A GERSI leki ibri tron baka nyunsu e bari taki rampu pasa. Noiti ete so furu sma kisi fu du nanga rampu leki na ini a ten disi. Wan organisâsi na ini Belgia di e ondrosuku fu san ede so furu rampu e pasa, e taki dati na ini 2010 wawan, 373 rampu ben pasa èn sowan 296.000 sma dede leki bakapisi fu dati.

Na ini den yari di pasa, a de krin fu si taki moro nanga moro rampu e pasa. Fu eksempre, a kon na krin taki fu 1975 te go miti 1999, a nomru fu rampu di ben pasa ibri yari, no ben doro 300 ete. Ma fu a yari 2000 te go miti 2010, pikinmoro 400 rampu pasa ibri yari. Kande yu na wan fu den sma di e aksi densrefi a sani disi: ’Fu san ede someni rampu e pasa now?’

Aladi sma gwenti taki dati na Gado e meki rampu pasa, toku a sani disi no tru. A no Gado e meki den rampu pasa di e miti so furu sma na ini a ten disi. Toku Bijbel ben taki na fesi dati rampu ben o pasa na ini a ten disi. Fu eksempre, na Mateyus 24:7, 8, Yesus e taki: „Angriten nanga gronseki o de na difrenti presi. Ala den sani disi na a bigin fu wan ten fu banawtu di de leki a hebi pen fu wan uma di de fu meki en pikin.” Fu san ede Yesus ben taki fu den sani disi èn san den sani disi wani taki gi wi?

Gado en manpikin, Yesus, ben piki na aksi disi di sma ben poti gi en: „San o de a marki . . . taki a kaba fu a grontapu disi de krosibei?” (Mateyus 24:3) A ben taki fu difrenti sani di ben o pasa, sosrefi fu den rampu di skrifi na tapusei. Baka dati, a taki a prenspari sani disi tu: „Te unu e si den sani disi e pasa, dan un musu sabi taki a Kownukondre fu Gado de krosibei” (Lukas 21:31). Fu dati ede den rampu dati de prenspari srefisrefi gi wi. Den e sori taki heri esi bigi kenki o kon.

Sani di e meki taki rampu pasa

Ma toku furu sma e aksi densrefi taki efu a no Gado e meki den rampu disi pasa, dan suma e meki den pasa noso san e meki taki den e pasa? Wi kan kon sabi fu san ede den sani disi e pasa soso te wi e hori wan prenspari tru tori na prakseri di skrifi na ini Bijbel: „Heri grontapu de na ini a makti fu na ogriwan” (1 Yohanes 5:19). A vers disi e sori taki a no  Gado e meki rampu pasa na grontapu, ma nofo tron na a feanti fu en, noso „na ogriwan” di Bijbel e kari „Didibri”, e du den sani disi.​—Openbaring 12:9, 12.

A feanti disi fu Gado di e denki ensrefi nomo, e si libisma leki soso sani. Fu di heri grontapu de na ini a makti fu en, meki a e gi libisma deki-ati fu kon abi a srefi denki leki en. Iya, Bijbel e sori taki a sani disi tru fu di a taki na fesi dati na ini „den lasti dei”, sma o ’lobi densrefi nomo, den o lobi moni, den o lobi dyaf, èn den o abi heimemre’ (2 Timoteyus 3:1, 2). Dati meki a no e fruwondru wi taki na heri grontapu Didibri seti wan sistema di e go na fesi te sma e sori den fasi dati èn te den e sori tra fasi di Gado no feni bun. A e gi sma deki-ati fu suku den eigi bun nomo sondro fu broko den ede nanga trawan, èn nofo tron a sani dati kan tyari problema kon gi sma.

Na sortu fasi a gridi di sma gridi e meki taki rampu pasa? Wan raportu di a Verenigde Naties ben meki fu den rampu di e pasa na heri grontapu, e taki: „Nofo tron bun furu sma e go libi na presi pe rampu kan pasa makriki, soleki kontren pe frudu kan pasa. Boiti dati, a pori di sma e pori busi nanga swampu kontren e meki taki rampu kan pasa moro makriki na ini son kontren. Wan tra sani di kan tyari rampu kon, na taki den sani di libisma e du e meki taki furu gas e kon na ini a loktu èn leki bakapisi fu dati a weer e kenki na heri grontapu èn a watra fu den se e kren moro nanga moro.” Sma feni taki furu fu „den sani di libisma e du” na fu meki na ekonomia go na fesi, ma fu taki en leti, a sani disi na wan buweisi taki sma na heri grontapu gridi èn taki den e denki densrefi nomo.

Disi meki taki furu sabiman kon si now taki den sani disi di libisma e du sondro fu broko den ede nanga trawan, e meki taki moro bigi rampu e pasa. Fu taki en leti, libisma e horibaka gi wan sistema di Didibri e gebroiki fu meki libisma pina moro te rampu pasa.

Sobun, wi e si taki furu rampu e pasa fu di libisma e du sani sondro fu broko den ede nanga trawan. Sonwan fu den rampu no ben o bigi so efu den ben pasa na wan tra presi. Na ini furu kondre den sani di ogri-ati sma du, meki taki den rampu di ben pasa drape ben moro bigi. Boiti dati, furu sma ben musu go libi na ini kontren pe wan rampu kan pasa makriki fu di a no ala sma gudu a srefi, èn fu di a libi de tra fasi na ala presi. Ma a no de fu taki dati te son sma e nyan pina leki bakapisi fu rampu, dan dati no e kon fu di wan sma meki fowtu noso fu di a no ben du san a ben musu du, ma fu di „ogri ten nanga sani di den no e fruwakti kan miti den alamala”.​—Preikiman 9:11.

Ma efu yu e kisi fu du nanga wan rampu, awansi fa dati du kon, dan san yu kan du? Wi o luku now san wi kan du fu no pina tumusi te rampu pasa.