’Yonkuman nanga yonguwenke, un prèise a nen fu Yehovah.’​—PS. 148:12, 13.

SINGI: 88, 115

1, 2. (a) Sortu sani kan muilek gi papa nanga mama èn san kan yepi den? (b) Sortu fo sani wi o luku now?

WAN trowpaar na Fransikondre ben taki: „A no fu di wi e bribi na ini Yehovah, meki den pikin fu wi o bribi tu.” Den e taki moro fara: „Bribi a no wan sani di wi e kisi te wi gebore. Safrisafri den pikin fu yu musu leri fu kon abi bribi.” Wan brada fu Australia ben skrifi: „Mi denki taki a moro muilek sani na fu leri yu pikin fu kon abi bribi. Yu o abi fu gebroiki iniwan sani di yu kan feni. Kande yu pikin poti wan aksi gi yu èn yu denki taki yu gi en wan bun piki kaba. Ma bakaten a e poti a srefi aksi gi yu! Kande a pikin breiti nanga a piki di yu e gi en now, ma te a kon moro bigi a wani sabi moro. Sobun, yu o abi fu taki fu son sani omeni leisi.”

2 Yu leki papa noso mama feni en muilek son leisi fu gi yu pikin leri èn fu yepi den fu tron man nanga uma di abi bribi? A tru taki nanga wi eigi koni, wi no o man du dati (Yer. 10:23). Ma wi o man du en te wi e suku yepi na Yehovah. Luku fo sani di yu kan du fu yepi yu pikin fu kon abi bribi: (1) Kon sabi den bun. (2) Leri den san de na ini yu ati. (3) Gebroiki bun eksempre. (4) Sori pasensi èn abi a gwenti fu begi.

 KON SABI YU PIKIN BUN

3. Fa papa nanga mama kan teki na eksempre fu Yesus te den e gi leri?

3 Yesus ben gwenti aksi den bakaman fu en san den e bribi (Mat. 16:13-15). Teki na eksempre fu en. A moro bun ten fu kon sabi fa den pikin fu yu e denki fu wan tori, na te yu e sidon relax nanga den. Yu kan taki nanga den fu iniwan sani di den e tweifri. Wan brada fu Australia di abi 15 yari ben skrifi: „Mi papa lobi taki nanga mi fu kon sabi san mi e bribi èn a e yepi mi fu denki bun fu den sani dati. Son leisi a e aksi: ’San Bijbel e taki?’ ’Yu e bribi san Bijbel e taki?’ ’Fu san ede yu e bribi dati?’ A no wani taki mi e taki nomo san en noso mi mama ben o taki, ma a wani taki mi e gi piki nanga mi eigi wortu. Di mi kon moro owru, a no ben wani taki mi piki en frafra nomo.”

4. Fu san ede a prenspari fu teki den aksi fu yu pikin leki wan seryusu sani? Gi wan eksempre?

4 Efu wan pikin e tweifri na son sani di wi e bribi, dan no ati bron nanga en. No piki en leki nanga yu a abi en. Ma sori pasensi te yu e taki nanga en fu a tori. Wan papa e taki: „Si den aksi fu yu pikin leki wan seryusu sani. No gi den a firi taki na lawlaw sani den e aksi. Èn no suku fu drai a tori, awinsi yu feni en muilek fu taki fu en.” Fu taki en leti, te yu e teki den aksi fu yu pikin leki wan seryusu sani, dan yu o si taki na wani den wani kon frustan wan tori moro bun. Yesus srefi ben poti seryusu aksi, aladi a ben abi 12 yari nomo. (Leisi Lukas 2:46.) Wan boi fu Deinsikondre di abi 15 yari e taki: „Mi kan memre ete taki di mi taigi mi papa nanga mama taki mi e tweifri efu wi abi a tru anbegi, den no kisi atibron, aladi den ben skreki kande. Den gebroiki Bijbel fu piki ala den aksi fu mi.”

5. San papa nanga mama musu du srefi te a gersi leki den pikin fu den abi bribi?

5 Kon sabi yu pikin bun. Sabi san den e denki, fa den e firi èn nanga san den e broko den ede. Noiti yu musu denki taki fu di den e go na den konmakandra nanga a preikiwroko nanga yu, dan den abi bribi kaba. Ibri dei te yu e du sani makandra nanga den, yu musu pruberi fu kon sabi fa den e denki fu Yehovah èn fu Bijbel. Begi makandra nanga den èn te yu wawan e begi, no frigiti fu begi gi den tu. Pruberi fu kon sabi sortu tesi den e kisi èn sori den san den musu du te den e kisi den tesi disi.

