„Wán sma nomo na un Fesiman, dati na Krestes.”​—MAT. 23:10.

SINGI: 16, 14

1, 2. Sortu bigi frantwortu Yosua kisi baka di Moses dede?

YEHOVAH ben taigi Yosua: „Mi futuboi Moses dede. Sobun, sreka yusrefi. Abra a Yordan-liba disi makandra nanga a heri pipel èn go na ini a kondre di mi o gi den” (Yos. 1:1, 2). Dati ben de wan bigi kenki gi Yosua, di ben de a dinari fu Moses sowan 40 yari langa!

2 Fu di Moses ben de fesiman fu Israel so langa kaba, meki Yosua ben kan aksi ensrefi fa a pipel ben o feni en te en ben o tron den fesiman (Deut. 34:8, 10-12). Wan buku di e fruklari Bijbel, taki disi fu Yosua 1:1, 2: „Na ini owruten, ma sosrefi na ini a ten disi, wan fu den moro ogri èn muilek pisi ten gi wan kondre, na te den o kisi wan nyun tiriman.”

3, 4. Fa Gado blesi Yosua fu di a ben e frutrow na en tapu, èn san wi kan aksi wisrefi?

3 Wi kan frustan taki Yosua ben e frede. Ma a ben e frutrow na tapu Yehovah èn sondro fu draidrai a gi yesi na den rai fu en (Yos. 1:9-11). Yehovah blesi Yosua fu di a ben frutrow na en tapu. A meki wan engel tiri Yosua nanga den Israelsma. A sori leki na engel disi ben de a fosi Manpikin fu Gado di Bijbel e kari a Wortu.​—Eks. 23:20-23; Yoh. 1:1.

 4 Yehovah meki en makelek gi a pipel Israel fu teki Yosua leki den nyun fesiman, baka di Moses dede. Na ini a ten disi furu sani e kenki tu na ini na organisâsi fu Yehovah. Kande wi e aksi wisrefi: ’Fu san ede wi kan frutrow na tapu Yesus, wi Fesiman?’ (Leisi Mateyus 23:10.) Fu kan piki na aksi disi wi o luku fa Yehovah tiri en pipel na ini a ten di pasa te sani ben e kenki.

FA GADO TYARI EN PIPEL GO NA INI A PRAMISI KONDRE?

5. San pasa di Yosua ben de krosibei fu Yerikow? (Luku a prenki na a bigin fu na artikel.)

5 Syatu baka di den Israelsma abra Yordan-liba, wan sani pasa di Yosua no ben fruwakti. Di a ben e kon moro krosibei fu Yerikow, a si wan man e tanapu nanga wan feti-owru na ini en anu. Fu di Yosua no ben sabi suma na a man disi, meki a aksi: „Yu e horibaka gi wi, noso gi den feanti fu wi?” Yosua ben musu fu fruwondru di a man taigi en taki en na a „edeman fu a legre fu Yehovah”. A man disi ben de wan engel di ben o feti gi a pipel fu Gado. (Leisi Yosua 5:13-15.) Na ini tra tekst wi e leisi taki na Yehovah ben e taki nanga Yosua. Ma a musu de so taki Yehovah ben gebroiki wan engel fu taki nanga Yosua, neleki fa a ben gwenti du na tra okasi.​—Eks. 3:2-4; Yos. 4:1, 15; 5:2, 9; Tori 7:38; Gal. 3:19.

6-8. (a) Fu san ede son sma ben kan denki taki a rai fu na engel no ben o wroko? (b) Fu san ede wi sabi taki a rai di Gado ben gi den Israelsma ben bun èn taki den kisi en na a yoisti ten? (Luku sosrefi a futuwortu.)

6 Na engel taigi Yosua soifri san a ben musu du fu kan wini Yerikow. Na ini a bigin, a ben kan gersi leki den rai di na engel gi no ben bun. Fu eksempre, na engel taigi Yosua fu besnèi ala den mansma. Disi wani taki dati wan tu dei langa den no ben o man feti. A ben de wan koni sani fu besnèi den man na a ten dati?​—Gen. 34:24, 25; Yos. 5:2, 8.

