Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2017

 ONDROFENITORI

Wi o kisi blesi te wi e du san Yehovah wani

Wi o kisi blesi te wi e du san Yehovah wani

„Wi o du en!” Na dati mi nanga mi masra, èn mi brada nanga en wefi taki di den brada aksi wi fu teki wan frantwortu na wi tapu. Fu san ede wi ben de klariklari fu du a wroko dati èn fa Yehovah blesi wi? Ma meki mi fruteri unu moro fu misrefi.

MI GEBORE na ini 1923 na ini Hemsworth, wan foto na ini Yorkshire, Ingrisikondre. Mi ben abi wan bigi brada di nen Bob. Di mi ben abi neigi yari, mi papa di no ben lobi a hoigrifasi fu den kerki, kisi wan tu buku di ben tyari kon na krin san na den falsi leri fu den kerki. A ben lobi den sani di a ben leisi. Wan tu yari baka dati Bob Atkinson kon na wi oso èn a prei wan gramofon-plaat nanga wan lezing fu Brada Rutherford. Wi frustan wantewante taki a ben de fu a srefi grupu di ben skrifi den buku di wi ben kisi. Mi papa nanga mama aksi Brada Atkinson fu kon nyan na wi oso ibri neti, so taki a ben kan piki den someni aksi di wi ben abi. A kari wi fu go na den konmakandra di ben hori na a oso fu wan brada di ben libi wan tu kilometer moro fara. Wi no draidrai fu du dati èn na so wan pikin gemeente seti na ini Hemsworth. Fosi yu denki brada di ben e go luku den difrenti gemeente (kring-opziener) ben e kon tan na wi oso. Boiti dati, wi ben e kari pionier di ben tan krosibei fu kon nyan makandra nanga wi. Mi leri furu fu den brada nanga sisa disi.

Wi osofamiri ben bigin nanga wan bisnis, ma mi papa taigi mi brada: „Efu yu wani pionier, wi o stop nanga a heri sani disi.” Bob ben feni dati bun èn di a ben abi 21 yari a gowe libi oso fu go pionier. Tu yari baka dati di mi ben abi 16 yari, mi srefi bigin pionier. Nofo tron mi ben e preiki mi wawan, boiti tapu satra nanga sonde. Mi ben gebroiki wan kotoigikarta nanga wan gramofon fu preiki. Yehovah blesi mi nanga wan Bijbelstudie di ben e meki muiti fu go na fesi. Furu famiriman fu a Bijbelstudie dati kon na ini a tru anbegi te fu kaba. A yari baka dati mi tron spesrutu pionier makandra nanga Mary Henshall. Den seni wi go na Cheshire, wan kontren pe den gemeente no ben preiki ete.

Na a ten dati, a Di Fu Tu Grontapufeti ben de fayafaya èn umasma ben musu du spesrutu wroko fu horibaka gi a feti. Fu di wi ben de furuten preikiman, meki wi ben fruwakti taki wi no ben abi fu go na ini a legre, neleki fa a ben de nanga den sma fu tra kerki. Ma krutubangi no gi mi leti, dati meki mi ben musu koti strafu 31 dei. A yari baka dati mi tapu 19 yari èn mi skrifi wan brifi go na a legre fu taigi den taki mi konsensi e tapu mi fu go na ini a legre. Mi  ben musu go na fesi krutu tu leisi, ma ala tu leisi a krutuman bosroiti taki nofo buweisi no ben de fu krutu mi. Sobun, mi ben kan go na oso. Di den sani disi miti mi, mi ben sabi taki a santa yeye ben yepi mi èn taki Yehovah ben hori mi anu fu tranga mi.​—Yes. 41:10, 13.

