Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2016

„Wi wani go nanga unu”

„Wi wani go nanga unu”

„Wi wani go nanga unu, bika wi yere taki Gado de nanga unu.”SAK. 8:23.

SINGI: 65, 122

1, 2. (a) San Yehovah ben taki dati o pasa na ini a ten fu wi? (b) Sortu aksi wi o luku na ini na artikel disi? (Luku a prenki na a bigin fu na artikel.)

LUKU san Yehovah ben meki a profeiti Sakaria taki fu a ten fu wi: „Na a ten dati a o pasa so trutru, taki tin man o komoto na mindri ala den pipel di e taki difrenti tongo èn den o grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu’” (Sak. 8:23). Neleki den tin man na ini a profeititori disi, na so den sma di abi a howpu fu libi na grontapu e „grabu wan Dyu hori na en krosi”. Fu di den sabi taki Yehovah e blesi na „Israel fu Gado” di a salfu nanga en yeye, meki den breiti taki den kan de nanga den salfu Kresten disi.Gal. 6:16.

2 Neleki a profeiti Sakaria, na so Yesus ben sori taki a pipel fu Gado ben o abi wánfasi. A taki dati den bakaman fu en ben o prati na ini tu grupu: a „pikin ipi” nanga den „tra skapu”. Ma a taki tu dati den ben o de leki „wán ipi di abi wán skapuman” (Luk. 12:32; Yoh. 10:16). Ma fu di tu grupu de, meki son sma kan aksi densrefi: (1) Den tra skapu disi musu sabi den nen fu ala den salfu Kresten na ini a ten disi? (2) Fa den salfuwan musu si densrefi? (3) San yu musu du te wan sma na ini yu  gemeente e bigin nyan fu a brede èn e dringi fu a win na a Memrefesa? (4) Yu musu broko yu ede te yu e si taki a nomru e kon moro bigi? Meki wi go luku a piki tapu den aksi disi.

WI MUSU SABI DEN NEN FU ALA DEN SALFU KRESTEN NA INI A TEN DISI?

3. Fu san ede wi no man sabi seiker suma o de wan fu den 144.000 sma?

3 Den tra skapu musu sabi den nen fu ala den salfu Kresten na ini a ten disi? Nôno. Fu san ede? We, srefi te wan sma kisi a kari fu go na hemel, dan dati no wani taki dati a o go na hemel awinsi san e pasa. Na wan kari nomo a kisi. Fu dati ede Satan e meki ’falsi profeiti opo kon so taki den ben o kori srefi den sma di Gado kari, efu disi ben o man’ (Mat. 24:24). Solanga Yehovah no feni taki wan salfu Kresten warti fu kisi a pai fu go na hemel, nowan sma kan sabi efu a Kresten disi o go na hemel. Te Yehovah si taki so wan sma tan tyari ensrefi na wan reti fasi, dan a e gi a sma wan marki fu a lasti leisi. Disi kan pasa syatu fosi a sma dede noso syatu fosi „a bigi banawtu” bigin (Openb. 2:10; 7:3, 14). Dati meki a ben o de fu soso te wan sma ben o pruberi fu kon sabi suma fu den futuboi fu Gado o de wan fu den 144.000 sma te fu kaba. [1]

4. Efu wi no man sabi a nen fu ala den salfu Kresten di de na grontapu, dan fa wi kan „go nanga” den?

4 Efu den tra skapu no man sabi den nen fu ala den salfu Kresten di de ete na grontapu na ini a ten disi, dan fa den kan „go nanga” den? Luku san a profeititori fu Sakaria e taki fu den tin man. A e taki dati den man disi ben o „grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu.’” Aladi a tekst e taki fu wán Dyu, toku den wortu „unu” e sori taki a abi fu du nanga moro leki wán sma. Sobun, a Dyu disi a no wán sma nomo, ma na wan grupu. Dati meki a no de fanowdu fu kon sabi a nen fu ibriwan fu den Dyu disi so taki wi kan go nanga den. San wi musu du, na taki wi musu kon sabi suma na a grupu disi èn dan wi musu horibaka gi den. Nowan presi na ini Bijbel skrifi taki wi musu si wan libisma leki wi fesiman. Yesus na wi Fesiman.Mat. 23:10.

FA SALFU KRESTEN MUSU SI DENSREFI?

