Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2016

A yeye fu Gado e sori wi krin taki wi na Gado pikin

A yeye fu Gado e sori wi krin taki wi na Gado pikin

„A yeye fu Gado srefi e sori wi krin taki wi na pikin fu Gado.”ROM. 8:16.

SINGI: 109, 108

1-3. Sortu spesrutu sani pasa na a Pinksterfesa, èn fa disi e kruderi nanga san Bijbel ben taki na fesi? (Luku a prenki na a bigin fu na artikel.)

A DE sonde mamanten, wan ten fu neigi yuru. A sonde disi na wan spesrutu dei gi den sma di de na Yerusalem. Fu di a de wan fesadei, meki a de wan Sabat-dei tu. Soleki fa a gwenti de, dan fruku mamanten a granpriester tyari na ofrandi kaba na a tempel. Now a momenti doro taki a e sreka sani fu tyari tu brede leki ofrandi di a e buweigi go-kon na fesi Yehovah. Den brede disi meki fu fini blon èn den baka nanga srudeki (Lef. 23:15-20). Na ofrandi disi e sori taki a ten fu koti nyanyan bigin. A dei disi na a Pinksterfesa fu a yari 33.

2 Hondrohondro yari kaba, a granpriester ben abi a gwenti fu tyari na ofrandi disi èn a ben e du a sani disi ibri yari. Now 120 bakaman fu Yesus ben de na wan sodrokamra e begi nanga makandra (Tori 1:13-15). A sani di ben o pasa nanga den, ben abi fu du nanga den sani di a granpriester ben gwenti du na a Pinksterfesa. Aiti hondro yari na fesi, a profeiti Yoèl ben  skrifi taki so wan sani ben o pasa (Yoèl 2:28-32; Tori 2:16-21). Ma san ben o pasa di ben de so prenspari?

3 Leisi Tori fu den apostel 2:2-4. A santa yeye fu Gado ben kon na tapu den Kresten di ben kon makandra na a sodrokamra (Tori 1:8). Ne den bigin taki fu den moi sani di den si èn yere. Baka dati na apostel Petrus bigin fruteri ala den sma drape san a sani di ben pasa wani taki èn fu san ede a prenspari. Dan a taigi den: „Un musu abi berow èn ibriwan fu unu musu dopu na ini a nen fu Yesus Krestes, so taki unu kan kisi pardon fu un sondu. Na so unu o kisi a santa yeye di Gado e gi sma fu soso.” Ala nanga ala, sowan 3000 sma du san Petrus taki èn a dei dati den teki dopu. Ne santa yeye kon na den tapu soleki fa Yesus ben pramisi.Tori 2:37, 38, 41.

4. (a) Fu san ede den sani di pasa na a Pinksterfesa prenspari gi wi? (b) Sortu tra prenspari sani pasa kande na a srefi dei na ini owruten? (Luku „Ete wan sani”.)

4 Fu san ede a Pinksterfesa fu a yari 33 de so prenspari gi wi? Fu di a granpriester e prenki Yesus Krestes, di de a bigi Granpriester. [1] Tapu a dei disi a granpriester ben e tyari tu brede leki ofrandi gi Yehovah. Den brede disi e prenki den salfu bakaman fu Yesus. Gado teki den bakaman disi nanga tra salfu Kresten, puru na mindri sondu libisma fu tron en manpikin. Den na den „fosiwan” di ben o go na hemel te fu kaba fu tiri na ini a Kownukondre di o tyari omeni blesi kon gi ala libisma di e gi yesi (Yak. 1:18; 1 Petr. 2:9). Sobun, awinsi wi abi a howpu fu libi na hemel makandra nanga Yesus, noso fu libi fu têgo na ini wan paradijs na grontapu, toku den sani di pasa na a dei dati prenspari gi wi.

SAN E PASA TE WAN SMA E TRON WAN SALFUWAN?

5. Fa wi du sabi taki a no ala salfu Kresten e tron salfuwan na a srefi fasi?

5 Efu yu ben de wan fu den disipel di ben abi wan sani leki faya na tapu en ede, dan noiti yu ben o frigiti a dei dati. Yu no ben o tweifri taki Gado salfu yu nanga santa yeye, spesrutu te yu srefi ben bigin taki wan tra tongo (Tori 2:6-12). Ma Gado e salfu wan Kresten na a srefi fasi leki fa a ben salfu den 120 disipel? Nôno. Den tra sma di ben de na Yerusalem a dei dati, tron salfu Kresten di den teki dopu (Tori 2:38). Nowan faya ben de fu si na tapu den ede. Boiti dati, a no ala salfu Kresten ben kisi santa yeye wantewante baka di den teki dopu. Fu eksempre, den Samariasma no ben tron salfuwan syatu baka di den teki dopu (Tori 8:14-17). Ma Kornelius nanga den sma fu en osofamiri ben tron salfuwan srefi fosi den teki dopu. Noiti ete so wan sani ben pasa.Tori 10:44-48.