WAN NYUN PATNA

Na ini 1946 mi miti Arthur Matthews. No so langa na fesi a ben koti strafu dri mun langa fu di a no ben wani go na ini a legre. Di a komoto na strafu-oso a go na Hemsworth fu pionier makandra nanga en brada Dennis, di ben de wan spesrutu pionier. Sensi di den ben pikin, den papa ben gi den leri fu Yehovah èn den dopu di den ben de yongu boi. A no teki langa fosi Dennis kisi a kari fu go dini na Ierland èn Arthur tan na baka sondro patna. Mi papa nanga mama ben lobi a fasi fa a yongu pionier disi ben e wroko tranga èn fa a ben e tyari ensrefi. Dati meki den aksi Arthur fu kon tan nanga den. Te mi ben go luku mi papa nanga mama, dan mi nanga Arthur ben e wasi doti sani te wi ben kaba nyan. Te fu kaba wi bigin skrifi brifi gi makandra. Na ini 1948 Arthur ben musu koti strafu dri mun. Na ini yanuari 1949 wi trow èn wi bosroiti fu du a furuten diniwroko so langa leki wi man. Wi ben man tan pionier fu di wi ben e luku bun fa wi ben e gebroiki wi moni. Te wi ben abi fakansi, dan wi ben e gebroiki a ten dati fu go piki froktu gi sma fu kan meki pikinso moni. A no de fu taki dati Yehovah blesi a muiti di wi ben e du.

Na ini Hemsworth, syatu baka di wi trow na ini 1949

Baka wan yari den brada aksi wi fu go preiki na Noord Ierland. Wi go preiki na ini a foto Armagh fosi, èn baka dati wi go na Newry. Furu fu den sma na ini den foto dati ben de Lomsusma. Den sma drape no ben lobi sma fu tra kerki, sobun wi ben musu luku bun te wi ben e taki nanga sma. Wi ben hori konmakandra na ini na oso fu wan brada nanga wan sisa di ben e tan sowan 16 kilometer moro fara. Sowan aiti sma ben e kon. Son leisi wi ben e tan sribi drape. Wi ben e sribi tapu a gron èn a tra mamanten wi ben e nyan wan steifi nyanyan. Wi breiti taki so furu Kotoigi de na ini a kontren dati now.

„WI O DU EN!”

Mi brada nanga en wefi Lottie, ben dini kaba leki spesrutu pionier na ini Noord Ierland èn na ini 1952 wi ala fo go na wan distrikt kongres na ini Belfast. Wan brada di ben abi switifasi teki wi alamala na ini en oso, sosrefi Pryce Hughes di ben de bijkantoro-opziener na ini Ingrisikondre na a ten dati. Wan neti wi taki fu a pikin buku di nen God’s Way Is Love (A pasi fu Gado na lobi). Brada Hughes ben fruteri fa a muilek fu preiki gi Lomsusma na ini a Republiek fu Ierland. Den ben e puru den brada nanga sisa na ini den oso èn den priester ben e seni ipi-ipi sma fu go du ogri nanga den. Brada Pryce ben taki: „Wi e suku trowpaar di abi wan wagi fu teki prati na a spesrutu preikiwroko disi fu prati a buku na ini a heri kondre.” * Wantewante wi taki: „Wi o du en!” Na a sani disi wi ben taki na a bigin fu na ondrofenitori disi.

Wi nanga tra pionier e sidon na tapu wan motro di abi wan pikin wagi na en sei

Wan presi pe den pionier ben kan go tan ala ten na ini Dublin, na a oso fu „Ma” Rutland, wan sisa di  ben e dini Yehovah furu yari kaba. Wi tan na a oso fu a sisa disi wan pisi ten èn wi seri wan tu fu den sani fu wi. Baka dati wi dyompo tapu a motro fu Bob fu go luku pe wi ben kan bai wan wagi. A motro disi ben abi wan pikin wagi na seisei. Wi feni wan owru wagi èn wi aksi a sma di ben e seri a wagi fu rèi tyari en kon gi wi, fu di nowan fu wi ben man rèi wagi. A neti dati, Arthur ben e sidon na tapu a bedi e du neleki a e gi gas èn leki a ben e poti a wagi na ini versnelling. A tra dei di Arthur ben pruberi fu poti a wagi na strati, sisa Mildred Willett (a trow nanga John Barr bakaten) kon luku wi. A sisa disi ben de wan zendeling èn a ben man rèi wagi! Baka di a sori wi fa fu rèi a wagi, wi ben de srekasreka fu go preiki.

