Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2016

Un musu „tan lobi makandra leki brada”!

Un musu „tan lobi makandra leki brada”!

„Tan lobi makandra leki brada.”HEBR. 13:1.

SINGI: 72, 119

1, 2. Fu san ede Paulus skrifi wan brifi gi den Hebrew Kresten?

NA INI a yari 61, a ben e go bun nanga ala den gemeente na Israel. Aladi na apostel Paulus ben de na strafu-oso na ini Rome, toku a ben e howpu taki den ben o lusu en dyonsro. No so langa pasa, en mati Timoteyus ben komoto na strafu-oso èn den ben abi na prakseri fu go luku den brada nanga sisa na Yudea (Hebr. 13:23). Ma san den no ben sabi na taki baka feifi yari, ’legre ben o seti kampu lontu’ Yerusalem, soleki fa Yesus ben taki na ini wan profeititori. Na a ten dati, den Kresten na Yudea èn spesrutu den wan di ben e libi na Yerusalem ben o abi fu du wan sani esi-esi. Yesus ben warskow den taki solanga den si taki legre lontu a foto, den ben musu lowe go na den bergi.Luk. 21:20-24.

2 Na ini den 28 yari baka di Yesus taki a profeititori disi, den Dyu Kresten di ben e libi na Israel kisi furu tesi, ma den tan horidoro di sma frufolgu den (Hebr. 10:32-34). Toku Paulus ben sabi taki den ben o kisi wan fu den moro hebi tesi na ini den libi (Mat. 24:20, 21; Hebr. 12:4). A ben wani taki den sreka densrefi gi iniwan sani di ben o miti den. Efu den  ben wani tan na libi, dan den ben o abi fu horidoro èn a bribi fu den ben musu tranga. (Leisi Hebrewsma 10:36-39.) Fu dati ede Yehovah meki Paulus skrifi wan brifi gi den brada nanga sisa disi fu tranga a bribi fu den. Wi sabi a brifi disi leki a Bijbel buku Hebrewsma.

3. Fu san ede wi musu poti prakseri na a Bijbel buku Hebrewsma?

3 Wi alamala na ini a ten disi musu poti prakseri na a brifi di Paulus skrifi gi den Hebrew Kresten. Fu san ede? Fu di wi de na ini wan srefi sortu situwâsi. Na ini den ’muilek ten disi di tranga fu pasa’, Yehovah en pipel kisi frufolgu na ala sortu fasi èn den kisi ala sortu tesi (2 Tim. 3:1, 12). Wi sori ala ten baka taki a bribi fu wi tranga èn taki wi o tan dini Gado fayafaya awinsi san o pasa. Ma furu fu wi e libi na ini kondre pe sani e go bun èn pe sma no e frufolgu wi. Ma neleki den Kresten na ini a ten fu Paulus, nowan fu wi musu frigiti a prenspari sani disi: Dyonsro a bribi fu wi o kisi a moro bigi tesi di noiti wi kisi ete!Leisi Lukas 21:34-36.

4. San na a yaritekst gi 2016 èn fu san ede a fiti?

4 San o yepi wi fu sreka wisrefi gi den sani di o pasa dyonsro? Na ini Hebrewsma, Paulus e taki fu wan lo sani di o yepi wi fu tranga a bribi fu wi. Na ini a fosi vers fu a lasti kapitel fu a brifi disi, wi kan leisi wan fu den prenspari sani dati. Na a vers disi wi teki leki a yaritekst gi 2016. Drape wi e kisi a deki-ati: „Tan lobi makandra leki brada.”Hebr. 13:1.

A yaritekst fu 2016 na: „Tan lobi makandra leki brada.”Hebrewsma 13:1

SAN A WANI TAKI FU LOBI MAKANDRA LEKI BRADA?

5. San a wani taki fu lobi makandra leki brada?

5 San a wani taki fu lobi makandra leki brada? A Griki wortu di Paulus gebroiki dya na filadelfia. A wortu disi wani taki „firi gi wan brada”. Te wi lobi makandra leki brada, dan wi o abi tranga firi gi makandra, neleki fa a de na mindri famiriman noso bun mati (Yoh. 11:36). Wi no e du leki wi na brada nanga sisa, ma wi na trutru brada nanga sisa fu makandra (Mat. 23:8). Paulus taki: „Un musu lobi makandra trutru, iya, lobi makandra leki brada. De a fosiwan fu sori trawan lespeki” (Rom. 12:10). Den wortu disi e sori o tranga a lobi de di wi abi gi wi brada nanga sisa. Te Gado pipel e sori a sortu lobi disi, makandra nanga agape-lobi di ala Kresten musu abi, dan dati o yepi den fu de bun mati fu makandra èn den o de wán.

