Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2017

Warderi a grani di yu abi fu teki yu eigi bosroiti

Warderi a grani di yu abi fu teki yu eigi bosroiti

„Pe a yeye fu Yehovah de, drape sma de fri.”2 KOR. 3:17.

SINGI: 62, 65

1, 2. (a) Fa sma e denki fu a grani di wi abi fu teki wi eigi bosroiti? (b) San Bijbel e leri fu a grani di wi abi fu teki wi eigi bosroiti?

DI WAN frow ben musu teki wan bosroiti, dan a taigi wan mati fu en: „Mi no wani denki, taigi mi gewoon san mi musu du. Dati moro makriki.” A frow ben wani taki wan trawan taigi en san a musu du, na presi taki a gebroiki a moi grani di a Mekiman ben gi en fu teki en eigi bosroiti. Fa a de nanga yu? Yu lobi fu teki yu eigi bosroiti, noso yu wani taki trawan teki bosroiti gi yu? Fa yu e si a grani di wi abi fu teki wi eigi bosroiti?

2 Na hondrohondro yari kaba libisma no e agri nanga makandra fu a tori disi. Son sma e taki dati libisma no man teki den eigi bosroiti. Den e taki dati Gado e bosroiti na fesi san libisma o du. Trawan e taki dati na te yu man du ala san yu wani, dan fosi yu kan taki dati yu fri fu teki yu eigi bosroiti. Ma efu wi wani frustan a tori disi bun, dan wi musu luku san Gado Wortu, Bijbel, e taki. Fu san ede? Bijbel e sori wi taki di Yehovah meki wi, a gi wi a grani fu teki wi eigi bosroiti. (Leisi Yosua 24:15.) Bijbel e gi piki tu tapu den aksi disi: Fa wi musu gebroiki a grani di wi kisi fu teki wi eigi bosroiti? Sani de di wi no mag du? Fa den bosroiti di wi e teki e sori efu wi lobi Yehovah trutru? Fa wi kan sori lespeki gi den bosroiti fu trawan?

 SAN WI KAN LERI FU YEHOVAH NANGA YESUS?

3. San wi kan leri fu Yehovah te wi e luku a fasi fa a e teki bosroiti?

3 Yehovah na a wan-enkri sma di kan du iniwan sani di a wani. Ma wi kan leri furu fu a fasi fa Yehovah e teki bosroiti. Fu eksempre, a bosroiti fu teki a pipel fu Israel leki en pipel, noso leki „wan spesrutu gudu” (Deut. 7:6-8). A no somaar a du dati. Yehovah ben du san a ben pramisi en mati Abraham hondrohondro yari na fesi (Gen. 22:15-18). Wan tra sani, na taki ala ten Yehovah e teki bosroiti na wan fasi di e kruderi nanga a lobi èn a retidu fu en. Wi kan si disi te wi e luku taki a ben strafu den Israelsma di ben e drai baka gi a tru anbegi ibri tron baka. Ma di den sori berow, dan Yehovah ben de klariklari fu sori lobi nanga sari-ati gi den. A ben taki: „Mi o meki a pipel disi kon betre, dan den o gi yesi na mi baka. Mi o lobi den, fu di misrefi wani dati” (Hos. 14:4). Disi na wan moi fasi fa Yehovah teki bosroiti di tyari wini kon gi a pipel fu en.

4, 5. (a) Suma ben de a fosi sma di Gado gi a grani fu teki en eigi bosroiti, èn fa a gebroiki a grani dati? (b) Sortu sani ibriwan fu wi musu aksi ensrefi?

4 Di Yehovah bigin meki den sani na hemel èn na grontapu, a bosroiti fu gi den engel nanga libisma a grani fu teki den eigi bosroiti. A du dati fu di a lobi den. A fosi sma di kisi a grani disi, na a fosi gebore Manpikin fu en di „abi den srefi fasi fu Gado di sma no man si” (Kol. 1:15). Srefi bifo Yesus ben kon na grontapu, a bosroiti fu tan gi yesi na en Tata èn fu no teki a sei fu Satan di ben opo ensrefi teige Gado. Bakaten, di Yesus ben de na grontapu, en srefi bosroiti fu no gi abra di a bigi Gensman ben e tesi en (Mat. 4:10). A neti fosi Yesus dede, a begi Gado èn a taigi en taki a ben o tan du a wani fu en. A taki: „Mi Tata, efu yu wani, dan puru a kan disi na mi fesi. Ma a no mi wani musu pasa, ma yu wani” (Luk. 22:42). Dati meki neleki Yesus, wi musu gebroiki a grani di wi kisi fu teki wi eigi bosroiti na wan fasi di e gi Yehovah grani èn wi musu du a wani fu en! A sani dati kan?