5. Sortu warskow den salfu Kresten musu hori na prakseri èn fu san ede?

5 Den sma di e nyan fu a brede èn e dringi fu a win na a Memrefesa musu hori a warskow na ini 1 Korentesma 11:27-29 na prakseri. (Leisi en.) San na apostel Paulus ben wani taki dya? Efu wan salfu Kresten no e meki muiti fu tan abi wan bun matifasi nanga Yehovah, dan a no fiti taki a e nyan fu a brede èn e dringi fu a win (Hebr. 6:4-6; 10:26-29). A warskow disi e yepi den salfu Kresten fu hori na prakseri taki den no kisi a pai fu den ete. Den musu tan meki tranga muiti ’fu kisi a pai fu Gado. Dati na a libi na ini hemel. Gado meki Yesus Krestes kari den fu gi den a libi disi.’Fil. 3:13-16.

6. Fa salfu Kresten musu si densrefi?

6 Paulus ben taigi den salfu Kresten fu ’tyari densrefi na wan fasi di fiti den wan di Gado kari’. Fa den ben musu du disi? Paulus e taki moro fara: „Ala ten un musu abi sakafasi nanga safri-ati. Un musu abi pasensi èn un musu abi lobi, so taki un man frudrage makandra. Un musu libi bun nanga makandra èn un musu du ala muiti fu tan abi a wánfasi di unu kisi nanga yepi fu a santa yeye” (Ef. 4:1-3). Sma di abi a yeye fu Yehovah musu abi sakafasi. Den no musu abi heimemre (Kol.  3:12). Te salfu Kresten abi sakafasi, dan den no o denki taki Gado gi den moro fu en santa yeye leki den tra Kresten di abi a howpu fu libi na grontapu. Den no o feni taki den man frustan Bijbel moro bun leki trawan èn den no o pruberi fu buweisi taki den betre moro trawan. Noiti den o taigi wan sma taki Gado salfu en èn taki a musu bigin nyan fu a brede èn dringi fu a win tu. Ma sakafasi o yepi den fu kon si taki Yehovah na a sma di gi Kresten a kari fu de salfuwan.

7, 8. San salfu Kresten no e fruwakti èn fu san ede?

7 Aladi na wan moi grani fu kisi wan kari fu go na hemel, toku salfu Kresten no e fruwakti taki trawan musu gi den spesrutu grani. (Ef. 1:18, 19; leisi Filipisma 2:2, 3.) Na a yeye fu Yehovah srefi sori den taki den kisi wan kari fu go na hemel. Yehovah no meki tra sma sabi. Sobun, a no e fruwondru den efu tra sma no e bribi wantewante taki Gado salfu den nanga en santa yeye. Fu taki en leti, den sabi taki Bijbel e taigi wi taki wi no musu bribi esi-esi te wan sma e taki dati Gado gi en wan spesrutu grani (Openb. 2:2). Te wan salfu Kresten e miti sma a fosi leisi, dan a no o bigin taigi den taki en na wan salfuwan. Èn kande a no o fruteri sma san a e ondrofeni leki wan salfuwan, fu di a no wani taki sma poti tumusi furu prakseri na en. A no o dyaf tu taki a o go na hemel.1 Kor. 1:28, 29; leisi 1 Korentesma 4:6-8.

8 Boiti dati, salfu Kresten no e si densrefi leki sma di de fu wan spesrutu grupu sma di hei moro trawan. Den no e pruberi fu suku tra salfu Kresten fu go taki nanga makandra fa a e firi fu de wan salfuwan. Boiti dati, den no o seti wan grupu fu studeri Bijbel makandra (Gal. 1:15-17). Efu den ben o du den sortu sani disi, dan pratifasi ben o kon na ini a gemeente èn a santa yeye di e meki taki freide nanga wánfasi de, no ben o man wroko bun.Leisi Romesma 16:17, 18.

FA YU MUSU SI DEN?

9. Fa yu musu si den sma di e nyan fu a brede èn e dringi fu a win na a Memrefesa? (Luku a faki „Lobi ’no e tyari ensrefi na wan fasi di no fiti’”.)

