„Disi wani taki mi skin. . . . Disi wani taki mi ’brudu fu a frubontu’.”​—MAT. 26:26-28.

SINGI 16 Prèise Yah taki a salfu en Manpikin

SAN WI O LERI *

1-2. (a) Fu san ede a no e fruwondru wi taki Yesus leri wi fu hori a Memrefesa na wan makriki fasi? (b) Fu sortu fasi fu Yesus wi o taki?

YU SABI san e pasa te wi e hori a Memrefesa fu a dede fu Yesus? A no o muilek gi furu fu wi fu piki na aksi disi. Fu san ede? Fu di furu sani no e pasa na a Memrefesa. Ma toku a konmakandra disi prenspari srefisrefi. Sobun, kande wi e aksi wisrefi: ’Efu a Memrefesa prenspari so, dan fu san ede wi no e du moro bigi sani tapu a dei disi?

2 Di Yesus ben e preiki na grontapu, a ben e leri sma prenspari tru tori èn a ben e du dati na wan fasi di makriki fu frustan (Mat. 7:28, 29). Na a srefi fasi, a yepi wi fu memre a dede fu en na wan makriki fasi. Meki wi go luku san wi kan leri fu a Memrefesa * èn sortu sani Yesus taki èn du a neti fosi a dede. Disi o yepi wi fu frustan taki Yesus abi trutru sakafasi, taki a abi deki-ati èn taki a abi lobi. Wi o si tu fa wi kan teki na eksempre fu en.

YESUS ABI SAKAFASI

A brede nanga win di wi e gebroiki na a Memrefesa e memre wi taki Yesus dede gi wi èn taki now a e tiri leki Kownu na ini hemel (Luku paragraaf 3-5)

3. (a) Soleki fa wi kan leisi na Mateyus 26:26-28, dan fa Yesus ben wani taki den bakaman fu en musu memre a dede fu en? (b) San den tu sani di den ben musu gebroiki e prenki?

3 Yesus ben de nanga 11 fu den apostel fu en di a taki dati den bakaman fu en musu tan memre a dede fu en. A teki den sani di ben tan abra fu a Paska nyanyan, dan  a sori den fa den musu memre a dede fu en na wan makriki fasi. (Leisi Mateyus 26:26-28.) A gebroiki soso a brede sondro srudeki nanga a win di ben tan abra. Yesus taigi den apostel fu en taki den tu sani disi e prenki en skin nanga en brudu di a ben o gi leki wan ofrandi. A kan taki den apostel no ben fruwondru di Yesus taigi den fu hori a Memrefesa nanga den tu sani disi nomo, sondro furu pranpran. Fu san ede?

4. Fa a rai di Yesus gi Marta e yepi wi fu frustan fu san ede Yesus taigi den apostel fu en fu hori a Memrefesa sondro furu nyanyan?

4 Prakseri san ben pasa wan tu mun na fesi, di Yesus ben go na a oso fu Lasarus, Marta nanga Maria di ben de bun mati fu en. Di Yesus ben de drape a bigin gi den leri. Marta ben de na oso, ma a no ben poti prakseri na den sani di Yesus ben taki fu di a ben e sreka wan bigi nyanyan gi a fisitiman fu en. Di Yesus si disi a sori Marta taki a no ala ten so furu nyanyan de fanowdu (Luk. 10:40-42). Bakaten, Yesus du a srefi sani di a taigi Marta. Wan tu yuru fosi a dede leki wan frulusu-ofrandi, a sori den apostel fu en fu hori a Memrefesa fu en sondro furu nyanyan. San a sani disi e leri wi fu Yesus?

5. San wi e leri fu Yesus te wi e luku fa a wani taki den bakaman fu en musu hori a Memrefesa èn fa Filipisma 2:5-8 e horibaka gi dati?

5 Ala sani di Yesus ben e taki èn du, ben e sori taki a abi sakafasi. Sobun, a no e fruwondru wi taki a sori sakafasi tapu a lasti neti fu en na grontapu (Mat. 11:29). A ben sabi taki na ofrandi di a ben o tyari ben prenspari srefisrefi gi ala libisma èn taki te a ben o kisi wan opobaka a ben o tron kownu na ini hemel. Toku a no ben wani taki sma hori a Memrefesa fu en nanga furu pranpran. Na presi fu dati a taigi den disipel fu en fu memre a dede fu en wán leisi wan yari èn fu gebroiki soso brede nanga win (Yoh. 13:15; 1 Kor. 11:23-25). A fasi fa Yesus ben wani taki den bakaman fu en musu hori a Memrefesa e sori taki a no ben abi heimemre. Yu no breiti taki wi hemel Kownu abi sakafasi?​—Leisi Filipisma 2:5-8.