5 Iya, wi man teki na eksempre fu Yesus, fu di wi srefi kan sori den fasi fu Gado (Gen. 1:26). Ma tra fasi leki Yehovah, wi no de fri fu du ala san wi wani. Gado Wortu e taki dati wi musu hori wisrefi na den bun wet di Yehovah e poti gi wi. Boiti dati, wefi musu saka densrefi na ondro a masra fu den èn pikin musu gi yesi na den papa nanga mama (Ef. 5:22; 6:1). Wi e hori wisrefi na den wet disi te wi e teki bosroiti? A fasi fa wi e piki na aksi disi o sori efu wi o kisi na okasi fu libi fu têgo.

A FASI FA WI E TEKI BOSROITI

6. Fruklari fu san ede a bun taki Gado poti wet gi wi.

6 Efu Gado e poti wet gi wi, dan wi kan taki dati wi abi a grani fu teki wi eigi bosroiti? Iya, wi kan taki dati! Fu san ede? Wet kan kibri sma libi. Fu eksempre, kande wi e bosroiti fu rèi go na wan farawe foto. Ma wi ben o firi bun te wi e rèi na tapu wan bigi pasi pe ala sma kan bosroiti gi ensrefi o tranga a e rèi noso na sortu sei fu a pasi a e rèi? Kwetikweti. Wi abi wet fanowdu efu wi wani taki sani e waka bun gi ala sma. Wi o luku wan tu Bijbel eksempre di o sori fu san ede a de wan koni sani te wi e hori wisrefi na den wet di Yehovah e poti gi wi.

7. (a) Fa Adam ben de tra fasi leki den meti? (b) San na wán fasi fa Adam gebroiki a grani di Gado gi en fu teki bosroiti?

7 Di Gado meki a fosi libisma Adam, a gi en a srefi grani di a ben gi den engel na  hemel. A gi en a grani fu teki en eigi bosroiti. A sani disi meki taki Adam ben de tra fasi leki den meti di no man bosroiti san bun èn san ogri. Luku fa Adam gebroiki a grani di a ben kisi, na wan fasi di Gado ben feni bun. Gado ben meki meti fosi a meki libisma. Ma Yehovah gi a fosi manpikin Adam na okasi fu gi den meti disi wan nen. Gado „tyari den kon na a man fu luku fa a o kari ibriwan fu den”. Baka di Adam luku ibri meti bun, dan a gi en wan nen di fiti. Fu di Yehovah ben feni den nen dati bun, meki a no kenki den. Bijbel e taki dati „ibriwan fu den meti kisi a nen di a man gi den”.Gen. 2:19.

8. Sortu bosroiti Adam teki, èn san ben de a bakapisi?

8 A de wan sari sani taki Adam no ben e warderi a wroko di Gado ben gi en fu sorgu a paradijs. Gado ben gi Adam a wroko disi: „Meki pikin èn kon furu, teleki unu kon lai na grontapu èn basi ala sani na grontapu. Basi den fisi . . . , den meti di e frei . . . , nanga ibri meti di e kroipi na gron” (Gen. 1:28). Ma Adam no ben breiti taki Gado ben gi en a moi grani disi. Na presi fu dati, a bosroiti fu nyan fu a froktu di Gado ben taigi en fu no nyan. A bosroiti di Adam teki meki taki dusundusun yari kaba den bakapikin fu en e pina (Rom. 5:12). Fu di wi sabi sortu takru bakapisi a bosroiti fu Adam tyari kon, meki wi musu luku bun fa wi e teki bosroiti èn wi musu hori wisrefi na den wet fu Yehovah.

9. Sortu okasi Yehovah ben gi en pipel Israel, èn san a pipel du?

9 Den bakapikin fu Adam nanga Eva kisi sondu èn den e dede fu di a papa nanga mama fu den trangayesi Yehovah. Ma den no lasi a grani di Gado ben gi libisma fu teki den eigi bosroiti. Wi kan si disi te wi e luku taki Yehovah meki en futuboi Moses gi a pipel Israel na okasi fu bosroiti efu den wani tron en pipel noso efu den no ben wani dati (Eks. 19:3-6). San a pipel du? Den ben de klariklari fu tron Gado pipel èn fu du iniwan sani di a ben aksi fu den. Den alamala ben taki: „Wi o du ala san Yehovah taki” (Eks. 19:8). A sari fu si taki baka wan pisi ten a pipel bosroiti fu no hori densrefi na a sani di den ben pramisi Yehovah. Meki wi teki leri fu na eksempre disi èn meki wi tan krosibei fu Yehovah èn gi yesi na den bun wet fu en. Na so wi o sori taki wi e warderi a grani di wi abi fu teki wi eigi bosroiti.1 Kor. 10:11.

