’Meki un leti skèin gi sma. Dan den kan gi glori na un Tata di de na hemel.’​—MAT. 5:16.

SINGI: 77, 59

1. Sortu moi sani wi e si na ini a ten disi?

A MOI fu si taki a pipel fu Yehovah e meki a leti fu den skèin na heri grontapu! A yari di pasa wi studeri Bijbel nanga moro leki tin milyun sma. Èn milyunmilyun sma kon na a Memrefesa pe den leri fa Yehovah sori lobi gi wi di a seni en Manpikin kon fu dede gi wi.​—1 Yoh. 4:9.

2, 3. (a) Sortu sani no e tapu wi fu meki wi leti skèin? (b) San wi o luku na ini na artikel disi?

2 Na heri grontapu a pipel fu Yehovah e taki furu difrenti tongo. Ma disi no e tapu den fu prèise Yehovah leki wán famiri (Openb. 7:9). Awinsi sortu tongo wi e taki noso awinsi pe wi e libi, wi kan „de leki sma di e skèin leti”.​—Fil. 2:15.

3 Te wi e du a preikiwroko, te wi e du muiti fu abi wánfasi èn te wi e tan na ai, dan Yehovah e kisi glori. Na ini na artikel disi wi o si fa wi kan tan du disi.​—Leisi Mateyus 5:14-16.

 YEPI TRA SMA FU ANBEGI YEHOVAH

4, 5. (a) Boiti a preikiwroko, na sortu tra fasi wi kan meki wi leti skèin? (b) Sortu wini a e tyari kon te wi e sori switifasi? (Luku a prenki na a bigin fu na artikel.)

4 Na ini A Waktitoren fu 1 yuni 1925 wan artikel ben de di nen „Leti e skèin na ini a dungru”. Na artikel disi ben taki: „Efu wan sma wani de wan trutru disipel fu Masra èn efu a wani gi yesi na en, dan a musu gebroiki ibri okasi fu meki en leti skèin.” Na artikel ben taki moro fara: „Fu man du disi, wan sma musu preiki a bun nyunsu gi sma èn a musu libi soleki fa a leri na ini Gado Wortu.” Sobun, wan fasi fa wi e meki wi leti skèin, na fu preiki a bun nyunsu èn fu meki sma tron disipel (Mat. 28:19, 20). Ma boiti a preikiwroko, a fasi fa wi e libi leki Kresten kan meki Yehovah kisi glori. Den ososma nanga sma di e waka pasa e luku fa wi e tyari wisrefi. Te wi e lafu nanga den èn te wi e gi den odi, dan den o si taki wi na sma di abi switifasi èn den o denki bun fu a Gado di wi e anbegi.

5 Yesus taigi den disipel fu en: „Te unu e go na ini na oso, taki den sma na ini na oso odi” (Mat. 10:12). Na ini a kontren pe Yesus nanga den apostel ben e preiki, sma ben abi a gwenti fu kari sma di den no sabi, kon na ini den oso. Ma na furu presi na ini a ten disi, a no de so. Furu tron sma e bruya noso den feni en fruferi te den e si sma di den no sabi na den mofodoro. Te wi e lafu nanga den èn te wi e sori switifasi, dan a kan moro makelek gi den fu kon taki nanga wi. Disi yepi furu brada nanga sisa tu di e preiki nanga a bukuwagi na presi pe furu sma de. Efu yu e du a wroko disi, dan kande yu si taki sma lobi en te yu e lafu nanga den èn te yu e gi den odi. Disi kan meki taki den no e frede fu kon teki wan buku. Te yu e sori switifasi, dan a o moro makelek fu bigin wan takimakandra nanga sma.

6. San wan owru trowpaar du fu man tan preiki?

6 Wan owru trowpaar na ini Ingrisikondre no ben man preiki oso fu oso so furu moro fu di den no de so gosontu moro. Dati meki den bosroiti fu poti wan tafra nanga buku na den mofodoro. Fu di den e tan krosibei fu wan skoro, meki den e poti buku di e hari a prakseri fu papa nanga mama di e go teki den pikin na skoro. Son papa nanga mama teki den buku disi. Wan fu den buku di furu fu den teki na a buku „Sani di yongusma e aksi​—Piki di kan yepi den”, Pisi 1 nanga 2. Wan pionier sisa di de na ini a srefi gemeente gwenti fu tanapu nanga a trowpaar na a tafra. Den papa nanga mama e si taki a sisa disi abi switifasi èn taki a trowpaar e meki muiti trutru fu yepi sma. Wan papa bigin studeri Bijbel srefi.

