Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2016

„Yehovah wi Gado na wán Yehovah”

„Yehovah wi Gado na wán Yehovah”

„Arki, un Israelsma: Yehovah wi Gado na wán Yehovah.”DEUT. 6:4.

SINGI: 138, 112

1, 2. (a) Fu san ede furu sma sabi den wortu fu Deuteronomium 6:4, 5? (b) Fu san ede Moses taki den wortu disi?

HONDROHONDRO yari langa kaba, sma di abi a Dyu bribi e gebroiki den siksi wortu fu Deuteronomium 6:4 te den e begi. Den e taki den wortu disi ibri dei, na mamanten èn na neti. Den e kari a begi disi a Syema. Dati na a fosi Hebrew wortu na ini a vers. Nanga a begi disi furu Dyu e sori taki den wani dini Gado wawan.

2 Na den wortu disi Moses taki di a ben abi en lasti takimakandra nanga den Israelsma na Moab-sabana na ini 1473 Fosi Krestes. Na a ten dati, a pipel ben o abra Yordan-liba fu go na ini a Pramisi Kondre (Deut. 6:1). Moses di ben de a fesiman fu den na ini den 40 yari di pasa, ben wani gi a pipel deki-ati fu di a ben sabi taki den ben o kisi furu problema. Den ben o abi fu frutrow tapu Yehovah èn den ben o abi fu tan dini en leki a Gado fu den. Wi kan frustan taki den lasti sani di Moses taki ben o abi furu krakti tapu a pipel. Baka di a taki fu den Tin Komando nanga den tra wet di Yehovah ben gi a pipel, a taki a  tumusi prenspari sani disi di skrifi na Deuteronomium 6:4, 5. (Leisi en.)

3. Sortu aksi wi o luku na ini na artikel disi?

3 Yu denki taki den Israelsma di ben kon makandra drape nanga Moses, no ben sabi taki Yehovah, a Gado fu den, na „wán Yehovah”? Iya, den ben sabi dati. Den ben sabi wán Gado nomo èn na en den ben e anbegi. A ben de a Gado fu den afo Abraham, Isak nanga Yakob. Dan fu san ede Moses ben memre den taki Yehovah, a Gado fu den, na „wán Yehovah”? Te den ben o frustan taki Yehovah na wán Yehovah, dan fa dati ben o yepi den fu lobi en nanga den heri ati, nanga den heri libi èn nanga ala den krakti, soleki fa skrifi na vers 5? San den wortu fu Deuteronomium 6:4, 5 wani taki gi wi na ini a ten disi?

WI GADO NA „WÁN YEHOVAH”

4, 5. (a) San a wani taki dati Yehovah na „wán Yehovah”? (b) Fa Yehovah ben e difrenti fu den gado fu den tra pipel?

4 Nowan gado no de leki en. Na ini Hebrewtongo èn na ini furu tra tongo, a wortu „wán” a no wan nomru nomo. A wani taki tu dati na wán nomo fu wan sani de, nowan trawan fu en no de. Dyaso Moses no ben e taki fu a falsi leri fu den pipel di ben e bribi taki dri gado de na ini wán. Yehovah na a Mekiman fu hemel nanga grontapu èn en na a Moro Hei Tiriman. Nowan tra tru Gado no de boiti Yehovah. Nowan tra gado de leki en (2 Sam. 7:22). Sobun, Moses ben wani memre den Israelsma taki den ben musu anbegi Yehovah wawan. Den no ben musu de leki den tra pipel di ben e anbegi difrenti man-gado nanga umagado. Den pipel disi ben e bribi taki sonwan fu den falsi gado disi ben de basi fu sani soleki a loktu, a gron nanga a son.

5 Fu eksempre, den Egeptesma ben e anbegi a son-gado Ra nanga a gron-gado Geb èn den ben e anbegi Nut, na umagado fu a loktu, nanga Hapi, a gado fu Nijl-liba. Boiti dati, den ben e anbegi furu tra meti di den ben e si leki santa meti. Ma den Tin Rampu di Yehovah tyari kon, sori taki a ben tranga moro den falsi gado disi. A moro prenspari gado fu den Kanansma ben de Bâal, wan gado di den ben e anbegi fu kisi furu pikin, ma di den ben e si tu leki a gado fu a loktu, fu alen èn fu bigi draiwinti. Na furu presi den ben e si Bâal leki wan gado di ben e kibri den (Num. 25:3). Den Israelsma no ben musu frigiti taki a Gado fu den, di de „a tru Gado”, na „wán Yehovah”.Deut. 4:35, 39.