6. San ala salfu Kresten e kisi èn san disi wani taki gi den?

6 Disi e sori taki a no ala salfu Kresten e tron salfuwan na a srefi fasi. Sonwan fu den e kon frustan wantronso taki Gado kari den, ma trawan e frustan baka wan heri pisi ten fosi taki Gado kari den. Ma awinsi fa wan sma e tron wan salfu Kresten, a srefi sani e pasa nanga den alamala soleki fa na apostel Paulus taki: „Baka di unu bigin bribi, dan Gado poti a santa yeye di a pramisi unu leki wan stampu na un tapu nanga yepi fu Krestes. A santa yeye disi na wan dyaranti taki wi o kisi wan gudu” (Ef. 1:13, 14). Sobun, a spesrutu fasi disi fa a santa yeye e wroko na wan dyaranti gi wan salfu Kresten taki a o go na hemel. So wan  Kresten sabi seiker taki Gado salfu en, fu di a kisi a dyaranti disi.Leisi 2 Korentesma 1:21, 22; 5:5.

7. San ibri salfu Kresten musu du fu kan go na hemel te fu kaba?

7 Ma te wan Kresten kisi a dyaranti disi, dan a wani taki dati noti no man tapu en fu go na hemel? Kwetikweti. Wán sani san a sabi seiker, na taki a kisi wan kari. Ma fu man de seiker taki a o go na hemel, dan a musu tan gi yesi na Yehovah te na a kaba. Dati meki Petrus taki: „Fu dati ede brada, du ala muiti fu tan de wan fu den sma di Gado kari èn di a teki. Efu unu tan du den sani disi, dan noiti unu o fadon. Fu taki en leti, na a fasi disi unu o kisi a bigi blesi fu go na ini a têgo Kownukondre fu wi Masra nanga wi Frulusuman Yesus Krestes” (2 Petr. 1:10, 11). Sobun, ibri salfu Kresten musu meki muiti fu horidoro te na a kaba. Efu a no du dati, dan a kari di a kisi fu go na hemel o de fu soso.Hebr. 3:1; Openb. 2:10.

FA WAN SMA SABI TAKI A DE WAN SALFU KRESTEN?

8, 9. (a) Fu san ede a muilek gi furu sma fu frustan san e pasa te wan sma e tron wan salfu Kresten? (b) Fa wan sma sabi taki a kisi a kari fu go na hemel?

8 Furu futuboi fu Gado na ini a ten disi no man frustan krin fa wan sma e tron wan salfu Kresten. Fu san ede? Fu di den no sabi fa a e firi fu de wan salfuwan. Na a bigin, Gado ben wani taki libisma musu libi fu têgo na grontapu (Gen. 1:28; Ps. 37:29). Ma aladi Gado teki wan tu sma fu tiri leki kownu nanga priester, toku a no dati a ben abi na prakseri di a meki libisma. A sani disi na wan aparti sani di a du. Te Gado e salfu wan sma, dan a howpu fu a sma disi e kenki, sosrefi a heri fasi fa a e denki èn e si sani.Leisi Efeisesma 1:18.

9 Ma fa wan sma sabi taki a kisi a kari fu go na hemel? Luku san Paulus skrifi den salfu brada fu Rome di Gado ben „kari fu de santa sma”. Paulus taigi den: „A yeye fu Gado no e meki wi tron srafu èn a no e meki wi frede baka. Ma a yeye meki taki Gado teki unu leki en manpikin èn a e meki wi bari: ’Abba, Tata!’ A yeye fu Gado srefi e sori wi krin taki wi na pikin fu Gado” (Rom. 1:7; 8:15, 16). San disi e sori wi? Gado e gebroiki en santa yeye fu meki wan sma sabi krin taki a kisi a kari fu tiri leki kownu na ini a Kownukondre makandra nanga Yesus.1 Tes. 2:12.

