Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2017

Horibaka gi Yehovah leki a Moro Hei Tiriman!

Horibaka gi Yehovah leki a Moro Hei Tiriman!

„Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani.”​—OPENB. 4:11.

SINGI: 112, 133

1, 2. San ibriwan fu wi musu sabi seiker? (Luku a prenki na a bigin fu na artikel.)

SOLEKI fa wi si na ini na artikel na fesi, Didibri feni taki Yehovah no abi a reti fu de a Moro Hei Tiriman, èn taki sani ben o waka moro bun gi libisma efu den ben o tiri densrefi. Yu denki taki Satan abi leti? Kon meki wi taki dati den libisma di wani tiri densrefi ben man libi fu têgo. Yu denki taki sani ben o waka moro bun gi den efu Gado no ben e tiri den? Yu denki taki yu ben o de moro koloku efu yu ben man libi fu têgo sondro taki yu abi fu gi yesi na Gado?

2 Nowan sma man piki den aksi dati gi yu. Ibri sma musu denki a tori disi. Te yu e du dati, dan yu o sabi seiker taki na Gado abi a reti fu tiri hemel nanga grontapu. En na a moro bun tiriman èn a fiti taki wi e horibaka gi en nanga wi heri ati. Bijbel e sori fu san ede wi kan bribi taki na Gado na a Moro Hei Tiriman. Luku san Bijbel e taki fu a reti di Yehovah abi fu tiri hemel nanga grontapu.

NA YEHOVAH ABI A RETI FU TIRI

3. Fu san ede Yehovah wawan abi a reti fu tiri?

3 Na Yehovah wawan abi a reti fu tiri hemel nanga grontapu  fu di en na a almakti Gado nanga Mekiman (1 Kron. 29:11; Tori 4:24). Openbaring 4:11 e taki fu wan fisyun pe den 144.000 kownu di e tiri makandra nanga Krestes e taki: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den sani disi kon de èn na yu meki den.” Iya, fu di na Yehovah meki ala sani, meki na en abi a reti fu tiri libisma nanga den engel.

4. Fu san ede wi no mag opo wisrefi teige Gado, aladi wi abi a grani fu teki wi eigi bosroiti?

4 Satan no meki noti. Dati meki a no abi a reti fu tiri hemel nanga grontapu. Na bigifasi Satan nanga den fosi tu libisma ben abi di den opo densrefi teige Yehovah (Yer. 10:23). A tru taki den ben abi a grani fu teki den eigi bosroiti. Ma disi ben gi den a reti fu no gi yesi na Yehovah? Nôno. A grani di libisma abi fu teki den eigi bosroiti, e meki taki den man teki furu bun bosroiti na ini den aladei libi. Ma disi no e gi den a reti fu opo densrefi teige a Mekiman fu den, a sma di gi den libi. A de krin taki te wi e opo wisrefi teige Yehovah, dan wi no e gebroiki a grani di wi kisi na a yoisti fasi. Wi leki libisma abi a tiri fu Yehovah fanowdu.

5. Fu san ede wi kan de seiker taki den bosroiti fu Gado reti?

5 Wan tra sani de di e sori taki Yehovah abi a reti fu de a Moro Hei Tiriman. Ala ten a e du san reti. A e taki: „Mi, Yehovah, na a sma di e sori sma bun-ati, a sma di e krutu sani na wan reti fasi, èn a sma di e du san reti na grontapu. Na den sani disi mi lobi” (Yer. 9:24). A no abi fu luku den wet di sondu libisma meki, fu kon sabi san bun èn san reti. Ensrefi sabi san na trutru retidu, èn fu dati ede a meki wet gi libisma. Bijbel e taki dati „a fondamenti fu [en] kownusturu na retidu nanga a reti fasi fa [a] e koti krutu”, sobun, wi kan de seiker taki ala den wet, den leri, nanga den bosroiti fu en reti (Ps. 89:14; 119:128). Ma aladi Satan ben taki dati Yehovah a no wan bun tiriman, toku a no ben man seti wan grontapu pe ala sma e du san reti.