6, 7. San a wortu „wán” wani taki moro èn fa Yehovah sori taki a de „wán”?

6 A no e kenki èn ala ten a e du san a taki. A wortu „wán” e sori tu taki wánfasi de, sma abi a srefi denki èn den e du a srefi sani. Yehovah Gado no e taki wan sani tide, dan tamara a e taki wan tra sani. Ma wi kan frutrow na en tapu ala ten, a e du san a taki, a no e kenki èn a e taki san tru. A ben pramisi Abraham taki den bakapikin fu en ben o libi na ini a Pramisi Kondre èn a du bigi wondru fu man du san a pramisi. Aladi sowan 430 yari pasa, toku Yehovah du san a ben pramisi Abraham.Gen. 12:1, 2, 7; Eks. 12:40, 41.

7 Hondrohondro yari baka dati, di Yehovah kari den Israelsma en kotoigi, a taigi den: „Mi e tan a srefi ala ten. Fosi mi nowan Gado ben de èn baka mi nowan Gado o de tu.” Fu di Yehovah na wan Gado di no e kenki, meki a taki tu: „Mi tan a srefi ala ten” (Yes. 43:10, 13; 44:6; 48:12). A ben de wan bigi grani gi den Israelsma fu de futuboi fu Yehovah, a Gado di no e kenki èn di wi kan frutrow  ala ten! Now wi srefi abi a bigi grani disi tu.Mal. 3:6; Yak. 1:17.

8, 9. (a) San Yehovah e aksi fu den futuboi fu en? (b) Fa Yesus sori taki den sani di Moses ben taigi den Israelsma, prenspari trutru?

8 Iya, Moses ben memre den Israelsma taki Yehovah no e kenki èn taki ala ten a ben o lobi den èn sorgu gi den. Sobun, den ben musu dini en wawan èn den ben musu lobi en nanga den heri ati, nanga den heri libi èn nanga ala den krakti. Yonguwan ben musu dini Yehovah na a fasi disi tu. Dati meki papa nanga mama ben musu gi den pikin fu den leri na ibri okasi.Deut. 6:6-9.

9 Fu di Yehovah no e kenki èn ala ten a e du san a taki, meki teleki now a wani taki den futuboi fu en e dini en na a srefi fasi. Efu wi wani anbegi en na a fasi di a feni bun, dan wi srefi musu dini en wawan èn wi musu lobi en nanga wi heri ati, nanga wi heri frustan èn nanga ala wi krakti. Fu taki en leti, na a srefi sani disi Yesus Krestes taigi wan man di ben aksi en san na a moro prenspari komando. (Leisi Markus 12:28-31.) Sobun, meki wi go luku fa wi kan sori taki wi e frustan san a wani taki dati „Yehovah wi Gado na wán Yehovah”.

WI MUSU DINI YEHOVAH WAWAN

10, 11. (a) Fa wi kan sori taki wi e dini Yehovah wawan? (b) Di den yongu Hebrew man ben de na Babilon, dan fa den sori taki den ben e dini Yehovah wawan?

10 Efu wi wani abi Yehovah leki wi wan-enkri Gado, dan wi musu dini en wawan. Wi no kan dini tra gado èn wi no kan moksi na anbegi fu wi nanga den leri noso gwenti fu tra bribi. Wi no e si Yehovah leki wan fu den someni gado di sma e dini èn leki a moro maktiwan fu ala den gado disi. Nôno! Na Yehovah wawan wi musu anbegi.Leisi Openbaring 4:11.

11 Na ini a buku Danièl wi e leisi fu den yongu Hebrew man Danièl, Hananya, Misael nanga Asaria. Den no ben nyan den sani di Yehovah no feni bun èn den ben weigri fu boigi gi a gowtu popki fu Nebukadnesar. Na so den sori taki den ben wani dini Yehovah wawan. A ben de krin san ben de prenspari gi den. Den no ben wani du nowan enkri sani di ben o sori taki den e anbegi wan tra gado.Dan. 1:1–3:30.

