Go na content

Go na table of contents

Yehovah Kotoigi

Tongo Sranantongo

Na Gado e strafu wi?

Na Gado e strafu wi?

„Mi e firi sari gi den sma di lasi den libi, ma mi denki taki a sani disi na tembatsu (a strafu fu Gado).” Na so wan prenspari politiekman fu Yapan ben taki di wan bigi gronseki nanga wan tsunami ben pasa na ini a kondre dati na ini maart 2011.

Na ini Haiti wan bigi gronseki ben pasa na ini yanuari 2010, èn moro leki 220.000 sma lasi den libi. A sani disi meki taki wan pôpi domri di e preiki na telefisi, taki dati a sani disi pasa fu di den sma ben „meki wan sweri nanga didibri” èn fu di den ben musu „drai kon baka na gado”.

Na ini Manila, na den Filippijnen, 79 sma lasi den libi fu di wan bigi grupu sma di ben e lon bruyabruya, trapu den kiri. Wan Lomsu priester ben taki fu a sani disi: „Gado wani seki unu so taki wi konsensi kan wroko baka.” Wan koranti drape ben skrifi taki „21 procent fu den sma drape e bribi taki Gado e puru en atibron na sma tapu, èn fu dati ede a e meki bigi pisi gron saka kon fu den bergi, a e meki bigi winti wai, noso a e meki tra rampu pasa” di e pori a kondre doronomo.

A NO tide sma e bribi taki Gado e meki rampu pasa fu strafu libisma. Na ini 1755, di 60.000 sma na ini Lissabon, na Portugal dede leki bakapisi fu wan gronseki, wan faya, nanga wan tsunami, dan a pôpi filosofiaman Voltaire poti na aksi disi: „Un wani taigi mi taki den sma na ini Lissabon ben e du moro ogri leki den sma na ini Parijs di e libi soso fu meki prisiri?” Iya, milyunmilyun sma e aksi densrefi efu na Gado e meki rampu pasa fu strafu sma. Na ini furu kondre sma e taki dati na Gado e meki den sani disi pasa.

Te wi e luku den sani disi, dan wi musu aksi wisrefi: A de so trutru taki Gado e meki rampu pasa fu strafu sma? A de so taki ala den rampu di e pasa ibri tron baka na strafu fu Gado?

Fu di son sma gaw fu taki dati na Gado e meki den rampu disi pasa, meki den e poti prakseri na Bijbel tori pe Gado tyari pori kon nanga yepi fu watra, faya, nanga gronseki (Genesis 7:17-22; 18:20; 19:24, 25; Numeri 16:31-35). Te wi e ondrosuku den Bijbel tori disi, dan wi e si taki na ini ibriwan fu den, dri prenspari sani de di e sori taki den ben de strafu fu Gado. A fosi sani na taki Gado ben warskow sma na fesi. A di fu tu sani na taki tra fasi leki den rampu di e pasa na ini a ten disi pe bun sma nanga ogri sma e lasi den libi, Gado no ben e kiri ala sortu sma na ini owruten. A ben e kiri soso den ogriwan di noiti no ben o kenki, èn den wan di ben e weigri fu arki den warskow fu en. A di fu dri sani na taki Gado ben e sorgu taki reti-ati sma ben kan kisi frulusu.​—Genesis 7:1, 23; 19:15-17; Numeri 16:23-27.

Aladi den someni rampu di e pasa e bruya a libi fu milyunmilyun sma, toku buweisi no de taki na Gado e meki den sani disi pasa. We dan, fu san ede moro nanga moro rampu e pasa na ini a ten disi? San wi kan du te den rampu disi miti wi? Oiti wan ten o kon taki rampu no o pasa moro? Yu o kisi piki tapu den aksi disi na ini den tra artikel.