Go na content

Go na a tra menu

Yehovah Kotoigi

Sranantongo

A Waktitoren  |  november 2011

 Fa yu kan abi wan koloku osofamiri libi?

Du muiti fu meki a yeye fu Gado tiri unu leki trowpaar

Du muiti fu meki a yeye fu Gado tiri unu leki trowpaar

Frederick *: „Na a bigin di wi trow, mi ben de nomonomo taki mi nanga mi wefi studeri Bijbel makandra. Mi ben wani taki a poti ala en prakseri na a studie fu wi. Mi ben feni taki Leanne ben e du ala sortu pikinpikin fruferi sani te wi ben e studeri. Èn te mi ben e poti aksi gi en, dan a ben e piki soso ’iya’ noso ’nôno’. Mi no ben feni taki a ben e piki na a fasi fa dati musu pasa te wi ben e studeri Bijbel.”

Leanne: „Mi ben abi 18 yari di mi trow nanga Frederick. Wi ben e studeri Bijbel ibri wiki, ma ibri leisi Frederick ben e teki a studie leki okasi fu sori mi san na den fowtu fu mi èn fa mi ben kan tron wan moro bun wefi. A sani dati meki mi lasi-ati srefisrefi èn den sani di a ben taigi mi ben hati mi!”

SAN yu denki ben de a problema na ini a trowlibi fu Frederick nanga Leanne? Den ben wani du bun. Den ala tu ben lobi Gado. Den ala tu ben feni en prenspari fu studeri Bijbel nanga makandra. Ma a studie no ben e yepi den fu de moro bun nanga makandra. A gersi leki na a sani dati ben e tyari problema kon na den mindri. Iya, den ben e studeri nanga makandra, ma leki trowpaar den no ben e meki a yeye fu Gado tiri den.

Fa wan sma o tyari ensrefi te a e meki a yeye fu Gado tiri en? Fu san ede trowpaar musu du muiti fu meki a yeye fu Gado tiri den? Sortu problema kan miti den te den e du dati, èn fa den kan lusu den problema dati?

Fa wan sma o tyari ensrefi te a e meki a yeye fu Gado tiri en?

Bijbel e taki dati sma kan tyari densrefi na difrenti fasi (Yudas 18, 19). Fu eksempre, a Bijbel skrifiman Paulus ben sori san na a difrenti na mindri wan sma di e meki a yeye fu Gado tiri en nanga wan sma di abi libisma denki. Paulus e sori taki wan sma di abi libisma denki nofo tron no e denki trawan, ma a e denki ensrefi nomo. A sma disi e du san en srefi feni bun, na presi taki a e pruberi fu hori ensrefi na den markitiki fu Gado.​—1 Korentesma 2:14; Galasiasma 5:19, 20.

 Ma sma di e meki a yeye fu Gado tiri den, na sma di abi warderi gi den markitiki fu Gado. Den e si Yehovah Gado leki den Mati èn den e du muiti fu sori den fasi fu en (Efeisesma 5:1). Fu dati ede, den sma disi abi safri-ati, èn den e sori lobi nanga switifasi gi trawan (Eksodes 34:6). Boiti dati den e gi yesi na Gado srefi te dati muilek gi den (Psalm 15:1, 4). Darren, di e libi na ini Kanada èn di trow 35 yari kaba, e taki: „Soleki fa mi e si en, dan wan sma di e meki a yeye fu Gado tiri en, ala ten e luku bun san a e taki èn e du fu di dati o abi krakti tapu a matifasi di a abi nanga Gado.” En wefi, Jane, e taki: „Mi denki taki wan uma di e meki a yeye fu Gado tiri en e du tranga muiti ibri dei fu sori den fasi di a yeye e meki sma abi.”​—Galasiasma 5:22, 23.

A no de fu taki dati a no trowpaar wawan musu du muiti fu meki a yeye fu Gado tiri den. Fu taki en leti, Bijbel e leri taki ibri sma abi a frantwortu fu kon sabi Gado èn fu sori den fasi fu en.​—Tori fu den apostel 17:26, 27.

Fu san ede wan trowpaar musu du muiti fu meki a yeye fu Gado tiri den?