12. Efu wi taki dati wi e dini Yehovah wawan, dan san wi no musu du?

12 Efu wi wani dini Yehovah wawan, dan wi musu luku bun taki nowan sani na ini wi libi e kon de moro prenspari leki na anbegi fu wi. A musu kon na a fosi presi. Sortu sani ben kan kon de moro prenspari gi wi? Di Yehovah gi en pipel den Tin Komando, a sori krin taki den no ben mag anbegi nowan tra gado boiti en èn den no ben mag du afkodrei (Deut. 5:6-10). Na ini a ten disi, furu fasi de fa sma e anbegi falsi gado èn a no ala ten a makriki fu sabi san na den fasi disi. Ma den sani di Gado e aksi fu wi no kenki. Te now ete Yehovah na „wán Yehovah”. Meki wi go luku san disi wani taki gi wi.

13. Sortu sani wi kan kon lobi moro Yehovah?

13 Kolosesma 3:5 (leisi en) e warskow Kresten gi sani di kan meki taki den no e si en leki wan grani moro fu dini Yehovah leki a wan-enkri tru Gado. Na ini a tekst disi yu e si taki bigi-ai nanga na anbegi fu kruktugado na a srefi. Fu san ede wi kan taki dati? We, wan sma kan angri so te fu kon abi gudu noso ala sortu diridiri sani, taki na dati nomo a e prakseri èn den sani dati e tron a moro prenspari sani gi en. Yu kan taki dati den sani disi e tron leki wan gado gi en. Ma te wi e luku a heri vers, dan wi e si taki ala den tra sondu di kari drape abi fu du nanga bigi-ai di de a srefi leki na anbegi fu kruktugado. Te wi  e angri fu den sortu sani disi, dan wi kan kon lobi den so te, taki den e kon na a presi fu Gado. Wi o meki den sani disi abi someni krakti na wi tapu taki wi no e si Yehovah moro leki „wán Yehovah”? Noiti wi musu meki disi pasa nanga wi.

14. Gi sortu sani na apostel Yohanes warskow wi?

14 Na apostel Yohanes ben warskow wi gi a srefi sani. A taki dati efu wan sma lobi den sani fu grontapu, dan „a no lobi a Tata”. Den sani fu grontapu na „a lostu fu a skin, a lostu fu den ai èn a prodo di wan sma e prodo nanga den gudu di a abi” (1 Yoh. 2:15, 16). Disi wani taki dati wi musu ondrosuku wi ati ala ten baka fu luku efu wi e kon lobi den sma fu grontapu, a fasi fa den e meki prisiri nanga a fasi fa den e meki modo. Noso kande fu di wi lobi grontapu, meki wi e suku „bigi sani”, kande fu di wi e go na universiteit (Yer. 45:4, 5). A nyun grontapu di Gado pramisi wi de krosibei. Sobun, a prenspari taki wi e tan prakseri den moi sani di Moses taki. Te wi frustan krin taki „Yehovah wi Gado na wán Yehovah” èn te wi e bribi disi, dan wi o du ala san wi man fu dini en wawan soleki fa a wani.Hebr. 12:28, 29.

KRESTEN MUSU DE WÁN

15. Fu san ede Paulus ben memre Kresten taki Gado na „wán Yehovah”?

15 Fu di Yehovah na wán Yehovah, meki wi leki en futuboi musu de wán èn wi musu abi a srefi denki te a abi fu du nanga den sani di a e aksi fu wi. Na ini a fosi Kresten gemeente, yu ben abi Dyu, Grikisma, Romesma nanga sma fu tra kondre. Fosi den tron futuboi fu Gado, den ben abi den eigi bribi nanga den eigi gwenti èn den ben lobi den eigi sani. Fu dati ede a no ben makriki gi sonwan fu den fu teki wan nyun bribi noso fu tapu nanga a fasi fa den ben gwenti du sani  fosi. Dati meki na apostel Paulus ben feni en fanowdu fu memre den taki Kresten abi wán Gado nomo èn dati na Yehovah.Leisi 1 Korentesma 8:5, 6.

16, 17. (a) Sortu profeititori e kon tru na ini a ten disi èn san de a bakapisi? (b) San kan tapu wi fu de wán nanga wi brada nanga sisa?

