Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2017

Fu san ede wi musu „prèise Yah”?

Fu san ede wi musu „prèise Yah”?

„Prèise Yah, un pipel . . . A e gi wi prisiri, iya, a fiti fu prèise en.”​—PS. 147:1.

SINGI: 59, 3

1-3. (a) O ten Psalm 147 skrifi? (b) San wi kan leri te wi e studeri Psalm 147?

TE WAN sma du wan wroko bun, noso te a sori wan moi Kresten fasi, dan a sma dati warti fu kisi prèise. Efu na so a de nanga libisma, dan a no de fu taki dati wi musu prèise Yehovah Gado. Wi kan prèise en fu di a abi bigi makti, soleki fa wi kan si dati na den sani di a meki. Wi kan prèise en tu fu di a e sori lobi gi libisma èn fu di a gi en eigi Manpikin leki lusu-paiman gi wi.

2 A skrifiman fu Psalm 147 ben e angri fu prèise Yehovah. A gi trawan deki-ati tu fu prèise Gado makandra nanga en.​—Leisi Psalm 147:1, 7, 12.

3 Wi no sabi suma skrifi a psalm disi, ma soleki fa a sori, dan a psalm skrifiman ben e libi na a ten di den Israelsma ben drai go baka na Yerusalem di Yehovah ben frulusu den fu Babilon (Ps. 147:2). A no de fu taki dati a psalm skrifiman ben e prèise Yehovah fu di a pipel fu en ben kan anbegi a Gado fu den baka na ini den eigi kondre. Ma tra sani ben de tu fu san ede a ben e prèise Yehovah. San na den sani dati? Sortu reide yu  abi fu bari „Haleluyah!” noso fu „prèise Yah”? *​—Ps. 147:1.

YEHOVAH E DRESI DEN SMA DI BROKOSAKA

4. Fa den Israelsma ben e firi di Kownu Sirus frulusu den èn fu san ede den ben e firi so?

4 Prakseri fa den Israelsma ben e firi di den ben de na ini katibo na Babilon. Den sma di ben tyari den go drape ben e spotu den: „Un singi wan fu den singi fu Sion gi unu.” Na a ten dati, Yerusalem, di ben de a moro prenspari sani di ben e meki den prèise Yehovah, ben kisi pori (Ps. 137:1-3, 6). Den Dyu no ben e firi fu singi. Den ben e sari èn den ben abi trowstu fanowdu. Ma den kisi frulusu fu Sirus, a kownu fu Persia, soleki fa den profeiti fu Gado ben taki. A ben teki Babilon abra èn a ben taki: „Yehovah . . . taigi mi fu bow wan oso gi en na Yerusalem . . . Efu wan sma de na un mindri di de fu a pipel fu en, dan meki Yehovah en Gado de nanga en. Sobun, meki a sma dati drai go baka drape” (2 Kron. 36:23). A sani disi ben musu fu de wan trowstu gi den Israelsma di ben e tan na ini Babilon!

5. San a psalm skrifiman ben taki fu a krakti di Yehovah abi fu dresi wi?

5 Boiti taki Yehovah ben trowstu a heri pipel leki grupu, a trowstu sosrefi ibriwan fu den Israelsma. Na so a de tu na ini a ten disi. A psalm skrifiman ben skrifi fu Gado: „A e dresi den sma di brokosaka èn a e tai den soro di e hati den” (Ps. 147:3). Iya, Yehovah e sorgu gi den sma di abi problema, awansi den e siki noso awansi den e firi brokosaka. Na ini a ten disi, Yehovah de klariklari fu trowstu wi èn fu dresi den soro na ini wi ati (Ps. 34:18; Yes. 57:15). A e gi wi koni nanga krakti fu man pasa iniwan problema di e miti wi.​—Yak. 1:5.