6. Fa wi kan teki na eksempre fu Yesus te wi e kisi fu du nanga tesi?

6 Fa wi kan sori sakafasi neleki Yesus? Wi kan du dati te wi no e prakseri wisrefi nomo, ma wi e luku san trawan abi fanowdu (Fil. 2:3, 4). Prakseri a lasti neti di Yesus ben de na grontapu. Yesus ben sabi taki a ben o dede wan  hati dede, ma toku a ben e broko en ede nanga den apostel fu en di ben o sari te a ben dede. Dati meki a gebroiki a lasti neti di a ben de nanga den fu gi den leri èn fu gi den deki-ati nanga trowstu (Yoh. 14:25-31). Fu di Yesus ben abi sakafasi, meki a ben broko en ede moro nanga trawan, na presi fu prakseri ensrefi nomo. Yesus na wan moi eksempre gi wi!

YESUS ABI DEKI-ATI

7. Fa Yesus sori deki-ati baka di a sori den apostel fa den ben musu hori a Memrefesa?

7 Syatu baka di Yesus sori den apostel fu en fa den ben musu memre a dede fu en, a sori furu deki-ati. Fa so? Yesus ben de klariklari fu du san en Papa ben wani, aladi a ben sabi taki sma ben o kiri en fu di den ben feni taki a spotu Gado (Mat. 26:65, 66; Luk. 22:41, 42). Yesus tan gi yesi na Yehovah. Na a fasi disi a gi Yehovah grani, a sori taki Gado abi a reti fu de wi Tiriman èn a gi libisma di abi berow fu den sondu, na okasi fu kisi têgo libi. Ma Yesus ben sreka den bakaman fu en tu gi den tesi di den ben o kisi.

8. (a) San Yesus taigi den apostel di tan horibaka gi en? (b) Fa den disipel fu Yesus tan sori deki-ati neleki en na ini den yari baka di a dede?

8 Yesus ben abi so furu deki-ati taki a no ben prakseri den sani di ben o miti en, ma a ben luku fa a ben kan yepi den apostel fu en. A neti-nyanyan di a hori nanga den 11 apostel baka di a seni Yudas gowe, ben o memre den wan di Gado ben o salfu sortu wini a brudu fu Yesus ben o tyari kon gi den èn fa den ben o kisi wini fu a nyun frubontu (1 Kor. 10:16, 17). Fu yepi den fu tan gi yesi na Yehovah èn fu kisi a pai fu den na ini hemel, a taigi den san en nanga en Papa ben fruwakti fu den (Yoh. 15:12-15). A taigi den tu sortu  tesi den ben o kisi. Baka dati a taigi den taki neleki en den ben musu „hori deki-ati”! (Yoh. 16:1-4a, 33) Baka omeni yari den disipel fu Yesus ben tan poti a wani fu Gado na a fosi presi èn den ben tan sori deki-ati neleki en. Aladi den ben musu nyan pina, toku den tan horibaka gi makandra.​—Hebr. 10:33, 34.

9. Fa wi kan sori deki-ati neleki Yesus?

9 Na ini a ten disi wi srefi e sori deki-ati neleki Yesus. Fu eksempre, wi musu abi deki-ati fu horibaka gi den brada nanga sisa di e kisi frufolgu fu a bribi fu den ede. Son leisi brada nanga sisa musu go na strafu-oso aladi den no du nowan ogri. Te dati e pasa, dan wi musu du ala san wi man fu yepi den. Wi musu de klariklari fu opo taki gi den (Fil. 1:14; Hebr. 13:19). Wan tra fasi fa wi e sori deki-ati na te wi e preiki „sondro frede” (Tori 14:3). Neleki Yesus wi e du ala san wi man fu preiki a Kownukondre boskopu, aladi sma e gens wi noso e frufolgu wi. Ma son leisi wi kan firi leki wi no abi nofo deki-ati. San kan yepi wi te dati e pasa?

