Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2017

Warderi den gudu di Gado gi wi

Warderi den gudu di Gado gi wi

„Pe un gudu de, na drape un ati sa de tu.”​—LUK. 12:34.

SINGI: 153, 104

1, 2. (a) San na dri gudu di Yehovah gi wi? (b) San wi o luku na ini na artikel disi?

YEHOVAH na a moro gudu sma fu hemel nanga grontapu (1 Kron. 29:11, 12). Leki wan lobi-ati Papa, Gado de klariklari fu gi sma den warti gudu fu en te den abi warderi gi den. Dati meki wi de nanga tangi taki Yehovah gi wi gudu soleki (1) Gado Kownukondre, (2) a diniwroko fu wi di e kibri sma libi, èn (3) den warti tru tori di skrifi na ini a Wortu fu en! Ma efu wi no e luku bun, wi kan lasi warderi gi den gudu disi. Fu taki en leti, a ben o de neleki wi e trowe den gowe. Efu wi wani tan abi den gudu disi, dan wi musu gebroiki den bun èn wi musu tan tranga a lobi di wi abi gi den. Yesus ben taki: „Pe un gudu de, na drape un ati sa de tu.”​—Luk. 12:34.

2 Meki wi luku fa wi kan kon abi moro lobi nanga warderi gi a Kownukondre, gi wi diniwroko èn gi den tru leri fu Gado. Te wi e du dati, dan denki dipi san yu kan du fu kon abi moro lobi gi den gudu disi.

 GADO KOWNUKONDRE DE LEKI WAN DIRI PERI

3. San a bisnisman na ini na agersitori fu Yesus ben de klariklari fu du fu man abi a diri peri? (Luku a prenki na a bigin fu na artikel.)

3 Leisi Mateyus 13:45, 46. Yesus ben fruteri wan agersitori fu wan bisnisman di ben e suku peri. A no de fu taki dati na ini den yari di a man disi ben e du bisnis, a ben bai èn seri hondrohondro peri kaba. Ma now a ben feni a peri di ben warti so te taki en ati ben e prisiri di a si en. Ma a ben o abi fu seri ala san a ben abi fu man bai a peri disi. Disi e sori taki a peri ben warti srefisrefi gi en.

4. Efu wi lobi Gado Kownukondre neleki fa a bisnisman ben lobi a peri, dan san wi o du?

4 San wi e leri fu na agersitori disi? Den tru tori fu Gado Kownukondre de leki wan diri peri. Efu wi lobi den tru tori disi neleki fa a bisnisman ben lobi a peri, dan wi o de klariklari fu libi iniwan sani na baka fu man tron wan borgu fu a Kownukondre. (Leisi Markus 10:28-30.) Wi o taki now fu tu sma di ben du dati.

5. Fa Sakeyus sori taki a ben wani du ala sani fu man tron wan borgu fu Gado Kownukondre?

5 Sakeyus ben de edeman fu den belastingman. A ben kon gudu fu di a ben e bedrigi sma soso fu puru den moni na den anu (Luk. 19:1-9). Ma di a man dati yere fa Yesus preiki a Kownukondre boskopu, dan a kon frustan taki den sani di a ben yere ben prenspari srefisrefi. Dati meki a no draidrai, ma wantewante a bari: „Masra, mi o gi den pôti sma afu fu den sani di mi abi. Efu mi bedrigi wan sma fu teki en moni, dan mi o pai en fo tron moro furu.” A ben de klariklari fu gi den sma a moni baka di a ben puru na den anu èn a no bedrigi sma moro.

6. Sortu kenki Rose tyari kon fu man tron wan borgu fu Gado Kownukondre èn fu san ede a du dati?

6 Wan tu yari pasa, wan uma di wi sa kari Rose, kon yere a Kownukondre boskopu. Na a ten dati a ben e hori nanga wan uma. A ben de edeman fu wan organisâsi di ben e feti gi den reti fu sma di e libi wan homo-libi. Ma di Rose studeri Bijbel, a kon si o prenspari den tru tori fu Gado Kownukondre de. A kon si tu taki a ben o abi fu tyari bigi kenki kon (1 Kor. 6:9, 10). A bosroiti fu saka leki presidenti fu na organisâsi èn fu no hori moro nanga a tra uma. Rose teki dopu na ini 2009 èn a yari baka dati a bigin dini leki gewoon pionier. A lobi di a ben abi gi Yehovah èn gi a Kownukondre fu en ben tranga moro den sondu lostu fu en.​—Mark. 12:29, 30.

