Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2016

Aksi fu leisiman

Aksi fu leisiman

Esekièl kapitel 37 e taki fu tu tiki di e tron wán tiki. San disi wani taki?

Yehovah ben gi a profeiti Esekièl wan boskopu di ben e gi sma howpu. A ben pramisi taki baka te den Israelsma ben drai go baka na ini a Pramisi Kondre, den ben o tron wán pipel. A profeititori disi e sori tu taki na ini den lasti dei Gado pipel ben o tron wán pipel.

Yehovah ben taigi a profeiti Esekièl fu skrifi na tapu tu tiki. Na tapu a wan, a ben musu skrifi: „Gi Yuda èn gi den manpikin fu Israel di e horibaka gi en.” Na tapu a tra tiki, a ben musu skrifi: „Gi Yosef, a tiki fu Efrayim èn gi ala den Israelsma di e horibaka gi en.” Den tu tiki disi ben o „tron wán tiki” na ini Esekièl anu.Esek. 37:15-17.

 Suma „Efrayim” e prenki na ini a fisyun disi? Yerobeyam, a fosi kownu fu a tin-lo kownukondre Israel fu noordsei, ben de fu a lo fu Efrayim. A lo disi ben bigi èn a ben abi furu makti (Deut. 33:13, 17; 1 Kow. 11:26). Den sma fu a lo disi ben de bakapikin fu Yosef manpikin Efrayim (Num. 1:32, 33). Yosef ben kisi spesrutu blesi fu en papa Yakob. Dati meki a fiti taki Esekièl e kari a tiki di ben e prenki a tin-lo kownukondre, „a tiki fu Efrayim”. Na a ten di Esekièl skrifi a profeititori fu den tu tiki, den Asiriasma ben tyari a tin-lo kownukondre Israel fu noordsei, gowe kaba leki katiboman na ini 740 Fosi Krestes (2 Kow. 17:6). Ma bakaten den Babilonsma teki a makti abra fu den Asiriasma. Sobun, na a ten di Esekièl skrifi a profeititori, a moro bigi pisi fu den Israelsma ben panya na ala sei fu a Gran Kownukondre Babilon.

Na ini 607 Fosi Krestes, den Babilonsma tyari a tu-lo kownukondre fu zuidsei nanga wan tu sma di ben tan abra fu a noordsei kownukondre, gowe leki katiboman na Babilon. Den kownu di ben e tiri a tu-lo kownukondre ben de fu a lo fu Yuda. Den priester ben e libi na ini Yuda tu fu di den ben e wroko na ini a tempel na Yerusalem (2 Kron. 11:13, 14; 34:30). Sobun, a fiti taki a tiki „gi Yuda” e prenki a tu-lo kownukondre.

O ten den tu tiki disi kon tron wán tiki? Na di den Israelsma drai go baka na Yerusalem na ini 537 Fosi Krestes fu bow a tempel baka. Sma fu a tu-lo kownukondre nanga a tin-lo kownukondre ben drai go baka na a kondre fu den. Den Israelsma no ben prati moro, ma den ben tron wán pipel (Esek. 37:21, 22). Now den ben kan dini Yehovah baka leki wán man. Den profeiti Yesaya nanga Yeremia ben taki na fesi tu taki a pipel ben o tron wán baka.Yes. 11:12, 13; Yer. 31:1, 6, 31.

Sortu prenspari sani a profeititori disi e leri wi fu a tru anbegi? A e leri wi taki Yehovah o meki den anbegiman fu en „tron wán” (Esek. 37:18, 19). A pramisi disi kon tru na ini a ten disi? Iya. A profeititori disi bigin kon tru na ini 1919 di Gado pipel bigin orga densrefi baka èn den kon de wán. Satan no ben man prati den, aladi a ben pruberi dati.

Na a ten dati, a moro bigi pisi fu den sma di ben kon de wán, ben abi a howpu fu tron kownu nanga priester na ini hemel makandra nanga Yesus (Openb. 20:6). Na agersi fasi, den ben de a tiki gi Yuda. Ma bakaten moro nanga moro sma di ben abi a howpu fu libi na grontapu bigin moksi nanga den agersi Dyu disi (Sak. 8:23). Den ben de a tiki gi Yosef èn den no ben abi a howpu fu tiri makandra nanga Krestes.

Na ini a ten disi, den tu grupu disi e dini Yehovah leki wán pipel èn den abi wán Kownu, Yesus Krestes. A profeititori e kari en „mi futuboi David” (Esek. 37:24, 25). Yesus ben begi taki ala den bakaman fu en ben kan ’de wán, neleki fa en Tata ben de wán nanga en èn en ben de wán nanga en Tata’ (Yoh. 17:20, 21). * Yesus ben taki tu dati a pikin ipi salfu bakaman fu en ben „o tron wán ipi” makandra nanga den „tra skapu” fu en. Den alamala ben o abi „wán skapuman” (Yoh. 10:16). Na wan moi fasi Yesus e sori taki a pipel fu Yehovah na ini a ten disi ben o dini Gado leki wán man awinsi sortu howpu den abi.

^ paragraaf 6 Di Yesus taki fu den lasti dei, a fruteri den bakaman fu en wan tu agersitori. A moi fu si taki a taki fosi fu „a koni srafu di de fu frutrow”. Disi na wan pikin grupu salfu brada di ben o teki fesi (Mat. 24:45-47). Baka dati a fruteri agersitori di abi fu du nanga ala den salfu Kresten di abi a howpu fu libi na hemel (Mat. 25:1-30). Te fu kaba, a taki fu den wan di abi a howpu fu libi na grontapu èn di ben o horibaka gi den brada fu Krestes (Mat. 25:31-46). Na so a de tu taki a profeititori fu Esekièl di e kon tru na ini a ten disi, e sori fosi san ben o pasa nanga den wan di abi a howpu fu libi na hemel. Aladi a no ala ten a tin-lo kownukondre e prenki den wan di abi a howpu fu libi na grontapu, toku a profeititori disi di e taki dati tu tiki ben o tron wán, e sori taki den wan di abi a howpu fu libi na grontapu nanga den wan di abi a howpu fu go na hemel ben o de wán pipel.