Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2016

Wi de nanga tangi taki Gado sori wi bun-ati

Wi de nanga tangi taki Gado sori wi bun-ati

„A sori wi alamala bun-ati pasa marki, bika a abi furu bun-ati.”YOH. 1:16.

SINGI: 95, 13

1, 2. (a) Fruteri na agersitori di Yesus gi fu a man di ben abi wan droifidyari. (b) San a tori disi e leri wi fu wan sma di lobi fu gi sani èn di e sori trawan bun-ati?

FRUKU mamanten wan man di abi wan droifidyari e go na wowoyo fu suku sma di wani wroko na ini a droifidyari fu en. Den sma di a feni e agri fu wroko gi a moni di a wani pai den èn den e bigin wroko. Ma a man abi moro sma fanowdu èn dati meki moro lati na a dei a e go na a wowoyo baka fu suku sma. Bakadina a e go suku sma baka èn a e taigi den tu taki a o pai den bun. Na mofoneti a e kari den wrokoman kon fu pai den. A e gi ibriwan fu den a srefi moni, awinsi den wroko wán yuru nomo noso moro langa. Te den sma di wroko moro langa gi en si san a du, den e bigin kragi. Ne a man e taigi den: ’Un ben agri nanga a moni di mi ben o gi unu, a no so? Mi no abi a reti fu pai ala mi wrokoman san mi wani? Un e dyarusu, fu di mi na wan bun sma?’Mat. 20:1-15.

2 Na agersitori fu Yesus e meki wi prakseri wan fu den moi fasi fu Yehovah di Bijbel e taki fu en furu leisi. Dati na a „bun-ati” fu en. (Leisi 2 Korentesma 6:1.) Kande son sma  ben o feni taki den wrokoman di wroko wán yuru nomo, no ben musu kisi pai gi wan heri dei, ma a man fu a droifidyari ben sori den bun-ati pasa marki. Son Bijbel e vertaal a wortu „bun-ati” nanga „gnade”. Wan sabiman e taki: „A wortu disi e sori taki wan sma kisi wan kado, aladi a no e frudini en. A kisi en sondro taki a wroko fu en noso sondro taki a meki muiti fu en.”

A MORO MOI KADO DI YEHOVAH GI WI

3, 4. Fu san ede Yehovah sori ala libisma bun-ati èn fa a du dati?

3 Bijbel e taki dati ’a bun-ati fu Gado de leki wan kado’ (Ef. 3:7). Fu san ede Yehovah gi wi a „kado” disi èn fa a du dati? Efu wi ben e du ala den sani di Yehovah e aksi fu wi, dan wi ben o frudini en taki a e sori wi bun-ati. Ma soleki fa wi sabi, dan wi no e du ala san a e aksi fu wi. Dati meki a koni Kownu Salomo ben skrifi: „Nowan reti-ati sma no de na grontapu, di e du bun ala ten èn di no e sondu” (Preik. 7:20). Na apostel Paulus ben taki wan srefi sortu sani: „Ala sma sondu èn den no man sori a glori fu Gado kwetikweti.” A ben taki tu dati „a pai fu sondu na dede” (Rom. 3:23; 6:23a). Na dati wi e frudini.

4 Ma fu di Yehovah abi lobi, meki a sori sondu libisma bun-ati pasa marki. A moro moi kado di a gi wi na taki a seni „en wan-enkri Manpikin” kon na grontapu fu dede gi wi (Yoh. 3:16). Dati meki Paulus ben skrifi taki now Yesus „kisi glori nanga grani fu di a dede. Na so fasi a bun-ati fu Gado meki taki a ben kan dede gi ala sma” (Hebr. 2:9). Iya, „a kado di Gado e gi sma na têgo libi nanga yepi fu Krestes Yesus wi Masra”.Rom. 6:23b.

5, 6. San o de a bakapisi (a) te sondu e basi wi? (b) te wi e meki a bun-ati fu Gado tiri wi?

