Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2017

Meki den man di e gi yesi na Gado kisi moro frantwortu

Meki den man di e gi yesi na Gado kisi moro frantwortu

„Fruteri den man di e gi yesi na Gado ala ten, den sani di mi taigi yu . . . Dan den man disi srefi o kon koni nofo fu gi tra sma leri.”2 TIM. 2:2.

SINGI: 123, 53

1, 2. Fa furu sma e si a wroko fu den?

FURU sma feni taki a wroko di den e du e sori o prenspari den de. Na ini son kulturu a de so taki te wan sma e leri sabi wan trawan, dan wan fu den fosi sani di a e aksi a sma na: „Sortu wroko yu e du?”

2 Son leisi te Bijbel e taki fu wan sma, dan a e taki tu sortu wroko a ben e du. Bijbel e taki fu „Mateyus di ben abi a wroko fu teki belasting-moni gi lanti”, a e taki tu fu „Simon, wan man di e meki leer nanga a buba fu meti” èn fu „Lukas, wi lobi brada di de wan datra” (Mat. 10:3; Tori 10:6; Kol. 4:14). Son leisi Bijbel e taki tu fu den frantwortu noso den grani di sma abi na ini na anbegi. Bijbel e taki fu Kownu David, a profeiti Elia, nanga na apostel Paulus. Den man disi ben e warderi a wroko di Gado ben gi den. Efu wi abi frantwortu na ini na anbegi, dan wi musu warderi den tu.

3. Fu san ede a de fanowdu taki den owru brada e yepi den yongu brada fu teki frantwortu na den tapu? (Luku a prenki na a bigin fu na artikel.)

3 Furu fu wi lobi den frantwortu di wi abi na ini na anbegi èn wi ben o wani du den wroko dati fu ala ten. Ma a sari taki sensi  a ten fu Adam, ala sma e kon owru èn tra sma e teki a wroko fu den abra (Preik. 1:4). Na ini den yari di pasa, a sani disi tyari wan tu nyun problema kon gi tru Kresten. A wroko di Yehovah en pipel e du kon moro bigi èn den e du difrenti sortu nyun sani. Nofo tron wi e gebroiki nyun computer programa nanga masyin te wi e du den nyun wroko disi èn furu fu den sani disi e kenki ibri tron baka. Ma kande sonwan fu den owru brada feni en muilek fu leri wroko nanga den nyun sani disi (Luk. 5:39). Srefi te dati no de so, nofo tron yongu brada abi moro krakti leki den owruwan (Odo 20:29). Dati meki den owruwan di e sreka den yongu brada fu teki moro frantwortu na den tapu, e sori taki den koni èn taki den abi lobi.Leisi Psalm 71:18.

4. Fu san ede a muilek gi son brada fu meki trawan yepi den nanga den frantwortu fu den? (Luku a faki „ Fu san ede son brada no wani taki trawan yepi den nanga a wroko di den musu du?”.)

4 Kande den brada di abi frantwortu feni en muilek fu meki yongu brada yepi den nanga den frantwortu fu den. Sonwan fu den e frede taki den o lasi a moi posisi di den abi. Trawan e frede taki sani no o waka soleki fa den wani, fu di den feni taki den yonguwan no man du sani so bun. Trawan kan feni taki den no abi ten fu leri wan tra sma fa fu du a wroko. Ma na a tra sei, den yongu brada musu luku bun taki den no e lasi pasensi te den no e kisi moro wroko fu du.

5. San wi o luku na ini na artikel disi?

5 Wi o luku a tori disi fu tu sei. Wi o luku fosi fa owru brada kan yepi den yonguwan fu teki moro frantwortu na den tapu èn fu san ede a sani disi prenspari (2 Tim. 2:2). Wi o luku tu fu san ede a prenspari taki yongu brada e tan sori sakafasi te den e yepi brada di abi moro ondrofeni leki den èn fu san ede den musu de klariklari fu teki leri fu den. Meki wi go luku fa Kownu David sreka en manpikin fu teki wan prenspari frantwortu na en tapu.

