Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2016

Yu e memre disi ete?

Yu e memre disi ete?

Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Fu san ede Yehovah ben feni en bun taki a pipel Israel go feti nanga tra pipel?

Yehovah na wan lobi-ati Gado. Ma son leisi te wan pipel ben e du ogri sani di ben kan pori a denki fu en pipel, noso te den ben e pina den, dan a ben taigi den Israelsma fu go feti nanga a pipel disi. Na Gado wawan ben e taki suma ben o teki prati na a feti èn o ten den ben musu du dati.w15 1/11, blz. 4, 5.

Sortu prenspari sani papa nanga mama kan du fu yepi den pikin fu den fu dini Yehovah?

A prenspari taki papa nanga mama lobi den pikin fu den èn taki den abi sakafasi. Na so den kan gi den pikin wan bun eksempre. Papa nanga mama musu abi a koni tu fu sabi fa den pikin fu den e denki noso e firi.w15 15/11, blz. 9-11.

Fu san ede wi kan taki dati a paus no e teki a presi fu na apostel Petrus?

Mateyus 16:17, 18 no e taki dati na apostel Petrus ben o de na ede fu a Kresten gemeente. Bijbel no e sori taki Petrus ben o abi wan moro hei posisi leki den tra apostel, ma a e sori taki na Yesus ben de na ukuston fu a gemeente (1 Petr. 2:4-8).w15 1/12, blz. 12-14.

San wi musu hori na prakseri, fosi wi taki wan sani?

Te wi wani gebroiki wi tongo bun, dan wi musu hori na prakseri (1) o ten wi musu taki (Preik. 3:7), (2) san wi musu taki (Odo 12:18), (3) fa wi musu taki (Odo 25:15).w15 15/12, blz. 19-22.

Sortu sani di no eerlijk, Kresten no musu du?

Tru Kresten no musu lei noso gi sma porinen. Den no e fruteri lei nanga ogri sani fu wan sma soso fu meki trawan denki takru fu a sma dati. Den no e bedrigi trawan èn den no e fufuru.wp16.1, blz. 5.

Suma ben de den „edeman fu den priester” di Bijbel e taki fu den?

Soleki fa a sori, dan a wortu „edeman fu den priester” abi fu du nanga den moro prenspari sma fu a priester famiri. A abi fu du tu nanga sonwan fu den man di ben de granpriester fosi.wp16.1, blz. 10.

Fa wi musu si den sma di e nyan fu a brede èn e dringi fu a win na a Memrefesa?

Kresten no e prèise den sma disi tumusi. Wan sma di de wan salfu Kresten trutru no wani taki sma e si en leki a hei moro trawan èn a no o fruteri ala sma taki en na wan salfuwan (Mat. 23:8-12).w16.01, blz. 23, 24.

San wi kan leri fu a fasi fa Abraham tron wan mati fu Gado?

Kande na Sem leri Abraham suma na Gado. Abraham ondrofeni tu san Yehovah du gi en nanga en osofamiri. Te wi e leri sabi Yehovah moro bun èn te wi e ondrofeni san a du gi wi, dan wi srefi kan tron en mati.w16.02, blz. 9, 10.

Fa a du kon taki Bijbel abi kapitel nanga vers?

A kerki fesiman Stephen Langton, di ben e libi baka a yari 1200, poti kapitel na ini Bijbel. Dyu sabiman di ben e skrifi Bijbel abra, na den fosi sma di poti vers na ini ala den Hebrew Buku fu Bijbel. Na a ten fu a yari 1550, a sabiman Robert Estienne du a srefi nanga den Kresten Griki Buku fu Bijbel.wp16.2, blz. 14, 15.

Di Satan tesi Yesus, a tyari en go na a tempel trutru?

Wi no sabi seiker. Kande Mateyus 4:5 nanga Lukas 4:9 wani sori taki Satan ben tyari Yesus go drape na ini wan fisyun noso taki na trutru Yesus ben e tanapu na wan hei presi na a tempel-dyari.w16.03, blz. 31, 32.

Fa a preikiwroko fu Kresten de leki dow?

Dow e saka kon na gron safrisafri, a e gi sani krakti baka èn a e hori sani na libi. Fu taki en leti, dow na wan blesi fu Gado (Deut. 33:13). Te wi e luku san ala den futuboi fu Gado e du makandra, dan wi e si taki a preikiwroko fu den de leki dow tu.w16.04, blz. 4.