6. San na wan fu den sani di e meki taki Yehovah abi a reti fu tiri grontapu?

6 Ete wan sani di e sori taki na Yehovah abi a reti fu tiri, na taki a abi a sabi nanga a koni di de fanowdu fu sorgu gi grontapu. Wan eksempre fu dati, na taki Gado ben gi en Manpikin a koni fu dresi siki di datra no ben man dresi (Mat. 4:23, 24; Mark. 5:25-29). Gi Yehovah, a sani dati no ben de wan wondru. A e frustan san e meki taki sma e kon siki èn a man dresi ibri siki. A man wiki den dedewan tu èn a man sorgu taki rampu no e pasa na grontapu.

7. Fu san ede wi kan taki dati Yehovah koni moro iniwan sma di Satan e tiri?

7 A grontapu disi di Satan e tiri no man sorgu taki freide de na ini den difrenti kondre, noso na heri grontapu. Yehovah wawan sabi fa fu tyari freide kon na heri grontapu (Yes. 2:3, 4; 54:13). Dati meki wi e firi neleki na apostel Paulus di ben taki: „Ai, den blesi, a koni nanga a sabi fu Gado, furu trutru! Wi no man frustan fa a e krutu sani èn wi no man kon sabi fa den pasi fu en de!”​—Rom. 11:33.

YEHOVAH NA A MORO BUN TIRIMAN

8. San e naki yu ati te yu e luku a fasi fa Yehovah e tiri?

8 Boiti taki Bijbel e sori taki Yehovah abi a reti fu tiri, a e sori tu taki en na a moro bun tiriman. Disi de so fu di a e tiri  nanga lobi. A no de fu taki dati a e naki wi ati fu si fa a e tiri. A abi „sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki” (Eks. 34:6). Gado e si wi leki warti sma èn a e sori lespeki gi wi. A e sorgu moro bun gi wi leki fa wi man sorgu wisrefi. Tra fasi leki san Didibri taki, Yehovah no e hori bun sani na baka gi den anbegiman fu en. Iya, a meki en lobi Manpikin dede gi wi so taki wi kan abi a howpu fu libi fu têgo!​—Leisi Psalm 84:11; Romesma 8:32.

9. Fa wi du sabi taki Gado e broko en ede nanga ibri sma?

9 Yehovah no e broko en ede nomo nanga den anbegiman fu en leki grupu, ma a e broko en ede tu nanga ibri anbegiman fu en. Fu eksempre, sowan dri hondro yari langa, Yehovah gebroiki krutuman fu tiri a pipel fu en èn fu wini den feanti fu den. Aladi sani ben bruya na a ten dati, toku a poti prakseri na wan uma di no ben de wan Israelsma. Na uma disi di ben nen Rut, ben libi furu sani na baka fu man tron wan anbegiman fu a tru Gado. Yehovah blesi Rut. A gi en wan masra nanga wan manpikin. Ma dati a no ala. Te Rut o kisi wan opobaka, dan a o kon sabi taki a manpikin fu en ben de wan fu den afo fu a Mesias. Èn prakseri fa a o breiti te a o si taki a tori fu en skrifi na ini wan Bijbel buku di abi en nen!​—Rut 4:13; Mat. 1:5, 16.

10. Fu san ede Yehovah a no wan tiriman di e pina wi?

10 Yehovah no e pina wi èn a no e dwengi wi fu du san a wani. A fasi fa a e tiri wi e gi wi okasi fu de fri èn fu de nanga prisiri (2 Kor. 3:17). David ben taki en so: „En na wan Gado di e kisi furu grani èn di abi bigi glori. Pe a e libi, na drape krakti nanga prisiri de” (1 Kron. 16:7, 27). A psalm skrifiman Etan ben skrifi tu: „Koloku fu den sma di sabi san a wani taki fu bari fu prisiri. Yehovah, den e tan waka na ini a leti di e skèin komoto fu yu fesi. A nen fu yu e meki den firi prisiri heri dei. Na a retidu fu yu e meki den kon moro hei.”​—Ps. 89:15, 16.