 DAVID BEN SREKA SALOMO ÈN A YEPI EN

6. San Kownu David ben wani du èn san Yehovah piki en?

6 Baka di David ben e libi omeni yari langa leki loweman, a tron kownu èn a ben e libi na ini wan bigi oso. Fu di a ben e sari taki Yehovah no ben abi wan „oso” noso tempel, meki a bosroiti fu bow wan oso gi en. A taigi a profeiti Natan: „Luku, mi e tan na ini wan oso fu sedre-udu, ma a santa kisi fu a frubontu fu Yehovah de na ini wan tenti.” Natan piki en: „Yu kan du awinsi san de na yu ati, bika a tru Gado de nanga yu.” Ma Yehovah meki sani waka tra fasi. A meki Natan taigi David: „A no yu o bow na oso fu mi tan na ini.” Aladi Yehovah pramisi David taki a ben o tan blesi en, toku Gado meki David en manpikin, Salomo, bow a tempel. San David du?1 Kron. 17:1-4, 8, 11, 12; 29:1.

7. San David du di a yere san Yehovah ben wani?

7 David no ben e tan prakseri taki a no ben kisi a grani fu bow a tempel, ma na presi fu dati, a horibaka gi Salomo. Fu taki en leti, sma no ben sabi a tempel leki a tempel fu David, ma leki a tempel fu Salomo. Awansi a de so taki David ben e sari taki a no ben man du a sani di a ben e angri fu du, toku a horibaka gi a wroko. A du ala san a man fu seti grupu fu wrokoman èn a tyari isri, kopro, solfru, gowtu, nanga sedre-udu kon na wan. Boiti dati, a gi Salomo a deki-ati disi: „Mi boi, meki Yehovah de nanga yu èn meki sani waka bun gi yu. Bow na oso gi Yehovah yu Gado, soleki fa a taigi yu fu du.”1 Kron. 22:11, 14-16.

8. Fu san ede David ben kan denki taki Salomo no ben o man du a wroko, ma san a du?

8 Leisi 1 Kroniki 22:5. Kande David ben denki taki Salomo no ben o man teki fesi na ini so wan prenspari wroko. Te yu luku en bun, a tempel ben musu de „wan tumusi aparti oso” èn na a ten dati Salomo ben ’yongu ete èn a no ben abi ondrofeni’. Ma David ben sabi taki Yehovah ben o gi Salomo a koni fu du a wroko di a ben gi en. Dati meki David tan du san a ben man du fu yepi nanga a wroko èn fu dati ede a tyari bun furu wrokosani kon na wán.

YU O FIRI KOLOKU TE YU E LERI TRAWAN FU DU WAN WROKO

A e gi prisiri fu si fa yongu brada e teki moro frantwortu na den tapu (Luku paragraaf 9)

9. San o yepi brada di kon owru kaba fu no sari te yonguwan musu teki den frantwortu fu den abra? Gi wan eksempre.

9 Owru brada no musu sari te a de fanowdu taki yongu brada teki den frantwortu fu den abra. Fu taki en leti, te yongu brada e leri fu teki frantwortu na den tapu, dan disi na fu a bun fu a wroko. Brada di abi frantwortu musu breiti srefisrefi te yongu brada di den leri du a wroko man teki a wroko abra. Luku na eksempre fu wan papa di abi wan boi di e leri rèi oto. Te a boi pikin ete, dan a boi e luku iniwan sani di en papa e du. Te a boi kon moro bigi, dan a papa e bigin fruteri a boi san a  e du. Te a boi kisi en rijbewijs, dan en srefi e bigin rèi a wagi. Toku en papa e tan sori en fa a kan rèi moro bun. Son leisi a boi e rèi èn tra leisi a papa e rèi. Ma te a papa kon owru, dan kande a no e rèi moro. Kande na a boi e tyari en go na presi now. Wan papa di koni o breiti taki a boi fu en e rèi en now èn a no o feni taki en srefi musu rèi en oto. Na so a de tu taki owru brada breiti te den sreka yonguwan fu teki frantwortu na den tapu na ini a gemeente.

