Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2017

Suku trutru gudu

Suku trutru gudu

„Meki mati nanga yepi fu den gudu fu a grontapu disi pe retidu no de.”​—LUK. 16:9.

SINGI: 122, 129

1, 2. Fu san ede pôtisma o de ala ten na ini a sistema disi?

NA EKONOMIA fu a ten disi muilek èn sani no e waka na wan reti fasi. Furu yongusma no man feni wroko. Furu sma e froisi go tan na gudu kondre, aladi den kan lasi den libi fu doro drape. Sma e pina na ala sei, srefi na ini gudu kondre. Èn moro nanga moro sma e kon pôti. Wan raportu di sma meki no so langa pasa e sori taki den moro gudu sma na 1 procent nomo fu ala sma na grontapu èn den sma disi gudu moro ala tra libisma tyari kon na wan. A de krin taki son sma abi so furu gudu taki noiti den o abi fu pina, aladi milyardmilyard sma pôti srefisrefi. Yesus ben si a sani disi èn fu dati ede a ben taki: „Den pôti sma de nanga unu ala ten” (Mark. 14:7). Fu san ede a situwâsi na grontapu de so?

2 Yesus ben frustan taki na ekonomia fu grontapu no ben o kenki solanga Gado Kownukondre no kon. Den politiek makti, den kerki, nanga den gridi „bisnisman” fu Openbaring 18:3, na pisi fu a grontapu fu Satan. Aladi Gado pipel no e bumui srefisrefi nanga politiek èn nanga falsi kerki, toku furu fu den no man hori densrefi aparti dorodoro fu a bisnis libi fu a grontapu fu Satan.

3. Sortu aksi wi o luku?

3 A bun te wi leki Kresten e luku gi wisrefi fa wi e si a bisnis sistema fu a ten disi. Dati meki wi musu aksi wisrefi: ’Fa mi kan gebroiki  den gudu fu mi fu sori taki mi e horibaka gi Gado? Fa mi kan sorgu taki mi no e feti fu meki furu moni? Sortu ondrofenitori e sori taki a pipel fu Gado e frutrow dorodoro na en tapu na ini a muilek sistema disi?

NA AGERSITORI FU A FUTUBOI DI NO BEN WROKO NA WAN RETI FASI

4, 5. (a) Na ini sortu situwâsi a futuboi na ini na agersitori ben kon feni ensrefi? (b) Sortu rai Yesus gi den bakaman fu en?

4 Leisi Lukas 16:1-9. A bun fu poti prakseri na a agersitori fu a futuboi di no ben wroko na wan reti fasi. Di a basi fu en krutu en taki a ben frumorsu den gudu fu en, dan a futuboi „meki mati” fu yepi en te a no ben o abi wroko moro. Na so a du sani na wan „koni fasi”. * A no de fu taki dati Yesus no ben e gi den disipel fu en deki-ati fu du sani di no fiti, soso fu man hori densrefi na libi na ini a grontapu disi. Yesus taki dati na „den sma fu a grontapu disi” ben e tyari densrefi na a fasi dati. Ma a gebroiki na agersitori fu leri wi wan prenspari sani.

5 Yesus ben sabi taki neleki a futuboi di kon feni ensrefi na ini wan muilek situwâsi, na so furu Kresten brada nanga sisa musu meki moni fu man sorgu densrefi na ini a grontapu disi pe retidu no de. Dati meki a e gi den a rai disi: „Meki mati nanga yepi fu den gudu fu a grontapu disi pe retidu no de. Te yu no abi den gudu moro, dan den mati dati [Yehovah nanga Yesus] kan teki yu na ini den tanpresi pe sma man libi fu têgo.” San wi kan leri fu a rai disi?

6. Fa wi du sabi taki a bisnis sistema fu a ten disi a no wan sani di Gado ben abi na prakseri?

6 Bijbel e sori taki a gwenti di libisma abi fu meki furu moni, a no wan sani di Gado ben abi na prakseri. Yehovah ben e gi Adam nanga Eva ala san den ben abi fanowdu di den ben de na ini Eden (Gen. 2:15, 16). Bakaten, di santa yeye ben e tiri a gemeente fu den salfuwan na ini a fosi yarihondro, dan „nowan sma ben feni taki san a ben abi ben de fu en wawan, ma den ben e prati ala sani nanga makandra” (Tori 4:32). A profeiti Yesaya ben taki fu wan ten te ala libisma ben o nyan bun fu den gudu fu grontapu (Yes. 25:6-9; 65:21, 22). Ma teleki a ten dati ben doro, den bakaman fu Yesus di ben wani plisi Gado, ben o abi fu „du sani na wan koni fasi” fu man sorgu densrefi nanga yepi fu „den gudu fu a grontapu disi pe retidu no de”.