5 Fa a du kon taki libisma abi sondu èn taki den e dede? Bijbel e taki: „A sondu fu wan man [Adam] meki taki dede tiri [den bakapikin fu en] leki kownu” (Rom. 5:12, 14, 17). Ma koloku taki wi kan bosroiti fu no meki sondu tiri wi moro. Te wi e sori bribi na ini a lusu-paiman fu Krestes, dan wi kan taki dati wi e meki a bun-ati fu Yehovah tiri. Fa so? Bijbel e taki: „Efu sma e du furu sondu, dan Gado e sori moro bun-ati. Fu san ede? We, neleki fa sondu nanga dede tiri leki kownu, na so a bun-ati fu Gado o tiri leki kownu tu, so taki sma kan tron reti-ati sma. Na so fasi sma kan kisi têgo libi nanga yepi fu wi Masra Yesus Krestes.”Rom. 5:20, 21.

6 Aladi wi na sondusma ete, toku wi no abi fu meki sondu basi wi. Te wi du wan sondu, dan wi kan aksi Yehovah pardon. Paulus ben warskow Kresten: „No meki sondu basi unu, bika a Wèt no abi krakti na un tapu moro èn Gado sori unu bun-ati” (Rom. 6:14). Sobun, now sondu no e basi wi moro, ma wi tron sma di Gado sori bun-ati. San o de a bakapisi? Paulus ben taki: ’A bun-ati fu Gado e leri wi fu kakafutu gi ogridu èn gi den lostu fu grontapu. A e leri wi tu fu libi nanga krin frustan, fu de reti-ati sma èn fu dini Gado fayafaya na ini a ten disi.’Tit. 2:11, 12.

GADO SORI WI BUN-ATI „NA DIFRENTI FASI”

7, 8. San a wani taki dati Yehovah e „sori bun-ati na difrenti fasi”? (Luku a prenki na a bigin fu na artikel.)

7 Na apostel Petrus ben skrifi: „Neleki fa ibriwan fu unu kisi a koni fu man du wan spesrutu sani, na so un musu gebroiki  a koni dati fu dini makandra leki bun futuboi di Gado sori bun-ati na difrenti fasi” (1 Petr. 4:10). San a wani taki dati Gado e „sori bun-ati na difrenti fasi”? A wani taki dati awinsi sortu tesi wi e kisi, Yehovah kan sori wi bun-ati èn dati e yepi wi fu horidoro (1 Petr. 1:6). Na so a e gi wi ala san wi abi fanowdu fu man pasa ibri tesi.

8 Iya, Yehovah e sori wi bun-ati na difrenti fasi. Na apostel Yohanes ben skrifi: „A sori wi alamala bun-ati pasa marki, bika a abi furu bun-ati” (Yoh. 1:16). Den difrenti fasi fa Yehovah e sori wi bun-ati, e meki taki wi e kisi furu blesi. San na wan tu fu den blesi disi?

9. Sortu wini wi e kisi fu di Yehovah e sori wi bun-ati èn fa wi kan sori taki wi de nanga tangi gi dati?

9 Wi e kisi pardon fu den sondu fu wi. A bun-ati fu Yehovah meki taki wi kan kisi pardon fu den sondu fu wi, ma soso te wi abi berow èn wi e tan meki muiti fu feti nanga den sondu firi fu wi. (Leisi 1 Yohanes 1:8, 9.) A sari-ati fu Gado musu meki taki wi de nanga tangi èn taki wi wani prèise en. Paulus ben skrifi den salfu brada nanga sisa fu en: „[Yehovah] puru wi na ini a makti fu dungru èn a poti wi na ini a Kownukondre fu en lobi Manpikin, di pai wan lusu-paiman fu fri wi. Sobun, wi kisi pardon fu wi sondu” (Kol. 1:13, 14). Te Gado e gi wi pardon fu den sondu fu wi, dan wi o kisi omeni tra moi blesi tu.

10. Sortu tra blesi wi e kisi fu di Gado sori wi bun-ati?

10 Wi abi wan bun matifasi nanga Gado. Sensi di wi gebore wi na sondu libisma èn dati meki wi na feanti fu Gado. Paulus ben taki: „A dede fu Gado en Manpikin meki taki wi kon bun baka nanga Gado, aladi wi ben de feanti” fu en (Rom. 5:10). Sobun, fu di wi kon bun baka nanga Yehovah, meki wi kan tron mati fu en. Paulus e sori taki wi kisi a grani disi fu di Yehovah sori wi bun-ati. Dati meki a taigi den salfu brada fu en: „Now di Gado e si wi leki reti-ati sma fu di wi abi bribi, meki wi de bun nanga Gado nanga yepi fu wi Masra Yesus Krestes. Nanga yepi fu en èn fu di wi abi bribi, meki wi kisi na okasi tu fu kon krosibei na Gado fu a sori wi bun-ati, soleki fa wi e si nownow kaba” (Rom. 5:1, 2). Disi na wan bigi blesi!