Den tu wagi fu wi

Now wi ben musu suku wan presi fu tan. Sma ben warskow wi fu no sribi na ini a wagi, fu di gensman ben kan sutu faya gi en. Dati meki wi suku fu feni wan oso, ma wi no ben man feni wan. A neti dati wi ala fo sribi na ini na oto. A tra dei wi feni wan bigi wagi di ben abi tu bedi tapu makandra. Na a wagi dati tron wi oso. Ma wi ben breiti taki wi ben mag parkeer a wagi fu wi na tapu a dyari fu gronman na ini a kontren. Wi ben go preiki na kontren di ben de sowan 16 te go miti 24 kilometer moro fara. Te wi ben froisi fu go preiki na wan tra kontren, dan wi ben drai go baka fu preiki gi den sma pe wi ben poti a wagi fu wi.

Wi preiki na a heri zuid-owstusei fu a Republiek, sondro taki wi kisi furu problema. Wi prati moro leki 20.000 fu den buku èn wi ben seni den nen fu den sma di ben wani sabi moro go na a bijkantoro fu Ingrisikondre. A de wan blesi taki hondrohondro Kotoigi de na ini a kontren dati now!

WI E DRAI GO BAKA NA INGRISIKONDRE, DAN WI E GO NA SKOTLAND

Baka wan pisi ten den brada seni wi go na a zuidsei fu Londen. Di wi preiki wan tu wiki, a bijkantoro fu Ingrisikondre bel Arthur èn den aksi en fu bigin du a kring-wroko a tra dei kaba. Wi kisi leri wán wiki langa fa fu du a wroko disi, èn baka dati wi go na Skotland fu du a kring-wroko. Arthur no ben abi ten moro fu sreka den lezing fu en. Ma a ben de wan deki-ati gi mi fu si taki a ben de klariklari fu du a wroko fu Yehovah, aladi dati no ben makriki ala ten. Wi ben lobi a kring-wroko. Omeni yari langa wi preiki na ini kontren pe gemeente no ben de, èn fu dati ede a ben de wan blesi fu de na mindri so furu brada nanga sisa.

Di Arthur kisi a kari fu go na a Gileadskoro na ini 1962, dan wi ben musu teki wan prenspari bosroiti. A skoro disi ben o hori tin mun langa, ma mi no ben o man go nanga en fu di mi no ben kisi wan kari. Wi bosroiti taki a ben o bun efu Arthur ben go na a skoro. Fu di mi no ben o abi wan pionier patna, meki den brada seni mi go baka na Hemsworth leki spesrutu pionier. Baka wán yari Arthur drai kon baka èn a kisi a frantwortu fu dini leki distrikt-opziener na ini Skotland, na a noordsei fu Ingrisikondre èn na Noord Ierland.

NYUN FRANTWORTU NA INI IERLAND

Na ini 1964, Arthur kisi a frantwortu fu dini leki bijkantoro-opziener na ini a Republiek fu Ierland. Na a bigin mi ben frede pikinso fu go dini na Betel, fu di mi ben lobi a wroko di wi ben du fu go luku den  gemeente. Ma now mi de nanga tangi taki mi kisi a grani fu wroko na Betel. Mi e bribi taki te yu e teki wan frantwortu na yu tapu, srefi te yu no e firi fu du dati, dan Yehovah o blesi yu. Mi ben e du kantoro wroko, mi ben e poti buku nanga tijdschrift na ini dosu, mi ben e bori èn mi ben krin kamra. Wan pisi ten wi ben e du a distrikt-wroko tu, aladi wi ben de na Betel. Disi ben e gi wi na okasi fu miti brada nanga sisa na ini a heri kondre. Wan tra moi sani, na taki den Bijbelstudie fu wi ben e meki muiti fu go na fesi. Ala den sani disi meki taki wi kon abi furu bun mati na ini Ierland. Dati na wan moi blesi trutru!

