Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2016

Eric nanga Amy

Den ben de klariklari fu go—Gana

Den ben de klariklari fu go—Gana

YU SABI wan brada noso sisa di froisi go na wan tra kondre pe moro Kownukondre preikiman de fanowdu? Oiti yu aksi yusrefi: ’San meki den wani dini na ini wan tra kondre? Fa den e sreka densrefi fu du a wroko disi? Mi o man du en tu?’ Fu kan feni wan piki tapu den aksi disi, dan a bun fu taki nanga den brada nanga sisa disi. Sobun, meki wi go taki pikinso nanga den.

SAN MEKI DEN E DU EN?

San meki yu bigin denki fu go dini na wan tra kondre pe moro preikiman de fanowdu? Amy abi sowan 35 yari èn a komoto na Amerkankondre. A e taki: „Someni yari kaba mi ben wani go dini na ini wan tra kondre, ma a gersi leki noiti mi no ben o man du en.” San yepi en fu kon si sani tra fasi? „Na ini 2004, wan trowpaar di e dini na Belise, aksi mi fu kon pionier wán mun nanga den. Na dati mi du èn mi ben lobi en! Wán yari baka dati, mi froisi go na Gana fu dini drape leki wan pionier.”

Aaron nanga Stephanie

Stephanie di no doro 30 yari ete, na fu Amerkankondre tu. Wan tu yari pasa, a luku a situwâsi fu en moro bun èn a taki na ensrefi: ’Mi gosontu èn mi no abi wan osofamiri fu sorgu. Sobun, mi kan du moro gi Yehovah leki san mi e du nownowde.’ Baka dati a si taki a ben kan froisi go na Gana fu du moro na ini a preikiwroko. Filip nanga Ida fu Deinsikondre na wan trowpaar di no doro 60 yari ete èn di e pionier. Ala ten den ben wani froisi go na wan kontren pe moro preikiman de fanowdu. Dati meki den suku fasi fu kan du disi. Filip e taki: „Di wan okasi opo kon, a ben gersi leki Yehovah ben taigi wi: ’Un go!’” Na ini 2008, den froisi go na Gana èn den dini drape moro leki dri yari.

Brook nanga Hans

Hans nanga Brook, wan trowpaar di pasa 30 yari  kaba èn di e pionier, e dini na Amerkankondre. Na ini 2005, wan bigi draiwinti di den e kari Katrina, wai na Amerkankondre. Di a rampu disi pasa, a trowpaar disi go yepi den brada nanga sisa drape. Bakaten den seni aksi a bijkantoro efu den kan yepi du bow-wroko na tra kondre, ma den no kisi wan kari. Hans e taki: „Ne wi yere wan kongres lezing di ben taki dati di Kownu David kon si taki a no ben o kisi primisi fu bow a tempel, a bosroiti fu du wan tra sani. A tori disi yepi wi fu si taki a no fowtu fu pruberi fu du wan tra wroko na ini na organisâsi, efu yu no kisi na okasi fu du a wan di yu ben wani” (1 Kron. 17:1-4, 11, 12; 22:5-11). Brook e taki: „Yehovah ben wani taki wi du wan tra sani.”

Baka di Hans nanga Brook yere den moi ondrofenitori fu den mati fu den di ben e dini na tra kondre, den srefi bosroiti fu go pruberi pionier na wan tra kondre. Na ini 2012, den go na Gana èn den ben man dini drape fo mun na ini a Dofusma-tongo gemeente. Den ben musu drai go baka na Amerkankondre, ma san den ondrofeni di den ben de na Gana yepi den fu meki moro muiti fu poti a Kownukondre na a fosi presi. Baka dati den yepi bow a bijkantoro na Mikronesia.

FA DEN E SREKA DENSREFI FU GO DINI NA WAN TRA KONDRE?