10. Sortu eksempre e sori taki sondu libisma man teki bosroiti di e gi grani na Gado? (Luku a prenki na a bigin fu na artikel.)

10 Na ini Hebrewsma kapitel 11, wi kan feni den nen fu 16 futuboi fu Gado di bosroiti fu hori densrefi na den wet fu Yehovah aladi den ben de fri fu du wan tra sani. Dati meki den kisi furu blesi èn wan trutru howpu gi a ten di e kon. Fu eksempre, Noa ben sori taki a ben abi wan tranga bribi èn a bosroiti fu gi yesi di Gado taigi en fu bow wan ark. Na so en famiri ben o tan na libi èn tra libisma ben o de tu na grontapu baka en (Hebr. 11:7). Abraham nanga Sara ben de klariklari fu go na „a pramisi kondre” pe Gado ben o tyari den go. Baka di den teki a langa waka disi, den ben abi „na okasi fu drai go baka” na a gudu foto Ur. Ma fu di den ben abi bribi meki den tan fruwakti a ten te „den pramisi” fu Gado ben o kon tru. Den ben e „suku fu feni wan moro betre presi” (Hebr. 11:8, 9, 13, 15, 16). Moses no ben wani den gudu fu Egepte, ma a „bosroiti fu nyan pina makandra nanga a pipel fu Gado, na presi fu nyan bun fu sondu fu wan pisi ten nomo” (Hebr. 11:24-26). Neleki den sma dati fu owruten,  wi musu sori bribi tu èn wi musu warderi a grani di wi abi fu teki wi eigi bosroiti. Meki wi gebroiki a grani dati fu teki bosroiti di Gado feni bun.

11. (a) San na wan prenspari blesi di wi o kisi soleki fa Deuteronomium 30:19, 20 e sori? (b) Fu san ede yu e teki bosroiti di Gado feni bun?

11 Kande wi feni en moro makriki te tra sma e teki bosroiti gi wi. Ma a sani dati kan meki taki wi no kisi wini fu a grani di wi abi fu teki wi eigi bosroiti. Wi e leisi fu dati na Deuteronomium 30:19, 20. (Leisi en.) Vers 19 e sori taki Gado ben gi den Israelsma na okasi fu teki wan bosroiti. Vers 20 e sori wi taki disi ben e gi den a moi okasi fu sori Yehovah san ben de na ini den ati. Wi kan bosroiti tu fu anbegi Yehovah. Dati meki wi e teki bosroiti di a feni bun. Na so wi e gi en grani èn wi e sori taki wi lobi en.

NO TEKI BOSROITI DI GADO NO FENI BUN

12. San wi no musu du noiti?

12 Kon meki wi taki dati yu gi wan mati wan diri kado. A no de fu taki dati a ben o hati yu te yu e yere taki a trowe en na ini wan dotibaki, noso taki a gebroiki en fu gi wan tra sma mankeri! Prakseri fa Yehovah musu firi te a e luku fa someni sma e teki bosroiti di e tyari takru bakapisi kon gi trawan. A tru taki neleki fa Bijbel ben taki na fesi, sma „no o de nanga tangi” na ini „den lasti dei” (2 Tim. 3:1, 2). Noiti wi musu teki bosroiti di Yehovah no feni bun èn noiti wi musu si a grani di a gi wi leki wan lawlaw sani. Ma fa wi kan teki bosroiti di Gado feni bun?

13. Sortu bosroiti wi leki Kresten wani teki?

13 Wi alamala abi a grani fu bosroiti gi wisrefi suma wi o teki leki mati, sortu krosi wi o weri, fa wi o moi wisrefi, èn sortu prisiri ten wi o abi. Ma kande wi e gi pasi taki den sondu firi fu wi e basi wi, noso kande wi e teki na eksempre fu den sma na ini a ten disi di no e tyari densrefi na wan fasi di fiti. Te wi e du dati dan wi e gebroiki a grani di Gado gi wi leki wan okasi fu „kibri takrudu”. (Leisi 1 Petrus 2:16.) Wi no musu si a grani disi „leki wan okasi fu du san a sondu skin wani”, ma wi wani teki bosroiti di e sori taki wi e „du ala sani fu gi Gado glori”.Gal. 5:13; 1 Kor. 10:31.