9 Fa yu musu si den sma di e nyan fu a brede èn e dringi fu a win na a Memrefesa? Yesus ben taigi den bakaman fu en: „Un alamala na brada.” A taki tu: „Gado o saka a sma di e hei ensrefi èn a o hei a sma di e saka ensrefi” (Mat. 23:8-12). Dati meki a no ben o fiti fu prèise sma tumusi, srefi te den na salfu brada fu Krestes. Bijbel e gi wi deki-ati fu sori a srefi bribi leki den wan di e teki fesi. Dati na den Kresten owruman. Ma noiti a e taki dati wi musu teki libisma leki wi fesiman (Hebr. 13:7). A tru taki Bijbel e taki dati wi musu gi son brada „moro lespeki”. Ma a no fu di den brada disi na salfuwan, meki wi musu lespeki den, ma na fu di den „e teki fesi na wan bun fasi”. Boiti dati, den „e wroko tranga fu taki fu a wortu fu Gado èn fu leri sma a wortu dati” (1 Tim. 5:17). Efu sma ben o prèise den salfu brada disi tumusi noso efu den ben o poti tumusi furu prakseri na den, dan den ben o firi fruferi. Ma san moro ogri, na taki te sma ben o du spesrutu sani gi den salfu Kresten disi, dan kande a ben o moro muilek gi den fu sori sakafasi (Rom. 12:3). Nowan fu wi wani du wan sani di kan meki wan brada fu Krestes fadon.Luk. 17:2.

Fa wi musu si wan sma di e nyan fu a brede èn e dringi fu a win na a Memrefesa? (Luku paragraaf 9-11)

10. Fa yu kan sori taki yu e lespeki den salfu Kresten?

10 Fa wi kan sori lespeki gi den wan di Yehovah salfu? Wi no o aksi den fa a du kon taki den tron salfu Kresten, fu di wi  no wani bumui nanga tra sma tori (1 Tes. 4:11; 2 Tes. 3:11). Wi no musu denki taki na fu di wan sma na wan salfuwan, dan en papa, en mama, en trowpatna noso tra famiriman fu en na salfuwan tu. A no fu di en trowpatna noso furu sma na ini en famiri na salfuwan, meki wan sma e tron wan salfuwan (1 Tes. 2:12). Wi no musu aksi den trowpatna fu den salfuwan fa den e firi taki den patna fu den no o de nanga den na ini a paradijs. Den sortu aksi disi kan hati sma firi. Wi alamala kan de seiker taki Yehovah o opo en anu èn a o „gi ala libisani san den e angri fu kisi”.Ps. 145:16.

11. Sortu sani no o pasa nanga wi te wi no e „prèise sma” tumusi?

11 Te wi no e si salfu Kresten leki sma di prenspari moro trawan, dan wi no o kisi problema. Fa so? Bijbel e taki dati sma ben o boro kon na ini a gemeente èn den ben o „du leki den na brada” (Gal. 2:4, 5; 1 Yoh. 2:19). Den bedrigiman disi kan taki srefi dati den na salfuwan. A kan tu taki son salfu Kresten e drai baka gi Gado (Mat. 25:10-12; 2 Petr. 2:20, 21). Te wi no abi a gwenti fu „prèise sma” tumusi, dan wi no o waka na den baka awinsi den na salfuwan, noso den na sma di e dini Gado wan langa pisi ten kaba, noso awinsi furu sma sabi den. Èn efu den sma disi ben o drai baka gi Gado, dan wi no o lasi bribi èn wi no o tapu fu dini Yehovah.Yud. 16.

WI MUSU BROKO WI EDE TAKI A NOMRU E KON MORO BIGI?

12, 13. Fu san ede wi no musu broko wi ede te wi si taki moro nanga moro sma e nyan fu a brede èn e dringi fu a win na a Memrefesa?

12 Na ini den yari di pasa, wi kon si taki moro nanga moro sma e nyan fu a brede èn e dringi fu a win na a Memrefesa. A sani disi no ben de so na ini den yari di pasa. Ma wi musu broko wi ede? Nôno. Meki wi go luku wan tu sani di wi musu hori na prakseri.

13 „Yehovah sabi den sma di de fu en” (2 Tim. 2:19). Den brada di e teri omeni sma nyan fu a brede èn dringi fu a win na a Memrefesa, no man taki suma na den sma di abi a howpu fu go na hemel. A kan taki sonwan fu den sma disi e nyan èn e dringi fu di den denki taki den na salfuwan. Son sma ben e nyan èn dringi, ma bakaten den tapu fu du dati. Fu di trawan ede no e wroko so bun, meki den kan denki taki den o tiri makandra nanga Krestes  na ini hemel. Sobun, wi no man taki soifri omeni salfuwan de ete na grontapu.