6. Fa wi e kisi wini fu den sani di a psalm skrifiman e taki na Psalm 147:4? (Luku a prenki na a bigin fu na artikel.)

6 Baka dati, a psalm skrifiman e poti prakseri na den hemel na loktu. A e fruteri wi taki Yehovah „e teri den stari” èn taki „a e kari den alamala na den nen” (Ps. 147:4). Fu san ede a bigin taki fu den stari now? Luku a tori disi: A psalm skrifiman ben man si den stari, ma a no ben sabi omeni fu den ben de. Na ini den yari di pasa, wi kon si moro nanga moro stari. Son sma e denki taki milyardmilyard stari de na ini a stari sistema fu wi. Èn den e denki taki bilyunbilyun stari sistema de na hemel! Libisma no man teri den stari kwetikweti! Ma a Mekiman e gi den alamala wan nen noso wan presi. Disi wani taki dati ibri stari prenspari gi Yehovah (1 Kor. 15:41). Fa a de nanga den libisma di a meki na grontapu? A Gado di sabi pe ibri stari de na iniwan momenti, sabi soifri tu pe yu de, fa yu e firi, èn san yu abi fanowdu na iniwan momenti!

7, 8. (a) San Yehovah e hori na prakseri te a e yepi a pipel fu en fu pasa den tesi di e miti den? (b) Gi wan eksempre di e sori fa Yehovah e yepi sondu libisma fu di a e firi gi den.

7 Boiti taki Yehovah e broko en ede nanga yu, a abi a makti tu fu yepi yu nanga den problema fu yu èn a wani du dati fu di a e firi gi yu. (Leisi Psalm 147:5.) Kande yu feni taki a situwâsi fu yu muilek tumusi èn taki den problema fu yu hebi tumusi gi yu. Gado sabi san yu man èn san yu no man, fu di ’a e hori na prakseri taki na fu doti yu meki’ (Ps. 103:14). Fu di wi na sondusma, meki wi e meki fowtu ibri tron baka. A no de fu taki dati wi e sari te wi taki wan sani di wi no ben musu taki, te wi abi takru lostu ten na ten, noso te wi e dyarusu tapu trawan! Yehovah srefi no e meki den fowtu disi, ma toku a e frustan heri bun fa wi e firi!​—Yes. 40:28.

 8 Kande yu ondrofeni kaba fa Yehovah yepi yu fu pasa wan tesi (Yes. 41:10, 13). Luku a tori fu Kyoko. Baka di a pionier sisa disi froisi go na wan tra gemeente, dan a lasi-ati. Fa Yehovah sori taki a ben e frustan fa a ben firi? Na ini a nyun gemeente pe Kyoko ben go, furu sma ben e frustan fa a ben e firi. A ben e firi neleki Yehovah ben e taigi en: „Mi lobi yu, èn a no fu di yu na wan pionier, ma na fu di yu na mi umapikin èn yu gi yusrefi abra na mi. Mi wani taki yu musu de koloku leki wan fu den Kotoigi fu mi!” Fa na Almaktiwan sori yu taki „a abi koni pasa marki” èn taki a e frustan fa yu e firi?

YEHOVAH E GI WI SAN WI ABI FANOWDU

9, 10. San na a moro prenspari fasi fa Yehovah e yepi wi? Gi wan eksempre.

9 Wi alamala abi sani fanowdu soleki nyanyan, krosi, nanga wan tanpresi. Kande yu e broko yu ede taki yu no abi nofo nyanyan. Ma no frigiti taki Yehovah e meki taki a gron e gi nyanyan, srefi gi den yongu blaka fowru di e bari fu di angri e kiri den! (Leisi Psalm 147:8, 9.) Efu Yehovah e gi den blaka fowru nyanyan doronomo, dan yu kan abi a frutrow taki a o gi yu den sani tu di yu abi fanowdu.​—Ps. 37:25.