16 Fa a de nanga a Kresten gemeente na ini a ten disi? A profeiti Yesaya ben taki dati „na ini den lasti dei”, sma fu ala kondre ben o kon makandra fu anbegi Yehovah, a Moro Hei Gado. Den ben o taki: „[Yehovah] o leri wi san na den pasi fu en èn wi o waka den pasi dati” (Yes. 2:2, 3). Wi breiti fu si taki a profeititori disi e kon tru nownowde! Dati meki furu gemeente abi sma fu ala sortu ras, kulturu nanga tongo èn den alamala e prèise Yehovah. Ma fu di wi e difrenti so furu fu makandra, meki son leisi disi kan tyari problema kon. Dati meki a bun fu taki fu a tori disi.

Yu e sorgu taki wánfasi de na ini a Kresten gemeente? (Luku paragraaf 16-19)

17 Fu eksempre, fa yu e firi te brada noso sisa abi wan heri tra kulturu leki yu? Kande a mamatongo fu den, den krosi fu den, den maniri nanga a nyanyan fu den, a no san yu gwenti. Disi musu meki taki yu no wani bumui nanga den? Yu e bumui soso nanga den sma di abi den srefi gwenti leki yu? Noso kon meki wi taki dati den owruman fu yu gemeente noso fu wan tra gemeente na ini yu kring yongu moro yu, noso taki den de fu wan tra kulturu noso ras. San yu o du? Yu o meki disi tapu yu fu de wán nanga yu brada nanga sisa, soleki fa a gwenti de na mindri Yehovah en pipel?

18, 19. (a) Sortu rai Paulus gi na Efeisesma 4:1-3? (b) San wi kan du fu meki taki wánfasi de na ini a gemeente?

18 San kan yepi wi fu no meki disi pasa nanga wi? Den Kresten na Efeise ben e libi na ini wan gudu foto di ben abi sma fu ala sortu ras nanga kulturu. Ma Paulus ben gi den Kresten disi wan tu bun rai. (Leisi Efeisesma 4:1-3.) Paulus ben taki fosi fu moi fasi soleki sakafasi, safri-ati, pasensi nanga lobi. Yu kan agersi den fasi disi nanga pilari fu wan oso di e meki taki na oso no e fadon. Boiti taki wan oso musu abi tranga pilari, a de fanowdu fu ondrow en tu so taki a no e pori. Paulus ben aksi den Kresten na Efeise fu du ala san den man fu ’tan abi a wánfasi di den ben kisi nanga yepi fu a santa yeye’.

19 Ibriwan fu wi musu du ala san wi man fu meki wánfasi de na ini a gemeente. San wi kan du? A fosi sani na taki wi musu leri fu abi den moi fasi di Paulus ben taki fu den: sakafasi, safri-ati, pasensi nanga lobi. Baka dati wi musu meki ala muiti fu „libi bun nanga makandra”. Neleki fa sma e tapu den pikinpikin priti di wan oso kan kisi, na so wi musu wroko na iniwan swakifasi di wi abi kande. Te wi e du disi, dan wi o meki taki freide nanga wánfasi de na ini a gemeente.

20. Fa wi kan sori taki wi e frustan taki „Yehovah wi Gado na wán Yehovah”?

20 „Yehovah wi Gado na wán Yehovah.” Na wan tumusi prenspari sani Moses ben taki dya! Disi ben o yepi den Israelsma te den ben o kisi problema na ini a Pramisi Kondre. Te wi e tan prakseri den sani di Moses taki, dan dati o yepi wi fu pasa a bigi banawtu di o kon dyonsro èn wi o man sorgu taki freide nanga wánfasi de na ini a paradijs di o kon baka dati. Meki wi tan dini Yehovah wawan. Iya, meki wi lobi en èn anbegi en nanga wi heri ati. Meki wi du ala san wi man tu fu sorgu taki wánfasi de na mindri brada nanga sisa. Te wi e tan du disi, dan wi o si fa den wortu fu Yesus o kon tru te a o krutu wi leki skapu. A o taigi wi: „Un kon, unu di mi Tata blesi, èn teki a Kownukondre di sreka gi unu sensi a ten di grontapu seti.”Mat. 25:34.