Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2017

Yosef fu Arimateya e sori deki-ati

Yosef fu Arimateya e sori deki-ati

YOSEF FU ARIMATEYA no ben sabi srefisrefi pe a ben feni a deki-ati fu go na Pontius Pilatus, wan granman fu Rome. Sma ben sabi a man dati leki wan tranga-ede man. Ma efu den ben wani beri Yesus na wan lespeki fasi, dan wan sma ben o abi fu aksi Pilatus fu gi den a dedeskin. Soleki fa a sori, dan sani no waka so muilek leki fa Yosef ben denki. Baka di wan legre-edeman taigi Pilatus taki Yesus dede, dan Pilatus gi Yosef primisi fu teki a dedeskin. Yosef ben e sari ete, ma a hasti ensrefi go na a presi pe den ben kiri Yesus.​—Mark. 15:42-45.

  • Suma na Yosef fu Arimateya?

  • Suma a ben de fu Yesus?

  • San yu kan leri fu a tori fu en?

 WAN MEMRE FU A SANHEDRIN

Na Evangelietori fu Markus e kari Yosef „wan lespeki memre fu a Grankrutu”. Fu taki en leti, a Grankrutu na a srefi leki a Sanhedrin. A Grankrutu disi ben abi furu makti na ini a libimakandra, na ini a tirimakti, èn na ini na anbegi fu den Dyu (Mark. 15:1, 43). Sobun, Yosef ben de wan fu den fesiman fu a pipel fu en. Dati meki wi kan frustan fu san ede a ben kisi primisi fu go taki nanga Pilatus, wan granman fu Rome. A no e fruwondru wi taki Yosef ben gudu tu.​—Mat. 27:57.

Yu abi a deki-ati fu meki sma kon sabi taki Yesus na yu Kownu?

Leki grupu, a Sanhedrin ben du ogri nanga Yesus. Den memre fu a grupu disi ben du wan lo kruktudu soso fu man kiri Yesus. Ma Bijbel e taki dati Yosef ben de „wan bun sma di lobi retidu” (Luk. 23:50). Tra fasi leki furu fu den tra memre fu a Sanhedrin, a no ben e bedrigi sma, a ben e libi wan krin libi, èn a ben e du ala san a man fu hori ensrefi na den wet fu Gado. A ben e „fruwakti a Kownukondre fu Gado” tu, èn kande na fu dati ede a tron wan disipel fu Yesus (Mark. 15:43; Mat. 27:57). A ben musu de so taki a boskopu fu Yesus ben hari en fu di a ben lobi retidu.

SMA NO BEN SABI TAKI A BEN DE WAN DISIPEL

Yohanes 19:38 e taki dati Yosef „ben de wan disipel fu Yesus, ma a no ben meki sma sabi taki a ben de wan disipel, fu di a ben frede den Dyu”. Fu san ede Yosef ben e frede? A ben sabi taki den Dyu no ben lobi Yesus èn efu wan sma ben poti bribi na ini en, dan den ben de nomonomo fu puru a sma dati na ini a snoga (Yoh. 7:45-49; 9:22). Te den Dyu ben puru wan sma na ini a snoga, dan den ben e spotu a sma dati, den no ben e bumui moro nanga en, èn den ben e wisiwasi en. Dati meki Yosef ben e frede fu taigi sma taki a ben e bribi na ini Yesus. Efu a ben o du dati, dan a ben o lasi a posisi nanga a bun nen di a ben abi na ini a libimakandra.

A no Yosef wawan ben de na ini a muilek situwâsi disi. Soleki fa Yohanes 12:42 e sori, dan „furu heihei man srefi ben e bribi trutru na ini Krestes, ma fu den Fariseiman ede meki den no ben wani taki disi krin. Den ben frede taki den ben o yagi den puru na ini a snoga.” Wan tra sma di ben de na ini a srefi sortu situwâsi disi, na Nikodeimus. A ben de wan memre fu a Sanhedrin tu.​—Yoh. 3:1-10; 7:50-52.

Tra fasi leki Nikodeimus, Yosef ben de wan disipel, ma a ben frede fu meki sma kon sabi dati. A sani disi ben de wan seryusu problema, spesrutu te yu e prakseri a sani disi di Yesus ben taki: „Efu wan sma e taigi trawan taki mi nanga en na wán, dan mi o taigi mi Tata na hemel taki mi nanga a sma dati na wán. Ma efu wan sma e taigi trawan taki a no sabi mi, dan mi o taigi mi Tata na hemel tu taki mi no sabi a sma dati” (Mat. 10:32, 33). Yosef no ben taki dati a no ben sabi Yesus, ma a no ben abi a deki-ati tu fu taki dati a ben de wan disipel fu en. Fa a de nanga yu?

Wan bun sani di Bijbel e taki fu Yosef, na taki a no ben feni en bun taki a Sanhedrin  ben meki mofo fu kiri Yesus (Luk. 23:51). Soleki fa son sma e denki, dan a kan taki Yosef no ben de na a krutu fu Yesus. Awansi fa a no fa, Yosef ben musu fu firi sari fu si sortu ogri den man ben wani du, ma a no ben man tapu pasi gi dati!