7 Kande den srudati ben e aksi densrefi fa den ben o man kibri den osofamiri efu feanti ben o kon feti nanga a pipel. Ma den kisi wan boskopu di den no ben fruwakti! Na presi taki den sma fu Yerikow kon feti nanga den, den yere taki den „ben tapu ala den portu fu a foto, fu di den ben frede den Israelsma” (Yos. 6:1). A no de fu taki dati a nyunsu disi meki taki den Israelsma ben e frutrow moro na tapu den rai di Gado ben e gi den!

8 Den Israelsma ben kisi a rai tu fu no go feti nanga Yerikow. Den ben musu waka lontu a foto wán leisi wan dei, siksi dei langa. Ma na tapu a di fu seibi dei den ben musu waka lontu a foto seibi leisi. A kan taki sonwan fu den srudati ben denki: ’A sani disi na lasi ten. Somaar wi o go weri unsrefi!’ Ma Yehovah, a Fesiman di den no ben man si ben sabi heri bun san a ben e du! Di den Israelsma gi yesi na den rai fu en, den ben man teki Yerikow abra sondro fu feti. A sani disi tranga den bribi fu di den si taki a rai di Yehovah gi den ben bun.​—Yos. 6:2-5; Hebr. 11:30. *

9. Fu san ede wi musu gi yesi na den rai di wi e kisi fu na organisâsi fu Gado? Gi wan eksempre.

9 San wi kan leri fu a tori disi? Son leisi na organisâsi fu Yehovah kan bosroiti fu du sani tra fasi, èn a kan taki wi no e frustan fu san ede. Fu eksempre, kande wi no ben feni en wan koni sani fu bigin gebroiki wi cellulair noso tablet na ini a preikiwroko, na den  konmakandra èn fu studeri. Ma now wi e si fu san ede a bun fu gebroiki den sani disi efu wi man. Te wi e si den wini di den sortu kenki disi e tyari kon, dan wi bribi o kon moro tranga èn wi o si taki wi de wán nanga wi brada nanga sisa na heri grontapu.

FA KRESTES BEN TIRI A KRESTEN GEMEENTE NA INI A TEN FU DEN APOSTEL?

10. Di sma ben feni taki Kresten ben musu besnèi, dan suma ben sorgu taki a tiri skin na ini Yerusalem luku a tori?

10 Sowan 13 yari baka di Kornelius tron wan Kresten, son Dyu di ben tron Kresten ben feni ete taki anbegiman fu Yehovah musu besnèi (Tori 15:1, 2). Di den brada na ini Antiokia bigin haritaki fu a tori disi, den seti sani fu seni Paulus go na a tiri skin na ini Yerusalem fu aksi den san den musu du. Ma suma ben wani taki na so sani ben musu waka? Paulus taki: „Mi go fu di Masra sori mi taki mi musu go.” A de krin taki na Krestes ben meki sani waka na so wan fasi, taki a tiri skin ben kan teki wan bosroiti.​—Gal. 2:1-3.

A de krin taki Krestes ben e tiri a Kresten gemeente na ini a ten fu den apostel (Luku paragraaf 10, 11)

11. (a) San son Dyu di ben tron Kresten ben e bribi ete? (b) Fa Paulus sori taki a ben de klariklari fu horibaka gi den owruman na ini Yerusalem? (Luku sosrefi a futuwortu.)

11 Krestes meki a tiri skin kon frustan taki Kresten no abi fu besnèi (Tori 15:19, 20). Ma wan tu yari baka dati, furu Dyu di ben tron Kresten ben e tan besnèi den pikin fu den. Di den owruman na ini Yerusalem yere taki sma ben e fruteri taki Paulus no e lespeki a Wet fu Moses, den aksi en fu du wan sani di ben o sori sma taki a e lespeki a Wet (Tori 21:20-26). * Den taigi en fu teki fo man tyari go na a tempel fu krin densrefi, so taki sma ben kan si taki Paulus e „gi yesi na a Wèt”. Paulus ben kan taki: ’Mi no e frustan fu san ede den aksi mi fu du a sani disi? Na den Dyu di tron Kresten abi wan problema. Na den no e frustan taki wan Kresten no abi fu besnèi.’ Ma Paulus ben frustan taki den owruman ben wani taki wánfasi musu de na mindri ala Kresten. Dati meki a sori sakafasi èn a du san den  taki. Toku wi kan aksi wisrefi: ’Fu san ede Yesus gi pasi taki sma tan haritaki fu a tori disi so langa, aladi a Wet fu Moses no ben teri moro baka a dede fu Krestes?’​—Kol. 2:13, 14.