10. San wi musu du na ini den wiki fosi a Memrefesa, èn fu san ede a bun fu du den sani disi?

10 Wi o kisi moro deki-ati te wi e prakseri den moi sani di wi o kisi fu di Yesus dede gi wi (Yoh. 3:16; Ef. 1:7). Na ini den wiki fosi a Memrefesa wi abi na okasi fu du sani di o meki taki wi kisi moro warderi gi a lusu-paiman. Na ini a pisi ten dati meki muiti fu leisi den Bijbel pisi di abi fu du nanga a Memrefesa. Begi èn denki dipi fu den sani di pasa na a pisi ten di Yesus dede. Te wi kon makandra gi a Memrefesa, dan wi o frustan moro bun o prenspari a brede nanga a win de èn o bigi na ofrandi de di Yesus tyari gi wi. Efu  wi e frustan san Yehovah nanga Yesus du gi wi èn fa den sani dati e tyari wini kon gi wi, dan wi howpu o kon moro tranga èn wi o kisi deki-ati fu horidoro te na kaba.​—Hebr. 12:3.

11-12. San wi leri teleki now?

11 Te nanga now wi si taki a Memrefesa e memre wi o prenspari a lusu-paiman de èn taki Yesus abi sakafasi nanga deki-ati. Wi breiti taki Yesus e tan sori den fasi disi leki wi Granpriester na hemel di e taki gi wi (Hebr. 7:24, 25). Fu sori taki wi de nanga tangi, wi musu go na a Memrefesa fu a dede fu Yesus ibri yari, soleki fa a taigi wi (Luk. 22:19, 20). Wi e memre a dede fu en tapu a dei di e fadon tapu 14 Nisan fu a Dyu kalender. Disi na a moro prenspari dei fu a yari.

12 Te wi e luku a fasi fa Yesus ben wani wi memre a dede fu en, dan wi e leri fu wan tra fasi di Yesus abi. Fu di a ben abi a fasi dati, meki a ben de klariklari fu dede gi wi. Di a ben de na grontapu a ben de krin taki a ben abi a fasi disi. San na a fasi disi?

YESUS ABI LOBI

13. Fa Yohanes 15:9 nanga 1 Yohanes 4:8-10 e tyari kon na krin o furu lobi Yehovah nanga Yesus sori gi wi èn fa wi kan kisi wini fu a lobi dati?

13 Ala san Yesus ben du e sori o furu lobi Yehovah abi gi wi. (Leisi Yohanes 15:9; 1 Yohanes 4:8-10.) Ma a moro prenspari fasi fa a sori a lobi dati, na taki a ben de klariklari fu dede gi wi. Awinsi wi na wan salfuwan noso wi na wan fu den „tra skapu”, wi alamala e kisi wini fu a lobi di Yehovah nanga en Manpikin sori nanga yepi fu a lusu-paiman (Yoh. 10:16; 1 Yoh. 2:2). Prakseri a fasi fa wi e hori a Memrefesa tu. A sani disi e sori tu taki Yesus lobi den disipel fu en. Fu san ede wi kan taki dati?

Fu di Yesus lobi wi meki a taigi wi fu hori a Memrefesa sondro furu pranpran, so taki wi ben kan hori en ala yari awinsi na ini sortu situwâsi wi de (Luku paragraaf 14-16) *

14. Fa Yesus sori lobi gi den disipel fu en?

14 Yesus sori lobi gi den salfuwan, di a sori den taki den no abi fu hori a Memrefesa nanga furu sani. Ibri yari den salfuwan dati ben o abi fu hori a Memrefesa awinsi fa a situwâsi fu den ben o de. Sonwan fu den ben o abi fu hori en aladi den ben de na strafu-oso (Openb. 2:10). Den ben man tan gi yesi na Yesus? Iya, den tan gi yesi na en!

15-16. Fa son sma ben man hori a Memrefesa aladi den ben de na ini muilek situwâsi?