LERI DEN SAN DE NA INI YU ATI

6. Te den leri fu Gado de na ini na ati fu papa nanga mama, dan fa dati o yepi den fu gi leri?

6 Yesus ben man doro sma ati te a ben e gi leri fu di a ben lobi Yehovah, a ben lobi Gado Wortu èn a ben lobi sma (Luk. 24:32; Yoh. 7:46). Lobi o yepi papa nanga mama tu fu doro na ati fu den pikin fu den. (Leisi Deuteronomium 6:5-8; Lukas 6:45.) Sobun, papa nanga mama, un musu abi a gwenti fu studeri Bijbel bun. Gebroiki den sani di wi e kisi fu du dati. Kon sabi moro fu den sani di Gado meki èn leisi den artikel di e taki fu den sani disi (Mat. 6:26, 28). Dati o yepi yu fu kon sabi moro sani, yu o kisi moro warderi gi Yehovah èn yu o man yepi yu pikin moro bun.​—Luk. 6:40.

7, 8. San papa nanga mama o du te den leri fu Bijbel de na ini den ati? Gi wan eksempre.

7 Te den leri fu Bijbel de na ini yu ati, dan yu o taki fu den nanga yu osofamiri. No du en nomo te yu e sreka gi den konmakandra noso te unu e hori na Osofamiri Anbegi. Ma gebroiki ibri okasi fu du dati. Boiti dati, yu no musu dwengi yu pikin fu taki fu Bijbel tori, ma a musu kon fu ensrefi leki fa un gwenti taki ibri dei. Wan trowpaar na Amerkankondre gwenti fruteri den pikin fu den wan sani fu Yehovah te den de na dorosei noso te den e nyan wan switi sani. Den e taki: „Wi e fruteri den pikin fu wi taki  Yehovah lobi wi èn taki a denki bun, fosi a meki den sani di a gi wi.” Wan papa nanga mama fu Zuid-Afrika abi a gwenti fu krin dyari makandra nanga den tu meisje fu den. Te den e du dati, den e sori den pikin taki na wan kefalek moi sani taki wan siri e gro kon tron wan bon. A papa nanga mama disi e taki: „Wi e pruberi fu yepi den meisje fu wi fu kon abi lespeki gi a libi èn fu si taki Gado meki libisani na wan kefalek koni fasi.”

8 Wan papa fu Australia ben tyari a boi fu en di abi tin yari, go luku wan museum. A ben wani yepi en boi fu tranga a bribi fu en èn fu si buweisi taki na Gado meki ala sani. A papa e taki: „Wi si se pakro di den e kari ammoniet nanga trilobiet. Aladi den meti disi no e libi moro, toku a naki wi ati fu si fa den ben moi èn fa den ben meki na wan kefalek koni fasi. Noti no ben e mankeri na den. Yu kan taki dati den ben meki a srefi leki den wan di wi e si now. Sobun, efu na ini owruten kaba yu ben abi den sortu meti disi di meki na so wan kefalek koni fasi, dan fa sma kan taki dati na lawlaw libisani kenki kon tron kefalek moi libisani? Den sani di mi leri a dei dati, naki mi ati trutru èn mi nanga mi boi taki fu den.”

GEBROIKI BUN EKSEMPRE

9. Fu san ede a bun fu gebroiki eksempre te yu e gi yu pikin leri èn fa wan mama du dati?

9 Yesus ben abi a gwenti fu gebroiki eksempre di ben e yepi sma fu go denki, di ben e naki den ati èn di ben e yepi den fu no frigiti san den leri (Mat. 13:34, 35). Nofo tron pikin e si sani leki wan prenki na ini den ede. Sobun, pruberi fu gebroiki furu eksempre te yu e gi yu pikin leri. Na dati wan mama fu Yapan du. Di den tu boi fu en ben abi aiti nanga tin yari, a leri den sani di abi fu du nanga a loktu di de lontu grontapu èn a sori den taki Yehovah denki bun, fosi a meki a loktu disi. Fa a mama du disi? A gi den boi merki, sukru nanga kofi. Ne a aksi ibriwan fu den fu meki wan kofi gi en. A mama disi e fruteri: „Den boi teki den ten fu meki a kofi. Di mi aksi den fu san ede den du dati, den taigi mi taki den wani meki a kofi gi mi leki fa mi lobi en. Ne mi fruteri den taki na so Gado teki en ten fu moksi den difrenti gas na ini a loktu, so taki a loktu bun gi libisma.” Dati na wan moi eksempre di no ben muilek tumusi gi den boi fu frustan. Efu a mama ben fruteri den gewoon fu a loktu, dan kande den no ben o leri so furu. Wi de seiker taki noiti den o frigiti a sani dati!