12. San ben kan de wan reide fu san ede Krestes hori pasensi nanga den sma di ben feni ete taki sma ben musu besnèi?

12 A kan teki ten gi son sma fu frustan fu san ede wan kenki de fanowdu. Son Dyu di ben tron Kresten ben abi ten fanowdu ete fu frustan taki den no ben abi fu hori densrefi moro na a Wet fu Moses (Yoh. 16:12). Den ben denki taki te wan sma besnèi, dan dati ben sori taki en na wan trutru anbegiman fu Gado (Gen. 17:9-12). Trawan ben frede taki den tra Dyu ben o frufolgu den efu den ben o pruberi fu de tra fasi (Gal. 6:12). Ma bakaten Krestes yepi den fu frustan sani moro krin nanga yepi fu den brifi fu Paulus.​—Rom. 2:28, 29; Gal. 3:23-25.

KRESTES E TIRI A GEMEENTE ETE

13. San kan yepi wi fu saka wisrefi ondro a tiri fu Krestes, awinsi wi no e frustan fu san ede son kenki e kon?

13 Te wi no e frustan fu san ede son kenki e kon na ini na organisâsi, dan a bun fu prakseri fa Krestes tiri a pipel fu Yehovah na ini a ten di pasa. Ala ten Krestes gi a pipel fu Gado koni rai fu kibri den, fu tranga den bribi èn fu yepi den fu tan abi wánfasi. A du dati na ini a ten fu Yosua èn na ini a ten fu den apostel.​—Hebr. 13:8.

14-16. Fa den rai di wi e kisi fu „a koni srafu di de fu frutrow” e sori taki Krestes wani yepi wi fu tan abi wan tranga bribi?

14 Na ini a ten disi „a koni srafu di de fu frutrow” e gi wi koni rai na a yoisti ten (Mat. 24:45). Marc, wan papa di abi fo pikin, e taki: „Satan e pruberi fu swaki a bribi fu den osofamiri, fu di a wani pori den gemeente. Ma now wi kisi a deki-ati fu hori na Osofamiri Anbegi ala wiki. Sobun, osofamiri edeman musu frustan krin san den musu du. Den musu tranga a bribi fu den osofamiri!”

15 Te wi e si fa Krestes e tiri wi, dan wi o frustan taki a wani yepi wi fu tan abi wan tranga bribi. Wan owruman di nen Patrick taki: „Di wi bigin hori preikiwroko konmakandra na ini pikin grupu, dan na ini a bigin, a no ben switi gi son sma.” Ma Patrick taki dati a kenki disi e sori taki Yesus e broko en ede nanga ibri sma na ini a gemeente. Fu eksempre, son brada nanga sisa di e syensyen noso di no ben e go furu na ini a preikiwroko, e firi now taki den prenspari gi a gemeente. Disi e gi den deki-ati fu du moro na ini a preikiwroko.

16 Krestes e yepi wi tu fu tan poti prakseri na a preikiwroko fu di dati na a moro prenspari wroko di e du na grontapu na ini a ten disi. (Leisi Markus 13:10.) André, di tron owruman no so langa pasa e pruberi fu wroko ala ten nanga iniwan nyun rai di e kon fu na organisâsi fu Gado. A e taki: „Na ini a ten di pasa den brada bosroiti fu no gebroiki so furu sma moro fu du a wroko na den bijkantoro. Disi e memre wi taki a ten syatu èn taki wi musu poti moro prakseri na a preikiwroko.”

FA WI KAN TEKI A TIRI FU KRESTES?

17, 18. Fu san ede a bun fu prakseri sortu wini wi e kisi fu den kenki di kon na ini na organisâsi?

