Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2017

„Frutrow tapu Yehovah èn du bun”

„Frutrow tapu Yehovah èn du bun”

„Frutrow tapu Yehovah èn du bun . . . èn du sani gi trawan nanga wan krin ati.”PS. 37:3.

SINGI: 133, 63

1. Sortu koni Yehovah gi libisma di a meki den?

DI YEHOVAH meki libisma a gi den kefalek moi koni. A gi wi frustan, so taki wi man lusu problema èn seti sani gi a ten di e kon (Odo 2:11). A gi wi krakti fu wroko èn fu du den sani di wi wani du (Fil. 2:13). A gi wi wan konsensi tu di e yepi wi fu sabi san bun èn san ogri. Disi e yepi wi fu no du ogri èn fu meki sani bun baka te wi meki fowtu.Rom. 2:15.

2. Fa Yehovah wani taki wi gebroiki den koni fu wi?

2 Yehovah wani taki wi gebroiki den koni di wi abi bun. Fu san ede? Fu di a lobi wi èn fu di a sabi taki wi o de koloku te wi e gebroiki den koni disi. Na ini Bijbel Yehovah e taigi wi difrenti leisi fu gebroiki den koni di wi abi na wan bun fasi. Fu eksempre, na ini den Hebrew Buku fu Bijbel wi e leisi: „Te wan sma e wroko tranga, dan den sani di a abi na prakseri fu du o tyari wini kon gi en.” Wan tra tekst e taki: „Ala san yu anu feni fu du, du dati nanga ala yu krakti” (Odo 21:5; Preik. 9:10).  Na ini den Griki Buku fu Bijbel wi e leisi: „Solanga wi abi na okasi, meki wi du bun gi ala sma.” Wan tra tekst e taki tu: „Neleki fa ibriwan fu unu kisi a koni fu man du wan spesrutu sani, na so un musu gebroiki a koni dati fu dini makandra” (Gal. 6:10; 1 Petr. 4:10). A de krin taki Yehovah wani taki wi du san wi man fu meki sani waka bun gi wisrefi èn gi trawan.

3. Sortu sani libisma no man du?

3 Ma Yehovah sabi tu taki libisma no man du ala sani. Libisma no man puru sondu nanga dede èn den no man taigi trawan fa den musu libi, fu di ala sma abi a grani fu teki den eigi bosroiti (1 Kow. 8:46). Awinsi o furu koni nanga ondrofeni wi abi toku wi de leki pikin-nengre te wi e teki wisrefi gersi nanga Yehovah.Yes. 55:9.

Te yu abi problema, dan „frutrow tapu Yehovah èn du bun”

4. San wi o luku na ini na artikel disi?

4 Na ini ala situwâsi wi musu meki Yehovah tiri wi, wi musu abi a frutrow taki a o yepi wi èn taki a o du gi wi san wi no man du gi wisrefi. Na a tra sei, wi musu du san wi man fu lusu problema èn fu yepi trawan na wan fasi di fiti. (Leisi Psalm 37:3.) Fu taki en leti, wi musu „frutrow tapu Yehovah èn du bun” èn wi musu „du sani gi trawan nanga wan krin ati”. Kon meki wi go luku san wi kan leri fu Noa, David, nanga tra reti-ati futuboi fu Gado di ben frutrow tapu Yehovah èn di ben du san bun. Wi o si taki den ben musu sabi krin san den no ben man du èn san den ben man du.

TE OGRIDU E PASA NA WI LONTU

5. Na ini sortu situwâsi Noa ben de?

5 Noa ben libi na ini wan grontapu di ben „lai ogridu” nanga hurudu (Gen. 6:4, 9-13). A ben sabi taki Yehovah ben o pori den ogrisma dati te fu kaba. Ma toku a ben e broko en ede nanga a takru situwâsi di ben de na grontapu. Noa ben sabi taki wan tu sani ben de di a no ben man du, ma tra sani ben de di a ben man du.

