Yesus ben taki: „Sma di de gosontu no abi datra fanowdu, ma na sikisma abi datra fanowdu” (Mateyus 9:12). Na so fasi a ben wani sori taki a no de teige Bijbel efu wan sma e teki datrayepi. Dati meki Yehovah Kotoigi de klariklari fu teki dresi èn fu kisi datrayepi. Den wani abi wan bun gosontu èn den wani libi moro langa. Fu taki en leti, neleki Lukas, wan Kresten fu a fosi yarihondro, son Kotoigi fu Yehovah na datra.​—Kolosesma 4:14.

Ma Yehovah Kotoigi no e teki datrayepi di de teige Bijbel gronprakseri. Fu eksempre, den no e teki brudu fu di Bijbel e taki dati wi no mag teki brudu (Genesis 9:4; Lefitikus 17:1-14; Tori fu den Apostel 15:28, 29). Gado Wortu e taki tu dati wi no mag du „afkodrei” sani fu kon betre.​—Yesaya 1:13; Galasiasma 5:19-21.

Furu datra e gi yepi di e kibri sma libi èn di no de teige Bijbel gronprakseri. Nofo tron den sortu datrayepi dati, di furu Kotoigi bosroiti fu teki, na den moro bun datrayepi leki den wan di de teige a wani fu Gado.

A no de fu taki dati furu difrenti sani de di wi kan du fu tan gosontu. A sani di kan yepi wan sma, no abi fu yepi wan tra sma. Sobun, sma di e meki datra ondrosuku den fu kon sabi sortu siki den abi, èn di e suku datrayepi gi wan siki di den abi, kande o wani fu go na wan tra datra fu kon sabi san den kan du.​—Odo 14:15.

A no ala Kotoigi o teki a srefi datrayepi. Gado Wortu e sori taki Kresten kan teki den eigi bosroiti di den konsensi e gi den pasi fu teki, èn di no de teige Bijbel wet (Romesma 14:2-4). Dati meki ibri sma musu ondrosuku fini sortu datrayepi den o teki, èn den musu sorgu taki a bosroiti di den e teki no de teige a konsensi fu den di e wroko na wan fasi di e kruderi nanga Bijbel gronprakseri.​—Galasiasma 6:5; Hebrewsma 5:14.

Wan Kotoigi o si ibri bosroiti di a musu teki leki wan prenspariwan. Wi kan agersi en nanga wan sma di e rèi wan wagi èn di e doro wan uku fu wan strati pe furu wagi e rèi. Efu a ben o rèi baka den wagi nomo di de na en fesi, èn efu a ben o rèi pasa na uku sondro fu luku, dan a ben kan meki sma kisi hebi mankeri. Wan sma di koni o rèi safri èn a o luku bun fosi a rèi go doro. Na a srefi fasi, Kotoigi no e hasti densrefi fu bosroiti sortu datrayepi den o teki èn den no e du san furu sma e du, sondro fu denki bun fosi. Na presi fu dati, den e luku fosi san na den difrenti sani di den kan du fu kisi yepi, èn den e ondrosuku Bijbel gronprakseri fosi den teki wan bosroiti.

Yehovah Kotoigi trutru e warderi a tranga wroko di den datra e du èn a fasi fa den e gi densrefi na ini a wroko fu den. Den de nanga tangi tu gi a yepi di den sma dati e gi den fu kon betre baka.