7. Fa yu kan yepi sma di lowe kon tan na ini a kontren fu yu?

7 Na ini den yari di pasa, furu sma lowe komoto na den kondre fu go tan na tra kondre. San yu kan du fu yepi den sortu sma disi fu kon sabi Yehovah èn fu kon sabi san a o du na ini a ten di e kon? Wan sani di yu kan bigin du, na fu leri fa yu kan taki odi na ini a tongo fu den. A JW Language app kan yepi yu fu du dati. Yu kan leri fu taki wan tu sani tu na ini a tongo fu den sma, fu kan bigin wan takimakandra nanga den. Disi sa gi yu na okasi fu sori den a jw.org website èn den difrenti felem nanga buku na ini a tongo fu den.​—Deut. 10:19.

8, 9. (a) Fa a mindriwiki konmakandra e yepi wi? (b) Fa papa nanga mama kan yepi den pikin fu den fu gi bun piki na den konmakandra?

 8 Yehovah e gi wi soifri san wi abi fanowdu fu kan du a preikiwroko bun. Fu eksempre, den sani di wi e leri na a Kresten libi nanga preikiwroko konmakandra kan yepi wi fu no frede fu tyari gobaka èn fu bigin studeri Bijbel nanga sma.

9 Furu sma di e kon na den konmakandra fu wi e si taki den pikin-nengre e gi piki. Papa nanga mama, leri den pikin fu unu fu gi piki nanga den eigi wortu. Na so yu e yepi den fu meki a leti fu den skèin. Son sma ben wani kon sabi moro fu Bijbel di den yere fa den pikin-nengre e gi syatu piki nanga den eigi wortu.​—1 Kor. 14:25.

DU MUITI FU MEKI WÁNFASI DE

10. Fa na Osofamiri Anbegi kan yepi osofamiri fu abi wánfasi?

10 Wan tra fasi fa yu kan meki yu leti skèin na te yu e du muiti fu meki wánfasi de na ini yu osofamiri nanga a gemeente. Wan fasi fa papa nanga mama kan du dati, na fu hori na Osofamiri Anbegi ibri wiki. Furu osofamiri e luku a JW Broadcasting programa, èn baka dati den e taki san den leri fu en. Te papa nanga mama e hori na Osofamiri Anbegi, dan den musu hori na prakseri taki a fasi fa yu e gi wan pikin-nengre leri, e difrenti fu a fasi fa yu e gi wan moro bigi pikin leri. Du ala san yu man fu yepi ala sma na ini na osofamiri fu kisi wini fu na Osofamiri Anbegi.​—Ps. 148:12, 13.

Wi o kisi furu deki-ati te wi e meki ten gi den owruwan (Luku paragraaf 11)

11-13. Fa wi alamala kan sorgu taki wánfasi de na ini a gemeente?

11 Fa yonguwan kan sorgu taki wánfasi de na ini a gemeente? Den kan meki mati nanga de owru brada nanga sisa. Na wan lespeki fasi, yu kan aksi den fu fruteri yu san yepi den fu tan dini Yehovah someni yari langa. Yu kan leri furu fu den. Na so yu nanga den kan kisi deki-ati. Wi alamala, awinsi wi yongu noso owru, kan sori switifasi gi tra sma di e kon na a Kownukondre zaal. Yu kan gi den odi, yu kan lafu nanga den, yu kan yepi den fu feni wan sidonpresi èn yu kan meki den kon sabi den tra brada nanga sisa. Meki den firi switi te den de na wi konmakandra.

 12 Efu yu musu teki fesi na den preikiwroko konmakandra, dan yu kan yepi den owru brada nanga sisa fu du a preikiwroko bun. Sorgu taki den abi wan kontren pe den kan preiki makelek. Son leisi yu kan meki wan moro yongu brada noso sisa wroko nanga den. Owru brada nanga sisa nanga den wan di siki kan lasi-ati fu di den no man preiki so furu moro leki fosi. Ma den o firi moro bun te den sabi taki wi e broko wi ede nanga den èn taki wi e frustan a situwâsi fu den. A no abi trobi o owru wan sma de noso o langa a e dini Yehovah, yu kan gi en deki-ati fu tan preiki nanga faya te yu e sori switifasi gi en.​—Lef. 19:32.

13 A psalm skrifiman ben taki: „Luku o bun èn o switi a de te brada e libi makandra leki wán famiri!” (Leisi Psalm 133:1, 2.) Te den Israelsma ben kon makandra fu anbegi Yehovah, dan den ben kan gi makandra deki-ati. A psalm skrifiman ben agersi a wánfasi fu den nanga salfu-oli di bun gi a skin èn di e smeri switi. Na a srefi fasi wi kan meki wi brada nanga sisa firi bun te wi e sori switifasi gi den. Disi e sorgu taki wánfasi de na ini a gemeente. Efu yu e du disi kaba, dan wi e prèise yu. Yu e du muiti fu kon sabi den brada nanga sisa fu yu gemeente moro bun?​—2 Kor. 6:11-13.