Sma e gens a preikiwroko fu wi (Luku paragraaf 6-9)

6, 7. (a) San Noa no ben man du? (b) Fu san ede wi kan taki dati wi de na ini a srefi situwâsi leki Noa?

6 San Noa no ben man du: Aladi Noa ben e tan preiki a boskopu fu Yehovah fu warskow den sma, toku a no ben man  dwengi den ogrisma fu arki a boskopu èn a no ben man meki a Frudu kon moro esi. Noa ben musu abi a frutrow taki Yehovah ben o tyari wan kaba kon na ogridu soleki fa a ben pramisi èn taki a ben o du dati na a yoisti ten.Gen. 6:17.

7 Wi srefi e libi na ini wan grontapu di lai nanga ogridu èn wi sabi taki Yehovah o pori a grontapu disi (1 Yoh. 2:17). Ma nownowde wi no kan dwengi den sma fu arki a ’bun nyunsu fu a Kownukondre’. Wi no kan meki a „bigi banawtu” kon moro esi tu (Mat. 24:14, 21). Neleki Noa wi musu abi wan tranga bribi èn wi musu abi a frutrow taki heri esi Gado o du wan sani (Ps. 37:10, 11). Wi de seiker taki Yehovah no o meki na ogri grontapu disi tan wán dei moro langa leki san de fanowdu.Hab. 2:3.

8. Fa Noa tan poti prakseri na den sani di a ben man du? (Luku a prenki na a bigin fu na artikel.)

8 San Noa ben man du: Na presi taki Noa lasi-ati fu di a no ben man du son sani, a tan poti prakseri na den sani di a ben man du. Leki „wan preikiman fu retidu” Noa tan preiki a boskopu fu Gado fu warskow den sma (2 Petr. 2:5). A no de fu taki dati a wroko dati yepi en fu abi wan tranga bribi. Boiti taki a ben e preiki, a gebroiki en krakti nanga koni fu du a wroko di Gado ben gi en fu bow na ark.Leisi Hebrewsma 11:7.

9. Fa wi kan teki na eksempre fu Noa?

9 Neleki Noa wi wani abi „furu fu du na ini a wroko fu Masra” (1 Kor. 15:58). Kande wi e yepi fu bow noso ondrow presi fu anbegi, kande wi e yepi na den kring konmakandra nanga kongres, noso kande wi e wroko na wan bijkantoro noso wan vertaal kantoro. San moro prenspari, na taki wi e teki prati fayafaya na a preikiwroko fu di wi sabi taki a wroko disi e tranga a howpu di wi abi gi a ten di e kon. Wan sisa e taki: „Te yu e taki nanga trawan fu den blesi di Gado Kownukondre o tyari kon, dan yu e kon si taki den sma no abi nowan howpu èn taki den e denki taki den problema fu den noiti no o lusu.” Te wi e teki prati na a preikiwroko, dan a howpu fu wi e kon moro tranga èn wi no o prakseri fu tapu fu lon a streilon di o meki wi kisi têgo libi.1 Kor. 9:24.

 TE WI E MEKI FOWTU

10. Na ini sortu situwâsi David ben de?

10 Yehovah ben taki dati Kownu David na ’wan man di a lobi’ (Tori 13:22). David ben gwenti gi yesi na Gado, ma toku a ben du wan tu seryusu sondu. A du hurudu nanga Batseiba. San moro ogri, na taki a ben wani kibri a sondu fu en èn fu dati ede a seti sani so taki sma kiri Batseiba en masra Uria na ini wan feti. David seni Uria srefi fu tyari a brifi di ben e taki dati a sani disi ben musu pasa nanga en (2 Sam. 11:1-21). Ma a no de fu taki dati den sondu fu David kon na krin (Mark. 4:22). San David du di dati pasa?

Den sondu di wi ben du (Luku paragraaf 11-14)

11, 12. (a) San David no ben man du baka di a sondu? (b) Efu wi e sori berow baka te wi e meki seryusu fowtu, dan san wi kan bribi taki Yehovah o du gi wi?

