Abel tron a fosi sma di sma kiri fu a bribi fu en ede. A dede, ma a tori fu en no ben kaba.

Na agersi fasi, a brudu fu Abel ben bari kari Yehovah Gado fu strafu a sma di ben du na ogri nanga en. Na dati Gado du nanga Kain (Genesis 4:9-12). San moro prenspari, na taki wi kan leri wan sani fu a bribi fu Abel. A ben libi kande 100 yari nomo èn dati ben syatu te yu e luku o langa sma fu a ten dati ben e libi. Ma Abel ben libi na wan fasi di Gado ben feni bun. A dede nanga na overtoigi taki Yehovah, en Tata na hemel ben lobi en èn taki a ben feni en bun (Hebrewsma 11:4). Dati meki wi kan de seiker taki Yehovah di man memre ala sani, no frigiti Abel, èn te a ten doro, a o kisi wan opobaka na ini a paradijs na grontapu (Yohanes 5:28, 29). Yu o miti en drape? Yu o man miti Abel efu yu abi a fasti bosroiti fu arki en te a e taki èn te yu e pruberi fu sori a srefi tranga bribi di a ben abi.

^ paragraaf 8 Den wortu „a ten di grontapu seti” abi fu du nanga a sai di wan sma e sai siri. Dati meki den wortu disi abi fu du nanga a fosi pikin di libisma meki. Ma fu san ede Yesus sori taki Abel ben libi na „a ten di grontapu seti”? Fu san ede a no taki dati fu Kain di ben de a fosi libisma pikin di gebore? Den bosroiti di Kain teki èn den sani di a du, sori krin taki na fu espresi a ben opo ensrefi teige Yehovah Gado. Soleki fa a sori, dan neleki en papa nanga mama, Kain no o kisi wan opobaka èn a no o kisi frulusu tu.