14. Soleki fa Bijbel e sori, dan omeni salfuwan o de ete na grontapu te a bigi banawtu bigin?

14 Salfuwan o de na ala sei fu grontapu te Yesus o kon fu tyari den go na hemel. Bijbel e taki san Yesus o du na a ten dati: „A o seni den engel fu en go nanga a bigi babari fu trompeti èn den o tyari den sma kon na wán di Gado kari komopo fu noordsei, zuidsei, owstusei, nanga west-sei, iya, fu a wan uku fu hemel te na a tra uku” (Mat. 24:31). Bijbel e sori taki soso wan pikin grupu salfuwan o de ete na grontapu na ini den lasti dei (Openb. 12:17). Ma a no e taki omeni fu den o tan abra te a bigi banawtu bigin.

15, 16. Sortu sani wi musu sabi fu den 144.000 sma di kisi wan kari fu go na hemel?

15 Na Yehovah e bosroiti o ten a wani gi wan sma a kari fu tron wan salfuwan (Rom. 8:28-30). Baka di Yesus dede èn a kisi wan opobaka, Yehovah bigin gi sma wan kari fu tron salfuwan. Soleki fa a sori, dan ala den sma fu a fosi Kresten gemeente ben de salfuwan. Sensi a ten dati teleki a bigin fu den lasti dei, a moro bigi pisi fu den sma di ben taki dati den na bakaman fu Krestes ben de falsi Kresten. Yesus ben agersi den sma disi nanga „takru wiwiri”. Ma a heri pisi ten dati, Yehovah tan salfu sonwan fu den sma di ben de tru Kresten èn a ben kon na krin taki den ben de na „aleisi” di Yesus ben taki fu en (Mat. 13:24-30). Na ini den lasti dei, Yehovah tan salfu den wan di o de na mindri den 144.000 sma te fu kaba. [2] Efu Yehovah e bosroiti fu wakti teleki a kabapisi fu den lasti dei, dan suma na wi taki wi musu tweifri efu a du a yoisti sani? (Yes. 45:9; Dan. 4:35; leisi Romesma 9:11, 16.) [3] Wi musu luku bun taki wi no de leki den wrokoman di ati ben bron fu di a masra fu den ben pai den a srefi moni di a pai den wrokoman di ben wroko wán yuru nomo.Leisi Mateyus 20:8-15.

16 A no ala den sma di abi a howpu fu go na hemel na „a koni srafu di de fu frutrow(Mat. 24:45-47). Neleki fa a ben de na a ten fu den apostel, na so Yehovah nanga Yesus e gebroiki wan pikin grupu nomo na ini a ten disi fu gi furu sma nyanyan. Na soso wan tu salfu Kresten na ini a ten fu den apostel, Gado ben gebroiki fu skrifi den Kresten Griki Buku fu Bijbel. Na ini a ten disi a de so tu taki na soso wan pikin grupu salfu Kresten kisi a wroko fu gi Gado pipel „nyanyan na a reti ten”.

17. San yu leri na ini na artikel disi?

17 San wi leri na ini na artikel disi? Yehovah e gi son sma a howpu fu libi na hemel èn tra sma a e gi a howpu fu libi na grontapu. Bijbel e agersi a fosi grupu nanga a Dyu èn a tra grupu a e agersi nanga den tin man. Ma ala tu grupu musu du san Yehovah wani, awinsi den o go na hemel noso den o tan na grontapu. Ala tu grupu musu tan abi sakafasi. Den ala tu musu de wán èn ala tu musu sorgu taki freide de na ini a gemeente. Now di a kaba fu den lasti dei disi e kon moro krosibei, wi musu meki muiti fu tan dini Gado leki wán ipi di abi Krestes leki skapuman.

^ [1] (paragraaf 3) Psalm 87:5, 6 e sori taki kande na ini a ten di e kon Gado o meki den nen bekènti fu den sma di go na hemel fu tiri makandra nanga Yesus.Rom. 8:19.

^ [2] (paragraaf 15) Tori fu den apostel 2:33 e sori taki Yesus e meki santa yeye kon na tapu den sma di o kisi wan kari fu go na hemel, ma na Yehovah e bosroiti suma na den sma disi.

^ [3] (paragraaf 15) Efu yu wani sabi moro fu a tori disi, dan luku „Aksi fu leisiman” na ini A Waktitoren fu 1 mei 2007, blz. 30, 31.