Den difrenti fasi fa Gado sori wi bun-ati: Wi kisi a grani fu yere a bun nyunsu (Luku paragraaf 11)

11. Fa den salfu Kresten e yepi den „tra skapu” fu tron reti-ati futuboi fu Gado?

11 Wi kan tron reti-ati futuboi fu Gado. Nowan fu wi e gebore leki reti-ati sma. Ma a profeiti Danièl ben taki dati na ini a ten fu a kaba, den salfu Kresten „di man si a dipi fu wan tori” ben o „yepi furu sma fu kon de reti-ati sma”. (Leisi Danièl 12:3.) Fu di den salfu Kresten disi e du a preikiwroko èn den e gi sma leri, meki den yepi milyunmilyun „tra skapu” fu tron reti-ati futuboi fu Yehovah (Yoh. 10:16). Ma na a bun-ati fu Yehovah, meki taki den ben man du disi. Paulus ben taki: „Na bun-ati fu Gado meki a e si sma leki reti-ati sma nanga yepi fu a lusu-paiman di Krestes Yesus pai èn di e tyari frulusu kon. Disi de leki wan kado di Gado gi sma.”Rom. 3:23, 24.

Wi kisi a grani fu begi (Luku paragraaf 12)

12. Fu san ede wi kan taki dati begi na wan fasi fa Gado sori wi bun-ati?

12 Wi man kon na fesi Gado fu begi en. Fu di Yehovah sori wi bun-ati, meki wi abi a grani fu kon na fesi en kownusturu fu begi en. Fu taki en leti, Paulus taki dati a kownusturu fu Yehovah, na „a kownusturu fu [a] Gado di e sori wi  bun-ati” èn a e gi wi a kari fu go na fesi a kownusturu fu Yehovah fu kan „taki nanga en sondro fu frede” (Hebr. 4:16a). Nanga yepi fu Yesus, wi kan taki nanga Yehovah, èn disi na wan bigi grani. Paulus ben taki: „Wi kan de seiker taki nanga yepi fu en wi man taki sondro frede èn wi man go na Gado o ten wi wani, fu di wi e bribi na ini Krestes” (Ef. 3:12). Iya, wan moi fasi fa Yehovah e sori wi bun-ati, na taki wi man taki fri nanga en na ini begi.

Wi e kisi yepi na a yoisti ten (Luku paragraaf 13)

13. Fa wi e kisi yepi „na a yoisti ten” fu di Gado sori wi bun-ati?

13 Wi e kisi yepi na a yoisti ten. Paulus ben gi wi a deki-ati fu taki fri nanga Yehovah na ini begi, „so taki a kan abi sari-ati nanga wi èn a kan sori wi bun-ati fu yepi wi na a yoisti ten” (Hebr. 4:16b). Ibri leisi te wi e kisi tesi noso problema, wi kan begi Yehovah fu a yepi wi. Aladi wi no e frudini en, toku a e piki wi, nofo tron nanga yepi fu wan brada noso sisa. „Na so fasi wi kan abi deki-ati èn wi kan taki: ’Yehovah na mi yepiman. Mi no o frede. San libisma kan du mi?’”Hebr. 13:6.

14. Te wi lasi-ati, dan sortu wini wi e kisi fu di Yehovah e sori wi bun-ati?

14 Wi e kisi trowstu te wi lasi-ati. Wan moi blesi di Yehovah e gi wi fu di a sori wi bun-ati na taki a e trowstu wi te wi lasi-ati (Ps. 51:17). Di sma frufolgu den Kresten na Tesalonika, Paulus skrifi den: „Wi Masra Yesus Krestes srefi nanga Gado wi Tata, ben lobi wi èn den gi wi trowstu fu ala ten. Den e meki taki wi kon abi wan moi howpu tu fu di den sori wi bun-ati. Sobun, meki den trowstu unu. Meki den gi unu deki-ati” (2 Tes. 2:16, 17). Wi e kisi furu trowstu fu di wi sabi taki Yehovah lobi wi èn a e sori wi bun-ati pasa marki.