We, fu san ede wan trowpaar musu wroko makandra fu meki a yeye fu Gado tiri den? Luku na agersitori disi: Tu gronman wani prani gruntu na tapu a srefi pisi gron. Wan fu den wani prani sani na wan spesrutu ten fu a yari, aladi a trawan feni taki den sani musu prani na wan tra ten. Wan fu den wani gebroiki wan spesrutu sortu mest, ma a trawan no e agri kwetikweti fu di a feni taki den sani no abi mest fanowdu. Wan fu den wani wroko tranga na ini a gron ibri dei. A trawan no wani wroko, ma a wani luku nomo fa den sani o gro. Na so fasi, wan tu sani o gro na ini a gron, ma a gron no o gi so furu nyanyan leki te ala tu gronman ben o agri nanga makandra èn ben o wroko makandra.

Wan masra nanga en wefi de leki den gronman dati. Efu wán patna nomo e du muiti fu meki a yeye fu Gado tiri en, dan kande a trowlibi sa waka moro bun (1 Petrus 3:1, 2). Ma a ben o moro bun te ala tu patna e bosroiti fu hori densrefi na den markitiki fu Gado èn e wroko tranga fu horibaka gi makandra aladi den e dini Gado. A koni Kownu Salomo ben skrifi: „Tu sma moro bun leki wán.” Fu san ede dati de so? „Bika den e feni wan pai gi a tranga wroko fu den. Efu wan fu den ben o fadon, dan a trawan kan opo en patna.”​—Preikiman 4:9, 10.

Kande yu wani taki yu nanga yu trowpatna e du muiti fu meki a yeye fu Gado tiri unu. Neleki fa a ben de nanga wan fu den gronman, dan a no nofo te wan sma wani wan sani nomo, ma a musu du muiti fu abi bun bakapisi. Wi o poti prakseri na tu problema di kan miti yu, èn wi o si fa yu kan lusu den problema dati.

PROBLEMA 1: Wi no man feni ten.

Sue, di no trow so langa ete, e taki: „Mi masra e kon teki mi na wroko seibi yuru na neti. Te wi doro oso, dan ala wroko e wakti wi. Wi sabi heri bun taki wi musu studeri nanga makandra fu meki a yeye fu Gado tiri wi, ma wi weri èn wi wani rostu.”

Wan sani di yu kan du: Fiti yusrefi èn wroko makandra nanga yu trowpatna. Sue e taki: „Mi nanga mi masra bosroiti fu opo fruku fu leisi wan pisi fu Bijbel makandra èn fu taki fu a pisi dati, fosi wi e go na wroko. A e yepi mi tu nanga wan tu sani di mi abi fu du na ini na oso, so taki mi kan abi moro ten gi en.” Sortu wini den e kisi fu di den du a muiti disi? Sue en masra, Ed, e taki: „Mi kon si taki te mi nanga Sue gwenti fu taki nanga makandra fu Bijbel, dan wi sabi moro bun fa fu lusu den problema fu wi, èn wi no e broko wi ede so furu.”

Boiti taki unu e taki nanga makandra, a prenspari tu taki unu e teki wan tu miniti ibri dei fu begi nanga makandra. Fa dati kan yepi? Ryan, di trow 16 yari kaba, e taki: „No so langa pasa, mi nanga mi wefi pasa wan muilek pisi ten na ini a trowlibi fu wi. Ma wi ben e teki ten ibri neti fu begi nanga makandra èn fu taigi Gado sortu sani ben e gi wi broko-ede. Mi feni taki a sani dati yepi wi fu lusu den problema fu wi èn fu kon abi prisiri baka na ini a trowlibi fu wi.”

 PRUBERI FU DU DISI: Teki wan tu miniti ibri dei fu taki nanga makandra fu den bun sani di miti unu leki trowpaar, iya, sani di yu kan taigi Gado tangi gi. Taki tu fu den problema di e miti unu, spesrutu fu den wan di unu wani taki Gado musu yepi unu nanga den. Luku bun: No teki disi leki wan okasi fu taki fu den fowtu fu yu trowpatna. Na presi fu dati, te unu e begi nanga makandra taki soso fu den sani di un ala tu musu du moro bun. A dei baka dati, un musu meki muiti fu du den sani di unu ben aksi Gado na ini begi.

