Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2017

Yu e memre disi ete?

Yu e memre disi ete?

Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

San brada soleki den kring-opziener nanga den gemeente owruman musu du te den e kisi rai fu Gado organisâsi?

Den musu de gaw fu gi yesi. Den kan aksi densrefi: ’Mi e gi trawan deki-ati fu gi yesi na Yehovah? Mi de gaw fu teki a rai fu den brada di e teki fesi èn fu horibaka gi den?’​—w16.11, blz. 11.

O ten tru Kresten kon de na ini katibo fu Babilon a Bigiwan?

A sani disi pasa syatu baka di den apostel dede. Na a ten dati yu ben kon abi kerki fesiman di ben feni taki den prenspari moro trawan. Kerki nanga lanti ben e horibaka gi a falsi Kresten bribi èn den no ben wani arki den Kresten di ben e meki muiti fu dini Gado. Ma na ini den yari fosi 1914 den salfu futuboi fu Gado bigin meki muiti fu fri densrefi fu Babilon a Bigiwan.​—w16.11, blz. 23-25.

Fu san ede a wroko fu Lefèvre d’Étaples ben prenspari so?

Na ini den yari baka 1520, Lefèvre vertaal a Bijbel na ini Fransitongo so taki ala sma ben kan leisi en. Maarten Luther, William Tyndale nanga Johannes Calvijn ben leri furu fu a fasi fa Lefèvre ben fruklari Bijbel.​—wp16.6, blz. 10-12.

San na a difrenti na mindri wan sma di „e poti prakseri na sani di a skin wani” nanga wan sma di „e poti prakseri na sani di abi fu du nanga a yeye”? (Rom. 8:6)

Wan sma di e poti prakseri na sani di a skin wani e gi pasi taki den sondu firi fu en e basi en. A sma disi lobi fu taki fu den sani di a skin wani èn a lobi du den sani dati. Te wan sma e poti prakseri na sani di abi fu du nanga a yeye, dan na anbegi fu Gado na a moro prenspari sani gi en. So wan Kresten e meki santa yeye tiri en. Te wan sma e poti prakseri na den sani di a skin wani, dan a bakapisi fu dati na dede, ma a sma di e poti prakseri na sani di abi fu du nanga a yeye o kisi libi nanga freide.​—w16.12, blz. 15-17.

San na wan tu sani di kan yepi wi fu no broko wi ede tumusi?

Sabi san na den moro prenspari sani, no fruwakti tumusi furu fu yusrefi èn fu trawan, teki ten fu prakseri fu sani èn fu begi, prisiri nanga den sani di Yehovah meki, leri fu lafu fu sani, abi a gwenti fu sport èn sorgu taki yu e sribi nofo.​—w16.12, blz. 22, 23.

„Gado tyari [Heinok] gowe, so taki a no ben o abi fu si dede.” (Hebr. 11:5) Fa a du dati?

A gersi leki Yehovah meki Heinok dede sondro taki a sabi taki a e dede.​—wp17.1, blz. 12, 13.

Fu san ede a prenspari fu abi sakafasi?

Wan sma di abi sakafasi no e denki taki a bun moro trawan èn a sabi taki a no man du son sani. Te wi abi a yoisti denki fu wisrefi, dan dati o meki taki wi e libi bun nanga trawan èn taki wi no e denki tumusi furu fu wisrefi.​—w17.01, blz. 18.

Sortu buweisi de taki Gado tiri den brada di ben e teki fesi na ini na organisâsi na ini a fosi yarihondro neleki fa a e tiri den memre fu a Tiri Skin na ini a ten disi?

Santa yeye yepi den fu frustan den tru tori fu Bijbel. Den ben abi a frantwortu fu tiri a preikiwroko èn engel ben yepi den nanga a wroko dati. Èn den ben e frutrow tapu Gado Wortu te den ben e teki bosroiti. Na so a de tu na ini a ten disi.​—w17.02, blz. 26-28.

San na fo sani di e yepi wi fu si o furu waarde a lusu-paiman abi gi wi?

Wi musu aksi wisrefi den fo sani disi: Suma gi wi a kado?, Fu san ede a sma gi wi a kado?, San a sma ben musu du fu man gi wi a kado? Èn fa a kado disi e tapu wan bigi nowtu?​—wp17.2, blz. 4-6.

Te wan Kresten teki wan bosroiti kaba, dan a mag kenki prakseri?

A tru taki wi musu du san wi pramisi. Ma son leisi a bun fu kenki wan bosroiti di wi teki kaba. Di Yehovah si taki den Ninefeisma sori berow, dan Yehovah teki wan tra bosroiti. Son leisi a kan de fanowdu taki wi e teki wan tra bosroiti tu fu di wan situwâsi kenki noso fu di wi kon sabi nyun sani.​—w17.03, blz. 16, 17.

Fu san ede a no bun fu taki ogri fu trawan?

Te wi e taki ogri fu trawan, dan a problema kan kon moro bigi. Awinsi wi abi leti, noso awansi wi fowtu, a no o yepi noiti te wi e taki ogri fu trawan.​—w17.04, blz. 21.