10. Fa Moses ben feni en taki a ben e kisi grani èn taki a ben abi makti?

10 Leki owruwan wi musu luku bun taki wi no e dyarusu tapu trawan. Luku san Moses du di wan tu man na ini na kampu fu Israel bigin tyari densrefi leki profeiti. (Leisi Numeri 11:24-29.) Yosua, a dinari fu Moses, ben wani tapu den fu du disi. Kande Yosua ben feni taki a sani di den man ben e du ben o meki taki a pipel no ben o si Moses moro leki a moro prenspariwan èn a moro maktiwan na den mindri. Ma Moses taigi en: „Fu san ede yu e dyarusu gi mi? Yu no abi fu dyarusu. Mi ben winsi taki a heri pipel fu Yehovah ben de profeiti, dan Yehovah ben o poti a yeye fu en na den tapu!” Moses ben si taki na Yehovah ben meki sani waka so. Moses no suku grani gi ensrefi, ma a taki dati a ben winsi taki ala den futuboi fu Yehovah ben abi den srefi grani. Wi de leki Moses? Wi breiti te trawan e kisi den grani di wi ben gwenti kisi fosi?

11. Fa wan brada ben feni en taki wan moro yongu brada kisi den frantwortu fu en?

11 Na ini a ten disi, furu brada de di wroko tranga omeni yari langa èn di sreka trawan fu teki moro frantwortu na den tapu. Meki wi go luku na eksempre fu wan brada di nen Peter. Na ini den 74 yari di a du a furuten diniwroko, a dini 35 yari na wan bijkantoro na ini Europa. Wan heri pisi ten a ben de opziener fu a dienstafdeling na Betel. Now Paul, wan yongu brada di wroko makandra nanga Peter omeni yari langa, e du a wroko fu en. Di sma aksi Peter fa a ben feni en taki a kisi wan tra frantwortu, a taki: „Mi breiti so te taki brada de di leri fu teki moro frantwortu na den tapu èn di e du a wroko bun.”

WARDERI DEN OWRUWAN NA WI MINDRI

12. San wi e leri fu a tori fu Rehabeyam?

12 Baka di Salomo dede, en manpikin Rehabeyam tron kownu. Di Rehabeyam ben wani sabi fa a ben musu tyari den frantwortu fu en, dan a go suku rai na den owru man fosi. Ma a no teki a rai fu den! Na presi fu dati a teki a rai fu den yonguman di ben de en speri èn di ben e wroko gi en now. A bakapisi no ben bun kwetikweti (2 Kron. 10:6-11, 19). San disi e leri wi? A de wan koni sani fu suku rai na sma di owru moro wi èn di abi ondrofeni. Na a tra sei, yonguwan no musu firi fruplekti fu tan du sani na a owru fasi, ma toku den no musu de gaw fu poti a rai fu den owruwan na wan sei.

13. Fa den yongu brada musu wroko makandra nanga den owruwan?

13 Kande son yongu brada e teki fesi now na ini wroko di owru brada e yepi du. Nofo tron den owru brada disi abi koni nanga ondrofeni. Dati meki a ben o bun te den yongu brada di kisi moro frantwortu e suku rai na den owru brada fosi den teki wan bosroiti. Paul di e dini now leki opziener fu wan afdeling fu Betel, kisi den frantwortu di Peter ben abi fosi. Paul e taki: „Ala ten mi ben e go suku rai na Peter èn mi ben e gi den trawan fu na afdeling a deki-ati fu du a srefi.”

14. San wi e leri fu a fasi fa Timoteyus nanga na apostel Paulus ben e wroko makandra?

14 Timoteyus, wan yongu brada, ben e  wroko makandra furu yari langa nanga na apostel Paulus. (Leisi Filipisma 2:20-22.) Na ini wan brifi gi den Korentesma, Paulus ben skrifi: „Mi e seni Timoteyus kon na unu, fu di mi lobi en leki mi pikin èn a e wroko gi Masra nanga en heri ati. A o memre unu fa mi e du sani na ini a wroko fu Krestes Yesus èn fa mi e gi sma leri na ala presi na ini ibri gemeente” (1 Kor. 4:17). A syatu boskopu disi e sori krin taki Paulus nanga Timoteyus ben e wroko furu nanga makandra. Paulus ben teki ten fu leri Timoteyus ’fa a e du sani na ini a wroko fu Krestes’. Timoteyus leri den sani dati bun èn Paulus kon lobi en. Boiti dati, Paulus ben abi a frutrow taki Timoteyus ben o man tranga a bribi fu den Kresten na ini Korente. Disi na wan moi eksempre di owruwan na ini a ten disi kan teki abra te den e sreka tra brada fu teki fesi na ini a gemeente.