GEBROIKI DEN GUDU FU A GRONTAPU DISI NA WAN KONI FASI

7. Sortu rai wi e kisi na Lukas 16:10-13?

7 Leisi Lukas 16:10-13. A futuboi na ini na agersitori fu Yesus meki mati fu en eigi bun. Ma Yesus ben gi den bakaman fu en deki-ati fu no suku den eigi bun, ma fu meki mati na hemel. Yesus ben wani leri wi taki a fasi fa wi e gebroiki den gudu fu a grontapu disi o sori efu wi „de fu frutrow”. Fa wi kan gebroiki den gudu fu wi na wan bun fasi?

8, 9. Gi wan tu eksempre di e sori fa son brada nanga sisa e gebroiki den gudu fu a grontapu disi fu horibaka gi Gado.

8 Wan prenspari fasi fa wi kan sori taki wi de fu frutrow, na te wi e gebroiki den gudu fu wi fu horibaka gi a preikiwroko di e du na heri grontapu, soleki fa Yesus ben taki (Mat. 24:14). Wan yongu meisje na ini India ben abi wan pikin monikisi pe a ben e kibri en moni. Srefi a moni di a ben kisi fu bai preisani a ben e poti na ini. Di a monikisi kon furu, dan a gi a moni leki bijdrage gi a preikiwroko. Wan brada na ini India e prani kronto. A tyari wan lo kronto gi den brada  nanga sisa fu a Malayalam vertaal kantoro, fu di a ben sabi taki den e bai kronto. A ben feni taki a moro bun fu gi den kronto, na presi taki a gi moni leki bijdrage. A no de fu taki dati a brada disi e du sani na wan koni fasi. Na so a de tu taki brada na ini Grikikondre gwenti gi a Betel famiri olèif-oli, kasi, nanga tra nyanyan sani.

9 Wan brada fu Sri Lanka di e libi na ini wan tra kondre now, gi den brada na ini a kondre pe a komoto okasi fu gebroiki en oso nanga en dyari fu hori den alawiki konmakandra nanga bigi konmakandra. Furuten dinari mag tan tu na ini na oso fu en. A brada ben kan meki moni nanga den gudu fu en, ma a bosroiti fu yepi den brada nanga sisa drape di no abi so furu moni. Na ini wan kondre pe den brada nanga sisa no man preiki fri, son brada e gi gemeente okasi fu hori konmakandra na ini na oso fu den. Na so furu pionier nanga trawan di no abi moni no abi fu yuru wan presi fu kon makandra.

10. San na wan tu blesi di wi e kisi te wi lobi gi sma sani?

10 Den eksempre disi e sori fa a pipel fu Gado „de fu frutrow na ini a moro pikin afersi”, noso na ini a fasi fa den e gebroiki den gudu fu den. Gi den, den gudu fu a grontapu disi no prenspari leki den gudu di den musu suku na hemel (Luk. 16:10). Fa den sma disi di de mati fu Yehovah feni en fu du den sani disi gi Gado? Den e frustan taki wan prenspari fasi fa den kan kon abi „trutru” gudu, na te den lobi fu gi sma sani (Luk. 16:11). Wan sisa di e horibaka doronomo gi a Kownukondre wroko e taki fu wan blesi di a ben kisi: „Fu di mi lobi gi sma sani, meki mi si taki wan moi sani pasa nanga mi na ini den yari di pasa. Mi feni taki o moro mi e gi sma sani, o moro mi e denki bun fu den. Mi man gi sma pardon moro makriki, mi abi moro pasensi nanga den, mi man fiti misrefi moro makriki tu te sani no e waka soleki fa mi ben wani èn mi man teki rai moro makriki.” Furu sma kon si taki te den lobi gi sma sani, dan den e firi koloku.​—Ps. 112:5; Odo 22:9.

11. (a) Te wi lobi gi sma sani, dan fa dati e sori taki wi e „du sani na wan koni fasi”? (b) Fa a pipel fu Gado e yepi makandra nanga den bijdrage di den e gi? (Luku a prenki na a bigin fu na artikel.)

11 Te wi e gebroiki den gudu fu wi fu horibaka gi Kownukondre afersi, dan dati e sori tu taki wi e „du sani na wan koni fasi”. Na so wi kan du sani fu yepi trawan. Son sma di abi furu gudu, no man teki prati na a furuten diniwroko èn den no man froisi go na wan tra kondre fu go yepi nanga a wroko drape. Ma den sma disi kan firi koloku fu di den sabi taki a moni di den e gi leki bijdrage e horibaka gi a diniwroko fu trawan (Odo 19:17). Den moni disi e yepi fu meki buku nanga tijdschrift èn den e horibaka gi a preikiwroko na ini pôti kondre pe furu sma e arki a bun nyunsu. Na ini kondre soleki Kongo, Madagaskar, nanga Rwanda, a ben de so furu yari taki a moni di sma ben musu abi fu man bai wan Bijbel, na a moni di sma  e meki na ini wán wiki noso na ini wan heri mun. A pasa furu tron taki brada ben musu bosroiti efu den ben o bai nyanyan gi den osofamiri noso efu den ben o bai wan Bijbel. Fu di furu brada nanga sisa e gi bijdrage, èn fu di den wan di ’abi bogobogo e yepi den wan di e mankeri sani’, meki Yehovah en organisâsi e vertaal èn e prati Bijbel gi ibri sma na ini wan osofamiri èn gi sma di e studeri Bijbel. (Leisi 2 Korentesma 8:13-15.) Na so Yehovah e tron wan mati fu sma di e gi èn fu sma di e kisi.

