Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2017

Yehovah e trowstu wi na ini ala sortu banawtu

Yehovah e trowstu wi na ini ala sortu banawtu

„A Gado fu ala trowstu, . . . e trowstu wi te wi de na ini ala sortu banawtu.”​—2 KOR. 1:3, 4.

SINGI: 38, 56

1, 2. Fa Yehovah e trowstu wi te problema e miti wi èn sortu dyaranti a Wortu fu en e gi wi?

WAN yongu brada ben prakseri 1 Korentesma 7:28, pe skrifi taki den wan di trow „o kisi banawtu na ini den libi”. A yongu brada disi taki nanga wan owruman di trow èn di ben owru moro en. A aksi en: „San na a ’banawtu’ disi èn san mi musu du efu mi kisi banawtu na ini mi trowlibi?” Fosi na owruman piki na aksi disi, a aksi a yongu brada fu poti prakseri na wan tra sani di na apostel Paulus skrifi. A sori en taki Yehovah na „a Gado fu ala trowstu, di e trowstu wi te wi de na ini ala sortu banawtu”.​—2 Kor. 1:3, 4.

2 A tru taki Yehovah na wan lobi-ati Papa di e trowstu wi te problema e miti wi. Kande yu srefi ondrofeni furu leisi fa Gado yepi yu èn fa a gi yu rai nanga yepi fu a Wortu fu en. Wi kan de seiker taki a abi a bun fu wi na prakseri, neleki fa a ben wani dati gi den futuboi fu en na ini owruten.​—Leisi Yeremia 29:11, 12.

3. Sortu aksi wi o luku now?

 3 A no de fu taki dati wi o sabi moro bun fa fu pasa problema noso tesi, te wi sabi fu san ede den sani disi e miti wi. Na so a de tu te wi e kisi problema na ini a trowlibi noso na ini wi osofamiri. San na wan tu sani di kan meki taki wi e kisi ’banawtu na ini wi libi’, soleki fa Paulus ben taki? Sortu eksempre fu Bijbel ten èn fu a ten disi kan yepi wi fu feni a trowstu di wi abi fanowdu? Te wi sabi den sani disi, dan dati o yepi wi fu horidoro.

PROBLEMA NA INI A TROWLIBI

4, 5. San na wan tu sani di e meki sma kisi „banawtu na ini den libi”?

4 Bijbel e sori san Gado taki baka di a meki a fosi man nanga uma: „Wan man o gowe libi en papa nanga en mama. A o tai hori na en wefi èn den o tron wán skin” (Gen. 2:24). Na dati Yehovah taki di a trow a fosi man nanga uma. Ma a no de fu taki dati wi alamala na sondusma (Rom. 3:23). Dati meki te wan man nanga wan uma e trow, dan den musu fruwakti taki den o kisi problema na ini a trowlibi. Fu eksempre, furu tron a de so taki fosi wan uma trow, a musu gi yesi na en papa nanga mama, ma te a trow, a musu saka ensrefi na ondro en masra. Gado gi wan masra a frantwortu fu de na ede fu en wefi (1 Kor. 11:3). A sani disi no makriki gi son masra nanga wefi di no trow so langa ete. Soleki fa Gado Wortu e taki, wan wefi musu frustan taki now en masra na en ede na presi fu en papa nanga mama. Wan tra sani di kan tron wan tesi, na taki masra nanga wefi e kisi problema tu nanga a papa nanga mama fu a trowpatna fu den.

5 Ma te wan wefi e taigi en masra taki a de nanga bere, dan nofo tron disi e tyari tra broko-ede kon. Aladi furu trowpaar e prisiri te den o kisi wan pikin, toku den e broko den ede efu ala sani o waka bun èn efu a pikin o de gosontu te a gebore. Den sabi tu taki den o abi moro moni fanowdu fu man sorgu a pikin. Den o abi fu tyari moro kenki kon te a pikin gebore. Kande a mama e poti ala en prakseri na a beibi. Furu masra e firi taki a wefi fu den no abi ten moro gi den fu di a e luku soso a beibi. Ma wan nyun papa e kisi nyun frantwortu tu fu di ete wan sma de now di a musu sorgu.