WAN PRENSPARI KONGRES GI YEHOVAH KOTOIGI NA INI IERLAND

Na ini 1965, a fosi internationaal kongres hori na ini Ierland, na ini a foto Dublin. * Aladi wi kisi furu gens, toku ala sani waka bun na a kongres. Sowan 3948 sma ben de na a kongres èn 65 sma dopu. Den 3500 brada nanga sisa di ben komoto fu tra kondre ben tan na den oso fu sma na ini Dublin. A bijkantoro seni wan brifi gi ibriwan fu den sma di ben teki Kotoigi na ini den oso, fu taigi den tangi. Den sma dati ben prèise a fasi fa den brada nanga sisa ben tyari densrefi. A kongres disi meki taki sani bigin go moro bun gi den Kotoigi na ini Ierland.

Arthur e taki Nathan Knorr odi di a doro na a kongres fu 1965

Na ini 1983, Arthur e tyari a Mi buku nanga Bijbel tori kon na doro na ini Keltis-tongo

Na ini 1966 a bijkantoro na ini Dublin bigin teki fesi fu a wroko na a noordsei èn na a zuidsei fu Ierland. Fu di kerki nanga politiek ben tyari prati kon na mindri den sma fu den tu kontren disi, meki a bosroiti di den brada teki ben de wan aparti sani. Wi ben breiti fu si taki so furu Lomsusma ben kon na ini a tru anbegi èn taki den ben e anbegi Yehovah makandra nanga brada nanga sisa di ben de Protestantsma fosi.

WI E KISI WAN NYUN FRANTWORTU

Na ini 2011 wi heri libi kenki di a bijkantoro fu Ierland tapu. Wi ben musu go wroko now na a Betel fu Londen. Wi kisi a nyunsu dati na wan ten di mi ben bigin broko mi ede nanga a gosontu fu Arthur. Arthur ben abi a siki fu Parkinson. Na tapu 20 mei 2015 a dede èn na so mi lasi mi mati di ben de mi patna 66 yari langa.

Den lasti yari disi mi sari furu èn mi ben lasi-ati. Fosi, mi ben abi Arthur di ben e gi mi deki-ati ala ten. Mi e misi en so te! Ma te yu de na ini den muilek situwâsi disi yu e kon moro krosibei na Yehovah. Mi e firi bun te mi e si o furu sma ben lobi Arthur. Di a dede mi kisi brifi fu mati fu wi na ini Ierland, Ingrisikondre nanga Amerkankondre srefi. Wortu no de fu taki fa den brifi disi yepi mi, makandra nanga a deki-ati di mi kisi fu Dennis, a brada fu Arthur, Mavis, a wefi fu Dennis, nanga Ruth nanga Judy, den umapikin fu Dennis.

Wan Bijbeltekst di gi mi furu deki-ati, na Yesaya 30:18. Drape skrifi: „Yehovah o tan wakti unu, fu di a wani du bun gi unu. A o opo du wan sani fu sori unu sari-ati. Bika Yehovah na wan Gado di e koti krutu na wan reti fasi. Koloku fu ala den sma di e tan wakti en.” A de wan bigi trowstu gi mi fu sabi taki Yehovah e wakti nanga pasensi fu meki ala sani kon bun baka èn taki a o gi wi moi frantwortu na ini en nyun grontapu.

Te mi e luku fa wi libi waka, dan mi e si taki Yehovah tiri a wroko na ini Ierland èn taki a blesi en! A de wan bigi grani gi mi taki mi ben mag abi wan pikin prati na a wroko dati. A no de fu taki dati ala ten wi o kisi blesi te wi e du san Yehovah e aksi fu wi.

^ paragraaf 12 Luku a Jaarboek van Jehovah’s Getuigen 1988, blz. 101, 102.

^ paragraaf 22 Luku a Jaarboek 1988, blz. 109-112.