14. Fu san ede wi musu frutrow tapu Yehovah efu wi wani teki bun bosroiti?

 14 Wan tra sani di kan yepi wi fu teki bun bosroiti, na te wi e frutrow tapu Yehovah èn te wi e meki a tiri wi nanga yepi fu den wet fu en. En wawan ’na a sma di e leri wi fu kisi wini. En na a sma di e meki wi waka a pasi di wi musu waka’ (Yes. 48:17). A no de fu taki dati Bijbel abi leti te a e taki: „A no de na wan libisma fu taki sortu pasi a o teki. A no de na wan libisma di e waka fu taki srefi pe a o poti en futu” (Yer. 10:23). Noiti wi musu meki a fowtu fu frutrow tapu wi eigi frustan, neleki fa Adam nanga den trangayesi Israelsma ben du dati. Na presi fu dati, meki wi ’frutrow na tapu Yehovah nanga wi heri ati’.Odo 3:5.

LESPEKI DEN BOSROITI DI TRAWAN E TEKI

15. San wi e leri fu a rai di skrifi na Galasiasma 6:5?

15 Wan sani di wi musu hori na prakseri, na taki wi musu lespeki a reti di trawan abi fu teki den eigi bosroiti. Fu san ede? Fu di wi alamala abi a grani fu teki wi eigi bosroiti, meki ala Kresten no o teki a srefi bosroiti ala ten. Na so a de tu te a abi fu du nanga a fasi fa wi e tyari wisrefi èn fa wi e anbegi Gado. Memre a prenspari rai di skrifi na Galasiasma 6:5. (Leisi en.) Te wi e frustan taki ibri Kresten musu „tyari en eigi lai”, dan wi o lespeki a reti di trawan abi fu teki den eigi bosroiti.

Wi kan teki bosroiti sondro taki wi e dwengi trawan fu si sani soleki fa wi e si den (Luku paragraaf 15)

16, 17. (a) Sortu problema ben opo kon na mindri den Kresten na ini Korente? (b) Fa Paulus lusu a problema dati èn san disi e leri wi fu a reti di trawan abi?

16 Bijbel e sori fu san ede wi musu lespeki den bosroiti di wi brada nanga sisa e teki te a konsensi fu den e gi pasi fu du dati. Luku na eksempre fu den Kresten na ini Korente di no ben e agri nanga makandra, fu di den ben e aksi densrefi efu Kresten ben mag nyan meti di sma ben tyari leki ofrandi gi falsi gado èn di ben e seri bakaten na wowoyo. Sonwan fu den ben taki: ’Wan falsi gado na noti, sobun wan sma kan nyan a meti sondro taki a kisi konsensi fonfon.’ Ma trawan fu den di ben e anbegi den falsi gado dati fosi, ben feni taki sma di ben e nyan a meti dati ben e teki prati na falsi anbegi (1 Kor. 8:4, 7). Disi ben de wan muilek tori fu di a ben kan tyari prati kon na ini a gemeente. Fa Paulus yepi den Kresten na Korente fu kon si sani soleki fa Gado e si den?

17 Na a fosi presi, Paulus memre ala tu grupu taki nyanyan no ben o tyari den kon moro krosibei na Gado (1 Kor. 8:8). Baka dati, a warskow den fu no gi pasi taki a ’reti di den abi fu du san den wani, tron wan sani di e meki den swakiwan fadon’ (1 Kor. 8:9). Bakaten, a taigi den wan di ben abi wan moro swaki konsensi fu no krutu den wan di ben e bosroiti fu nyan a meti dati (1 Kor. 10:25, 29, 30). Dati meki na ini a prenspari tori disi di abi fu du nanga na anbegi fu wi, ibri Kresten musu denki bun sortu bosroiti a o teki. Sobun, a fiti tu taki wi e lespeki den bosroiti di trawan e teki te a abi fu du nanga tra sani di no prenspari so.1 Kor. 10:32, 33.

18. Fa yu o sori taki yu e warderi a grani di Gado gi yu fu teki yu eigi bosroiti?

18 Yehovah gi wi a grani fu teki wi eigi bosroiti so taki wi kan de fri trutru (2 Kor. 3:17). Wi e warderi a grani disi fu di a e gi wi na okasi fu teki bosroiti di e sori taki wi lobi Yehovah nanga wi heri ati. Meki wi gebroiki a grani disi na wan fasi di e gi glori na Gado èn meki wi lespeki a fasi fa trawan e gebroiki a grani fu den. Na so wi e tan sori warderi gi a tumusi moi grani disi.