6-8. Fa wan trowpaar kan firi te den no man kisi pikin?

6 Son trowpaar e kisi fu du nanga wan tra sortu banawtu. Den e angri fu kisi pikin ma den no man. Te a wefi no e kon de nanga bere, dan kande a e firi brokosaka srefisrefi. A tru taki te wan sma trow noso te a abi pikin, dan dati no wani taki dati a no o abi broko-ede. Ma te wan sma no man kisi pikin, dan dati na wan heri tra sortu ’banawtu na ini a libi’ (Odo 13:12). Na ini Bijbel ten a ben de wan syen te wan sma no ben man kisi pikin. Rakel, a wefi fu Yakob, ben e sari fu di en sisa ben abi pikin aladi en srefi no ben abi (Gen. 30:1, 2). Na ini kondre pe sma gwenti abi bigi osofamiri, furu sma e aksi den zendeling di e dini drape fu san ede den no abi pikin. Awansi fa den e sori den sma fu san ede den no abi pikin ete, toku sma e taigi den: „Ke, wi o aksi Gado fu gi yu wan pikin!”

7 Luku wan tra eksempre. Wan sisa na ini Ingrisikondre ben angri fu kisi wan pikin. Di a kon si taki a no ben o man kisi pikin moro, dan a ben e firi brokosaka. Dati meki en nanga en masra bosroiti fu teki wan tra sma pikin kweki leki den eigi pikin. Ma a taki: „Toku mi ben e sari wan pisi ten. Mi ben sabi taki  te mi ben o kweki wan tra sma pikin, dan dati no ben o de a srefi leki te mi ben o kisi mi eigi pikin.”

8 A tru taki Bijbel e sori taki te wan Kresten uma „meki pikin, dan disi o kibri en” (1 Tim. 2:15). Ma disi no wani taki dati wan uma o kisi têgo libi fu di a kisi pikin noso fu di a e kweki pikin. Na presi fu dati, a tekst dati e sori taki wan uma di abi pikin nanga wan oso fu sorgu, no o abi ten fu taki sma tori èn fu bumui na ini tra sma libi (1 Tim. 5:13). Ma toku a kan kisi banawtu ete na ini en trowlibi èn na ini en osofamiri.

Fa wan sma kan feni trowstu te wan lobiwan fu en dede? (Luku paragraaf 9, 12)

9. San na wan tra banawtu di sma di trow kan kisi?

9 Ete wan banawtu di sma kan kisi na ini a trowlibi, na te wan trowpatna e dede. A no de fu taki dati disi na wan hebi tesi èn kande a wan patna no ben fruwakti taki a sani disi ben o miti en. Kresten abi a tranga bribi taki den dedewan o kisi wan opobaka, soleki fa Yesus pramisi (Yoh. 5:28, 29). Fa a howpu dati e yepi a trowpatna di tan na baka? A howpu disi e trowstu en srefisrefi. Disi na wan tra fasi fa wi lobi Tata e gebroiki a Wortu fu en fu yepi èn fu trowstu den wan di de na ini banawtu. Meki wi go luku now fa wan tu fu den futuboi fu Gado ben kisi wini fu a trowstu di Yehovah gi den.

