Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2016

Den krosi fu yu e gi Gado glori?

Den krosi fu yu e gi Gado glori?

„Du ala sani fu gi Gado glori.”1 KOR. 10:31.

SINGI: 34, 61

1, 2. Fu san ede Yehovah Kotoigi feni en prenspari fu weri krosi di fiti? (Luku a prenki na a bigin fu na artikel.)

WAN koranti fu Bakrakondre ben skrifi fa kerki fesiman ben weri na wan konmakandra fu den. A koranti taki: „Fu di a weer ben faya, meki furu fu den ben weri leki den e go koiri. Ma Yehovah Kotoigi no ben weri so na a kongres fu den. . . . Den yongu boi nanga den mansma ben weri dyakti nanga das èn den koto nanga den yapon fu den meisje nanga den frow no ben syatu, ma toku den ben moi.” Iya, furu tron sma e prèise Yehovah Kotoigi fu a fasi fa den e weri. Den e si taki den e moi ’densrefi nanga krosi di fiti. Den e du dati na wan lespeki fasi èn nanga krin frustan, soleki fa a fiti sma di e taki dati den e anbegi Gado’ (1 Tim. 2:9, 10). Aladi na apostel Paulus ben taki fu umasma, a tekst disi e fiti tu gi Kresten man.

2 Wi leki a pipel fu Yehovah feni en prenspari fu weri krosi di fiti. A Gado di wi e dini feni en prenspari tu (Gen. 3:21). Den sani di Bijbel e taki fu krosi èn fu a fasi fa sma e moi densrefi, e sori krin taki a Moro Hei Tiriman wani taki sma di e anbegi en weri krosi di a feni bun. Dati meki te wi  musu bosroiti sortu krosi noso modo fiti gi wi, dan wi no o luku nomo san wi lobi, ma wi o luku tu san e plisi a Moro Hei Gado Yehovah.

3. Fa a Wet di Gado gi den Israelsma, e yepi wi fu sabi sortu krosi fiti fu weri?

3 A Wet di Gado gi den Israelsma ben musu kibri den gi a morsu fasi fa den tra pipel ben e libi. A Wet ben sori taki Yehovah no ben lobi te mansma ben e weri krosi fu umasma noso te umasma ben e weri krosi fu mansma, soleki fa a e pasa na ini a ten disi. (Leisi Deuteronomium 22:5.) A wet disi e sori krin taki Gado no lobi krosi di e meki mansma gersi umasma, noso umasma gersi mansma. A no lobi krosi tu pe yu no man si krin efu na wan man noso wan uma.

4. San kan yepi Kresten fu teki bun bosroiti te den musu luku sortu krosi den o weri?

4 Na ini Gado Wortu wi kan feni rai di e yepi Kresten fu sabi sortu krosi bun fu weri. Den rai dati e fiti awinsi pe den e libi, awinsi sortu kulturu den abi noso awinsi fa a weer de. Wi no abi wan lijst fanowdu pe skrifi finifini sortu sani bun fu weri èn sortuwan no bun. Na presi fu dati wi e luku san Bijbel e taki fu a tori disi, aladi a no e tapu wi fu weri san wi lobi. Meki wi luku wan tu Bijbel rai di kan yepi wi fu sabi san na „a wani fu Gado di bun, di e gi en prisiri, èn di no e mankeri noti”. Disi o yepi wi fu sabi san wi kan weri èn san wi no kan weri.Rom. 12:1, 2.

„WI E SORI TAKI WI NA DINARI FU GADO”

5, 6. Fa sma musu denki fu wi te den e luku den krosi fu wi?

