Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  augustus 2011

 Fa yu kan abi wan koloku osofamiri libi?

Sori lespeki gi yu trowpatna

Sori lespeki gi yu trowpatna

Will * e taki: Te wan sani e trobi Rachel, dan a e krei wan heri pisi ten. Te wi e sidon taki, dan a e bigin atibron, noso a no wani taki srefi nanga mi. A gersi leki noti no e yepi. Mi no sabi moro san mi musu du.”

Rachel e taki: „Di Will kon na oso, mi ben e krei. Mi pruberi fu taigi en fu san ede mi ben e krei, ma a koti mi mofo. A taigi mi taki a no ben de so wan bigi sani, èn taki mi ben musu libi a tori. A sani dati meki mi kisi moro atibron.”

YU E firi leki Will noso Rachel son leisi? Den ala tu wani taki nanga makandra, ma nofo tron den e bruya fu di sani no e waka soleki fa den ben wani. Fu san ede dati de so?

Mansma nanga umasma e difrenti fu makandra te a abi fu du nanga a fasi fa den e taki, èn san wan man abi fanowdu a no san wan uma abi fanowdu. Son leisi wan uma wani fruteri krin fa a e firi èn a wani du dati furu leisi. Ma furu mansma no wani taki trobi e kon, èn fu dati ede den e pruberi fu lusu problema esi-esi. Boiti dati den no lobi fu taki fu tori di e tyari kesekese kon. We, san yu kan du fu taki bun nanga yu masra noso yu wefi, aladi unu e difrenti fu makandra?

Wan sma di abi lespeki e warderi trawan èn a e pruberi fu frustan fa den e firi. A kan taki sensi di yu ben pikin, yu leri fu lespeki sma di abi moro frantwortu noso moro ondrofeni leki yu. Ma na ini a trowlibi, a no makriki fu sori lespeki gi yu trowpatna di yu e si leki yu speri. „Mi ben sabi taki Phil ben o arki nanga pasensi te tra sma ben o taki nanga en, èn a ben o pruberi tu fu frustan fa den e firi.” Na so Linda e taki, wan uma di trow aiti yari. „Mi ben wani taki a ben e du a srefi te mi ben e taki nanga en.” A no de fu taki dati yu e arki nanga pasensi te mati nanga sma di yu no sabi e taki nanga yu, èn yu e taki na wan lespeki fasi nanga den. Ma yu e du dati tu te yu e taki nanga yu trowpatna?

Te trowpatna no e lespeki makandra, dan den no o man feni en bun nanga makandra, èn a sani dati o tyari bigi trobi kon. Wan koni tiriman ben taki: „A moro betre fu nyan wan pisi drei brede na ini wan oso pe nowan trobi no de, leki fu nyan na ini wan oso pe sma e hori fesa, ma pe trobi de” (Odo 17:1). Bijbel e  taigi wan man fu gi en wefi grani, noso fu sori lespeki gi en (1 Petrus 3:7). A ’wefi musu abi bigi lespeki tu gi en masra’.​—Efeisesma 5:33.

Fa yu kan taki na wan lespeki fasi nanga yu trowpatna? Luku wan tu bun rai di Bijbel e gi.

Te yu trowpatna abi wan sani fu taki

A problema:

Furu sma lobi fu taki ma den no lobi fu arki. Yu na wan fu den sma dati? Bijbel e taki dati te wan sma e „gi piki fosi a yere wan tori, dan dati na wan don sani” (Odo 18:13). Sobun, arki fosi yu taki. Fu san ede? Kara di trow 26 yari, e taki: „Mi no lobi te mi masra e pruberi fu lusu den problema fu mi wantewante. A no abi fu agri srefi nanga mi, èn a no abi fu broko en ede nanga a fasi fa a problema du kon. Na arki a musu arki mi nomo, èn a musu lespeki den firi fu mi.

Ma son mansma nanga son umasma e tweifri fu taki fa den e firi, èn den no lobi te a patna fu den e dwengi den fu taki. Lorrie di no trow so langa ete, kon si taki a e teki langa fosi en masra fruteri en fa a e firi. A e taki: „Mi musu abi pasensi, èn mi musu wakti teleki a wani fruteri mi.”