6. San den wortu „lobi makandra leki brada” wani taki gi tru Kresten?

6 Moro furu yu kan leisi den wortu „lobi makandra leki brada” na ini buku di e taki fu a Kresten bribi. Na ini a Dyu bribi, a wortu „brada” no ben abi fu du nanga trakondre sma, ma a ben abi fu du nanga trutru famiriman èn nanga ala sma di ben de wan Dyu. Ma na ini a Kresten bribi ala sma na brada, awinsi fu sortu kondre den de (Rom. 10:12). Yehovah leri wi taki wi musu lobi makandra leki brada (1 Tes. 4:9). Ma fu san ede a prenspari taki wi tan lobi makandra leki brada?

FU SAN EDE A DE SO PRENSPARI FU TAN LOBI MAKANDRA LEKI BRADA?

7. (a) San na a moro prenspari sani di meki taki wi musu lobi makandra leki brada? (b) Sortu tra sani meki taki a prenspari fu meki a lobi di wi abi gi makandra kon moro tranga?

7 A moro prenspari sani di meki taki wi musu lobi makandra leki brada, na fu di Yehovah wani dati. Wi no kan taki dati wi lobi Gado, efu wi no wani lobi wi  brada (1 Yoh. 4:7, 20, 21). Boiti dati, wi abi makandra fanowdu spesrutu na ini muilek ten. Paulus ben sabi taki son Hebrew Kresten ben o abi fu libi den oso nanga den gudu na baka. Yesus ben taki kaba o hebi a ten dati ben o de (Mark. 13:14-18; Luk. 21:21-23). Sobun, fosi a ten dati doro, den Kresten disi ben musu meki a lobi di den abi gi makandra kon moro tranga.Rom. 12:9.

8. San wi musu du now, fosi a bigi banawtu bigin?

8 Dyonsro den engel o lusu den winti di o tyari a moro bigi banawtu kon di noiti ete pasa na grontapu (Mark. 13:19; Openb. 7:1-3). Na a ten dati, a ben o bun fu poti prakseri na a rai disi: „Mi pipel, un go na ini un kamra èn tapu den doro. Un go kibri fu wan syatu pisi ten, teleki mi ati no bron moro” (Yes. 26:20). Kande den „kamra” disi na den gemeente fu wi. Leki gemeente wi e kon makandra fu anbegi Yehovah. Ma a no sari fu kon makandra nomo ala wiki nanga wi brada nanga sisa. Paulus ben taigi den Hebrew Kresten taki den ben musu gebroiki den sortu okasi dati fu gi makandra deki-ati „fu abi lobi èn fu du bun wroko” (Hebr. 10:24, 25). Wi musu meki a lobi di wi abi leki brada kon moro tranga now, fu di dati o yepi wi te wi o kisi tesi na ini a ten di e kon.

9. (a) Na sortu okasi wi kan sori taki wi lobi makandra leki brada? (b) Gi wan tu eksempre di e sori taki Yehovah pipel lobi makandra leki brada?

9 Srefi now, fosi a bigi banawtu bigin, a de fanowdu fu sori lobi gi den brada nanga sisa fu wi. Furu fu den e kisi fu du nanga gronseki, frudu, bigi draiwinti, tsunami noso tra rampu. Sonwan fu den e pina fu di sma e gens den noso e frufolgu den (Mat. 24:6-9). Boiti dati, ibri dei wi e kisi problema fu di wi e libi na ini wan kruka grontapu pe a no e go bun nanga na ekonomia (Openb. 6:5, 6). O moro den sortu problema disi e miti wi, o moro wi e kisi okasi fu sori tranga lobi gi makandra. Aladi „a lobi fu furu sma o kon kowru”, toku wi musu sori taki wi e tan lobi makandra leki brada.Mat. 24:12. [1]

SAN WI MUSU DU FU TAN LOBI MAKANDRA LEKI BRADA?