Fa yu sreka yusrefi fu go dini na wan presi pe moro yepi de fanowdu? Stephanie e taki: „Mi leisi artikel na ini A Waktitoren di ben e taki fu a tori disi. * Mi fruteri den owruman fu mi gemeente èn a kring-opziener nanga en wefi taki mi wani go dini na wan tra kondre. Ma a moro prenspari sani na taki mi begi Yehovah fu fruteri en san mi wani du.” Stephanie ben gebroiki en moni bun tu èn a no ben e bai sani lawlaw. Na so a ben man poti moni na wan sei di a ben kan gebroiki te a ben o dini na ini wan tra kondre.

 Hans e taki: „Fu di wi ben wani go pe Yehovah ben o seni wi, meki wi begi en fu a yepi wi. Wi taigi en tu sortu dei wi ben wani go.” A trowpaar disi seni brifi go na fo bijkantoro. Baka di den kisi wan moi piki fu a bijkantoro fu Gana, den go drape èn den ben o tan tu mun nomo. Ma Hans e taki: „Fu di wi ben lobi wroko nanga a gemeente, meki wi tan moro langa.”

Adria nanga George

George nanga Adria fu Kanada, na wan trowpaar di no doro 40 yari ete. Den ben hori na prakseri taki Yehovah e blesi den bun bosroiti di wi e teki. A no o blesi wi soso fu di wani du wan bun sani. Dati meki den bigin du san de fanowdu fu kan froisi go na wan tra kondre. Den taki nanga wan sisa di ben e dini na Gana, na wan kontren pe moro yepi de fanowdu èn den aksi en wan lo sani. Den skrifi wan brifi tu gi a bijkantoro fu Kanada nanga a bijkantoro fu Gana. Adria e taki: „Wi suku fasi tu fu kan gebroiki wi moni moro bun leki san wi ben e du kaba.” Disi yepi den fu froisi go na Gana na ini 2004.

SAN DEN E DU TE PROBLEMA E MITI DEN?

Sortu problema un kisi di un froisi èn san un du fu lusu den? Gi Amy a moro bigi problema ben de taki a ben e misi en famiri. „Ala sani ben de tra fasi leki san mi ben gwenti.” San yepi en? A e taki: „Mi famiri ben e bel mi fu taigi mi fa den breiti nanga san mi e du èn dati yepi mi fu no frigiti fu san ede mi froisi kon dya. Bakaten mi nanga mi famiri bigin gebroiki Internet fu taki nanga makandra. Fu di wi ben man si makandra, meki a no ben gersi leki den ben de so fara.” Amy kan memre taki di a tron mati  nanga wan sisa fu a kontren pe a ben de, a ben kon frustan den gwenti fu a kondre moro bun. „Te mi no ben frustan fu san ede sma ben e du son sani, dan mi ben kan go na mi mati ala ten. En yepi mi fu sabi san mi ben musu du èn san mi no ben musu du. Na so mi ben kan du a preikiwroko nanga prisiri.”

George nanga Adria e taki dati di den froisi go na Gana, a ben de leki den ben go baka na ini owruten. Adria e taki: „Wi no ben abi was-masyin, ma wi ben musu gebroiki emre fu wasi krosi. A ben e teki tin tron so langa fu bori nyanyan. Ma baka wan pisi ten sani no ben hebi so gi wi moro èn wi ben kan fruteri trawan den nyun sani disi di wi ondrofeni.” Brook e taki: „Aladi problema e miti wi leki pionier, toku wi e firi koloku. Wi ondrofeni so furu moi sani, taki ala ten wi e prisiri te wi e prakseri a ten dati baka.”

WAN WROKO DI E GI FURU PRISIRI

Fu san ede un wani gi trawan deki-ati fu go dini pe moro Kownukondre preikiman de fanowdu? Stephanie e taki: „A e gi prisiri fu preiki na ini wan kontren pe yu e miti sma di wani studeri Bijbel ibri dei fu di den gridi fu leri sabi a tru anbegi. A moro bun bosroiti di mi teki, na taki mi go dini pe moro yepi de fanowdu!” Na ini 2014, Stephanie trow nanga Aaron, èn now den e wroko na a bijkantoro fu Gana.

