Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2017

No luku wan sma fesi ma luku en ati

No luku wan sma fesi ma luku en ati

DON, wan Yehovah Kotoigi na ini Kanada, e du tranga muiti fu taki nanga sma di e libi na strati. Don e fruteri fu wan fu den sma disi: „Peter, wan man di ben e libi na strati, ben de wan fu den moro doti man di mi miti na ini den bakabirti fu a foto. A ben abi fruferi maniri èn dati meki sma no ben e kon na ini en birti. A ben gwenti weigri te sma ben wani du wan bun gi en.” Ma moro leki 14 yari, Don tan du muiti fu sori switifasi gi a man disi di ben e libi na strati.

Wan dei, Peter aksi Don: „Fu san ede yu e tan meki muiti fu yepi mi? Tra sma no e fruferi mi. Fu san ede yu e broko yu ede nanga mi?” Don gebroiki dri Bijbeltekst fu pruberi fu doro na ati fu Peter. Na a fosi presi, a aksi Peter efu a ben sabi taki Gado abi wan nen èn a aksi en fu leisi a nen langalanga komoto fu Bijbel na ini Psalm 83:18. Baka dati, Don sori Peter fu san ede a ben e broko en ede nanga en. A meki Peter leisi Romesma 10:13, 14 pe skrifi taki „ibri sma di e kari a nen fu Yehovah o kisi frulusu”. Te fu kaba, Don leisi Mateyus 9:36, dan a aksi Peter fu leisi en gi ensrefi. A vers dati e taki: „Di a si ala den sma, [Yesus] ben e sari den, bika sma ben e pina den èn den ben e waka bruyabruya leki skapu di no abi skapuman.” A sani dati meki Peter ai furu nanga watra, èn a aksi Don: „Mi na wan fu den skapu dati?”

Peter bigin tyari kenki kon. A wasi en skin, a koti en barba, èn a weri den bun krosi di Don ben gi en. Peter tan sorgu ensrefi èn a no ben doti moro.

Peter ben gwenti skrifi na ini wan buku fa en libi ben e waka. Na a bigin fu a buku a ben skrifi soso fu sari sani, ma bakaten den sani di a ben skrifi ben de heri tra fasi. Wan pisi na ini a buku ben taki: „Tide mi kon sabi fa Gado nen. Now, te mi e begi, mi kan begi Yehovah.  Mi breiti taki mi sabi en nen. Don e taki dati Yehovah kan de mi Mati, taki ala ten a e arki mi, awansi o ten èn awansi san pasa.”

Den lasti sani di Peter skrifi ben de gi a brada nanga a sisa fu en. A skrifi:

„Mi no e firi bun tide. Mi denki taki mi skin weri fu di mi kon owru. Ma awansi disi na mi lasti dei, toku mi sabi taki mi o si mi mati [Don] baka na ini Paradijs. Efu unu e leisi disi, dan mi no de moro. Ma efu wan man di unu no sabi kon beri mi, dan taki nanga en èn mi e begi unu, leisi a pikin blaw buku disi [a e taki fu a Bijbelstudie buku di nen „De Waarheid die tot eeuwig leven leidt”]. * A buku e taki dati mi o si mi mati baka na ini Paradijs. Mi e bribi a sani disi nanga mi heri ati. Un lobi brada, Peter.”

Baka a beri Peter en sisa Ummi taki: „Sowan tu yari pasa, Peter kon luku mi. Disi ben de a fosi leisi baka omeni yari taki a ben gersi leki a ben de koloku. A ben e lafu srefi.” Ummi taigi Don: „Mi o leisi a buku bika efu wan sani ben kan naki mi brada en ati so, dan a sani dati musu de wan prenspari sani.” Ummi taki tu dati a ben o studeri a nyun buku San Bijbel e leri wi trutru?, nanga wan Yehovah Kotoigi.

Wi kan leri tu fu no luku sma fesi, ma fu luku den ati. Dati meki wi musu sori trutru lobi gi ala sortu sma èn wi musu abi pasensi nanga den (1 Tim. 2:3, 4). Te wi e du dati, dan wi o man yepi sma leki Peter di abi wan bun ati aladi dati no gersi so. Wi kan de seiker taki Gado di man „si fa na ati de” o meki den tru leri fu Bijbel teki rutu na ini na ati fu sma di abi a yoisti denki.​—1 Sam. 16:7; Yoh. 6:44.

^ paragraaf 7 Yehovah Kotoigi ben e tyari en kon na doro, ma a no e meki moro.