PROBLEMA 2: Ibriwan fu wi man du difrenti sani bun.

Toni e taki: „Mi a no wan sma di lobi sidon leisi buku.” En wefi, Natalie, e taki: „Mi lobi leisi, èn mi lobi fu taki fu den sani di mi kon sabi. Son leisi te wi e taki fu Bijbel tori, dan mi denki taki Toni frede pikinso taki mi sabi moro en.”

Wan sani di yu kan du: Yepi makandra, no strei nanga makandra èn no krutu makandra. Taigi yu patna taki yu e warderi san a e du èn tan gi en deki-ati. Tony e taki: „Son leisi a furu tumusi gi mi te mi wefi e taki so fayafaya fu den tori fu Bijbel, èn mi no sabi san fu du. Fosi, mi no ben lobi fu taki fu Bijbel tori nanga en. Ma Natalie yepi mi trutru. Now wi abi a gwenti fu taki nanga makandra fu Bijbel tori, èn mi kon si taki mi no abi fu frede. Mi lobi taki nanga en fu den tori disi. Now wi man feni en bun nanga makandra èn wi e taki switi tu nanga makandra.”

Furu trowpaar kon si taki a trowlibi fu den e waka moro bun te den e leisi èn e studeri Bijbel na wan spesrutu ten ibri wiki. Ma luku bun nanga a sani disi: No luku fa yu trowpatna musu fiti den rai, ma luku fa yu srefi kan fiti den (Galasiasma 6:4). Te unu e studeri, dan un no musu taki fu problema di kan tyari trobi kon, ma taki fu den sani dati na wan tra ten. Fu san ede?

Poti prakseri na a sani disi: Kon meki wi taki dati yu e nyan makandra nanga yu osofamiri. Yu ben o krin wan fisti soro na a srefi ten dati? Yu no ben o du dati. Sma no ben o wani nyan moro. Yesus ben taki dati te wi e kon sabi a wani fu Gado èn te wi e du a wani dati, dan dati de neleki te wi e nyan (Mateyus 4:4; Yohanes 4:34). Efu ibri leisi te yu e studeri Bijbel yu e taki fu sani di kan hati den firi fu yu trowpatna, dan kande a no o wani studeri moro. A no de fu taki dati yu musu taki fu den problema fu unu. Ma taki fu den problema disi na wan ten di unu poti gi dati.​—Odo 10:19; 15:23.

PRUBERI FU DU DISI: Skrifi tu, noso dri fasi di yu trowpatna abi èn di yu lobi srefisrefi. Wan tra leisi te unu e studeri èn unu e taki fu den fasi dati, dan fruteri yu patna fa yu e warderi den fasi dati fu en.

San yu e sai na dati yu o koti

Te unu e du muiti leki trowpaar fu meki a yeye fu Gado tiri unu, dan te fu kaba unu o kon abi wan koloku trowlibi. Fu taki en leti, Gado Wortu e gi wi a dyaranti taki „san wan sma e sai, na dati a sa koti tu”.​—Galasiasma 6:7.

Frederick nanga Leanne di ben kari na a bigin fu na artikel disi, kon si taki a Bijbel gronprakseri dati tru. Den trow 45 yari now èn den sabi taki a e tyari wini kon te sma e tan du muiti fu meki a yeye fu Gado tiri den. Frederick e taki: „Mi ben gwenti fu krutu mi wefi taki na en ben e meki taki wi no ben man taki bun nanga makandra. Ma te fu kaba mi kon si taki mi ben musu meki muiti tu.” Leanne e taki: „A sani di yepi wi fu pasa a muilek ten dati, na a lobi di wi ala tu abi gi Yehovah Gado. Na ini den yari di pasa, wi studeri èn begi doronomo nanga makandra. Te mi e si fa Frederick meki muiti fu sori den fasi di wan Kresten musu abi, dan a e kon moro makriki gi mi fu lobi en.”

^ paragraaf 3 Wi kenki den nen.

AKSI YUSREFI DEN SANI DISI . . .

  • O ten ben de a lasti leisi di wi begi Gado leki trowpaar?

  • San mi kan du fu gi mi trowpatna deki-ati fu taki nanga mi fu Gado tori?