11 San David no ben man du: David no ben man kenki den ogri di a ben du. Boiti dati, a no ben man wai pasi tu gi den bakapisi fu den fowtu fu en. Fu taki en leti, sonwan fu den bakapisi dati ben o abi krakti tapu David en libi fu ala ten (2 Sam. 12:10-12, 14). Sobun, a ben musu frutrow moro tapu Yehovah. A ben musu abi a frutrow taki efu a ben sori trutru berow, dan Yehovah ben o gi en pardon èn a ben o yepi en fu libi nanga den bakapisi fu den sani di a ben du.

12 Fu di wi abi sondu, meki wi alamala e meki fowtu. Son fowtu seryusu moro trawan. Son leisi wi no man kenki den fowtu di wi meki. Wi abi fu libi nanga den bakapisi fu den fowtu dati (Gal. 6:7). Ma wi e bribi san Gado pramisi èn wi abi a frutrow taki efu wi e sori berow, a o yepi wi fu pasa muilek ten, awansi wi srefi abi a fowtu fu den sani di pasa.Leisi Yesaya 1:18, 19; Tori fu den apostel 3:19.

13. San yepi David fu kon abi wan tranga bribi baka?

13 San David ben man du: David meki Yehovah yepi en fu kon abi wan tranga bribi baka. Wan fasi fa a du dati, na taki a teki a piri-ai fu Yehovah en profeiti Natan (2 Sam. 12:13). David begi Yehovah tu, a taki fu den sondu fu en èn a sori taki a ben wani meki sani bun baka nanga Yehovah (Ps. 51:1-17). Aladi a ben hati David taki a ben du so wan bigi sondu, toku a no meki a sani dati tapu en fu du san bun. Na presi fu dati a teki leri fu den fowtu fu en. Iya, noiti moro a du den seryusu sondu dati. Furu yari baka dati, a dede leki wan man di ben e gi yesi na Gado. Yehovah noiti o frigiti den bun di a ben du.Hebr. 11:32-34.

14. San wi kan leri fu na eksempre fu David?

14 San wi kan leri fu na eksempre fu David? Efu wi e du seryusu sondu, dan wi musu sori taki wi abi trutru berow èn wi musu begi Yehovah fu gi wi pardon. Wi musu taigi en sortu sondu wi du (1 Yoh. 1:9). Wi musu go taki tu nanga den owruman di kan yepi wi fu meki sani bun nanga Gado. (Leisi Yakobus 5:14-16.) Te wi e wroko nanga ala den sani di Yehovah seti, dan dati o sori taki wi abi a frutrow taki Yehovah o meki wi kon betre baka èn taki a o gi wi pardon. Wi musu teki leri tu fu den fowtu fu wi, wi musu tan go na fesi na ini na anbegi fu Yehovah èn wi musu abi wan tranga howpu.Hebr. 12:12, 13.

NA INI TRA SITUWÂSI

Problema nanga wi gosontu (Luku paragraaf 15)

15. San wi kan leri fu na eksempre fu Hana?

15 Kande yu sabi tra reti-ati futuboi fu owruten di ben e frutrow tapu Yehovah èn di ben e du san bun. Fu eksempre, Hana no ben man kisi pikin, èn en srefi no ben man du noti fu lusu a problema dati. Ma a ben abi a frutrow taki Yehovah ben o trowstu en. Dati meki a tan anbegi Gado na a tabernakel èn a taigi en  krin san ben de na tapu en ati (1 Sam. 1:9-11). Wi kan leri furu fu en, a no so? Te wi abi problema nanga a gosontu fu wi noso te wi abi tra problema di wi no man lusu, dan wi e trowe wi hebi tapu Yehovah aladi wi abi a frutrow taki a o sorgu gi wi (1 Petr. 5:6, 7). Boiti dati, wi e du san wi man du fu kisi wini fu den Kresten konmakandra èn fu tra sani di Gado seti fu a bun fu wi.Hebr. 10:24, 25.