10 San moro prenspari, na taki Yehovah e gi wi san wi abi fanowdu fu kan abi wan tranga bribi èn a e gi wi „a freide fu Gado di bigi moro iniwan sani di libisma man frustan” (Fil. 4:6, 7). Luku na eksempre fu Mutsuo nanga en wefi di e libi na ini Yapan. Den ondrofeni fa Yehovah yepi den baka di a tsunami pasa drape na ini 2011. Efu den no ben kren na tapu a daki fu den oso, a tsunami ben o kiri den. Ma a dei dati, den lasi pikinmoro ala sani di den ben abi. A neti dati, den tan na ini wan kamra na a dungru sodro fu na oso fu den. A tra mamanten, den ben e suku wan sani di ben kan gi den deki-ati. A wan-enkri sani di den ben man feni, na a Yaribuku fu Yehovah Kotoigi fu 2006. Wantewante Mutsuo en ai fadon tapu wan artikel di ben e taki fu wan gronseki di ben pasa na Sumatra na ini 2004, èn di tyari wan tu bigi tsunami kon. Noiti ete tsunami ben tyari so wan bigi pori kon. Mutsuo nanga en wefi krei di den leisi den ondrofenitori na ini a artikel. Den firi fa Gado sori lobi gi den fu di a gi den deki-ati na a momenti di den ben abi dati fanowdu. Yehovah gi den tra sani tu. Den Kresten brada nanga sisa fu den gi den nyanyan nanga krosi. Ma a sani di gi den moro deki-ati, na taki den brada fu a Bijkantoro Komte ben e kon luku a gemeente. Mutsuo e taki: „Mi ben e firi taki Yehovah ben de leti na wi sei èn taki a ben e sorgu gi wi. Dati ben de wan bigi trowstu!” A moro prenspari fasi fa Gado e yepi wi, na taki a e tranga a bribi fu wi, ma a e gi wi tu san wi abi fanowdu.

KISI WINI FU A YEPI FU GADO

11. Efu sma wani taki Yehovah yepi den, dan san den musu du?

11 Yehovah de klariklari ala ten fu „frulusu den safri-ati sma” (Ps. 147:6a). Ma fa wi kan kisi wini fu a yepi di a e gi wi? Wi musu abi wan bun matifasi nanga en. Èn fu man abi wan bun matifasi nanga en, dan wi musu abi safri-ati (Sef. 2:3). Safri-ati sma e wakti tapu Gado fu seti sani bun baka te sma du ogri nanga den noso te den e pina. Yehovah e prisiri nanga den sma disi.

12, 13. (a) Efu yu wani kisi wini fu a yepi fu Gado, dan san yu no musu du? (b) Nanga suma Yehovah e prisiri?

12 Ma na a tra sei, Gado „e meki den  ogri sma saka te na gron” (Ps. 147:6b). A no de fu taki dati wi no wani taki a sani disi pasa nanga wi! Efu wi wani kisi wini fu a lobi fu Yehovah èn efu wi no wani taki a atibron nanga wi, dan wi musu tegu gi den sani di a e tegu gi (Ps. 97:10). Fu eksempre, wi musu tegu gi hurudu. Disi wani taki dati wi musu tan fara fu iniwan sani di kan meki taki wi e du na ogri dati. Dati wani taki dati wi no musu luku porno tu (Ps. 119:37; Mat. 5:28). Kande a sani disi no o makriki gi wi, ma efu wi wani taki Yehovah blesi wi, dan wi musu du ala muiti.

13 Te wi e feti a feti disi, dan wi no musu frutrow tapu wisrefi, ma wi musu frutrow tapu Yehovah. Yu denki taki a o feni en bun te wi e frutrow tapu „a krakti fu asi”, sobun, tapu sani di libisma e frutrow na tapu? Kwetikweti! Wi no musu frutrow tu tapu „a gaw di wan sma futu gaw”, sobun, wi no musu denki taki wi o man frulusu wisrefi, noso taki wan tra sma o man du dati gi wi (Ps. 147:10). Na presi fu dati, wi musu begi Yehovah fu yepi wi. Tra fasi leki libisma di e gi trawan rai, Yehovah noiti no e weri fu arki den begi fu wi, awansi wi e aksi en ibri tron baka fu yepi wi. Bijbel e taki: „Yehovah e prisiri nanga den sma di abi lespeki gi en, iya, nanga den wan di sabi taki a o sori den bun-ati” (Ps. 147:11). Wi kan abi a frutrow taki Yehovah o tan na wi sei èn taki a o yepi wi fu basi den takru lostu fu wi, fu di a lobi wi.