10. San wi o go luku now?

10 Fa wi kan sorgu taki wi tan lobi makandra leki brada, aladi wi e kisi someni problema? Na sortu fasi wi kan du disi? Baka di na apostel Paulus taki dati Kresten musu „tan lobi makandra leki brada”, a sori na sortu fasi den kan du dati. Meki wi go luku siksi fu den fasi disi.

11, 12. San a wani taki fu gi sma wan switikon? (Luku a prenki na a bigin fu na artikel.)

11 „No frigiti fu lobi fu gi sma wan switikon.” (Leisi Hebrewsma 13:2.) Den wortu „gi sma wan switikon”, wani taki „sori switifasi gi sma di yu no sabi”. Disi e meki wi prakseri Abraham nanga Lot di ben sori switifasi gi sma di den no ben sabi. Den sma disi ben de engel (Gen. 18:2-5; 19:1-3). Na a sani disi Paulus ben e prakseri di a ben gi den Hebrew Kresten deki-ati fu sori switifasi gi makandra, fu di na so den ben o sori taki den abi lobi.

12 Fa wi kan sori switifasi gi wi brada nanga sisa? Wi kan du dati te wi e kari den kon na wi oso fu nyan wan sani noso fu gi makandra deki-ati. Wi no abi fu bori wan bigi nyanyan di e teki tumusi furu moni. A no ben o bun tu fu kari soso den sma di kande man du wan sani gi wi baka (Luk. 10:42; 14:12-14). Na wani wi wani gi makandra deki-ati, a no  sori wi wani sori omeni sani wi abi. Fa a de nanga a kring-owruman nanga en wefi? Kande wi no sabi den so bun, ma toku wi kan kari den kon na wi oso fu sori switifasi gi den (3 Yoh. 5-8). A tru taki wi abi furu fu du èn a libi lai nanga broko-ede. Ma toku wi ’no musu frigiti fu gi makandra wan switikon’.

13, 14. Fa wi kan „tan prakseri den sma di de na strafu-oso”?

13 „Tan prakseri den sma di de na strafu-oso.” (Leisi Hebrewsma 13:3.) Dyaso Paulus no ben e taki fu ala sma di de na strafu-oso. Ma a ben e taki fu den Kresten di ben de na strafu-oso fu a bribi fu den. Paulus srefi ben de na strafu-oso sowan fo yari di a skrifi a brifi disi gi den Hebrew Kresten (Fil. 1:12-14). A prèise den fu di den ben sori taki den ben „firi gi den brada di ben de na strafu-oso” (Hebr. 10:34). Son brada ben de nanga Paulus fu yepi en di a ben de na strafu, ma den Hebrew Kresten no ben man yepi en fu di den no ben de drape. Sobun, fa den ben kan tan prakseri en? Den ben kan begi fayafaya gi en.Hebr. 13:18, 19.

14 Na ini a ten disi, furu brada nanga sisa de na strafu-oso tu. Kande wi no man go luku den èn wi no man yepi den nanga son sani, leki fa den Kotoigi di e libi na ini a birti fu a strafu-oso e du dati. Ma te wi e tan prakseri den èn wi e begi Yehovah fayafaya gi den, dan wi kan sori taki wi e firi gi den èn taki wi lobi den leki brada. Fu eksempre, kande wi kan prakseri den omeni brada nanga sisa èn son leisi yonguwan srefi di de na strafu-oso na Eritrea. Prakseri Brada Paulos Eyassu, Isaac Mogos nanga Negede Teklemariam, di de na strafu-oso moro leki 20 yari kaba!

15. Fa wi kan sori taki wi e lespeki a trowlibi fu wi?

15 „Un alamala musu si a trowlibi leki wan lespeki sani.” (Leisi Hebrewsma 13:4.) Wan tra fasi fa wi kan sori lobi gi makandra leki brada, na te wi e libi wan krin libi (1 Tim. 5:1, 2). Kon meki wi taki dati wan Kresten e du hurudu nanga wan brada noso sisa, noso nanga wan famiriman fu a brada noso sisa disi. So wan Kresten e ’go so fara taki a e du en brada ogri èn taki a e meki a lasi wan sani di a abi reti na tapu’. A sani disi kan meki taki en brada noso sisa no frutrow en moro (1 Tes. 4:3-8). Prakseri tu fa wan sisa ben o firi te a ben kon sabi taki en masra e luku porno. A brada disi no ben o sori taki a lobi en wefi èn taki a e lespeki a trowlibi.Mat. 5:28.