NO FETI FU MEKI MONI NA INI A GRONTAPU DISI

12. Fa Abraham sori taki a ben e frutrow tapu Gado?

12 Wan tra fasi fa wi kan tron wan mati fu Yehovah, na te wi no e feti fu meki moni na ini a grontapu disi. Na presi fu dati wi e suku fu kon abi „trutru” gudu. Abraham, wan man fu owruten di ben abi bribi, ben de klariklari fu gowe libi a gudu foto Ur fu go libi na ini tenti fu di a ben wani de wan mati fu Yehovah (Hebr. 11:8-10). Ala ten a ben e si Gado leki a sma di abi trutru gudu. A no ben e suku fu kon gudu, ma a ben e frutrow tapu Gado (Gen. 14:22, 23). Yesus ben gi wan gudu yonguman a rai fu sori a srefi sortu bribi disi. A taigi en: „Efu yu wani dini Gado dorodoro, dan go seri den sani di yu abi. Prati a moni gi den pôti sma, dan yu o kisi wan gudu na hemel. Kon, tron wan bakaman fu mi” (Mat. 19:21). A man dati no ben abi a bribi di Abraham ben abi, ma trawan sori taki den ben e frutrow tapu Gado nanga den heri ati.

13. (a) Sortu rai Paulus ben gi Timoteyus? (b) Fa wi kan fiti a rai fu Paulus na ini a ten disi?

13 Timoteyus ben abi wan tranga bribi. Baka di Paulus kari Timoteyus „wan bun srudati fu Krestes Yesus”, dan a taigi en: „Nowan man di de wan srudati e broko en ede nanga bisnis afersi. Na so fasi a sma di teki en leki srudati kan feni en bun” (2 Tim. 2:3, 4). Na ini a ten disi, den bakaman fu Yesus na wan bigi legre. Den moro leki wán milyun furuten preikiman, makandra nanga den tra brada nanga sisa e du ala san den man fu du san Paulus taki. Den e kakafutu gi den reklame fu a grontapu disi, fu di den e hori a sani disi na prakseri: „A sma di lobi leni moni na a futuboi fu a man di leni en a moni” (Odo 22:7). Satan ben o lobi en efu wi e gebroiki ala wi ten nanga krakti fu de srafu fu a bisnis sistema fu a grontapu disi. Son bosroiti di wi teki kan poti wi na ini paiman omeni yari langa. Son sma e leni bigi moni fu pai gi oso, skoro, diri oto, èn gi kefalek trowfesa srefi. Den paiman disi kan gi sma bigi broko-ede. Te wi de tevrede nanga den moro prenspari sani di wi abi fanowdu na ini a libi, te wi no e meki furu paiman èn te wi no e bai tumusi furu sani, dan dati e gi wi okasi fu tron srafu fu Gado, na presi fu tron srafu fu a bisnis sistema disi.​—1 Tim. 6:10.

14. San wan Kresten musu de klariklari fu du? Gi wan tu eksempre.

14 Efu wi no wani tron sma di e feti fu kisi gudu, dan wi musu poti Gado Kownukondre na a fosi presi na ini wi libi. Wan trowpaar ben abi wan bisnis di ben e drai bun. Ma fu di den ben e angri fu go baka na ini a furuten diniwroko, meki den seri a bisnis fu den, a boto fu den, nanga tra gudu di den ben abi. Baka dati den go yepi nanga a bow-wroko na a edekantoro na ini Warwick, New York. Wan moi blesi di den ben kisi, na taki den ben man wroko wan tu wiki na Betel makandra nanga na umapikin fu den, a masra fu en, nanga a papa nanga mama fu a masra di ben e yepi tu nanga a bow-wroko na Warwick. Wan pionier sisa na ini Colorado, Amerkankondre ben feni wroko na wan bangi gi wan tu dei na ini a wiki. Den sma drape  ben breiti so te nanga en taki den aksi en fu wroko drape a heri wiki èn a ben o meki dri tron so furu moni. Ma fu di a wroko disi ben o puru en prakseri na a preikiwroko, meki a no teki en. Disi na wan tu eksempre nomo di e sori omeni sani den futuboi fu Yehovah de klariklari fu du fu man horibaka gi a Kownukondre. Te wi e tan poti Kownukondre afersi na a fosi presi, dan dati e sori taki a matifasi di wi abi nanga Gado èn den trutru gudu di wi kan kisi, moro prenspari gi wi leki den gudu fu a grontapu disi.

