Go na content

Go na a tra menu

Yehovah Kotoigi

Sranantongo

A Waktitoren  |  oktober 2011

 Leri den pikin fu yu

O ten wi no musu fadon na sribi?

O ten wi no musu fadon na sribi?

KANDE yu e feni taki a prenspari fu no fadon na sribi te yu de na skoro. Sribi e kiri furu pikin te den e sidon na ini den klas, ma efu yu wani leri wan sani dan yu musu tan na ai. Kande yu e go na konmakandra tu pe yu e studeri Bijbel.

San kan yepi yu fu no fadon na sribi?​ * Kande yu kan go sribi fruku te neti, noso kande yu kan sribi pikinso te bakadina. Meki wi go luku san wi kan leri fu wan yonkuman di ben fadon na sribi wan lati neti, di na apostel Paulus ben hori a taki fu en. Opo yu Bijbel na Tori fu den apostel kapitel 20, vers 7 te go miti 12, èn luku san ben pasa.

Paulus ben go luku a gemeente na ini a foto Trowas di ben abi wan lanpe. Bijbel e taki dati Paulus „ben o gowe libi den [brada nanga sisa] a dei baka dati” èn a ben o go nanga boto. Fu dati ede „a tan taki te mindrineti”. Bijbel e taki: „Wan yonkuman di nen Etikus ben e sidon na a fensre èn di Paulus ben e taki go doro, a yonkuman disi fadon na ini wan dipi sribi.” San pasa baka dati?​

Etikus fadon komoto na a fensre „fu a di fu dri sodro go na gron”. Paulus nanga den trawan lon saka den trapu so esi leki den ben man. Etikus ben e didon na gron, èn a ben dede! Fa yu denki taki den ben e firi?​— Den ben musu fu firi sari. Bijbel e taki dati Paulus brasa Etikus hori. Syatu baka dati, Paulus ben breiti srefisrefi èn a taki: ’No sari moro, a e libi baka!’ Gado ben gi Etikus libi baka!

 San wi kan leri fu Gado te wi e luku san ben pasa nanga Etikus?​— Wan sani di wi e leri, na taki Yehovah, wi hemel Tata, kan gi den dedewan libi baka, sosrefi yonguwan. Yehovah lobi yu èn a e frustan yu, iya, moro leki fa yu papa nanga mama e du dati. Di Yesus ben de na grontapu, dan a brasa pikin-nengre hori èn a blesi den, èn na so a sori wi fa en Tata de. A ben gi yonguwan wan opobaka tu, sosrefi wan meisje fu 12 yari.

Fa yu e firi now di yu kon sabi taki yu hemel Tata lobi yu?​— Iya, a tru taki a sani disi e meki wi lobi Yehovah tu èn wi wani gi yesi na den sani di A e taki. Yu sabi fa wi kan sori taki wi lobi En?​— Wan fasi fa wi kan du dati, na te wi e taki dati wi lobi en. Yesus ben taki: „Mi lobi a Tata.” Ma Yesus no ben taki nomo dati a lobi Gado, ma a ben e sori dati nanga den sani di a ben e du.

Yesus ben gi yesi na Gado. Yesus ben taki: „Ala ten mi e du san e plisi en.” Te wi e du sani tu fu plisi Yehovah nanga en Manpikin, Yesus, dan wi o du ala muiti fu tan na ai te dati de fanowdu.

^ paragraaf 4 Te yu e leisi na artikel disi nanga wan pikin-nengre, dan hori na prakseri taki a strepi na fu memre yu fu wakti pikinso, èn fu gi a pikin na okasi fu gi piki.