7. San o yepi wi fu tan lobi Gado Kownukondre nanga wi heri ati?

7 A tru taki furu fu wi tyari bigi kenki kon fu man tron borgu fu Gado Kownukondre (Rom. 12:2). Ma toku wi no kaba ete. Wi musu tan luku bun taki wi no e kon lobi tra sani moro a Kownukondre. Kande wi sa bigin feti baka gudu, noso kande wi o meki den sondu lostu fu a skin basi wi (Odo 4:23; Mat. 5:27-29). Dati meki Yehovah gi wi ete wan warti gudu di kan yepi wi fu tan lobi a Kownukondre fu en nanga wi heri ati.

A DINIWROKO FU WI DI E KIBRI SMA LIBI

8. (a) Fu san ede na apostel Paulus ben kari a diniwroko fu wi wan ’gudu na ini prapi fu klèidoti’? (b) Fa Paulus sori taki a ben abi warderi gi a diniwroko fu en?

8 Memre taki Yesus gi wi a frantwortu fu preiki a bun nyunsu fu Gado Kownukondre èn fu gi sma leri fu en (Mat. 28:19, 20). Na apostel Paulus ben frustan  taki a diniwroko warti srefisrefi. A ben taki dati a diniwroko disi di abi fu du nanga a nyun frubontu, de leki wan ’gudu na ini prapi fu klèidoti’ (2 Kor. 4:7; 1 Tim. 1:12). Fu di wi na sondusma, meki wi de leki prapi fu klèidoti. Ma a boskopu di wi e preiki kan tyari têgo libi kon gi wi èn gi den sma di e arki wi. Paulus ben sabi disi èn fu dati ede a taki: „Mi e du ala sani fu a bun nyunsu ede, so taki mi kan prati en nanga trawan” (1 Kor. 9:23). Iya, a lobi di Paulus ben abi gi a preikiwroko ben meki taki a ben e wroko tranga fu meki disipel. (Leisi Romesma 1:14, 15; 2 Timoteyus 4:2.) Dati yepi en fu horidoro di a kisi hebi tesi (1 Tes. 2:2). Fa wi kan sori taki wi abi a lobi dati gi a diniwroko?

9. San na wan tu fasi fa wi kan sori taki wi abi warderi gi a diniwroko?

9 Wan fasi fa Paulus sori taki a ben abi warderi gi a diniwroko, na taki a ben e suku okasi fu preiki gi trawan. Neleki den apostel nanga den fosi Kresten, wi e suku okasi fu preiki gi sma, wi e preiki na strati, èn oso fu oso (Tori 5:42; 20:20). Efu a situwâsi fu wi e gi pasi, dan wi kan luku fa wi kan du moro na ini a preikiwroko. Kande wi kan dini leki yepipionier noso leki gewoon pionier. Wi kan leri wan tra tongo tu, wi kan froisi go na wan tra kontren na ini wi eigi kondre, noso wi kan froisi go na wan tra kondre.​—Tori 16:9, 10.

10. Sortu blesi Irene kisi fu di a ben de nomonomo fu preiki a bun nyunsu?

10 Luku na eksempre fu Irene, wan sisa fu Amerkankondre. A sisa disi di no trow ben e angri fu preiki gi sma fu Rosiakondre di ben kon tan na Amerkankondre. Di a bigin du dati na ini 1993, sowan 20 preikiman nomo ben de na ini a Rosiatongo grupu na ini a foto New York. Sowan 20 yari langa Irene wroko tranga fu preiki na ini a tongo dati. A e taki: „Te nanga now mi no man taki Rosiatongo so bun leki den sma dati.” Toku Yehovah blesi en nanga trawan fu di den ben de fayafaya. Na ini a ten disi, siksi Rosiatongo gemeente de na ini New York. Tinafeifi fu den sma di Irene ben studeri nanga den teki dopu. Sonwan fu den e dini na Betel, leki pionier, noso leki owruman. Irene e taki: „Te mi e prakseri den tra sani di mi ben o man du, dan mi no denki taki wan fu den ben o gi mi moro prisiri.” Iya, a abi warderi gi a diniwroko fu en!