TE WI NO ABI GUDU MORO

15. Sortu gudu e meki wi firi moro koloku?

15 Te wan sma gudu, dan dati no wani taki ala ten taki na Gado e blesi en. Yehovah e blesi den wan di e „du furu bun sani”. (Leisi 1 Timoteyus 6:17-19.) Fu eksempre, di Lucia * fu Italiakondre kon sabi taki preikiman ben de fanowdu na ini Albania, dan a froisi go drape na ini 1993. A no ben abi wroko, ma a ben e frutrow tapu Yehovah nanga en heri ati. A leri taki Albaniatongo èn a yepi moro leki 60 sma fu teki dopu. A tru taki furu anbegiman fu Gado no e preiki na ini den sortu kontren disi pe sma lobi arki a boskopu. Ma te wi du ala san wi man fu yepi sma fu kon sabi Yehovah èn fu tron en mati, dan dati o de wan gudu di o meki wi firi koloku fu ala ten.​—Mat. 6:20.

16. (a) San o pasa nanga a bisnis sistema fu a ten disi? (b) Te wi e luku san o pasa na ini a ten di e kon, dan fa wi musu si gudu?

16 Yesus ben sori krin taki a bisnis sistema fu a ten disi o kon na wan kaba. A ben taki: „Te yu no abi den gudu moro”, a no ben taki ’efu yu no abi den gudu moro’ (Luk. 16:9). Na ini den lasti dei disi, son bangi lasi ala den moni èn bigi problema ben de tu na ini na ekonomia. Na ini a ten di o kon den problema disi o kon moro bigi na heri grontapu. A heri sistema fu Satan, a politiek sistema, a kerki sistema, nanga a bisnis sistema o kon na wan kaba. Den profeiti Esekièl nanga Sefanya ben taki dati gowtu nanga solfru, di langa ten kaba sma e si leki prenspari sani na ini a bisnis libi, no o abi waarde moro (Esek. 7:19; Sef. 1:18). Fa wi ben o firi efu na a kaba fu wi libi wi e kon si taki wi feti soso baka „den gudu fu a grontapu disi pe retidu no de”, na presi fu suku trutru gudu? Wi ben o firi leki wan man di wroko en heri libi fu tyari moni kon na wan, soso fu kon sabi bakaten taki a moni dati na falsi moni (Odo 18:11). Iya, te fu kaba den gudu dati o kon na wan kaba seiker. Sobun, no lasi na okasi fu gebroiki den fu „meki mati” na hemel. Den sani di wi e du fu horibaka gi Yehovah nanga en Kownukondre o meki taki wi de koloku trutru.

17, 18. San e wakti den mati fu Gado?

17 Te Gado Kownukondre kon, dan sma no o abi fu pai yuru-oso moro èn den no o abi fu leni moni moro tu. Bogobogo nyanyan o de, èn sma no abi fu pai moro gi datra noso gi dresi. Den futuboi fu Yehovah na grontapu o kisi den moro bun sani fu grontapu. Sma o moi densrefi nanga gowtu nanga solfru. Den no o gebroiki den sani dati moro fu du bisnis èn den no o kibri den gi densrefi nomo. Bun udu, ston, nanga isri o de fu kisi gi ala sma so taki den kan bow moi oso. Mati o yepi wi fu di den wani du dati, a no fu di den wani meki moni na wi tapu. Na ini a ten dati, ala sma o prati den gudu fu grontapu nanga makandra.

18 Disi na soso wan tu fu den warti gudu di den wan di e suku fu tron mati fu Gado o kisi. Den anbegiman fu Yehovah na grontapu o prisiri pasa marki te den e yere Yesus e taki: „Un kon, unu di mi Tata blesi, èn teki a Kownukondre di sreka gi unu sensi a ten di grontapu seti.”​—Mat. 25:34.

^ paragraaf 4 Te wi e luku san Lukas 16:1 e taki na ini Grikitongo, dan wi e si taki Yesus srefi no ben taki dati a futuboi ben frumorsu den gudu fu en basi. Na tra sma ben taki a sani dati. Kande wan sma ben lei gi a futuboi. Ma Yesus no ben wani poti prakseri na a sani di meki taki a futuboi lasi en wroko. A ben wani poti prakseri na san a futuboi du di en basi krutu en.

^ paragraaf 15 Na ondrofenitori fu Lucia Moussanett de fu feni na ini na Ontwaakt! fu 22 yuni 2003, blz. 18-22.