5 Gado meki na apostel Paulus skrifi a prenspari rai na 2 Korentesma 6:4. (Leisi en.) Furu tron sma e si soso „san na ai e si”. Te den e luku a fasi fa wi e weri, dan den sabi kaba suma na wi (1 Sam. 16:7). Dati meki wi leki futuboi fu Gado musu denki bun san wi o weri. Wi no kan lon go weri iniwan sani di wi lobi noso di wi feni taki moro makriki gi wi. Den sani di Gado Wortu e leri wi musu yepi wi fu no weri krosi di span tumusi, di e sori furu fu wi skin, noso di sexy. Sobun, wi no kan weri krosi di e sori presi fu wi skin di tra sma no mag si. Nowan sma musu firi fruferi noso drai en fesi go na wan tra sei te a e si san wi weri.

6 Te wi krosi krin, te den e sidon bun èn te den no syabisyabi, dan sma o abi lespeki gi wi leki futuboi fu a Moro Hei Gado Yehovah. Èn kande den o wani kon sabi a Gado di wi e anbegi. Boiti dati, sma o taki bun fu na organisâsi fu wi. Disi kan meki taki den o wani arki a Bijbel boskopu di e gi libi.

7, 8. Spesrutu o ten a prenspari fu weri krosi di fiti?

7 Fu di wi lobi wi santa Gado, wi brada nanga sisa, nanga den sma na ini wi birti, meki wi e si en leki wan plekti fu weri krosi di fiti a boskopu di wi e preiki èn di e gi glori na Yehovah (Rom. 13:8-10). Disi prenspari spesrutu te wi e go na den konmakandra noso te wi de na ini a preikiwroko. Wi musu weri ’soleki fa a fiti sma di e taki dati den e anbegi Gado’ (1 Tim. 2:10). Son leisi wan krosi fiti fu weri na ini a wan kondre, ma a no fiti fu weri na ini wan tra kondre. Dati meki awinsi pe fu grontapu a pipel fu Yehovah e libi, den e hori den gwenti fu sma na prakseri so taki den no e hati sma firi.

Den krosi di yu e weri, o meki sma kisi lespeki gi a Gado di yu e dini? (Luku paragraaf 7, 8)

 8 Leisi 1 Korentesma 10:31. Te wi e go na den bigi konmakandra fu wi, wi musu weri krosi di fiti. Wi no musu weri leki grontapusma. Efu wi wani go koiri na a kaba fu wan kongres dei, wi musu luku tu fa wi e weri. Te wi krosi no syabisyabi èn wi no e weri leki wi de na oso, dan wi no abi fu syen fu taigi sma taki wi na Yehovah Kotoigi. Èn te wan okasi de, wi o man preiki fri tu.

9, 10. Fu san ede wi musu hori Filipisma 2:4 na prakseri te wi e luku san wi wani weri?

9 Leisi Filipisma 2:4. Fu san ede wi musu hori na prakseri fa wi Kresten brada nanga sisa o firi te den e luku den krosi fu wi? Wán sani na taki Gado pipel e pruberi fu teki a rai disi fu Bijbel: ’Kiri den difrenti pisi fu un skin di kan meki taki unu kisi fu du nanga hurudu, wan libi di no krin, nanga sekslostu’ (Kol. 3:2, 5). A kan taki brada nanga sisa di ben libi wan huru libi fosi, e feti ete nanga den sondu firi fu den (1 Kor. 6:9, 10). Yu ben o wani meki en moro hebi gi den brada nanga sisa disi?

10 Te wi de nanga wi brada nanga sisa, dan wi musu weri krosi di fiti so taki a gemeente kan tan krin. Wi musu du disi, awinsi wi de na den konmakandra fu wi noso na wan tra presi. Aladi wi srefi e teki a bosroiti fu luku san wi o weri, toku wi alamala abi a frantwortu fu weri krosi di o meki en moro makriki gi trawan fu libi wan krin libi èn fu de santa na ini den denki, na ini san den e taki èn e du (1 Petr. 1:15, 16). Tru lobi  „no e tyari ensrefi na wan fasi di no fiti, a no e suku en eigi bun”.1 Kor. 13:4, 5.