Pikin di no e gi yesi (Luku paragraaf 16)

16. San papa nanga mama kan leri fu Samuel?

16 Fa a de nanga reti-ati papa nanga mama di abi pikin di lasi pasi? Samuel di ben owru kaba no ben man dwengi den bigi boi fu en fu tan du den bun sani di a ben leri den (1 Sam. 8:1-3). A ben musu libi a tori gi Yehovah. Toku Samuel srefi tan du san bun so taki en hemel Tata ben kan breiti nanga en (Odo 27:11). Na ini a ten disi, furu Kresten papa nanga mama de na ini wan srefi sortu situwâsi. Den abi a frutrow taki neleki a papa na ini na agersitori fu a lasi manpikin, Yehovah e tan luku efu sondari abi berow so taki a kan gi den wan switikon (Luk. 15:20). Na a srefi ten, den papa nanga mama dati e wroko tranga fu tan gi yesi na Yehovah, èn den e howpu taki na eksempre fu den o gi den pikin fu den deki-ati fu drai kon baka.

Moni problema (Luku paragraaf 17)

17. Fu san ede wi e kisi deki-ati fu a pôti uma di masra ben dede?

17 Prakseri sosrefi a pôti uma di masra ben dede. Na uma disi ben libi na ini a ten fu Yesus. (Leisi Lukas 21:1-4.) A no ben man du noti fu tyari wan kaba kon na den kruktudu di sma ben e du na ini a tempel (Mat. 21:12, 13). A no ben man yepi tu taki a ben pôti. Toku en srefi bosroiti fu gi den „tu sensi” di a ben abi. Dati ben de ’ala san a ben abi fu sorgu ensrefi’. A reti-ati uma dati sori taki a ben e frutrow tapu Gado nanga en heri ati. A ben sabi tu taki efu a ben e poti na anbegi fu en na a fosi presi, Gado ben o gi en den sani di a abi fanowdu. Fu di na uma ben abi a frutrow disi, meki a horibaka gi a seti fu a tru anbegi di ben de na a ten dati. Wi abi a frutrow tu taki efu wi e poti a Kownukondre na a fosi presi, Yehovah o gi wi den sani di wi abi fanowdu.Mat. 6:33.

18. Gi wan eksempre fu wan futuboi fu a ten disi di ben abi a yoisti denki.

18 Na ini a ten disi, furu fu den Kresten brada nanga sisa fu wi sori tu taki den abi frutrow na ini Yehovah èn den du san bun. Luku na eksempre fu wan brada di nen Malcolm èn di tan anbegi Gado te na a dede fu en na ini 2015. Na ini den yari di en nanga en wefi ben e dini Yehovah, den ben sabi bun ten nanga muilek ten. A brada e taki: „Son leisi sani di wi no e fruwakti e pasa na ini wi libi èn son leisi a libi hebi srefisrefi. Ma Yehovah e blesi den wan di e frutrow na en tapu.” Sortu rai Malcolm abi gi wi? A e taki: „Begi Gado fu yepi yu fu du so furu leki yu man na ini a diniwroko fu en. No luku san yu no man du, ma du san yu man du.” *

19. (a) Fu san ede a yaritekst fu 2017 fiti? (b) Fa yu o fiti a rai fu a yaritekst fu 2017 na ini yu libi?

19 Now di a grontapu disi e „kon ogri moro nanga moro”, wi kan fruwakti taki wi o kisi fu du nanga moro bigi problema (2 Tim. 3:1, 13). Dati meki a prenspari srefisrefi now taki wi no e meki den sani dati tapu wi fu du san bun. Na presi fu dati, wi musu tranga a bribi di wi abi na ini Yehovah èn wi musu suku fu du bun ala ten. Sobun, a fiti srefisrefi taki a yaritekst fu 2017 e taki: „Frutrow tapu Yehovah èn du bun”!Ps. 37:3.

A yaritekst fu 2017 na: „Frutrow tapu Yehovah èn du bun”Psalm 37:3