16. Te wi de tevrede, dan fa dati o yepi wi fu sori lobi gi wi brada?

16 „Un musu breiti [noso de tevrede] nanga den sani di unu abi now.” (Leisi Hebrewsma 13:5.) Te wi e frutrow na tapu Yehovah, dan wi o de tevrede èn wi o si gudu na a yoisti fasi (1 Tim. 6:6-8). Wi o kon si tu taki a matifasi di wi abi nanga Yehovah èn nanga wi brada nanga sisa, prenspari moro iniwan sani di wi kan bai nanga moni. Wan sma di de tevrede, no e krutukrutu ala yuru, a no e suku fowtu na sma tapu, a no e dyarusu èn a no abi bigi-ai fu di den sani disi kan meki a lobi fu en kon kowru. Ma te wi de tevrede, dan wi o lobi fu gi trawan sani.1 Tim. 6:17-19.

17. Te wi „abi deki-ati”, dan fa dati o yepi wi fu sori lobi gi wi brada?

17 „Abi deki-ati.” (Leisi Hebrewsma 13:6.) Te wi e frutrow na tapu Yehovah, dan wi o abi deki-ati, awinsi sortu tesi miti wi. A deki-ati dati o yepi wi fu si  sani na a yoisti fasi. Te wi e si sani na a yoisti fasi, dan wi o man gi wi brada nanga sisa deki-ati èn wi o man trowstu den fu di wi lobi den (1 Tes. 5:14, 15). Srefi te a moro takru ten o de na grontapu fu di a bigi banawtu doro, wi o man ’opo tanapu leti-opo èn opo wi ede luku go na loktu’ fu di wi sabi taki a frulusu fu wi de krosibei.Luk. 21:25-28.

Yu e warderi a wroko di den owruman e du gi wi? (Luku paragraaf 18)

18. Fa wi kan sori moro lobi gi den owruman?

18 „Memre den wan di e teki fesi.” (Leisi Hebrewsma 13:7, 17.) Te wi e prakseri o tranga den owruman fu wi e wroko gi wi sondro taki den e kisi moni fu dati, dan wi o abi moro lobi nanga warderi gi den. Noiti wi o wani du wan sani di o meki den lasi den prisiri noso di o meki den geme. Na presi fu dati, wi musu gi yesi na den èn wi musu saka wisrefi na den ondro. Na so wi o sori taki wi ’abi furu lespeki gi den èn taki wi lobi den gi a wroko di den e du’.1 Tes. 5:13.

TAN SORI MORO LOBI GI WI BRADA

19, 20. Fa wi kan tan sori moro lobi gi wi brada?

19 Furu sma sabi taki a pipel fu Yehovah gwenti sori lobi gi makandra. Na so a ben de tu na ini a ten fu Paulus. Ma toku a gi ala Kresten deki-ati „fu tan lobi [makandra] moro” (1 Tes. 4:9, 10). Sobun, awinsi wi e sori lobi gi makandra kaba, toku wi musu tan suku moro okasi fu du dati.

20 Te wi e luku a yaritekst na ini a Kownukondre zaal a yari disi, dan meki wi denki dipi fu den aksi disi: Fa mi kan sori moro switifasi? Fa mi kan prakseri den brada nanga sisa di de na strafu-oso? Mi e sori lespeki gi a trowlibi di de wan seti fu Gado? San o yepi mi fu de tevrede nanga mi heri ati? Fa mi kan frutrow moro na tapu Yehovah? Fa mi kan wroko makandra moro bun nanga den brada di e teki fesi? Te wi e du ala den siksi sani di wi leri na ini na artikel disi, dan a yaritekst no o de nomo leki wan bord di e anga na ini a Kownukondre zaal, ma a o memre wi taki wi musu: „Tan lobi makandra leki brada.”Hebr. 13:1.

^ [1] (paragraaf 9) Efu yu wani leisi ete wan tu eksempre di e sori fa Yehovah Kotoigi sori lobi gi makandra na ini ten fu rampu, dan luku A Waktitoren fu 15 yuli 2002, blz. 8, 9 nanga Gado Kownukondre e tiri!, kap. 20.