Yu kan gebroiki sani di yu pikin sabi fu tranga a bribi fu den èn fu sori den taki na Gado meki ala sani (Luku paragraaf 10)

10, 11. (a) Sortu eksempre yu kan gebroiki fu meki a bribi fu yu pikin kon tranga? (Luku a prenki na a bigin fu na artikel.) (b) Sortu eksempre yu lobi gebroiki?

10 Srefi te yu e bori noso e meki wan switi sani yu kan tranga a bribi fu yu pikin. Fa so? Kon meki wi taki dati yu e baka kuku. Yu kan gi en a recept fu sori san yu e poti na ini a kuku. Baka dati yu kan gi en wan froktu, kande wan apra, dan yu kan aksi en: „Yu ben sabi taki wan recept ben de fanowdu tu fu meki na apra disi?” Dan yu kan koti na apra  na ini tu pisi èn gi en wan fu den siri. Baka dati yu kan sori en taki a recept fu na apra skrifi na ini den siri fu en, ma taki a moro muilek fu leisi leki te wan recept skrifi na ini wan buku. Efu na wan moro bigi pikin, yu kan fruteri en taki a recept fu ala den apra na a bon èn srefi fu a heri bon, skrifi na ini a siri fu na apra. Kande yu nanga yu pikin kan luku den prenki fu bladzijde 10 te go miti 20 fu a brochure di nen Vijf belangrijke vragen over het ontstaan van het leven.

11 Furu papa nanga mama lobi taki nanga den pikin, fu den artikel di nen „Toeval of ontwerp?” di e kon na ini Ontwaakt! Sonwan e fruteri den pikin fu den na wan makriki fasi san skrifi na ini den artikel disi. Fu eksempre, wan trowpaar na Deinsikondre ben fruteri den pikin fu den fa plain meki. Den taki: „Wan plain gersi wan fowru. Ma yu denki taki wan plain man meki eksi noso taki a man meki pikin neleki wan fowru? Yu denki fowru abi wan opolani-presi fanowdu pe den musu frei saka? A babari di wan plain e meki, moi neleki te wan fowru e singi? Dus suma moro koni: A sma di meki a plain, noso a sma di meki den fowru?” Te yu e taki nanga yu pikin na a fasi disi èn yu e poti bun aksi, dan yu e yepi den fu gebroiki den „frustan” bun èn fu kon abi wan moro tranga bribi na ini Gado.​—Odo 2:10-12.

12. Fa yu kan gebroiki eksempre fu yepi yu pikin fu si taki na tru tori skrifi na ini Bijbel?

12 Bun eksempre kan yepi yu pikin tu fu kon si taki na tru tori skrifi na ini Bijbel. Luku san skrifi na Yob 26:7. (Leisi en.) Fa yu kan sori yu pikin taki san skrifi dya na den prakseri fu Yehovah? Na presi fu kari buweisi nomo, yu kan du wan sani nanga en fu yepi en fu go denki fu a tori. Fruteri a pikin taki Yob ben e libi langa ten fosi sma ben man frei go na tra planeiti noso fosi sabiman ben meki sani fu man si stari nanga planeiti. Sobun, na ini a ten fu en a ben o muilek gi sma fu bribi taki so wan hebi sani, leki a grontapu e anga na noti. Yu kan meki a pikin gebroiki wan bal noso wan ston fu sori taki wan hebi sani musu fu abi wan sani di e hori en fu a no fadon. Na so yu kan yepi en fu si taki na Yehovah meki sma skrifi den sani disi na ini Bijbel langa ten fosi sma kon si taki den tru.​—Neh. 9:6.

SORI DEN FU SAN EDE A BUN FU TEKI DEN RAI FU BIJBEL

13, 14. Fa papa nanga mama kan yepi den pikin fu si taki a bun fu teki den rai di Bijbel e gi?

13 A prenspari tu fu sori yu pikin fu san ede a bun fu teki den rai di Bijbel e gi wi. (Leisi Psalm 1:1-3.) Furu fasi de fa yu kan du dati. Fu eksempre yu kan taigi yu pikin: ’Kon meki wi taki dati yu e go libi na wan farawe presi èn yu kan tyari wan tu sma nomo go nanga yu. Yu wani taki ala sma di e go nanga yu musu man libi na ini freide nanga makandra. Sortu sma yu ben o teki fu go nanga yu?’ Baka dati yu kan gebroiki Galasiasma 5:19-23 fu sori den sortu sma Yehovah wani na ini a paradijs fu en.