WI E KISI TROWSTU TE TESI E MITI WI

10. Fa Hana feni trowstu? (Luku a prenki na a bigin fu na artikel.)

10 Hana, a lobi wefi fu Elkana, ben kisi wan hebi tesi. En srefi no ben kisi pikin, aladi Penina, a tra wefi fu Elkana ben kisi furu pikin. (Leisi 1 Samuel 1:4-7.) „Yari go yari kon” Penina ben e tanteri Hana. A sani disi meki taki Hana ben e pina èn ben e sari srefisrefi. A taki nanga Yehovah na ini begi fu man feni trowstu. Iya, a „begi Yehovah wan heri pisi ten”. A ben e fruwakti taki Yehovah ben o piki a begi fu en? A ben musu fu de so taki na dati a ben howpu. Awansi fa a no fa „a no ben de nanga wan sari fesi moro” (1 Sam. 1:12, 17, 18). A ben abi a frutrow taki Yehovah ben o meki a kisi wan pikin noso taki a ben o trowstu en na wan tra fasi.

11. Fa wi kan kisi trowstu te wi e begi?

11 Solanga wi na sondusma na ini a grontapu disi di Satan e tiri, wi o tan kisi tesi nanga problema (1 Yoh. 5:19). Ma a bun fu sabi taki Yehovah na „a Gado fu ala trowstu”! Wán fasi fa wi kan kisi yepi te wi de na ini banawtu, na te wi e begi Gado. Hana ben begi Yehovah fu taigi en san de na tapu en ati. Te wi de na ini banawtu, wi musu du a srefi sani tu. Wi no musu taigi Yehovah nomo fa wi e firi. Wi musu begi en fayafaya, iya, wi musu taki nanga en komoto fu wi ati fu sori en fa wi e firi.​—Fil. 4:6, 7.

12. San yepi Ana fu de koloku?

12 Awansi wi e firi sari srefisrefi fu di wi no abi pikin noso fu di wan lobiwan fu wi dede, toku wi kan feni trowstu. Na ini a ten fu Yesus, na umaprofeiti Ana ben lasi a masra fu en na ini dede baka di den ben trow seibi yari nomo. Bijbel no e taki dati den ben abi pikin. Ma san Ana ben e du di a ben abi 84 yari? Lukas 2:37 e taki: „Ala ten a ben de na ini a tempel. Dei nanga neti a ben e go drape fu anbegi Gado, fu faste, èn fu begi fayafaya.” Iya, Ana feni trowstu èn a ben de koloku fu di a ben e anbegi Yehovah.

13. Gi wan eksempre fu sori fa mati kan de wan trowstu gi wi, awansi famiriman no e trowstu wi.

13 Wi kan feni bun mati te wi abi demakandra  nanga wi brada nanga sisa na ini a gemeente (Odo 18:24). Paula ben abi feifi yari di en mama gowe libi a tru anbegi. A ben e firi sari èn a no ben makriki gi en fu pasa a tesi disi. Ma Ann, wan pionier sisa na ini a gemeente, gi en deki-ati èn a yepi en na wan lobi-ati fasi fu tan krosibei na Yehovah. „Aladi Ann no ben de mi famiri toku a lobi di a sori gi mi ben de wan bigi yepi gi mi èn dati yepi mi fu tan dini Yehovah”, na so Paula e fruteri. Paula e dini Yehovah ete. A breiti tu taki a e dini Yehovah baka makandra nanga en mama. Ann, a pionier sisa, breiti tu taki a ben man yepi Paula fu tan dini Yehovah.

14. Sortu blesi wi kan kisi te wi e trowstu trawan?

14 A moi fu sabi taki te wi e poti prakseri na trawan, dan nofo tron dati e yepi wi fu frigiti wi eigi problema. Furu sisa, awansi den trow noso den no trow, sabi taki den e wroko makandra nanga Gado te den e preiki a bun nyunsu èn a sani disi e gi den furu prisiri. Den e du a wani fu Gado fu di den wani gi grani na en. Gi son brada nanga sisa, a preikiwroko na wan bigi yepi srefi fu di a e meki den firi bun. A no de fu taki dati te wi e wroko makandra nanga wi brada nanga sisa fu poti prakseri na sma na ini wi birti èn na ini a gemeente, dan dati e tyari wánfasi  kon na wi mindri (Fil. 2:4). Na apostel Paulus ben de wan bun eksempre. Gi den sma na ini a gemeente Tesalonika a kon de leki ’wan mama di e gi en eigi pikin bobi’. A ben de leki wan papa tu gi den.​—Leisi 1 Tesalonikasma 2:7, 11, 12.