WI ALAMALA KAN YEPI NANGA A WROKO

15. Fa a rai di Paulus gi den Kresten na ini Rome musu yepi wi te wi musu fiti wisrefi na kenki di e kon?

15 Wi e libi na ini span ten. A pisi fu Yehovah en organisâsi di de na grontapu e gro na furu difrenti fasi. Ma te wan sani e gro dan nofo tron sani musu kenki tu. Te wi musu fiti wisrefi na den kenki di e kon, dan a bun fu sori sakafasi èn fu tan poti prakseri na den afersi fu Yehovah, na presi fu suku wi eigi bun. Te wi e du dati, dan wánfasi o de na wi mindri. Paulus ben skrifi den Kresten na ini Rome: „Mi e taigi un alamala drape fu no denki moro fu unsrefi leki san de fanowdu. Ma ibriwan fu unu musu tyari ensrefi na wan fasi di e sori taki a de nanga krin frustan èn taki a abi a bribi di Gado gi en. Wi abi wán skin di abi furu pisi, ma den pisi fu a skin no e du a srefi wroko. Na so wi di de wán nanga Krestes na wán skin tu aladi wi de nanga furu sma.”Rom. 12:3-5.

16. San owru brada nanga moro yongu brada, sosrefi den wefi fu den, kan du so taki freide nanga wánfasi de na ini Yehovah en organisâsi?

16 Awansi san na a situwâsi fu wi, meki wi alamala wroko makandra fu horibaka gi Yehovah en makti Kownukondre. Owruwan, un sreka den yonguwan fu du den wroko di unu e du. Yongu brada, teki frantwortu na un tapu, sori sakafasi èn tan sori lespeki gi den owruwan. Un wefi, de leki Preskela, a wefi fu Akwila. A ben e tan wroko makandra nanga Akwila èn a ben e horibaka gi en srefi di a situwâsi fu den kenki.Tori 18:2.

17. San Yesus ben sabi seiker fu den disipel fu en èn gi sortu sani a sreka den?

17 Yesus na a moro bun sma di kan leri wi fa fu sreka trawan fu teki moro frantwortu na den tapu. A ben sabi taki a wroko fu en na grontapu ben o kon na wan kaba èn taki tra sma ben o go doro nanga a wroko disi. Aladi den disipel fu en ben abi fowtu, toku a ben e bribi taki den ben o du san a ben fruwakti fu den. Dati meki a taigi den taki den ben o du moro bigi wroko leki en (Yoh. 14:12). A sreka den bun èn den prati a bun nyunsu na ini ala den kondre di sma ben sabi na a ten dati.Kol. 1:23.

18. Sortu moi blesi wi kan kisi èn san wi kan du now?

18 Baka di Yesus gi en libi leki srakti-ofrandi, a kisi wan opobaka fu go libi na hemel. Drape Gado gi en moro wroko èn a poti en „moro hei leki ala tirimakti, ala hei makti, ala krakti, nanga a makti fu ala heihei sma” (Ef. 1:19-21). Efu wi e tan gi yesi na Gado èn wi dede fosi Armagedon, wi o kisi wan opobaka fu libi na ini wan grontapu pe retidu de. Wi o man du furu switi wroko drape. Ma now, wan tumusi prenspari wroko de di wi alamala kan yepi du. Iya, wi kan preiki a bun nyunsu èn wi kan meki disipel. Meki wi alamala, yonguwan nanga owruwan tan „abi furu fu du na ini a wroko fu Masra”.1 Kor. 15:58.