10. Te 1 Yohanes 2:27 e taki dati den salfu Kresten no abi nowan sma fanowdu fu gi den leri, dan san disi wani taki?

10 Den sma di kisi a spesrutu kari disi fu Gado no abi nowan tra buweisi fanowdu taki den o go na hemel. Nowan sma abi fu kon taki nanga den fu luku efu den na salfuwan trutru. Yehovah e sorgu taki nowan tweifri de na ini den ati. Luku san na apostel Yohanes e taigi den salfu Kresten disi: „A santawan salfu unu. Un alamala sabi a tru leri.” A e taki moro fara: „Ma Gado salfu unu nanga en yeye èn a yeye dati e tan na ini unu. Unu no abi nowan sma fanowdu di musu gi unu leri. Ma a salfu unu èn a sani dati de tru, iya, a no wan lei. A yeye e leri unu ala sani. Soleki fa a yeye leri unu, un musu de wán nanga a sma di salfu unu” (1 Yoh. 2:20, 27). Den salfu Kresten disi musu kisi leri fu Yehovah neleki ala tra sma. Ma den no abi nowan sma fanowdu fu luku efu den salfu trutru. A santa yeye, a moro bigi krakti di de na hemel nanga grontapu sori den kaba taki den na salfuwan!

 FA A DE GI WAN SMA DI „GEBORE NYUN BAKA”?

11, 12. San wan salfu Kresten kan aksi ensrefi, ma fu san a no e tweifri kwetikweti?

11 Te a santa yeye meki wan Kresten frustan taki en na wan salfuwan, dan a Kresten disi e kenki. A kenki dati bigi so te taki Yesus taki dati a „gebore baka” [2] (Yoh. 3:3, 5). A e taki moro fara: „No fruwondru fu di mi taigi yu: Un musu gebore baka. A winti e wai pe a wani èn yu e yere taki a e wai, ma yu no sabi fu pe a komopo èn pe a e go. Na so a de nanga wan sma di gebore fu a yeye” (Yoh. 3:7, 8). A de krin taki efu wan sma no de wan salfuwan, a no man frustan fa wan salfuwan e firi.

12 Kande wan sma di kisi a kari fu go na hemel e aksi ensrefi: ’Fu san ede Gado kari mi? Fu san ede a no teki wan tra sma?’ Kande a e feni srefi taki a no warti fu go na hemel. Ma a sma disi no e tweifri taki a kisi a kari. A e prisiri èn a de nanga tangi gi dati. A e firi neleki Petrus di ben taki: „Blesi fu a Gado nanga a Tata fu wi Masra Yesus Krestes, bika na fu di a abi furu sari-ati nanga wi, meki wi gebore nyun baka fu kan abi wan howpu di no e lasi gowe. Wi abi a howpu disi fu di a gi Yesus Krestes wan opobaka, so taki wi kan kon abi libi di no man pori, di no doti èn di no o lasi gowe. A libi disi na wan gudu di poti na wan sei na ini hemel gi unu” (1 Petr. 1:3, 4). Te wan salfu Kresten e leisi den wortu disi, dan a sabi seiker taki nanga en Yehovah, en hemel Tata e taki.

13. (a) Fa a denki fu wan sma e kenki te Gado e salfu en nanga santa yeye? (b) San e meki so wan sma e kenki?

13 Fosi den Kresten disi kisi a kari fu go na hemel, dan den ben abi a howpu fu libi na grontapu. Den ben e wakti a ten te Yehovah o krin a grontapu disi èn den ben wani si ala den blesi di Gado o gi libisma. Kande den ben e si kaba fa den ben o gi den lobiwan fu den di kisi wan opobaka, wan switikon. A kan taki den ben e prakseri fa a ben o de fu libi na ini wan oso di den srefi bow èn fa den ben o nyan den froktu di den srefi prani (Yes. 65:21-23). Fa a du kon taki a denki fu den kenki? Na wani den no wani abi a howpu dati moro? Na fu di den broko saka noso na fu di den e pina na grontapu meki den e denki so? Na wantronso den feni taki têgo libi na grontapu o soi èn taki den no o de koloku dyaso? Noso na wani den wani sabi fa a o de fu libi na hemel? Nôno, a no fu dati ede. Den kenki fu di a yeye fu Gado gi den wan kari èn a kenki a denki nanga a howpu di den ben abi.

14. Fa den salfuwan e si a libi fu den na grontapu?

14 Sobun, wi musu denki taki den salfuwan disi wani dede? Luku san Paulus e taki: „Fu taki en leti, wi e geme na ini a tenti disi, fu di a de leki wan hebi gi wi. A no de so taki wi wani puru a tenti disi, ma wi wani kisi a tanpresi na ini hemel. Dan libi kan kon na ini a presi fu dede” (2 Kor. 5:4). A no de so taki den salfuwan no lobi a libi disi. Den e prisiri fu a libi èn ibri dei den e angri fu anbegi Yehovah makandra nanga den famiri nanga den mati fu den. Ma awinsi san den e du, den e tan denki a moi howpu di den abi fu go na hemel.1 Kor. 15:53; 2 Petr. 1:4; 1 Yoh. 3:2, 3; Openb. 20:6.

