Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2016

No mandi tumusi te trawan e meki fowtu

No mandi tumusi te trawan e meki fowtu

„Tan . . . gi makandra pardon nanga un heri ati.”KOL. 3:13.

SINGI: 121, 75

1, 2. Fa Bijbel ben sori taki a pipel fu Yehovah ben o kon moro bigi?

DEN futuboi fu Yehovah na grontapu, di a e kari en Kotoigi, de na ini wan organisâsi di no de leki nowan tra organisâsi. A tru taki den na sondusma di e meki fowtu. Toku Gado en santa yeye meki taki a gemeente fu en na heri grontapu e gro èn taki sani e go bun. Luku wan tu moi sani di Yehovah meki den futuboi fu en du, aladi den na sondusma.

2 Na ini 1914 di den lasti dei fu a grontapu disi bigin, wan tu futuboi fu Gado nomo ben de. Ma Yehovah blesi a preikiwroko fu den. A bakapisi ben de taki milyunmilyun sma kon sabi a tru leri fu Bijbel èn den tron Kotoigi fu Yehovah. Yehovah ben sori kaba na ini wan profeititori taki a wroko ben o gro. A ben taki: „A pikin grupu o tron wan grupu fu dusun èn a pikin pipel o tron wan makti pipel. Mi, Yehovah, o meki disi pasa esi-esi te a ten doro” (Yes. 60:22). Na ini a ten disi, wi kan si krin taki a profeititori disi kon tru. Den sma di e dini Yehovah, na wan bigi pipel. Fu taki en leti, furu kondre de na grontapu di no abi so furu sma leki a nomru fu sma di e dini Yehovah.

3. Fa den futuboi fu Gado sori taki den abi lobi?

 3 Na ini a ten disi fu a kaba, Yehovah yepi en pipel tu fu meki a lobi di den abi gi makandra kon moro tranga. Na so den e sori lobi neleki en (1 Yoh. 4:8). Yesus di e sori lobi tu neleki Gado, ben taigi den bakaman fu en: „Mi e gi unu wan nyun komando, taki un musu lobi makandra. . . . Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Fu di furu kondre na ini a ten disi feti bigi feti, meki omeni sma dede na wan ogri-ati fasi. Fu eksempre, na ini a Di Fu Tu Grontapufeti wawan sowan 55 milyun sma lasi libi. Ma fu di Yehovah Kotoigi abi lobi, meki den no teki prati na den feti disi èn den no kiri nowan sma. (Leisi Mika 4:1, 3.) Dati meki den „no abi nowan brudu-paiman”.Tori 20:26.

4. Fu san ede a moi fu si fa a pipel fu Gado e kon moro bigi?

4 A pipel fu Gado e kon moro bigi, aladi den e libi na mindri ogrisma di Satan, „a gado fu a grontapu disi”, e tiri (2 Kor. 4:4). Satan e basi a politiek fu a grontapu disi, leki fa a e du nanga ala den organisâsi di e tyari nyunsu kon na doro. Toku a no man tapu Gado en futuboi fu preiki a bun nyunsu. Ma fu di Satan sabi taki en ten kon syatu, meki a e pruberi na ala sortu fasi fu tapu sma fu dini a tru Gado.Openb. 12:12.

YU O TAN DINI YEHOVAH?

5. Fu san ede a e pasa son leisi taki trawan e du noso taki sani di e hati wi? (Luku a prenki na a bigin fu na artikel.)

5 Na ini a Kresten gemeente wi e leri o prenspari a de fu lobi Gado nanga tra sma. Dati meki di wan man aksi Yesus san na a moro bigi komando, a piki: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi’” (Mat. 22:35-39). Ma Bijbel e sori tu taki fu di Adam sondu, meki wi alamala na sondusma. (Leisi Romesma 5:12, 19.) Dati meki son leisi a e pasa taki wan sma na ini a gemeente e taki noso du wan sani di e hati wi. Disi kan de wan tesi fu di wi o abi fu sori efu wi o tan lobi Yehovah nanga a pipel fu en. San wi o du te disi pasa? Srefi son futuboi fu Gado na ini owruten ben taki noso du sani di hati trawan èn wi kan leri wan sani fu disi.