Wan sani di yu kan du:

Efu yu nanga yu trowpatna musu taki fu wan sani di kan tyari trobi kon, dan a bun fu taki fu a tori te un ala tu no abi furu sani na un ede. Fa a de te a patna fu yu no wani taki fa a e firi? A bun fu sabi taki „den prakseri na ini na ati fu wan man de leki dipi watra, ma wan man di abi a koni fu man si sani krin o hari den kon na tapu” (Odo 20:5). Efu yu e hari wan emre watra puru na ini wan peti tumusi esi, dan yu o lasi furu watra. Na so a de tu taki te yu e taki krasi nanga yu trowpatna, dan a no o wani taki moro, èn yu no o man kon sabi fa a e firi. Na presi fu dati, poti aksi gi en na wan switi fasi èn na wan lespeki fasi. Abi pasensi te a e teki langa fosi a taki fa a e firi.

Te yu trowpatna e taki, dan yu musu ’de gaw fu yere. Yu no musu de gaw fu taki èn yu no musu de gaw fu kisi atibron’ (Yakobus 1:19). Wan sma di e arki bun no e yere nomo san wan trawan e taki, ma a e suku fu frustan tu fa a trawan e firi. Te yu patna e taki, dan pruberi fu frustan fa a e firi. A fasi fa yu e arki, o sori yu patna efu yu e lespeki en, noso efu yu no e du dati.

Yesus ben leri wi fa fu arki. Fu eksempre, di wan siki man go suku yepi na en, dan Yesus no lusu a problema wantewante. A arki fosi san a man ben wani aksi en. Baka dati, a meki den sani di a man taigi en naki en ati. Ne a dresi a man (Markus 1:40-42). Te yu patna e taki, dan yu musu teki na eksempre fu Yesus. Kande a patna fu yu no e suku wan esi-esi lusu gi a problema fu en. Kande a wani taki yu frustan fa a e firi. Dati meki yu musu arki bun san a e taki. Pruberi fu firi fa a e firi. Te yu du dati, dan fosi yu kan yepi a patna fu yu. Na so yu e sori taki yu e lespeki en.

PRUBERI FU DU DISI: A tra leisi te yu patna e bigin taki nanga yu, dan hori yusrefi fu no piki wantewante. Wakti teleki a kaba taki èn yu e frustan san a taigi yu. Bakaten, yu kan aksi en: „Yu feni taki mi ben e arki yu trutru?”

Te yu abi wan sani fu taki

A problema:

„Den lafu felem di de fu si na telefisi e meki a gersi leki a no de wan ogri te wan sma e taki takru fu en trowpatna èn te a e kosi noso e spotu a patna fu en”, na so Linda e taki di ben kari kaba na ini na artikel disi. Son sma kweki na ini osofamiri pe sma gwenti taki grofu nanga makandra. Bakaten, te den trow, dan den feni en muilek fu no taki na a fasi dati na ini den eigi osofamiri. Ivy, di e libi na ini Kanada, e taki: „Mi kweki na ini wan famiri pe sma ben e spotu makandra, den ben e bari makandra, èn den ben e kosi makandra.”

Wan sani di yu kan du:

Te yu e taki nanga trawan fu a patna fu yu, dan „taki sani di bun fu gi sma deki-ati te a de fanowdu. Na so fasi den sma di e arki, kan yere sani di bun gi den” (Efeisesma 4:29). Meki a fasi fa yu e taki fu a patna fu yu yepi sma fu kisi wan bun denki fu en.

 Awansi yu nanga yu patna de un wawan, toku yu musu hori yusrefi fu no spotu en èn fu no kosi en. Na ini owruten Israel, Mikal atibron nanga en masra, Kownu David. A ben spotu en masra èn a taigi en taki a ben e du „neleki wan lawman”. A sani di a taki hati David, èn a no ben plisi Gado tu (2 Samuel 6:20-23). San wi e leri fu a tori disi? Te yu e taki nanga yu trowpatna, dan yu musu luku bun san yu e taki (Kolosesma 4:6). Phil di trow aiti yari, e agri taki en nanga en wefi e kisi kesekese ete. A kon si taki son leisi den sani di a e taki e meki a situwâsi kon moro ogri. A e taki: „Mi kon si taki te mi wini wan kesekese, dan fu taki en leti mi na a lasiman. San mi leri, na taki a moro bun èn a moro switi te wi e gi makandra deki-ati fu kan abi wan moro bun trowlibi.”