WERI BUN KROSI, AWINSI PE YU DE NOSO AWINSI FA A WEER DE

11, 12. San wi musu hori na prakseri te wi o luku san wi o weri?

11 Te futuboi fu Gado e luku san den o weri, dan den e hori na prakseri taki wan ten de „gi ala afersi di de èn gi ala wroko” (Preik. 3:1, 17). Wi kan frustan taki fu di a weer no de a srefi na ini ala kondre, meki a fasi fa sma e weri krosi e difrenti. Boiti dati, difrenti situwâsi kan bepaal tu san wan sma e weri. Ma awinsi fa a no fa, den rai fu Yehovah no e kenki. Ala ten den e tan a srefi.Mal. 3:6.

12 Na ini kondre pe a weer faya, a no makriki fu feni krosi di fiti gi wan Kresten èn di o meki taki sma e sori lespeki gi wi. Dati meki wi brada nanga sisa e warderi en te wi e meki muiti fu no weri krosi di span tumusi noso di e sori furu fu wi skin (Yob 31:1). Te wi e go swen, wi musu luku tu taki wi e weri swenkrosi di fiti (Odo 11:2, 20). Awinsi grontapusma e weri swenkrosi di e sori furu fu den skin, toku wi leki futuboi fu Yehovah musu du sani di e gi grani na wi santa Gado fu di wi lobi en.

13. Fu san ede a rai na 1 Korentesma 10:32, 33 o yepi wi fu sabi sortu krosi wi o weri?

13 Ete wan sani de di wi musu hori na prakseri te wi o luku sortu krosi fiti fu weri. Dati na a konsensi fu tra sma, awinsi den e dini Gado noso den no e dini en. (Leisi 1 Korentesma 10:32, 33.) Wi e si en leki wan seryusu sani fu no weri krosi di kan meki tra sma firi fruferi. Na apostel Paulus ben skrifi: „Meki ibriwan fu wi plisi tra sma nanga bun sani di e gi den deki-ati.” Paulus e taki fu san ede wi musu du dati. A e taki: „Bika srefi Krestes no ben plisi ensrefi” (Rom. 15:2, 3). Iya, Yesus no ben luku nomo san en lobi, ma a ben feni en prenspari fu yepi tra sma èn fu du san Gado wani. Sobun, awinsi wi lobi wan modo, wi musu luku bun taki wi no e weri krosi di kan tapu sma fu arki a boskopu fu wi.

14. Fa papa nanga mama kan leri den pikin fu den fu weri krosi di e gi Gado grani?

14 Na a frantwortu fu Kresten papa nanga mama fu leri den pikin fu den fu du san Bijbel e taki. Sobun, den musu sorgu taki den nanga den pikin fu den e weri krosi di fiti èn di e prisiri na ati fu Gado (Odo 22:6; 27:11). Te papa nanga mama de wan bun eksempre èn den e gi den pikin fu den bun rai na wan switi fasi, dan den e yepi den pikin fu sori lespeki gi a santa Gado fu wi. A bun te papa nanga mama e leri pikin pe den kan feni bun krosi èn san den musu luku te den e go bai krosi. Den musu sabi taki den no kan weri krosi nomo di den lobi, ma taki den musu weri krosi di o gi grani na Yehovah, a Gado di den e dini.

SORI TAKI YU KONI, AWINSI YU KAN TEKI YU EIGI BOSROITI

15. San wi musu hori na prakseri, awinsi wi mag weri san wi lobi?

15 Gado Wortu e gi bun rai di kan yepi wi fu teki koni bosroiti di o gi Yehovah grani. Toku te a abi fu du nanga krosi, wi kan weri san wi lobi. A no ala sma lobi a srefi modo noso abi a moni fu bai ala krosi di den wani, ma toku den krosi  fu wi musu de krin ala ten, den musu fiti awinsi pe wi e go èn awinsi pe wi e libi.

