’Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi abi fu du nanga den gwenti fu libisma.’​—KOL. 2:8.

SINGI 96 A Buku fu Gado​—na wan bigi gudu

SAN WI O LERI *

1. Soleki fa Kolosesma 2:4, 8 e sori, dan fa Satan e pruberi fu kisi sma fu denki neleki en?

SATAN wani taki wi drai baka gi Yehovah. Dati meki a e pruberi fu kenki wi denki so taki wi e bigin denki neleki en. A e gebroiki sani di e hari wi èn di wi abi fanowdu, fu kisi wi fu waka na en baka.​—Leisi Kolosesma 2:4, 8.

2-3. (a) Fu san ede a warskow na ini Kolosesma 2:8 prenspari gi wi? (b) San wi o luku na ini na artikel disi?

2 Ma Satan kan kori wi trutru? Iya! Hori na prakseri taki Paulus no skrifi a warskow na ini Kolosesma 2:8 gi sma di no e bribi na ini Gado. A ben skrifi en gi Kresten di Gado ben salfu nanga santa yeye (Kol. 1:2, 5). Satan ben man kori den Kresten na ini a ten dati èn a kan kori wi na ini a ten disi tu. Fu taki en leti, wi musu de na ai moro na ini a ten disi (1 Kor. 10:12). Fu san ede? Satan de na grontapu now èn a e du tranga muiti fu kisi den sma di e dini Yehovah (Openb. 12:9, 12, 17). Boiti dati, wi e libi na ini wan ten pe ogrisma nanga bedrigiman e kon „ogri moro nanga moro”.​—2 Tim. 3:1, 13.

3 Na ini na artikel disi wi o si fa Satan e gebroiki „soso takitaki di e bedrigi sma” fu kisi wi fu denki neleki en. Wi o taki fu dri fasi fa Satan e kori sma (Ef. 6:11). Na ini a tra artikel wi o si fa wi kan tyari kenki kon te wi si taki wi teki a denki fu a grontapu disi abra. Ma now wi o luku fa Satan kori den Israelsma, baka di den go na ini a Pramisi Kondre èn san wi kan leri fu dati.

 SATAN KISI DEN ISRAELSMA FU ANBEGI FALSI GADO

4-6. Soleki fa Deuteronomium 11:10-15 e sori, dan na sortu nyun fasi den Israelsma ben o abi fu prani den gron, baka di den go na ini a Pramisi Kondre?

4 Satan ben man kisi den Israelsma fu anbegi falsi gado. Fa a du dati? A ben sabi taki den ben abi nyanyan fanowdu èn a gebroiki a sani dati fu kisi den fu du san a wani. Di den Israelsma go na ini a Pramisi Kondre den ben abi fu leri wan nyun fasi fu prani gron. Di den ben de na ini Egepte den ben gebroiki watra fu a Nijl-liba fu nati den gron fu den. Ma fu di a Pramisi Kondre no ben abi wan bigi liba, meki den ben abi alenwatra nanga dow fanowdu so taki den sani di den prani ben kan gro (leisi Deuteronomium 11:10-15; Yes. 18:4, 5). Dati meki den Israelsma ben abi fu leri nyun fasi fu prani den gron. A sani disi no ben o makelek fu di furu fu den sma di ben sabi prani gron ben dede na ini a sabana.

Fa Satan ben man kisi den Israelsma di ben de gronman fu denki leki en? (Luku paragraaf 4-6) *

5 Yehovah taigi en pipel taki a situwâsi fu den ben kenki. Baka dati a gi den a warskow disi: „Luku bun taki sma no kori unu, so taki unu drai baka gi Gado èn boigi gi tra gado fu anbegi den” (Deut. 11:16, 17). Fu san ede Yehovah ben warskow den fu no anbegi falsi gado aladi a ben taki fu a nyun fasi fa den ben musu prani den gron fu den?