14. San ben de wan deki-ati gi a psalm skrifiman?

14 Yehovah e gi wi a dyaranti taki a o yepi wi te wi abi problema. Di den Israelsma ben drai go baka na Yerusalem, dan a psalm skrifiman ben prakseri fa Yehovah ben e yepi den. A ben singi: „A meki den greni fu den portu fu yu kon tranga. A blesi den manpikin fu yu. A e sorgu taki freide de na ini a kontren fu yu” (Ps. 147:13, 14). A ben de wan deki-ati gi a psalm skrifiman fu sabi taki Gado ben o tranga den portu fu a foto fu kibri den anbegiman fu en!

Fa Gado Wortu kan yepi wi te tesi e miti wi? (Luku paragraaf 15-17)

15-17. (a) Fa wi kan firi son leisi te tesi e miti wi, ma fa Yehovah e gebroiki a Wortu fu en fu yepi wi? (b) Fruklari fa ’a boskopu fu Gado e waka esi’.

15 Kande yu e broko yu ede nanga den problema fu yu. Yehovah kan gi yu a koni fu pasa den problema disi. A psalm skrifiman ben taki fu a Gado fu en: „A gi grontapu komando. A boskopu fu en e waka esi.” A e taki tu dati Yehovah ’e meki snew fadon èn taki a e trowe finifini ijs nanga pisipisi ijs’ kon na grontapu. Baka dati a psalm skrifiman e aksi: „Suma kan teki a kowru fu en?” A e taki moro fara dati te Yehovah „e gi komando, na ijs e smèlter” (Ps. 147:15-18). A Gado fu wi di sabi ala sani èn di man du ala sani, di e basi na ijs èn a snew di e fadon komoto na hemel, kan yepi yu fu pasa iniwan problema di e miti yu.

16 Na ini a ten disi Yehovah e tiri wi nanga yepi fu en Wortu, Bijbel. Boiti dati, „a boskopu fu en e waka esi”. Disi wani taki dati Yehovah de klariklari fu gi wi rai te wi abi dati fanowdu. Prakseri fa yu kan kisi wini te yu e leisi Bijbel, te yu e ondrosuku den buku di „a koni srafu di de fu frutrow” e tyari kon na doro, te yu e luku JW Broadcasting, te yu e go tapu jw.org, te yu e suku rai na den owruman, èn te yu e moksi nanga Kresten brada nanga sisa (Mat. 24:45). Yu no si taki Yehovah no e draidrai fu sori yu san na a yoisti sani di yu musu du?

17 Simone ondrofeni a krakti fu Gado Wortu. A ben e denki so takru fu ensrefi taki a ben e tweifri efu Gado ben  feni en bun. Ma di a ben e firi brokosaka, a ben tan begi, èn a suku yepi na Yehovah. A tan studeri Bijbel doronomo tu. A taki: „Noiti mi ben de na ini wan situwâsi pe mi no si taki Yehovah gi mi krakti èn taki a tiri mi.” A sani disi yepi Simone fu du ala muiti fu tan denki bun fu ensrefi.

18. Fu san ede yu e firi taki Yehovah lobi yu, èn sortu reide yu abi fu bari „prèise Yah”?

18 A psalm skrifiman ben sabi taki Gado ben teki den Israelsma fu owruten, fu tron a pipel fu en. Na den wawan Gado ben ’fruteri san den musu du’ èn na den wawan ben kisi „den wèt fu en”. (Leisi Psalm 147:19, 20.) Na ini a ten disi a de wan grani taki wi na den wan-enkri sma na grontapu di e tyari a nen fu Gado. Fu di wi sabi Yehovah èn fu di a Wortu fu en abi krakti tapu wi libi, meki wi tron mati fu en, èn a sani disi na wan bigi grani. Neleki a skrifiman fu Psalm 147, yu abi ala reide fu bari „prèise Yah” èn fu gi trawan deki-ati fu du a srefi.

^ paragraaf 3 Yah na a syatu fasi fu skrifi a nen Yehovah.