A NO E FREDE MORO

Na a ten fu a dede fu Yesus, a de krin taki Yosef no ben e frede moro èn a bosroiti fu horibaka gi den bakaman fu Yesus. Markus 15:43 e taki fu a tori dati: „Yosef fu Arimateya teki deki-ati fu go aksi Pilatus a dedeskin fu Yesus.”

A gersi leki Yosef ben de drape di den kiri Yesus. Na so a du kon taki a ben sabi fosi Pilatus taki Yesus dede. Dati meki di Yosef go aksi fu kisi a dedeskin, dan a granman „ben wani sabi efu Yesus dede kaba” (Mark. 15:44). Efu Yosef ben si fa Yesus ben pina na a pinapostu, dan kande a sani dati ben abi krakti tapu a konsensi fu en. Kande na dati gi en deki-ati fu meki ala sma kon sabi taki a ben de wan disipel fu Yesus. Awansi fa a no fa, Yosef ben o du wan sani now. A no ben o kibri en moro gi sma taki a ben de wan disipel.

YOSEF E BERI YESUS

A wet fu den Dyu ben taki dati sma di ben kisi dedestrafu ben musu beri fosi sondongo (Deut. 21:22, 23). Ma den Romesma no ben e broko den ede srefisrefi nanga a tori dati. Te wan ogriman ben kisi dedestrafu, dan den ben e libi a dedeskin na a postu meki a pori, noso den ben e trowe en na ini wan grebi pe den ben trowe furu dedeskin kaba. Ma Yosef no ben wani taki a sani disi pasa nanga Yesus. Krosibei fu a presi pe den ben kiri Yesus, Yosef ben abi  wan nyun grebi-olo di ben koti na ini wan stonbergi. Sma no ben beri ete na ini a grebi disi. Kande dati ben kon fu di Yosef ben froisi komoto fu Arimateya * kon na Yerusalem no so langa ete, èn kande a ben o gebroiki a grebi disi fu beri famiriman fu en te dati ben de fanowdu (Luk. 23:53; Yoh. 19:41). A ben de wan moi sani taki Yosef ben wani gebroiki en eigi grebi fu beri Yesus. A sani disi di a du meki taki a profeititori kon tru di e taki dati a Mesias ben o beri „pe den e beri guduman”.​—Yes. 53:5, 8, 9.

Wan sani de di prenspari moro gi yu leki a matifasi di yu abi nanga Yehovah?

Ala den fo Evangelietori e skrifi taki baka di den puru a dedeskin fu Yesus na a pinapostu, dan Yosef domru en na ini fini linnen èn a poti en na ini en eigi grebi-olo (Mat. 27:59-61; Mark. 15:46, 47; Luk. 23:53, 55; Yoh. 19:38-40). A wan-enkri sma di Bijbel e taki krin taki a yepi Yosef, na Nikodeimus di ben tyari spesrei fu sreka a dedeskin. Te wi e luku taki den tu man disi ben de prenspari man, dan a no gersi leki na den wawan puru a dedeskin. A musu de so taki den meki futuboi fu den tyari a dedeskin gowe fu beri en. Awansi fa a no fa, a no wan pikin wroko den man disi du. Iniwan sma di ben e fasi wan dedeskin no ben de krin seibi dei langa, èn iniwan sani di a ben fasi no ben o krin tu (Num. 19:11; Hag. 2:13). A sani dati ben o meki taki den ben o abi fu hori densrefi aparti fu tra sma na ini a wiki fu a Paskafesa èn den no ben o mag teki prati na den seremonia nanga den fesa di sma ben e hori na a ten dati (Num. 9:6). Di Yosef seti sani gi a beri fu Yesus, dan den memre fu a Sanhedrin ben kan atibron tu nanga en. Ma Yosef no ben e broko en ede nanga den sani dati srefisrefi. Awansi san ben o pasa, a ben wani beri Yesus na wan lespeki fasi èn a no ben frede moro fu meki sma kon sabi taki a ben de wan disipel fu Krestes.

A KABA FU A TORI FU YOSEF

Boiti den Evangelietori di e taki fu a beri fu Yesus, Bijbel no e taki moro fu Yosef fu Arimateya. Dati meki wi kan aksi wisrefi: Fa sani waka moro fara nanga en? We, wi no sabi. Te wi e luku den sani di wi sabi fu en, dan a kan taki a meki ala sma kon sabi taki en na wan Kresten. Bika di a situwâsi ben e kon moro muilek gi en a no ben frede moro, ma a ben e sori moro deki-ati. Dati na wan bun sani.

Te wi e luku a tori disi, dan a bun te wi e aksi wisrefi den prenspari sani disi: A de so taki a wroko fu mi, den gudu di mi abi, mi famiri, noso a fri libi fu mi prenspari moro gi mi leki a matifasi di mi abi nanga Yehovah?

^ paragraaf 18 A kan taki Arimateya na a srefi leki Rama, a presi di sma sabi now leki Rentis (Rantis). Na drape a profeiti Samuel ben gebore, èn a ben de sowan 35 kilometer na a noordwest-sei fu Yerusalem.​—1 Sam. 1:19, 20.