Efu yu ben libi na Israel na a ten fu Eli nanga den manpikin fu en, dan san yu ben o du? (Luku paragraaf 6)

6. Fa wi sabi taki Eli no strafu den manpikin fu en?

6 Fu eksempre, Granpriester Eli ben abi tu manpikin di no ben e hori den wet fu Yehovah. Bijbel e taki: „Den manpikin fu Eli ben de wisiwasi man. Den no ben abi lespeki gi Yehovah” (1 Sam. 2:12). Aladi a papa fu den du furu gi a tru anbegi, toku den manpikin fu en ben e du seryusu sondu. Eli ben sabi disi èn a ben musu strafu den. Ma a no du dati. A bakapisi ben de taki Gado krutu na osofamiri fu Eli (1 Sam. 3:10-14). Gado taigi en taki den bakapikin fu en no ben o dini leki granpriester moro. Efu yu ben libi na ini a ten fu Eli, san yu ben o du te yu ben o si taki Eli ben libi den manpikin fu en meki den du ogri? Yu ben o meki a sani disi swaki a bribi fu yu so te taki yu no wani dini Gado moro?

7. Sortu seryusu sondu David du èn san Gado du?

7 David ben abi moi fasi èn dati meki a ben de ’wan man di Yehovah lobi’ (1 Sam. 13:13, 14; Tori 13:22). Ma bakaten  a du hurudu nanga Batseiba èn na uma disi kon de nanga bere. A sani disi pasa di Batseiba masra Uria ben go feti na ini a legre. Di Uria kon na oso fu wan syatu pisi ten, David ben wani meki a go didon nanga Batseiba so taki a ben kan gersi leki na en ben meki Batseiba kon de nanga bere. Ma Uria no ben wani du san Kownu David aksi en. Dati meki David seti sani so taki Uria ben kan dede na ini a feti. Ma David pai gi na ogri disi di a du. A bakapisi ben de taki soso sari sani pasa na ini en osofamiri (2 Sam. 12:9-12). Ma toku Yehovah sori sari-ati gi a man disi di ben gi yesi na en „nanga en heri ati” (1 Kow. 9:4). Efu yu ben libi na ini a ten fu David, dan san yu ben o du? Yu ben o meki a sani disi tapu yu fu dini Yehovah?

8. (a) Fa na apostel Petrus sori taki a no du san a taki? (b) Fu san ede Yehovah tan gebroiki Petrus, aladi a meki wan fowtu?

8 Wan tra eksempre na ini Bijbel na a di fu na apostel Petrus. Yesus ben teki en leki wan fu den apostel fu en. Ma son leisi Petrus ben e taki noso du sani di ben hati en bakaten. Fu eksempre, syatu fosi Yesus dede, den apostel gowe libi en. Fosi disi pasa, Petrus taki dati awinsi den trawan ben o gowe libi Yesus, noiti en ben o du dati (Mark. 14:27-31, 50). Ma di sma tyari Yesus go sroto, ala den apostel èn Petrus srefi, gowe libi en. Boiti dati, Petrus taigi sma dri leisi taki a no sabi Yesus (Mark. 14:53, 54, 66-72). Ma fu di Petrus ben sari fu a sani di a du, meki Yehovah tan gebroiki en. Efu yu ben de wan disipel na a ten dati, yu ben o meki den sani di Petrus du meki taki yu mandi nanga Yehovah?