17 Den rai di wi e kisi fu wi Kownu Yesus Krestes e yepi wi now èn den o yepi wi na ini a ten di e kon. Fu dati ede, pruberi fu si sortu wini yu kisi fu di yu horibaka gi den kenki di kon no so langa pasa. Te yu e hori na Osofamiri Anbegi, dan yu kan taki fa yu osofamiri kisi wini di den brada kenki a fasi fa wi e hori den konmakandra èn a fasi fa wi e du a preikiwroko.

Yu e yepi yu osofamiri nanga tra sma fu horibaka gi den kenki di Yehovah en organisâsi e tyari kon? (Luku paragraaf 17, 18)

18 Efu wi e hori na prakseri taki a e tyari  furu wini kon te wi e gi yesi na den rai fu Yehovah en organisâsi, dan a o moro makriki gi wi fu teki den rai dati èn wi o de koloku. Fu eksempre, wi breiti taki den brada no abi fu gebroiki so furu moni moro fu druk buku fu di furu sma e wroko nanga den cellulair èn nanga den tablet. Disi e yepi na organisâsi fu preiki a bun nyunsu gi moro sma. Te wi e hori disi na prakseri, dan wi o wani wroko moro nanga den buku nanga den felem fu wi di de tapu wi website nanga den app fu wi. Na a fasi disi wi e horibaka gi Krestes di wani taki wi e gebroiki a moni fu na organisâsi na wan koni fasi.

19. Fu san ede wi musu gi yesi na den rai fu Krestes?

19 Te wi e gi yesi na den rai fu Krestes, dan wi e yepi wi brada nanga sisa fu kon abi wan moro tranga bribi èn fu abi wánfasi. Luku san André taki fu den sma di ben musu gowe fu Betel baka di wan tu kenki kon: „Di mi si fa den brada nanga sisa di ben wroko fosi na Betel horibaka gi den kenki disi, dan mi kisi moro frutrow na ini Krestes. Mi kon abi furu lespeki tu gi den brada nanga sisa disi fu di den e go pe a wagi fu Yehovah e go èn den e prisiri nanga iniwan wroko di den kan du gi Yehovah.”

ABI BRIBI ÈN FRUTROW NA TAPU WI FESIMAN

20, 21. (a) Fu san ede wi kan frutrow na tapu Krestes, wi Fesiman? (b) Sortu aksi wi o luku na ini a tra artikel?

20 Heri esi wi Fesiman, Yesus Krestes, o „wini” ala den feanti fu en èn a ’o du sani di o meki sma kisi bigi lespeki gi en’ (Openb. 6:2; Ps. 45:4). Ma nownow kaba a e sreka wi gi a nyun grontapu èn gi a wroko di wi o du drape. Wi o abi fu gi leri na den sma di kisi wan opobaka èn wi o abi fu meki grontapu tron wan paradijs.

21 Awinsi sortu kenki e kon, solanga wi e frutrow na tapu wi Fesiman nanga wi Kownu, a o yepi wi fu doro na ini a nyun grontapu. (Leisi Psalm 46:1-3.) Son leisi a kan muilek gi wi fu horibaka gi son kenki, spesrutu te den abi krakti na tapu wi eigi libi. Te dati pasa, dan san kan yepi wi fu abi wan korostu firi èn wan tranga bribi na ini Yehovah? Wi o taki fu a tori disi na ini a tra artikel.

^ paragraaf 8 Na ini den brokopresi fu Yerikow, sabiman feni maksin nanga bun furu aleisi di den sma fu Yerikow ben koti, ma di den no nyan. Disi e sori taki den Israelsma no lontu a foto fu wan langa pisi ten. Den Israelsma teki a foto abra na a yoisti ten fu di a ben de kotiten èn furu nyanyan ben de na den gron. Sobun, aladi den no ben mag teki noti fu a foto, toku den ben o abi nofo nyanyan.​—Yos. 5:10-12.

^ paragraaf 11 Luku a faki „Wan tesi di Paulus ben pasa nanga sakafasi” na ini A Waktitoren fu 15 maart 2003, blz. 24.