TROWSTU GI DEN WAN NA INI NA OSOFAMIRI

15. Suma abi a frantwortu fu gi pikin leri?

15 A prenspari tu taki wi e trowstu èn e yepi osofamiri. Ten na ten, sma di no e dini Gado so langa ete e aksi lepi preikiman fu sori den fa den kan studeri moro bun nanga den pikin fu den. Kande den e aksi den preikiman disi fu studeri Bijbel nanga den yongu pikin fu den. Bijbel e sori taki na a fosi presi na papa nanga mama abi a frantwortu fu gi den pikin fu den leri (Odo 23:22; Ef. 6:1-4). Son leisi a de fanowdu taki trawan e yepi wan papa nanga mama èn a papa nanga mama e warderi dati tu. Ma toku papa nanga mama no kan libi a frantwortu dati gi trawan. A prenspari taki den abi a gwenti fu taki nanga den pikin fu den, so taki den kan kon sabi den bun.

16. San wi musu hori na prakseri te wi e yepi pikin?

16 Efu wan papa noso mama bosroiti fu aksi wan sma fu studeri nanga a pikin fu en, dan a sma dati no musu pruberi fu teki a frantwortu fu a papa nanga mama abra. Son leisi wan Kotoigi musu studeri nanga pikin aladi a papa nanga mama fu den no e anbegi Yehovah. Ma a Kotoigi disi musu hori na prakseri taki aladi a e studeri nanga den pikin, toku en a no den papa noso mama. Te wi e studeri nanga den pikin dati, dan a ben o bun fu studeri na den oso, aladi a papa noso mama fu den, noso wan tra lepi Kresten de na ini a birti. Wi kan hori a studie tu na wan presi pe tra sma man si san wi e du. Na a fasi dati nowan sma kan kisi wan fowtu denki. Wi e howpu taki te fu kaba a papa noso mama fu den pikin disi o teki a frantwortu na en tapu fu gi den pikin fu en leri fu Yehovah.

17. Fa pikin kan de wan trowstu gi a famiri fu den?

17 Te yonguwan e leri fu lobi Gado èn fu gi yesi na den rai fu en, dan den kan de wan trowstu gi a famiri fu den. Den o de wan trowstu te den e sori lespeki gi a papa nanga mama fu den èn te den e yepi den na tra fasi. Boiti dati, te pikin e tan gi yesi na Yehovah, dan disi na wan deki-ati gi a heri famiri. Fosi a ten fu a Frudu, Lamek di ben de wan bakapikin fu Set, ben e anbegi Yehovah. A man dati ben taki fu en manpikin Noa: ’A o meki wi kisi trowstu fu a tranga wroko di wi e du èn fu a pina di wi e pina fu wroko a gron di Yehovah fluku.’ A profeititori dati kon tru di a gron di Gado ben fluku ben man gi nyanyan baka (Gen. 5:29; 8:21). Pikin di e tan meki muiti fu anbegi a tru Gado kan de wan trowstu gi den famiri tu fu di den e yepi den fu horidoro te den e kisi tesi now èn na ini a ten di e kon.

18. San kan yepi wi fu tan horidoro awansi sortu tesi wi e kisi?

18 Milyunmilyun sma di de na ini ala sortu banawtu e feni trowstu nownow kaba fu di den e begi, fu di den e denki dipi fu den eksempre na ini Bijbel èn fu di den abi demakandra nanga a pipel fu Yehovah. (Leisi Psalm 145:18, 19.) Te wi sabi taki Yehovah na a sma di e trowstu wi ala ten, dan dati o yepi wi fu tan horidoro, awansi sortu tesi e miti wi now noso na ini a ten di e kon.