11. Fa wi kan tranga a bribi di wi abi taki Yehovah na a moro bun tiriman?

11 Te wi abi a gwenti fu denki dipi fu a bunfasi fu Yehovah, dan dati kan tranga a bribi di wi abi taki en na a moro bun tiriman. Wi o firi neleki a psalm skrifiman di ben taki: „Wán dei na ini den tempel-dyari fu yu, betre moro leki wán dusun yari na wan tra presi” (Ps. 84:10). Fu di Yehovah na wi Mekiman, meki a sabi san wi abi fanowdu fu man de koloku trutru, èn a e du furu sani di e meki taki wi kan de koloku. Iniwan sani di a e aksi fu wi na fu wi eigi bun. Awansi a de fanowdu taki wi tyari kenki kon, toku wi o de koloku ala ten te wi e gi yesi na Yehovah.​—Leisi Yesaya 48:17.

12. Fu san ede wi wani horibaka gi Yehovah leki a Moro Hei Tiriman?

12 Bijbel e sori taki baka a Dusun Yari Tiri fu Krestes, son sma o opo densrefi teige Yehovah, a Moro Hei Tiriman (Openb. 20:7, 8). Fu san ede den o du dati? Na a ten dati, Didibri o pruberi baka fu overtoigi sma taki den kan libi fu têgo sondro fu gi yesi na Gado. A no de fu taki dati a sani disi na wan lei. Ma wan moro prenspari sani de di wi musu aksi wisrefi: Wi ben o bribi a lei dati? Efu wi lobi Yehovah èn efu wi e dini en fu di a abi bunfasi èn fu di a abi a reti fu tiri hemel nanga grontapu, dan wi no o bribi na ogri-ati lei fu Satan kwetikweti. A no de fu taki dati wi wani libi soso na ondro a tiri fu Yehovah, a Moro Hei Tiriman di e tiri wi nanga lobi.

 TAN HORIBAKA GI A MORO HEI TIRIMAN

13. Te wi e du sani soleki fa Gado feni bun, dan fa dati e sori taki wi e horibaka gi en?

13 Yehovah e frudini en taki wi e horibaka gi en leki a Moro Hei Tiriman. Soleki fa wi si, dan na en abi a reti fu tiri, èn en na a moro bun tiriman. Fu sori taki wi e tan horibaka gi Yehovah, dan wi musu tan gi yesi na en èn wi musu dini en nanga wi heri ati. Na sortu tra fasi wi kan horibaka gi en? Wi musu du sani soleki fa Yehovah feni bun. Te wi e du sani soleki fa Yehovah ben o du dati, dan wi e sori taki wi lobi en èn taki wi e horibaka gi a fasi fa a e tiri.​—Leisi Efeisesma 5:1, 2.

14. Fa owruman nanga famiri-edeman kan sori taki den e teki na eksempre fu Yehovah?

14 Bijbel leri wi taki Yehovah e tiri nanga lobi. Dati meki famiri-edeman nanga owruman di lobi a fasi fa Yehovah e tiri, no e tanteri na osofamiri fu den noso sma na ini a gemeente, neleki den na basi. Na presi fu dati, den o teki na eksempre fu Yehovah. Paulus ben e teki na eksempre fu Gado nanga en Manpikin (1 Kor. 11:1). Paulus no ben e gi sma syen èn a no ben e dwengi den fu du sani soleki fa en ben wani. Na presi fu dati, a ben e gi den deki-ati fu du san bun (Rom. 12:1; Ef. 4:1; Fileim. 8-10). Na so Yehovah e du sani. Sobun, na so ala sma di lobi Yehovah èn di e horibaka gi a tiri fu en musu du sani tu.

15. Te wi e lespeki den wan di Gado gi a frantwortu fu teki fesi, dan fa dati e sori taki wi lobi a fasi fa Yehovah e tiri?

15 Fa wi e si den wan di Gado gi a frantwortu fu teki fesi? Te wi de klariklari fu wroko makandra nanga den wan di e teki fesi, dan wi e sori taki wi e horibaka gi Yehovah leki a Moro Hei Tiriman. Awansi wi no e frustan wan bosroiti bun, noso wi no e agri nanga a bosroiti, toku wi wani horibaka gi a fasi fa Gado seti sani. Na ini a grontapu disi sma no de so.  Ma sma di wani horibaka gi a tiri fu Yehovah e horibaka gi den sani di a seti (Ef. 5:22, 23; 6:1-3; Hebr. 13:17). Wi e kisi wini te wi e tyari wisrefi na a fasi disi, fu di Gado abi a bun fu wi na prakseri.