Christine, wan pionier sisa fu Doisrikondre di pasa 30 yari kaba, e taki: „Mi leri furu bun sani.” Fosi Christine froisi go na Gana, a ben e dini na Bolifia. A e taki tu: „Fu di mi de so fara fu mi famiri, meki ala ten mi e begi Yehovah fu a yepi mi. Now mi e si Yehovah leki mi moro bun mati. Mi e si a wánfasi tu di de na mindri a pipel fu Yehovah. A wroko disi meki mi kon de moro koloku.” No so langa pasa, Christine trow nanga Gideon èn den e dini ete na Gana.

Christine nanga Gideon

Filip nanga Ida taki san den du fu yepi sma di e studeri Bijbel, so taki den kan go na fesi. „Fosi, wi ben e studeri Bijbel nanga 15 noso moro sma, ma bakaten wi sorgu taki wi no ben e studeri nanga moro leki 10 sma. Na a fasi disi wi ben kan yepi den moro bun.” Den Bijbelstudenti fu den kisi wini fu disi? Filip e taki: „Mi ben studeri nanga wan yonguman di nen Michael. A ben man studeri ibri dei èn a ben e sreka ensrefi so bun, taki wi kaba a Bijbel leri-buku na ini wán mun. Baka dati, Michael tron wan preikiman di no dopu ete. A fosi dei di a go na ini a preikiwroko, a aksi mi: ’Yu man yepi mi nanga den Bijbelstudie fu mi?’ Mi fruwondru di mi yere san a aksi. Ne Michael taigi mi taki a e studeri Bijbel nanga dri sma èn a wani taki wan sma musu yepi en.” Disi e sori taki someni sma de fanowdu fu gi Bijbel leri, taki srefi Bijbelstudenti e tron leriman.

Ida nanga Filip

Amy e fruteri taki esi-esi a kon si taki furu yepi ben de fanowdu. A e taki: „Syatu baka di mi doro na Gana, wi ben e preiki na ini wan pikin dorpu fu suku dofusma. A no wán dofusma nomo wi feni na ini a pikin dorpu dati, ma aiti!” Now Amy trow nanga Eric èn den e dini leki spesrutu pionier. Den de na ini wan Dofusma-tongo gemeente pe den kan yepi den moro leki 300 dofu preikiman na ini a kondre èn tra sma tu di wani sabi moro. Fu di George nanga Adria go dini na Gana, meki den kon si san a wani taki fu de wan zendeling. Sobun, di den kisi wan kari fu go na a di fu 126 klas fu a Gileadskoro, den ben breiti! Now den e dini leki zendeling na Mosambik.

DEN E DU EN FU DI DEN ABI LOBI

A moi fu si fa someni brada nanga sisa fu tra kondre e wroko so tranga fu leri sma a tru anbegi. Den e du disi makandra nanga den brada nanga sisa fu a kondre pe den froisi go (Yoh. 4:35). Ibri wiki fu a yari, sowan 120 sma na Gana e teki dopu. Neleki fa a de nanga den 17 brada nanga sisa di froisi go na Gana pe moro yepi de fanowdu, na so dusundusun preikiman na heri grontapu sori taki den lobi Yehovah èn taki den de klariklari fu du a wroko disi. Den srefi froisi go dini na kontren pe moro Kownukondre preikiman de fanowdu. Wi de seiker taki den brada nanga sisa disi e prisiri na ati fu Yehovah!Ps. 110:3; Odo 27:11.

^ paragraaf 9 Luku fu eksempre den artikel di nen „Yu kan dini na wan presi pe moro Kownukondre preikiman de fanowdu?” nanga „Yu man abra go na Masedonia?”, na ini A Waktitoren fu 15 april nanga 15 december 2009.