14 Na eksempre disi kan leri yu pikin tu prenspari sani: (1) Den rai fu Yehovah e meki taki sma e libi na ini freide èn taki wánfasi de. (2) Nownow kaba Yehovah e leri wi san wi musu du fu kan libi na ini a nyun grontapu (Yes. 54:13; Yoh. 17:3). Yu kan gebroiki wan ondrofenitori na ini den tijdschrift fu wi fu yepi den frustan a tori disi. Kande yu kan gebroiki den artikel „Bijbel e kenki sma libi” di e kon na ini A Waktitoren. Efu yu abi wan sma na ini yu gemeente di ben musu kenki furu sani na ini en libi fu man dini Yehovah, dan yu kan kari en kon na yu oso fu fruteri a tori fu en. Den sortu ondrofenitori disi o meki yu pikin si taki Bijbel e gi sma bun rai.​—Hebr. 4:12.

15. San yu musu hori na prakseri te yu e gi yu pikin leri?

15 Hori disi na prakseri: Te yu e gi yu pikin  leri, dan luku san yu kan du fu a no soi gi den. Pruberi fu du sani di e meki en moro span gi den. Meki den go denki, ma no frigiti taki na pikin-nengre yu e gi leri. Prakseri sortu eksempre den o feni moi èn di o tranga a bribi fu den. Wan papa e taki: „Noiti yu musu kon weri fu suku nyun fasi fa yu kan taki fu wan tori di den sabi kaba.”

SORI BRIBI NANGA PASENSI ÈN ABI A GWENTI FU BEGI

16. Fu san ede a prenspari fu abi pasensi te wi e gi den pikin fu wi leri? Gi wan eksempre.

16 Wi abi a yeye fu Gado fanowdu fu kon abi wan tranga bribi (Gal. 5:22, 23). Neleki fa wan froktu abi ten fanowdu fu gro, na so a de tu nanga bribi. Dati meki yu musu leri fu abi pasensi èn fu no kon weri te yu e gi yu pikin leri. Wan papa fu Yapan di abi tu pikin e taki: „Mi nanga mi frow e sori furu lobi gi den pikin fu wi. Sensi di den ben yongu, mi studeri 15 miniti nanga den ibri dei, boiti te wi ben abi konmakandra. Den 15 miniti dati no ben hebi gi den èn a no ben furu gi wi tu.” Wan kring-opziener ben skrifi: „Di mi ben yongu, mi ben abi wan lo aksi èn mi ben bigin tweifri na furu sani. Ma mi kisi piki tapu furu fu den aksi disi na den konmakandra, na a Osofamiri Anbegi èn te mi ben e studeri nanga misrefi. Dati meki a prenspari taki papa nanga mama e tan gi den pikin fu den leri.”

Efu yu wani gi yu pikin bun leri, dan yu musu sorgu taki Gado Wortu de na ini yu ati (Luku paragraaf 17)

17. Fu san ede a prenspari taki papa nanga mama de wan bun eksempre èn fa wan trowpaar gi den meisje fu den wan moi eksempre?

17 Ma san yu no musu frigiti na taki yu pikin e luku na eksempre fu yu. Te den e si taki yu srefi abi bribi, dan den kan teki a bun eksempre fu yu. Dati meki yu leki papa noso mama musu tan meki muiti fu tranga yu bribi. Meki den pikin fu yu si taki Yehovah na wan trutru mati gi yu. Na dati wan trowpaar fu Bermuda du. Ibri leisi te den ben e broko den ede nanga wan sani, den ben e begi Yehovah makandra nanga den pikin fu den fu a yepi den èn den ben e aksi den pikin fu begi tu. Den e taki: „Wi e taigi a bigi meisje fu wi tu fu tan frutrow tapu Yehovah, fu tan du furu na ini a diniwroko èn fu no broko en ede tumusi. Te a e si fa sani waka, dan a sabi taki Yehovah yepi wi. Disi meki taki en bribi na ini Gado èn na ini Bijbel e kon moro tranga.”

18. Sortu prenspari sani papa nanga mama no musu frigiti?

18 Ma no frigiti taki te fu kaba, den pikin srefi o abi fu meki muiti fu kon abi wan tranga bribi. Yu leki papa noso mama, e prani èn yu e gi watra, ma na Gado wawan kan meki sani gro (1 Kor. 3:6). Sobun, begi en fu gi yu en yeye èn du muiti fu gi leri na den pikin fu yu di yu lobi so te. Te yu e du dati, dan yu o si fa Yehovah o blesi a muiti di yu e meki.​—Ef. 6:4.