GADO GI YU WAN KARI?

15. Sortu sani no e sori taki wan sma salfu nanga santa yeye?

15 Kande yu e aksi yusrefi efu yu kisi a kari fu go na hemel. Efu yu e denki taki  kande yu kisi a kari, dan aksi yusrefi den prenspari sani disi: Yu feni taki yu e du a preikiwroko nanga moro faya? Yu lobi fu studeri Gado Wortu èn fu ondrosuku „den dipi sani fu Gado” (1 Kor. 2:10). Yu feni taki Yehovah gi yu furu blesi na ini a diniwroko? Yu e angri fu du a wani fu Yehovah? Yu lobi tra sma so te taki yu e firi taki na yu frantwortu fu yepi den fu kon sabi Yehovah? Yu feni taki yu e si Yehovah anu furu na ini yu libi? Efu yu feni taki na so a de, dan disi wani taki dati yu kisi a kari fu go na hemel? Nôno. Fu san ede? Fu di a no soso den sma di e go na hemel e ondrofeni den sortu sani disi. Awinsi wan sma abi a howpu fu go na hemel, Gado no e gi en moro fu en santa yeye leki den sma di abi a howpu fu libi na grontapu. Fu taki en leti, efu yu e tweifri taki yu kisi a kari fu go na hemel, dan yu no kisi en. Den wan di Yehovah kari no e tweifri! Den sabi seiker taki a kari den!

16. Fa wi du sabi taki a no ala sma di ben abi a santa yeye fu Gado kisi a kari fu go na hemel?

16 Na ini Bijbel wi kan leisi fu sma di ben abi bribi èn di ben kisi a santa yeye, aladi den no ben abi a howpu fu go na hemel. Yohanes a Dopuman ben de wan fu den. Yesus ben taki dati fu ala den sma di ben de na libi, nowan ben bigi moro Yohanes. Toku a no taki dati Yohanes ben o tiri na ini Gado Kownukondre (Mat. 11:10, 11). A yeye fu Gado ben de na tapu David tu (1 Sam. 16:13). Santa yeye ben yepi en fu frustan den dipi sani fu Gado èn fu skrifi son pisi fu Bijbel (Mark. 12:36). Ma na a Pinksterfesa, Petrus taki dati „David no opo go na hemel” (Tori 2:34). Yehovah gebroiki en santa yeye fu gi den sma disi a krakti fu du bigi sani, ma a no gebroiki en fu taigi den taki den o go na hemel. Ma disi wani taki dati den no warti nofo fu go na hemel? Nôno. Na presi fu dati, Yehovah o gi den wan opobaka fu libi na ini Paradijs na grontapu.Yoh. 5:28, 29; Tori 24:15.

17, 18. (a) Sortu howpu furu fu den futuboi fu Gado abi? (b) Sortu aksi wi o luku na ini a tra artikel?

17 Furu fu den futuboi fu Gado na ini a ten disi no kisi a kari fu go na hemel. Den abi a srefi howpu leki David, Yohanes a Dopuman nanga tra man nanga uma fu fositen di ben abi bribi. Neleki Abraham, den e wakti a ten te den o libi na grontapu na ondro a tiri fu Gado Kownukondre (Hebr. 11:10). Na soso wan pikin grupu fu den salfuwan de ete na grontapu na ini a ten disi fu a kaba (Openb. 12:17). Sobun, a moro bigi pisi fu den 144.000 sma di Gado kari, dede kaba èn den de na hemel.

18 Ma efu wan sma taki dati a abi a howpu fu go na hemel, dan fa den sma di abi a howpu fu libi na grontapu musu si a sma disi? Efu wan sma na ini yu gemeente e bigin nyan fu a brede èn e dringi fu a win na a Memrefesa, dan san yu musu du? Yu musu broko yu ede taki a nomru fu den sma di e taki dati den o go na hemel e kon moro bigi? A tra artikel o piki den aksi disi.

^ [1] (paragraaf 4) A kan taki a Pinksterfesa ben fadon na a srefi ten di Gado gi den Israelsma a Wet na Sinai (Eks. 19:1). Efu dati de so, dan wi kan taki dati neleki fa Gado ben meki Moses gi den Israelsma a Wetfrubontu na a dei dati, na so Yesus Krestes tyari wan tra pipel di Bijbel e kari na Israel fu Gado kon na ini wan nyun frubontu na a srefi dei dati.

^ [2] (paragraaf 11) Efu yu wani sabi moro san a wani taki fu gebore nyun baka, dan luku De Wachttoren fu 1 april 2009, blz. 3-11.