15 Fu a ten fu den apostel teleki a ten fu wi, tru Kresten meki muiti fu hori a Memrefesa. Den pruberi fu hori en soleki fa Yesus sori den, aladi den ben de na ini muilek situwâsi son leisi. Luku den eksempre disi. Di Brada Harold King ben de en wawan na ini wan strafu-oso kamra na ini China, a ben musu suku wan fasi fu hori a Memrefesa. Sondro taki den skowtu si en, a pruberi fu sreka a brede nanga a win nanga den sani di a ben abi na en. A meki muiti tu fu kon sabi san na a yoisti dei di a ben musu hori a Memrefesa. Di a dei doro a memre a dede fu Yesus aladi a ben de en wawan. A singi, a begi èn a hori wan Bijbel-lezing.

16 Luku a tra eksempre. Wan grupu sisa ben de na ini wan strafuman-kampu fu den Nazisma na a ten fu a Di Fu Tu Grontapufeti. Den sisa disi hori a Memrefesa aladi den ben kan lasi den libi efu sma ben kisi den. Ma fu di den ben abi tu sani nomo fanowdu fu hori a Memrefesa, meki den ben man du en sondro taki den waktiman kisi den. Den sisa disi taki: „Wi ben tanapu lontu wan pikin bangi pe wi  ben poti wan weti krosi na tapu nanga a brede nanga a win. Wi leti wan kandra fu di den ben o kisi wi efu wi ben leti a faya. . . . Wi alamala pramisi wi Papa taki wi o gebroiki ala wi krakti fu meki a nen fu en kon santa.” Den sisa disi sori bribi trutru! Fu di Yesus lobi wi, meki a seti a Memrefesa na so wan fasi taki wi kan tan hori en awinsi wi de na ini muilek situwâsi.

17. Sortu sani wi musu aksi wisrefi?

17 Now di a Memrefesa de so krosibei, a bun fu aksi wisrefi den sani disi: ’San mi kan du moro fu sori lobi neleki Yesus? Mi e broko mi ede moro nanga misrefi leki nanga den brada nanga sisa? Mi e fruwakti tumusi furu fu den brada nanga sisa, noso mi e hori na prakseri san den man èn san den no man?’ Meki a de so taki ala ten wi e sori lobi neleki Yesus èn taki wi e sori taki wi e „firi gi tra sma”.​—1 Petr. 3:8.

NO FRIGITI DEN SANI DI WI LERI FU YESUS

18-19. (a) Fu sortu sani wi kan de seiker? (b) San yu o du?

18 Wi no o abi fu hori a Memrefesa tumusi langa moro. Te Yesus „doro” na a ten fu a bigi banawtu, dan a o tyari den wan di „Gado kari” èn di de na grontapu ete kon na wan na hemel. Te a ten dati doro wi no o hori a Memrefesa moro.​—1 Kor. 11:26; Mat. 24:31.

19 Srefi efu wi no e hori a Memrefesa moro, wi de seiker taki a pipel fu Yehovah no o frigiti a sakafasi, a deki-ati nanga a lobi di Yesus sori. Na a ten dati, den wan di ben abi na okasi fu hori a Memrefesa o fruteri trawan fu a fesa disi. Na so den srefi kan kisi wini fu en. Ma efu wi wani kisi wini fu a Memrefesa nownow kaba, dan wi musu sori sakafasi, deki-ati nanga lobi neleki Yesus. Efu wi du dati, dan wi kan de seiker taki wi o kisi wi pai fu Yehovah.​—2 Petr. 1:10, 11.

SINGI 13 Krestes, wi eksempre

^ paragraaf 5 Dyonsro wi o hori a Memrefesa fu a dede fu Yesus Krestes. A fasi fa Yesus hori na Avondmaal e leri wi taki a abi sakafasi, deki-ati nanga lobi. Na ini na artikel disi wi o si fa wi kan sori den fasi disi tu.

^ paragraaf 2 SAN A WORTU DISI WANI TAKI: Wan Memrefesa na wan prenspari konmakandra di e hori fu memre wan sma noso wan sani di pasa.

^ paragraaf 56 SAN WI E SI TAPU DEN PRENKI: Den prenki disi e sori fa Kresten ben e hori a Memrefesa na ini a ten fu den apostel, na a pisi ten fu 1880 èn na ini wan strafuman-kampu. Yu kan si tu fa den e hori en na ini a ten disi na ini wan waran kondre na ini Zuid-Amerika. Den de na ini wan Kownukondre zaal di opo na seisei.