15. Sortu howpu wi abi fu di Gado sori wi bun-ati?

15 Wi abi a howpu fu kisi têgo libi.  Wi leki sondusma no ben abi nowan howpu. (Leisi Psalm 49:7, 8.) Ma Yehovah gi wi wan moi howpu. Yesus pramisi den bakaman fu en: „Mi Tata wani taki ibri sma di sabi a Manpikin èn di e sori taki a e bribi na ini en, musu kisi têgo libi” (Yoh. 6:40). Iya, a howpu fu kisi têgo libi na wan kado. Na wan moi fasi fa Gado sori wi bun-ati. Dati meki Paulus ben taki: „Gado meki sma si a bun-ati fu en èn na so fasi ala sortu sma kan kisi frulusu.”Tit. 2:11.

NO TEKI A BUN-ATI FU GADO LEKI WAN OKASI FU DU SONDU

16. Fa son Kresten na ini owruten ben teki a bun-ati fu Gado leki wan okasi fu du sondu?

16 Aladi wi e kisi furu blesi fu di Yehovah sori wi bun-ati, toku wi no musu denki taki awinsi san wi e du, a feni dati bun. Wan tu Kresten na ini owruten ben „teki a bun-ati fu wi Gado leki wan okasi fu du ogri sani sondro fu syen” (Yud. 4). Kande den Kresten disi ben denki taki den ben kan sondu fu espresi èn taki Yehovah ben o gi den pardon ala ten baka. Ma san moro ogri, na taki den ben e pruberi fu meki tra Kresten du den srefi ogri tu. Na ini a ten disi, a de so tu taki sma di e du den sani disi, „no abi nowan lespeki gi a yeye fu Gado di e sori sma a bun-ati fu en”.Hebr. 10:29.

17. Sortu warskow Petrus gi wi?

17 Na ini a ten disi, Satan kori son Kresten fu denki taki den kan tan du sondu fu espresi èn taki Gado o gi den pardon fu di a abi sari-ati. A tru taki te wi du wan sondu, Yehovah de klariklari fu gi wi pardon solanga wi abi berow. Ma a wani taki wi musu tan feti nanga den sondu firi fu wi. A ben meki Petrus skrifi: „Fu dati ede, un lobiwan, fu di unu sabi den sani disi na fesi, meki un musu luku bun taki den wan di e du kruktudu no kori unu nanga den lei fu den, so taki unu bigin degedege. Nôno, ma sorgu taki wi Masra nanga wi Frulusuman Yesus Krestes tan sori unu bun-ati moro nanga moro èn taki unu e tan kisi moro nanga moro sabi fu en.”2 Petr. 3:17, 18.

A BUN-ATI DI GADO SORI WI, E TYARI FRANTWORTU KON

18. Sortu frantwortu a bun-ati fu Gado e tyari kon gi wi?

18 Wi de nanga tangi taki Yehovah sori wi bun-ati. Dati meki wi musu prèise en èn wi musu du sani fu yepi tra sma. Fa wi kan du dati? Paulus taki: ’Fu di Gado abi bun-ati, meki a gi ibriwan fu wi difrenti koni. Fu dati ede, efu wi musu du wan diniwroko, dan meki wi tan du a diniwroko disi. Efu wan sma e gi leri, dan meki a tan gi leri. Efu wan sma e frumane trawan, dan meki a tan frumane trawan. Efu wan sma abi sari-ati gi trawan, dan meki a tan du disi nanga prisiri’ (Rom. 12:6-8). Fu di Yehovah sori wi bun-ati, meki wi abi a frantwortu fu du wi Kresten diniwroko fayafaya, fu leri sma san Bijbel e taki, fu gi tra Kresten deki-ati èn fu gi sma pardon awinsi den du wan hati sani nanga wi.

19. Fu sortu frantwortu di wi abi, wi o taki na ini a tra artikel?

19 Fu di wi de nanga tangi taki Gado sori wi lobi pasa marki, meki wi musu du ala san wi man fu preiki „a bun nyunsu taki Gado e sori sma bun-ati” (Tori 20:24). Na ini a tra artikel, wi o taki moro fini fu a frantwortu disi di wi abi.