9. Fu san ede yu de seiker taki Gado e du sani na wan reti fasi ala ten?

9 Disi na soso wan tu eksempre di e sori taki sma kan du sani di e hati trawan. Furu eksempre de ete di e sori taki son futuboi fu Yehovah na ini owruten  èn na ini a ten disi du wan ogri noso taki wan sani di hati trawan. Ma te disi pasa, san yu o du? Yu o mandi so te taki yu e gowe libi Yehovah nanga en pipel fu di trawan e meki fowtu? Noso yu e frustan taki Yehovah e gi sma di du ogri, na okasi fu sori berow èn taki te fu kaba a o meki sani kon bun baka na wan reti fasi? Ma son leisi sma di du wan seryusu sondu no e warderi a sari-ati fu Yehovah èn den no wani sori berow. San yu o du te disi e pasa? Yu o frutrow tapu Yehovah taki te a ten doro, a o krutu den sma disi? Kande a o puru den fu a gemeente srefi.

NO DRAI BAKA GI YEHOVAH TE TRAWAN E MEKI FOWTU

10. Fa Yesus ben e si den fowtu fu Yudas Iskariot nanga Petrus?

10 Na ini Bijbel wi kan leisi fa futuboi fu Yehovah tai hori na en nanga a pipel fu en, aladi tra sma na den lontu meki bigi fowtu. Fu eksempre, baka di Yesus taki nanga en Papa na ini begi wan heri neti, a teki den 12 apostel fu en. Yudas Iskariot ben de wan fu den. Bakaten di Yudas tori Krestes èn di Petrus taki dati a no sabi en, dan Yesus no meki disi pori a matifasi di a ben abi nanga en Papa Yehovah (Luk. 6:12-16; 22:2-6, 31, 32). Yesus ben sabi taki a no Yehovah noso a pipel fu en ben meki den sani disi pasa. A tan dini en Gado, aladi den fowtu fu sonwan fu en bakaman ben meki a firi sari. A blesi di Yehovah gi en, na taki a kisi wan opobaka èn na so a ben man tron Kownu fu a Kownukondre na hemel.Mat. 28:7, 18-20.

11. San Bijbel ben taki fu den futuboi fu Yehovah na ini a ten disi?

11 Soleki fa wi si, dan Yesus ben tan frutrow tapu Yehovah nanga a pipel fu en. Wi srefi wani du dati tu. Te wi e si fa Yehovah e gebroiki den futuboi fu en na ini den lasti dei disi, dan dati e fruwondru wi. Nowan tra pipel e preiki den tru leri fu Bijbel na heri grontapu, fu di Yehovah no e tiri den leki fa a e tiri a gemeente fu en di de wán na ini a ten disi. Yesaya 65:14 e taki fa Gado ben o blesi a pipel fu en. A e taki: „Mi futuboi o bari fu prisiri fu di den abi wan bun ati.”

12. San wi musu du te trawan e meki fowtu?

12 Den futuboi fu Yehovah breiti taki den kan du furu bun sani fu di Gado e tiri den. Ma den sma na ini Satan grontapu e sari fu di sani e kon ogri dei fu dei. Te sonwan fu den futuboi fu Gado e meki fowtu, dan a no ben o de wan koni sani fu mandi nanga Yehovah noso nanga na organisâsi fu en. A no ben o fiti fu du dati tu. Wi musu tai hori na Yehovah èn teki a tiri fu en. Wi musu leri tu san wi musu du te trawan e meki fowtu.

SAN WI MUSU DU

13, 14. (a) Fu san ede wi musu abi pasensi nanga makandra? (b) Sortu pramisi wi no wani frigiti?

13 Ma san wi kan du te wan futuboi fu Gado e taki noso e du wan sani di hati wi? Bijbel e gi wi a moi rai disi: „No de wan sma di e mandi esi, bika na soso don sma e mandi esi” (Preik. 7:9). Wi no musu frigiti taki na sowan 6000 yari pasa kaba sensi di libisma na ini Eden tron sondusma. Èn sondusma e meki fowtu. Dati meki wi no musu fruwakti tumusi furu fu wi brada nanga sisa èn wi no musu meki den fowtu fu den pori a prisiri di wi abi fu de wan futuboi fu Gado na ini den lasti dei disi. Efu dati ben o pasa, dan wi ben o lasi a grani di wi abi fu du a wani fu Gado èn wi ben o  lasi a howpu tu fu libi na ini Gado en nyun grontapu.