14. Fa yu kan meki yu leti skèin na ini yu birti?

14 Fa yu kan meki yu leti skèin na ini yu birti? Te yu e sori switifasi gi den birtisma fu yu èn te yu e du bun sani gi den, dan den o wani kon sabi moro fu Yehovah. Aksi yusrefi: ’Fa den birtisma e denki fu mi? Mi e hori mi oso nanga mi dyari krin so taki a birti kan moi? Mi e yepi den sma na ini a birti?’ Aksi tra Kotoigi fa den famiri, den birtisma, den sma na wrokope èn na skoro ben feni en di den sori switifasi èn di den tyari densrefi na wan bun fasi. Seiker yu o yere moi ondrofenitori.​—Ef. 5:9.

TAN NA AI

15. Fu san ede a prenspari fu tan na ai?

15 Efu wi wani taki wi leti tan skèin krin, dan wi no musu frigiti na ini sortu ten wi e libi. Difrenti leisi Yesus taigi den disipel fu en: „Tan na ai” (Mat. 24:42; 25:13; 26:41). Efu wi e denki taki a „bigi banawtu” de fara ete èn taki a no o kon na ini a ten fu wi, dan wi no o de na ai fu yepi sma fu kon sabi moro fu Yehovah (Mat. 24:21). A sani disi kan meki taki a leti fu wi o kon dòf èn taki a dede te fu kaba.

16, 17. San o yepi yu fu tan na ai?

16 Now a moro prenspari fu tan na ai fu di a situwâsi na grontapu e kon moro ogri. Wi sabi taki a kaba o kon na a ten di Yehovah poti (Mat. 24:42-44). Ma now wi musu abi pasensi èn wi musu tan na ai. Leisi Gado Wortu ibri dei èn no tapu fu begi Yehovah (1 Petr. 4:7). Leri fu brada nanga sisa di e dini Yehovah furu yari kaba nanga prisiri. Wan moi ondrofenitori de na ini A Waktitoren fu 15 april 2012, bladzijde 18-21. Na artikel nen „Seibitenti yari kaba mi grabu wan Dyu hori na en krosi”.

17 Ala ten yu musu abi furu fu du na ini na anbegi. Dati o gi yu furu prisiri èn yu o si taki a ten e lon (Ef. 5:16). Den futuboi fu Yehovah ben man du furu na ini den hondro yari di pasa. Ma na ini a ten disi, Yehovah e meki wi du moro furu srefi. Noiti wi ben o denki taki a wroko ben o go na fesi so. A leti fu wi e skèin trutru!

Te den owruman e kon luku wi, dan den e gi wi koni rai fu Gado Wortu (Luku paragraaf 18, 19)

18, 19. Fa gemeente owruman kan yepi wi fu dini Yehovah fayafaya? Gi wan eksempre.

 18 Aladi wi na sondusma, toku Yehovah feni na anbegi fu wi bun. Fu di a wani yepi wi, meki a poti owruman na ini den gemeente. (Leisi Efeisesma 4:8, 11, 12.) Sobun, te den owruman e kon luku yu, si en leki wan okasi fu leri fu den èn teki a rai di den e gi yu.

19 Tu owruman na ini Ingrisikondre ben go luku wan trowpaar di ben abi problema na ini a trowlibi fu den. A wefi ben feni taki a masra no ben e teki fesi na ini na anbegi fu Yehovah. A masra ben feni taki a no ben de wan bun leriman èn dati meki a no ben e hori na Osofamiri Anbegi ibri wiki. Den owruman yepi a trowpaar fu prakseri na eksempre fu Yesus. Yesus ben e sorgu bun gi den disipel fu en. Den owruman gi a masra a rai fu teki na eksempre fu Yesus èn den gi a wefi deki-ati fu abi pasensi. Den owruman sori a trowpaar wan tu sani di den kan du fu hori na Osofamiri Anbegi makandra nanga den tu pikin fu den (Ef. 5:21-29). Baka wan pisi ten den owruman prèise a masra gi a muiti di a du. Den taigi en fu tan go so doro èn fu frutrow taki a santa yeye kan yepi en fu tron wan bun edeman. A lobi nanga a switifasi di den owruman sori gi a trowpaar disi yepi na osofamiri fu meki a leti fu den skèin!

20. San o de a bakapisi te yu e meki yu leti skèin?

20 A psalm skrifiman ben singi: „Koloku fu ibriwan sma di abi lespeki gi Yehovah èn di e waka a pasi fu en” (Ps. 128:1). Yu o de koloku te yu e meki yu leti skèin. Sobun, yepi tra sma fu kon sabi Gado, du ala san yu man fu meki wánfasi de na ini yu osofamiri nanga a gemeente, èn tan na ai. Tra sma o si a bun eksempre fu yu èn den srefi o wani gi glori na wi Tata, Yehovah.​—Mat. 5:16.