6 Yehovah ben sabi taki den Israelsma ben o go na den trakondre sma di e anbegi falsi gado fu leri fa den kan prani den gron. A no de fu taki dati den sma dati ben sabi fa fu prani gron èn a pipel fu Gado ben kan leri wan tu sani fu den.  Ma toku den ben musu luku bun. Den Kanansma ben anbegi Bâal. Den ben bribi taki hemel ben de fu Bâal èn taki na en ben meki alen fadon. Yehovah no ben wani taki a pipel fu en bribi den lei disi. Ma toku ibri tron baka den Israelsma ben go dini Bâal (Num. 25:3, 5; Krut. 2:13; 1 Kow. 18:18). Wi o luku now fa Satan ben man kisi den Israelsma fu du san a wani.

DRI FASI FA SATAN KORI DEN ISRAELSMA

7. Sortu sani ben de wan tesi gi den Israelsma baka di den go na ini a Pramisi Kondre?

7 A fosi fasi fa Satan kori den Israelsma na taki a gebroiki wan sani di den ben abi fanowdu. A ben sabi taki den ben abi watra fanowdu. Fu april te go miti september furu alen no ben fadon na ini a Pramisi Kondre. Na alen ben bigin fadon na ini oktober. Na a watra disi den Israelsma ben abi fanowdu fu nati den gron so taki den ben abi nyanyan. Satan kori den Israelsma fu denki taki den ben musu teki den gwenti fu den trakondre sma abra, efu den ben wani taki den sani di den prani gro. Den trakondre sma ben bribi taki den gado fu den ben o meki alen fadon efu den ben du son sani fu plisi den gado fu den. Den Israelsma di no ben frutrow tapu Yehovah moro ben bigin du den sani disi tu gi a falsi gado Bâal. Den ben bribi taki te den ben o du den sani dati, a dreiten no ben o hori.

8. San na a di fu tu fasi fa Satan kori den Israelsma? Fruklari disi.

8 A di fu tu fasi fa Satan kori den Israelsma na taki a kisi den fu du hurudu. Den trakondre sma ben du wan lo morsu seks sani fu anbegi den gado fu den. Man nanga uma ben seri den skin na ini den tempel fu den gado fu den. Den no ben si en leki wan fowtu sani tu te sma ben libi wan homolibi èn te den ben abi seks na tra fasi di no fiti (Deut. 23:17, 18; 1 Kow. 14:24). Den trakondre sma ben e bribi taki te den ben du den sani disi, dan den gado fu den ben o meki furu nyanyan gro. A morsu sekslibi fu den trakondre sma ben hari den Israelsma èn dati meki den go anbegi den falsi gado fu den. Na a fasi disi Satan kisi den fu du san a wani.

9. Gebroiki Hosea 2:16, 17 fu sori fa Satan kisi den Israelsma fu frigiti Yehovah.

9 A di fu dri fasi fa Satan kori den Israelsma na taki a meki den frigiti Yehovah. Na ini a ten fu Yeremia, Yehovah ben taki dati den falsi profeiti ben meki a pipel frigiti en nen. Den ben e „dini Bâal” èn den ben gi a pipel deki-ati fu du a srefi sani (Yer. 23:27). Wan pisi ten a pipel fu Gado no ben gebroiki en nen èn den ben kari en Bâal, san wani taki „Masra”. A sani disi ben meki en muilek gi den Israelsma fu sabi a difrenti na mindri Yehovah nanga Bâal. Dati meki a ben makelek gi den fu moksi na anbegi fu Yehovah nanga na anbegi fu Bâal.​—Leisi Hosea 2:16, 17.

FA SATAN E KORI SMA NA INI A TEN DISI?

10. Fa Satan e kori sma na ini a ten disi?

10 Na ini a ten disi Satan e kori sma na a srefi fasi. A e gebroiki sani di sma abi fanowdu fu kisi den. A e meki den denki taki hurudu a no wan fowtu sani  èn a e meki den frigiti Yehovah. Wi o luku fosi fa Satan e meki sma frigiti Yehovah.