Na ini owruten, wan owru uma di en masra ben dede kaba, ben gi den wefi fu den manpikin fu en a rai fu „feni wan masra èn wan presi fu tan” (Rut 1:9). Te wan masra nanga en wefi e sori lespeki gi makandra, dan na oso fu den sa tron wan switi „presi fu tan”.

PRUBERI FU DU DISI: Teki ten fu taki nanga yu patna fu den sani di e kon now. Aksi yu patna: „Te mi e taki fu yu nanga trawan, dan yu feni taki mi e gi yu grani noso taki mi e lagi yu? San mi kan du fu gi yu moro grani?” Arki bun te yu trowpatna e taki fa a e firi. Pruberi fu du den sani di yu patna e taigi yu.

Teki yu trowpatna leki fa a de

A problema:

Son sma di no trow so langa ete, abi a fowtu denki taki te Bijbel e taki dati trowpatna musu de „wán skin”, dan dati wani taki dati den musu abi wán denki, noso taki den musu abi den srefi fasi (Mateyus 19:5). Ma heri esi den e kon si taki a denki dati na wan fowtu denki. Te tu sma e trow nanga makandra, dan nofo tron den e kisi kesekese fu di den e difrenti fu makandra. Linda e taki: „Wan bigi difrenti na mindri mi nanga Phil, na taki a no e broko en ede so furu nanga sani, leki fa mi e du dati. Son leisi te mi e broko mi ede nanga wan sani, dan a no e hati en ede nanga den sani dati. Dati e meki mi atibron, fu di a gersi leki a no e broko en ede so furu leki fa mi e du dati.

Wan sani di yu kan du:

Teki makandra soleki fa unu de, èn hori na prakseri taki yu patna de tra fasi leki yu. Luku na agersitori disi: Yu ai e wroko tra fasi leki den yesi fu yu. Ma toku den e wroko makandra so taki yu kan abra wan strati sondro taki wan sani pasa nanga yu. Adrienne di trow pikinmoro 30 yari, e taki: „Solanga a fasi fa wi e si sani e kruderi nanga Gado Wortu, mi nanga mi masra e lespeki den denki fu makandra te den no de a srefi. Te yu luku en bun, dan wi trow nanga makandra, ma wi na tu difrenti sma.

Te yu trowpatna e denki noso e du sani tra fasi leki yu, dan yu no musu poti prakseri na yu eigi firi nomo. Hori den firi fu yu patna na prakseri (Filipisma 2:4). Kyle, a masra fu Adrienne e taki: „A no ala ten mi e frustan fa mi wefi e si sani, èn a no ala ten mi e agri tu nanga en. Ma mi e hori na prakseri taki mi lobi en moro leki fa mi lobi a denki fu mi. Te a de koloku, dan misrefi de koloku tu.”

PRUBERI FU DU DISI: Skrifi na tapu papira na sortu fasi a denki fu yu patna noso a fasi fa a e du sani, bun moro di fu yu.​—Filipisma 2:3.

Wan sani di sa yepi yu fu tan abi wan koloku trowlibi, na te yu e sori lespeki gi yu trowpatna. Linda e taki: „Te trowpatna abi lespeki gi makandra, dan den sa de koloku, èn den sa abi a dyaranti taki a trowlibi sa waka bun. A no de fu taki dati a e tyari wini kon te wi e leri fu sori lespeki gi trawan.”

^ paragraaf 3 Wi kenki den nen.

AKSI YUSREFI . . .

  • Fa wi osofamiri kisi wini fu di mi trowpatna de tra fasi leki mi?

  • Fu san ede a bun fu lespeki den winsi fu mi patna te Bijbel gronprakseri no e krutu a sani dati?