Yu e si a diniwroko fu yu leki wan gudu èn yu e teki prati na en ibri wiki? (Luku paragraaf 11, 12)

11. Sortu bun bakapisi a abi te wi e tan preiki aladi sma e frufolgu wi?

11 Efu wi abi warderi gi a diniwroko fu wi, dan wi o de leki na apostel Paulus di ben e tan preiki aladi sma ben e frufolgu en (Tori 14:19-22). Na ini a pisi ten fu 1930 te go miti 1944, den brada fu wi na ini Amerkankondre ben e kisi hebi frufolgu. Ma neleki Paulus den tan tanapu  kánkan èn den tan preiki. Fu di den brada ben wani tan anbegi Gado fri, meki den tyari furu afersi go na fesi krutu. Na ini 1943, Brada Nathan H. Knorr ben taki fu wan fu den afersi di wi ben wini na a Hei Krutubangi fu Amerkankondre. A ben taki: „Na fu di unu tan feti meki wi wini den afersi disi. Efu a preikiman no ben tan preiki, dan wi no ben o abi fu tyari krutu-afersi go na a Hei Krutubangi. Ma na fu di yu leki preikiman, sobun, ala brada nanga sisa na heri grontapu, tan horidoro èn no gi abra, meki wan kaba kon na a frufolgu di sma frufolgu wi. Na fu di a pipel fu Masra tanapu kánkan, meki wi wini den krutu-afersi.” Fu di brada nanga sisa na ini tra kondre ben tanapu kánkan tu, meki den wini den srefi sortu tori disi na fesi krutu. Iya, a lobi di wi abi gi a diniwroko kan tyari wan kaba kon na a frufolgu di sma e frufolgu wi.

12. San yu o pruberi fu du na ini a diniwroko fu yu?

12 Te wi e si a diniwroko leki wan warti gudu di wi kisi fu Yehovah, dan wi no o suku nomo fu meki yuru na ini a preikiwroko. Na presi fu dati, wi o du ala san wi man „fu preiki finifini fu a bun nyunsu” (Tori 20:24; 2 Tim. 4:5). Ma san wi o leri trawan? Wi o luku ete wan gudu di Gado gi wi.

DEN WARTI TRU TORI DI WI E KON SABI

13, 14. San na a „maksin” di Yesus ben taki fu en na Mateyus 13:52 èn fa wi kan furu en nanga moro sani?

13 Ete wan gudu di Yehovah gi wi, na den tru tori fu en di wi kon sabi. Yehovah na a Gado di e taki san tru (2 Sam. 7:28; Ps. 31:5). Leki wan lobi-ati Papa, a e meki den sma di e lespeki en kon sabi den tru tori fu en. Sensi a fosi leisi di wi kon sabi den tru tori fu Gado, wi kon sabi moro sani fu en nanga yepi fu a Bijbel. Wi kon sabi tru tori tu nanga yepi fu den buku fu wi, den kongres, den kring konmakandra, nanga den konmakandra di e hori ibri wiki. Te fu kaba wi kon abi san Yesus e kari wan „maksin” fu owru sani nanga nyun sani. (Leisi Mateyus 13:52.) Yehovah o yepi wi fu tyari warti tru tori kon na ini wi „maksin” efu wi e suku fu feni den tru tori dati neleki fa wi e suku gudu di kibri. (Leisi Odo 2:4-7.) Fa wi kan du dati?

14 Wi musu abi a gwenti fu studeri Gado Wortu nanga den buku fu wi èn wi musu ondrosuku sani finifini. Disi o yepi wi fu kon sabi tru tori di wi kan si leki „nyun” sani fu di wi no ben sabi den ete (Yos. 1:8, 9; Ps. 1:2, 3). A fosi Ingrisitongo Waktitoren di ben kon na doro na ini yuli 1879 ben taki: „Den tru tori fu Gado de leki wan pikin bromki di e gro na mindri takru wiwiri. Neleki fa takru wiwiri e suku fu tyokro a pikin bromki disi, na so falsi leri e suku fu tapu pasi gi den tru tori fu Gado. Efu yu wani feni a pikin bromki disi dan yu musu tan suku en. . . . Efu yu wani piki en, dan yu musu bukundu fu piki en. No breiti nanga wán bromki nomo. . . . Suku fu feni moro nanga moro fu den.” Iya, wi musu du ala san wi man fu kon sabi moro tru tori fu Gado.

15. Fu san ede wi kan si son tru tori leki „owru” sani èn sortuwan fu den prenspari srefisrefi gi yu?

15 Di wi bigin abi demakandra nanga a pipel fu Gado, dan wi kon sabi wan tu prenspari tru tori. Wi kan si den tori disi leki „owru” sani fu di den ben de den fosi sani di wi leri. San na den tru tori disi? Wi kon sabi taki Yehovah na wi Mekiman èn a sma di gi wi libi, èn wi leri tu san a abi na prakseri gi libisma. Wi kon sabi tu taki Gado lobi wi so te taki a gi en Manpikin leki frulusu-ofrandi so taki wi kan  kisi frulusu fu sondu nanga dede. Wan tra sani di wi kon sabi, na taki a Kownukondre fu en o tyari wan kaba kon na ala pina èn taki wi abi a howpu fu libi fu têgo na ondro a tiri fu a Kownukondre di o tyari freide kon.​—Yoh. 3:16; Openb. 4:11; 21:3, 4.