11. Fa Satan meki taki sma no sabi moro suma na Yehovah?

11 Satan e meki taki sma no sabi moro suma na Yehovah. Baka di den apostel fu Yesus dede, son Kresten di ben fadon komoto na bribi, bigin leri sma lei (Tori 20:29, 30; 2 Tes. 2:3). Den Kresten disi ben meki taki sma no ben man si krin moro suma na a tru Gado. Fu eksempre, den no ben poti a nen fu Gado na ini den nyun Bijbel di den ben druk. Na presi fu dati den ben poti a wortu „Masra” na ini den Bijbel disi. A sani disi meki en muilek gi sma di e leisi Bijbel fu si a difrenti na mindri Yehovah èn den tra „masra” di kari na ini Bijbel (1 Kor. 8:5). Den ben gebroiki a wortu „Masra” tu gi Yehovah èn gi Yesus. Disi meki taki sma no sabi moro taki Yehovah nanga Yesus na tu difrenti sma (Yoh. 17:3). Dati meki sma e bribi now taki Gado, Yesus nanga a santa yeye na dri sma na ini wan. A bakapisi na taki furu sma e bribi taki den no man kon sabi Gado. Ma a sani dati na wan lei!​—Tori 17:27.

Fa Satan gebroiki falsi anbegi fu kisi sma fu du hurudu? (Luku paragraaf 12) *

12. San den falsi kerki e leri sma èn san na a bakapisi, soleki fa Romesma 1:28-31 e sori?

12 Satan e kisi sma fu du hurudu. Na ini a ten fu Israel fu owruten, Satan ben gebroiki falsi anbegi fu meki sma du hurudu. Na ini a ten disi a e du a srefi sani. Den falsi kerki e leri sma taki a no fowtu fu abi seks na wan fasi di no fiti. Dati meki furu sma di e taki dati den e dini Gado no e hori densrefi moro na den wet fu Gado. Na ini a brifi di na apostel Paulus skrifi gi den Romesma a taki san na a bakapisi fu a sani disi. (Leisi Romesma 1:28-31.) Paulus ben taki fu „sani di no fiti”. Den sani disi na ala den morsu fasi fa sma abi seks, sosrefi wan homolibi (Rom. 1:24-27, 32; Openb. 2:20). A prenspari srefisrefi taki wi leki a pipel fu Yehovah e hori wisrefi na den sani di wi e leri na ini Bijbel!

13. San na wan tra fasi fa Satan e kori sma?

13 Satan e kisi sma nanga sani di den abi fanowdu. Wi alamala wani leri fu du wan  wroko so taki wi kan sorgu wisrefi nanga wi osofamiri (1 Tim. 5:8). Nofo tron wi e meki muiti fu leri bun na skoro so taki wi kan feni wan bun wroko. Ma wi musu luku bun. Na ini furu kondre den skoro no e leri sma nomo fa fu du wan wroko, ma den e leri den tu fu teki a denki fu grontapu abra. Den studenti e kisi deki-ati fu no bribi na ini Gado èn na ini Bijbel. Den e leri den studenti taki ala konisma e bribi na ini evolutie (Rom. 1:21-23). Den sortu leri disi de teige a koni fu Gado.​—1 Kor. 1:19-21; 3:18-20.

14. San na a bakapisi te sma abi a denki fu libisma?

14 A denki fu libisma de teige den wet fu Yehovah èn a e meki taki sma e trangayesi den wet disi. A denki disi no e yepi sma fu kon abi den fasi di Gado yeye e meki sma kisi, ma fu du den sani di a sondu skin wani (Gal. 5:19-23). A e gi sma deki-ati fu abi heimemre èn disi e meki taki sma „lobi densrefi nomo” (2 Tim. 3:2-4). Gado no wani taki den anbegiman fu en abi den fasi disi, ma a wani taki den abi sakafasi (2 Sam. 22:28). Son brada nanga sisa di go na universiteit bigin denki leki den sma fu a grontapu, na presi fu denki neleki fa Gado e denki. Meki wi go luku wan eksempre.