16. Fu san ede a bun fu meki muiti fu feni krosi di fiti?

16 A tru taki a no ala ten a makriki fu feni bun krosi di fiti gi wan Kresten. Furu wenkri e seri krosi di de na modo èn dati meki a o teki moro ten nanga muiti fu feni wan koto, yapon, bloes, empi noso bruku di no span tumusi. Ma te brada nanga sisa e si taki wi meki muiti fu feni krosi di fiti èn di moi, dan den o warderi dati tu. Èn awinsi wi musu meki furu muiti fu feni bun krosi, wi o prisiri srefisrefi fu di wi sabi taki wi e weri krosi di e gi glori na wi lobi-ati hemel Tata.

17. Sortu situwâsi kan bepaal efu wan brada mag abi wan barba?

17 Ma fa a de nanga brada di abi wan barba? A Wet di Gado gi den Israelsma ben taki dati mansma ben mag kweki wan barba. Ma Kresten no abi fu hori a Wet disi (Lef. 19:27; 21:5; Gal. 3:24, 25). Na ini son kulturu, mansma mag abi wan barba solanga a koti netjes èn a no e tapu sma fu arki a Kownukondre boskopu. Fu taki en leti, son brada di e libi na ini den kondre dati èn di abi frantwortu, abi wan barba. Ma awinsi dati de so, toku tra brada e teki a bosroiti fu no kweki wan barba (1 Kor. 8:9, 13; 10:32). Na ini tra kulturu noso kondre, a no de a gwenti taki mansma e kweki barba èn dati meki a no fiti taki Kresten brada abi wan. Te wan brada di e libi na ini den sortu kondre disi abi wan barba, dan dati kan tapu en srefi fu gi Gado glori èn sma kan feni srefi taki a e du wan sani di no bun.Rom. 15:1-3; 1 Tim. 3:2, 7.

18, 19. Fa Mika 6:8 kan yepi wi fu feni krosi di e plisi Gado?

18 Wi breiti taki Yehovah no gi wi wan lo lijst pe skrifi finifini sortu krosi fiti fu weri èn sortu modo wi musu lobi. Na presi fu dati, a e gi wi na okasi fu teki wi eigi bosroiti èn fu weri sani di wi lobi, solanga wi e du san Bijbel e taki. Sobun, srefi den krosi di wi e weri èn a fasi fa wi e moi wisrefi, kan sori taki wi abi sakafasi èn taki wi e waka nanga wi Gado.Mika 6:8.

19 Te wi abi sakafasi, dan wi o frustan taki den rai fu Yehovah na den moro bunwan fu di a de wan Gado di krin èn di santa. Dati meki wi o luku efu den sani di wi e du, e kruderi nanga den sani di a e aksi fu wi. Sakafasi o meki tu taki wi e hori a firi fu trawan na prakseri èn taki wi e lespeki a fasi fa den e si sani. Sobun, meki wi tan ’abi sakafasi aladi wi e waka nanga Gado’. Meki wi teki den bun rai di a e gi wi èn meki wi sori lespeki gi den firi fu trawan.

20. San sma musu man si krin te den e luku den krosi di wi e weri èn a fasi fa wi e moi wisrefi?

20 Den krosi di wi e weri, musu sori sma krin taki wi na anbegiman fu Yehovah. Wi brada nanga sisa, nanga tra sma musu man si taki wi e dini wan Gado di e du san reti. A Gado disi abi den moro bun wet èn wi e prisiri fu hori den wet disi. Wi breiti nanga den brada nanga sisa di e weri krosi di fiti èn di e tyari densrefi na wan bun fasi. Disi e meki taki furu reti-ati sma e arki a boskopu fu Bijbel di e gi sma libi èn Yehovah e kisi glori èn a e prisiri. Sobun, te wi e luku san wi o weri èn wi e teki koni bosroiti, dan wi o tan gi grani na a Gado di e weri „glori nanga grani” leki wan krosi na en skin.Ps. 104:1, 2.