Go na content

Go na table of contents

Yehovah Kotoigi

Tongo Sranantongo

San sma kan du te rampu miti den?

San sma kan du te rampu miti den?

Na ini a ten disi, moro nanga moro rampu e pasa di e tyari bigi pori kon. San wan sma kan du na ini den situwâsi dati? Meki wi go luku wan tu sani di kan yepi wi.

Wai pasi gi rampu.

Bijbel e taki: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu” (Odo 22:3). Wi kan fiti a koni rai disi tu te rampu pasa. Te sma e kisi warskow taki wan bergi o spiti faya, taki wan frudu kan pasa, noso taki wan bigi winti o wai, dan a de wan koni sani te den sma na ini a kontren drape e go na wan presi pe den kan kisi kibri. A libi prenspari moro wan oso noso tra gudu.

Kande son sma kan bosroiti fu no libi na ini kontren pe furu rampu e pasa. Wan raportu e taki: „Rampu no e pasa na furu presi na grontapu. Den sani disi e pasa na wan pikin pisi nomo fu grontapu èn moro furu na den presi disi bigi rampu o pasa na ini a ten di e kon.” Dati kan de lagi kontren krosibei fu a se, noso kontren pe dipi priti de na ini a gron. Efu yu kan bosroiti fu no go libi na ini den kontren dati, dan a no o pasa so makriki taki yu o pina te wan rampu pasa.

Sabi san yu o du.

Awansi fa yu seti sani na fesi, toku wan rampu kan miti yu sondro taki yu fruwakti dati. Ma a bun fu seti sani na fesi, fu di dati o meki en moro makriki gi yu fu sabi san yu o du na ini a situwâsi dati. A sani disi e kruderi tu nanga a rai na Odo 22:3, di wi ben kari kaba. Yu poti wan tu prenspari sani na wan sei di yu kan teki tyari gowe wantewante? Wan buku di e sori san sma musu du te rampu pasa, e gi a rai fu poti den sani disi na wan sei: Dresi nanga tra sani di yu abi fanowdu te wan sma kisi mankeri, batra nanga watra, nyanyan di no e pori esi-esi, èn prenspari papira (1-2-3 of Disaster Education). A ben o bun fu luku makandra nanga yu osofamiri sortu rampu kan pasa, èn san unu kan du na ini den situwâsi dati.

Yu poti wan tu prenspari sani na wan sei di yu kan teki tyari gowe wantewante?

Tan abi wan bun matifasi nanga Gado.

A sani disi kan yepi na ini ala situwâsi. Bijbel e taki dati Gado na „a Tata di abi furu sari-ati, a Gado fu ala trowstu, di e trowstu wi te wi de na ini ala sortu banawtu”. Wan tra tekst e taki dati en na a Gado di „e trowstu den sma di e firi brokosaka”.​—2 Korentesma 1:3, 4; 7:6.

Iya, Gado sabi heri bun na ini sortu situwâsi den sma de di e frutrow na en tapu. En na wan Gado fu lobi èn a e gi wi deki-ati na difrenti fasi (1 Yohanes 4:8). Wi no musu begi Gado fu du wan wondru, ma fu gi wi en santa yeye di kan yepi wi na ini ala situwâsi. Te sma  e kisi fu du nanga rampu, dan santa yeye kan yepi den fu memre Bijbeltekst di kan gi den trowstu nanga deki-ati. Iya, den reti-ati futuboi fu Gado kan firi neleki David, a kownu fu owruten Israel, di ben taki: „Awinsi mi e waka na ini a lagipresi di dungru pikapika, toku mi no e frede nowan ogri, bika yu de nanga mi. Na yu skapuman-tiki e trowstu mi.”​—Psalm 23:4.

Wi no musu begi Gado fu du wan wondru, ma fu gi wi en santa yeye di kan yepi wi na ini ala situwâsi

Kresten brada nanga sisa e yepi makandra.

Na ini a fosi yarihondro, wan Kresten profeiti di nen Agabus ben taigi den sma taki ’wan bigi angriten ben o kon na heri grontapu èn a sani dati pasa trutru na a ten di Klawdiyus ben de tiriman’. Furu fu den disipel fu Yesus na ini Yudea ben kisi fu du nanga a hebi angriten disi. San den disipel fu tra presi du di den yere fu a nowtu fu den Kresten brada nanga sisa? A tori e taki: „Fu dati ede, den disipel bosroiti taki ibriwan fu den ben o seni san den man gi, fu yepi den brada di ben tan na Yudea” (Tori fu den apostel 11:28, 29). Na wan lobi-ati fasi den seni sani gi den Kresten fu yepi den.

„Mi ben firi a lobi fu den èn mi no ben frede moro”

Te bigi rampu e pasa na ini a ten disi, dan den futuboi fu Gado e du a srefi sani. Furu sma sabi taki Yehovah Kotoigi lobi yepi den brada nanga sisa fu den. Fu eksempre, di wan hebi gronseki pasa na ini Chili tapu 27 februari 2010, dan Yehovah Kotoigi no draidrai fu yepi den wan di ben kisi fu du nanga a rampu dati. Karla, di lasi en oso di wan tsunami ben pasa, e fruteri: „A ben de wan trowstu gi mi èn a ben gi mi deki-ati fu si taki a dei baka dati [tra Kotoigi] fu tra presi kon fu yepi wi. A no de fu taki dati Yehovah trowstu wi trutru nanga yepi fu den bun sani di den Kotoigi disi du gi wi. Mi ben firi a lobi fu den èn mi no ben frede moro.” En granpapa, di no de wan Kotoigi, ben si fa den ben e yepi makandra. A ben taki: „Disi de heri tra fasi leki san mi gwenti fu si ala den yari di mi de na ini a kerki fu mi.” A sani di a si meki taki a aksi Yehovah Kotoigi fu studeri Bijbel nanga en.

Kresten brada nanga sisa e yepi makandra te rampu pasa

Te sma abi demakandra nanga den wan di lobi Gado, dan dati kan yepi den na ini muilek ten. Ma oiti wan ten o de te rampu no o pasa moro na grontapu? Meki wi go luku san Bijbel e taki fu a tori disi.