16. San wi musu du te a fasi fa wi ben frustan wan tru tori fu Bijbel kon kenki?

16 Ten na ten wan kenki e kon na ini a fasi fa wi e frustan wan Bijbel profeititori noso wan Bijbeltekst. Te wi e kon sabi den nyun sani disi, dan wi musu teki ten fu studeri den bun èn wi musu denki dipi fu den (Tori 17:11; 1 Tim. 4:15). Wi no musu pruberi fu frustan nomo san na a kenki di kon, ma wi musu frustan sosrefi ala den pikinpikin sani di kenki. Na so wi o de seiker taki wi poti a nyun tori na ini a maksin fu wi. Fu san ede a bun fu du disi?

17, 18. Fa santa yeye kan yepi wi?

17 Yesus ben leri taki a yeye fu Gado kan yepi wi fu memre den sani di wi leri (Yoh. 14:25, 26). Fa a sani disi kan yepi wi leki preikiman fu a bun nyunsu? Luku na ondrofenitori fu wan brada di nen Peter. Na ini 1970 a ben abi 19 yari èn a no ben e dini so langa ete na Betel fu Ingrisikondre. Di a ben e preiki oso fu oso, a miti wan man di ben abi sowan 50 yari. A man disi ben abi wan bigi barba. Peter aksi a man efu a ben wani leri moro fu Bijbel. Fu di a man no ben man bribi taki Peter aksi en a sani dati, meki a taigi en krin taki a ben e taki nanga wan Dyu rabbi. Fu di a man ben wani luku efu Peter ben sabi a Bijbel, meki a aksi en: „So mi boi, na ini sortu tongo a buku Danièl skrifi?” Peter piki en: „Wan pisi fu a buku ben skrifi na ini Arameisitongo.” Peter e taki: „A rabbi no ben man bribi taki mi ben sabi a piki. Ma mi srefi no ben man bribi tu taki mi ben sabi en. Fa a du kon taki mi ben sabi a piki? Di mi go na oso mi luku den Waktitoren nanga Ontwaakt! fu den mun na fesi èn mi feni wan artikel di e fruteri taki a buku Danièl ben skrifi na ini Arameisitongo” (Dan. 2:4). Iya, a santa yeye kan yepi wi fu memre sani di wi ben leisi kaba èn di wi poti na ini a maksin fu wi.​—Luk. 12:11, 12; 21:13-15.

18 Efu wi e warderi a koni di Yehovah e gi wi, dan wi o tan meki muiti fu furu a maksin fu wi nanga moro tru tori. O moro wi e kon abi lobi nanga warderi gi a koni fu Yehovah, o moro wi o man preiki a boskopu bun.

KIBRI DEN GUDU FU YU

19. Fu san ede wi musu kibri den gudu di Gado gi wi?

19 Satan nanga a grontapu fu en e tan meki muiti fu meki wi lasi warderi gi den gudu di kari na ini na artikel disi. Dati meki wi alamala musu luku bun. A kan pasa makriki taki wi e angri fu abi wan kefalek wroko, wan gudu libi, noso kande wi e bigin prodo nanga den gudu di wi abi. Na apostel Yohanes e memre wi taki a grontapu disi o pasa gowe nanga den lostu fu en (1 Yoh. 2:15-17). Dati meki wi musu sorgu taki wi no e lasi a lobi nanga a warderi di wi abi gi den gudu di Gado gi wi.

20. San yu o du fu man kibri den gudu di yu kisi fu Gado?

20 De klariklari fu libi iniwan sani na baka di kan meki taki yu lasi a lobi di yu abi gi Gado Kownukondre. Tan preiki fayafaya, èn no lasi warderi gi a diniwroko di e kibri sma libi. Tan du tranga muiti fu kon sabi moro tru tori fu Gado. Te yu e du disi, dan yu o kon abi moro nanga moro ’bun sani na hemel. Drape fufuruman no man doro èn woron no man nyan den. Bika pe un gudu de, na drape un ati sa de tu’.​—Luk. 12:33, 34.