Fa wi kan teki a denki fu libisma abra? (Luku paragraaf 14-16) *

15-16. San na ondrofenitori fu wan sisa e leri yu?

15 Wan sisa di e du a furuten diniwroko moro leki 15 yari e taki: „Leki wan dopu Kotoigi mi ben yere san ben kan pasa nanga wan sma te a ben go na universiteit  èn mi ben leisi fu den tori dati. Ma toku mi go na universiteit. Mi ben denki taki noti no ben o pasa nanga mi.” Sortu problema a sisa kisi? A e taki: „A skoro ben teki furu fu mi ten. Mi ben musu studeri so furu taki mi no ben abi ten fu begi leki fa mi ben gwenti. A no ben gi mi prisiri fu go na ini a preikiwroko èn mi ben weri so te taki mi no ben sreka bun gi den konmakandra. Ma koloku taki mi kon si taki a skoro ben pori mi matifasi nanga Yehovah. Mi ben sabi taki mi ben abi fu stop èn na dati mi du tu.”

16 Fa a leri di a sisa kisi na universiteit kenki a fasi fa a ben denki? A sisa e taki: „Mi e syen fu taki en, ma den sani di mi ben leri ben meki taki mi ben krutu trawan, spesrutu den brada nanga sisa. Mi ben fruwakti tumusi furu fu den èn mi no ben moksi so furu nanga den. A teki langa fosi mi ben man kenki mi denki. A sani disi leri mi taki sani no o waka bun nanga wi te wi no e arki den warskow di wi hemel Papa e gi wi nanga yepi fu en organisâsi. Yehovah sabi san bun gi mi. Mi ben musu arki en!”

17. (a) San wi no musu du noiti? (b) San wi o luku na ini a tra artikel?

17 Noiti wi musu meki Satan kisi wi „nanga a koni fu grontapu èn nanga soso takitaki di e bedrigi sma” (1 Kor. 3:18; 2 Kor. 2:11). Ala ten wi musu de na ai gi den fasi fa a e kisi sma fu du san a wani. Wi no musu meki Satan kisi wi, so taki wi frigiti Yehovah. Wi musu hori wisrefi na den wet fu Yehovah èn wi no musu meki Satan kisi wi fu trangayesi den rai fu Yehovah. Ma san yu musu du te yu e si taki yu e denki kaba leki a grontapu disi? Na ini a tra artikel wi o si fa a Wortu fu Gado kan yepi wi fu kenki iniwan denki noso gwenti di tranga srefisrefi.​—2 Kor. 10:4, 5.

SINGI 49 Prisiri Yehovah ati

^ paragraaf 5 Satan sabi fa a musu kori sma. A kisi furu sma fu denki neleki en, sondro taki den sabi srefi. Na ini na artikel disi wi o si difrenti fasi fa Satan e kori sma.

^ paragraaf 48 SAN WI E SI TAPU A PRENKI: Den Kanansma e kori den Israelsma di ben e bumui nanga den fu anbegi Bâal èn fu du hurudu.

^ paragraaf 51 SAN WI E SI TAPU A PRENKI: Den kloru na tapu a reklame bord fu wan kerki e sori taki a kerki feni en bun taki sma e libi wan homolibi.

^ paragraaf 53 SAN WI E SI TAPU DEN PRENKI: Wan yongu sisa e go na universiteit. En nanga den tra pikin fu a klas e bribi a jufrow di e taki dati sabiman kan lusu ala den problema fu libisma. Bakaten a de na a Kownukondre zaal, ma a no e arki èn na ini en ati a e krutu den brada nanga sisa.