16. Fa den sma di e horibaka gi Gado leki a Moro Hei Tiriman e teki bosroiti?

16 Den bosroiti di wi e teki kan sori tu taki wi e horibaka gi Gado leki a Moro Hei Tiriman. Yehovah no e gi wi wan wet gi ibri situwâsi. Na presi fu dati a e meki wi kon sabi fa a e denki. Fu eksempre, a no taigi Kresten finifini sortu krosi den musu weri. Na presi fu dati, a sori wi taki wi musu weri krosi èn sorgu wisrefi na wan fasi di fiti gi wan Kresten (1 Tim. 2:9, 10). A no wani taki den bosroiti di wi e teki e meki trawan naki futu, noso taki den e meki trawan firi wan fasi (1 Kor. 10:31-33). Te wi e teki bosroiti di e sori taki wi e lespeki a fasi fa Yehovah e denki, dan wi e sori taki wi lobi a fasi fa Yehovah e tiri èn taki wi e horibaka gi en.

Horibaka gi Gado leki a Moro Hei Tiriman te yu e teki bosroiti èn te yu e du sani leki osofamiri (Luku paragraaf 16-18)

17, 18. San na wan tu fasi fa trowpaar kan sori taki den e horibaka gi Yehovah leki a Moro Hei Tiriman?

17 Luku wán fasi fa Kresten trowpaar kan sori taki den e horibaka gi Yehovah leki a Moro Hei Tiriman. Kon meki wi taki dati wan Kresten feni taki a trowlibi moro muilek leki fa a ben fruwakti. Kande a trowlibi fu en no e waka bun kwetikweti. Efu dati de so, dan a ben o bun te a e prakseri a fasi fa Yehovah ben libi nanga Israel. Na ini Bijbel, Yehovah e kari ensrefi a masra fu na owruten pipel disi (Yes. 54:5; 62:4). A no de fu taki dati na agersi trowlibi dati ben muilek srefisrefi! Toku Yehovah no ben de gaw fu drai baka gi a pipel disi. Doronomo a ben e sori sari-ati gi den èn a ben e tan hori ensrefi na a frubontu di a ben meki nanga den. (Leisi Psalm 106:43-45.) Te yu e si fa Yehovah sori lobi gi a pipel fu en, dan dati no e gi yu deki-ati fu sori lobi gi en?

18 Dati meki trowpaar di lobi a fasi fa Yehovah e tiri, e teki na eksempre fu en. Den no o suku wan fasi fu broko trow te Bijbel no e gi pasi taki den du dati. Den e frustan taki Yehovah tyari den kon na wán èn taki a wani taki den „tai hori” na makandra. Na soso te wan sma du hurudu, Bijbel e gi pasi taki a trowpatna fu en broko a trow (Mat. 19:5, 6, 9). Te Kresten e du ala san den man fu meki a trowlibi waka bun, dan den e sori taki den e tan horibaka gi Yehovah leki a Moro Hei Tiriman.

19. San wi musu du te wi meki wan fowtu?

19 Fu di wi na sondu libisma, meki ten na ten wi o du sani di e meki Yehovah firi sari. A sabi disi, èn dati meki a seti a lusu-paiman fu Krestes fu a bun fu wi. Sobun, te wi meki wan fowtu, dan wi musu aksi Yehovah fu gi wi pardon (1 Yoh. 2:1, 2). Na presi taki wi e tan krutu wisrefi, wi musu leri fu den fowtu fu wi. Efu wi e tan gi yesi na Yehovah, dan a o gi wi pardon so taki wi konsensi no e fon wi moro èn a o yepi wi fu pasa den sortu tesi disi na ini a ten di e kon.​—Ps. 103:3.

20. Fu san ede wi musu horibaka gi Yehovah leki a Moro Hei Tiriman nownow kaba?

20 Na ini a nyun grontapu, ala sma o saka densrefi na ondro Yehovah leki a Moro Hei Tiriman, èn den o leri fu libi na wan reti fasi (Yes. 11:9). Ma wi e kisi furu leri fu en nownow kaba. Dyonsro sma no o tweifri moro suma abi a reti fu tiri hemel nanga grontapu. Dati meki wi musu du ala san wi man now fu tan gi yesi na Gado, fu du a diniwroko fu en, èn fu du sani soleki fa en feni bun. Na so wi e sori taki wi e horibaka gi en leki a Moro Hei Tiriman.