14 Efu wi no wani lasi wi prisiri nanga wi howpu, dan wi no musu frigiti san Yehovah pramisi wi: „Luku, mi o meki nyun hemel nanga wan nyun grontapu. Sma no o memre den fositen sani moro èn den sani dati no o abi krakti na den tapu moro” (Yes. 65:17; 2 Petr. 3:13). No meki den fowtu fu trawan tapu yu fu kisi den blesi disi.

15. San Yesus taki dati wi musu du te trawan du wan sani di hati wi?

15 Ma fu di wi no de na ini a nyun grontapu ete, meki trawan o taki noso du sani di o hati wi. Sobun, wi musu hori na prakseri san Gado wani taki wi musu du te dati e pasa. Fu eksempre, wi no musu frigiti san Yesus ben taki: „Efu unu e gi sma pardon fu den sondu fu den, dan un Tata na hemel o gi unu pardon tu. Ma efu unu no e gi sma pardon fu den sondu fu den, dan un Tata no o gi unu pardon fu den sondu fu unu.” Prakseri tu san Yesus taki di Petrus aksi en efu a ben musu gi sma pardon „te nanga seibi tron”. Yesus taigi en: „Mi e taigi yu, a no te nanga seibi tron, ma te nanga seibitenti na seibi tron.” Na so Yesus ben wani sori taki wi musu de klariklari ala ten fu gi sma pardon. Disi na a fosi sani di wi musu prakseri te wan trawan du wan hati sani nanga wi.Mat. 6:14, 15; 18:21, 22.

16. San wi kan leri fu a bun eksempre fu Yosef?

16 Na eksempre fu Yosef e leri wi san wi musu du te trawan e meki fowtu. Yosef nanga en pikin brada ben de den wan-enkri manpikin di Yakob meki nanga Rakel. Ma fu di Yakob ben lobi Yosef moro den tin afubrada fu en, meki den ben kon dyarusu. Dati meki den seri Yosef leki srafu. Baka omeni yari a kownu fu Egepte meki Yosef tron a moro maktiwan baka en, fu di a ben lobi den bun sani di Yosef du. Di angriten ben de, den brada fu Yosef kon na Egepte fu bai nyanyan, ma den no ben sabi taki na en. Yosef ben kan gebroiki a makti fu en fu meki den brada fu en pai gi den ogri di den ben du nanga en. Ma a no du dati. Na presi fu dati, a du wan sani fu luku efu den ben kenki. Di a si taki den brada fu en kenki trutru, a taigi den taki en na Yosef, a brada fu den. Bakaten a taki: „No frede. Mi o sorgu taki unu nanga den pikin fu unu kisi nyanyan.” A tori e taki moro fara: „Na so Yosef trowstu den èn a taki sani fu meki den firi korostu.”Gen. 50:21.

17. San yu o du te trawan e meki fowtu?

17 A bun fu hori na prakseri taki fu di wi alamala e meki fowtu, wi srefi kan du wan sani tu di e hati trawan. Efu wi si taki na dati wi du, dan wi musu go na a sma èn pruberi fu meki en bun baka nanga en, soleki fa Bijbel e leri wi. (Leisi Mateyus 5:23, 24.) Wi breiti te trawan no e hori wi na ati èn wi srefi no musu du dati nanga den tu. Kolosesma 3:13 e leri wi: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu.” Na 1 Korentesma 13:5 wi e si tu taki Kresten di lobi makandra „no e tan memre na ogri di trawan du”. Te wi abi a gwenti fu gi trawan pardon, dan Yehovah o gi wi pardon tu. Iya, te trawan e meki fowtu, dan wi leki Kresten musu teki na eksempre fu wi hemel Papa di abi sari-ati nanga wi te wi e meki fowtu.Leisi Psalm 103:12-14.