Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2017

„Nanga wan krin ati wi musu du sani fu sori taki wi lobi makandra”

„Nanga wan krin ati wi musu du sani fu sori taki wi lobi makandra”

„Wi no musu taki nanga wi mofo nomo taki wi lobi makandra, ma nanga wan krin ati wi musu du sani fu sori taki wi lobi makandra.”​—1 YOH. 3:18.

SINGI: 106, 100

1. San na a moro prenspari lobi di de, èn fa wan sma e sori a lobi dati? (Luku a prenki na a bigin fu na artikel.)

YEHOVAH na a sma di e leri wi fa fu sori lobi (1 Yoh. 4:7). A moro prenspari lobi di de e kruderi nanga den leri fu Bijbel. Bijbel e kari a lobi disi agape-lobi. Te wan sma abi a lobi disi gi trawan, dan a kan taki a e firi gi a sma dati. Ma a lobi disi no abi fu du soso nanga firi. A lobi disi e meki taki wi de klariklari fu du sani fu a bun fu trawan. Soleki fa wan buku e sori, dan na den sani di wan sma e du e sori taki a abi agape-lobi. Te wi e sori a lobi disi gi trawan wi o de koloku trutru.

2, 3. Fa Yehovah sori taki a lobi libisma?

2 Yehovah ben sori lobi kaba gi libisma, fosi a meki Adam nanga Eva. A meki grontapu na so wan fasi taki libisma ben o abi ala sani di den ben o abi fanowdu fu man tan na en tapu fu têgo. Boiti dati, a meki grontapu leki wan tanpresi pe libisma ben o man de koloku trutru. Yehovah no du a sani disi gi ensrefi, ma a du en fu a bun fu wi. Wan tra fasi fa a sori taki a lobi den pikin  fu en, na taki a gi den na okasi fu libi fu têgo na ini a Paradijs di a ben sreka gi den.

3 Baka di Adam nanga Eva opo densrefi teige Gado, dan Yehovah sori lobi gi libisma na wan tumusi moi fasi. A seti a lusu-paiman fu frulusu den bakapikin fu Adam nanga Eva, fu di a ben de seiker taki sonwan fu den ben o sori warderi gi a lobi fu en (Gen. 3:15; 1 Yoh. 4:10). Fu taki en leti, di Yehovah pramisi taki wan Frulusuman o kon, dan gi en a ben de neleki a sani dati ben pasa kaba. Èn sowan 4000 yari baka dati, Yehovah gi en wan-enkri Manpikin fu a bun fu libisma (Yoh. 3:16). A no de fu taki dati wi abi bigi warderi gi a lobi di Yehovah sori gi wi!

4. Fa wi du sabi taki sondu libisma man sori trutru lobi gi trawan?

4 Wi man sori trutru lobi gi trawan fu di Gado meki wi nanga den srefi fasi leki en. A tru taki a sondu di wi kisi fu Adam e meki en muilek gi wi fu sori lobi, ma dati no wani taki dati wi no man sori lobi. Abel sori lobi gi Gado di a ben de klariklari fu gi Yehovah a moro warti sani di a ben abi (Gen. 4:3, 4). Noa sori trutru lobi gi den sma fu en ten, fu di a preiki Gado boskopu omeni tenti yari langa aladi den sma no ben wani arki en srefisrefi (2 Petr. 2:5). Abraham no ben prakseri ensrefi, ma a lobi di a ben abi gi Gado meki taki a ben de klariklari fu gi en manpikin Isak leki ofrandi di Gado aksi en fu du dati (Yak. 2:21). Neleki den reti-ati man dati, wi wani sori lobi, srefi te a no makriki.

SAN NA TRUTRU LOBI?

5. Na sortu fasi wi kan sori trutru lobi gi trawan?

5 Bijbel e sori san na trutru lobi. A e taki: „Wi no musu taki nanga wi mofo nomo taki wi lobi makandra, ma nanga wan krin ati wi musu du sani fu sori taki wi lobi makandra” (1 Yoh. 3:18). A sani disi wani taki dati wi no kan taki sani fu sori taki wi lobi trawan? Kwetikweti! (1 Tes. 4:18) Na presi fu dati, Bijbel e leri wi taki wi no musu taki nomo dati wi lobi trawan, ma taki wi musu du sani tu fu sori dati, spesrutu te dati de fanowdu. Fu eksempre, te wan Kresten brada noso sisa no abi nofo nyanyan noso krosi, dan switi wortu wawan no o yepi en (Yak. 2:15, 16). Na so a de tu taki te wi abi lobi gi Yehovah èn gi trawan, dan wi no o begi Gado nomo fu ’seni moro wrokoman fu go du a kotiwroko fu en’, ma wi o teki prati fayafaya tu na a wroko disi.​—Mat. 9:38.

6, 7. (a) San a wani taki fu „lobi sma sondro fu hoigri”? (b) San na wan tu eksempre fu sma di ben du neleki den lobi trawan?

6 Na apostel Yohanes ben skrifi taki „nanga wan krin ati wi musu du sani fu sori taki wi lobi makandra”. Sobun, wi musu lobi trawan „sondro fu hoigri” (Rom. 12:9; 2 Kor. 6:6). A sani disi e sori taki wi no kan du neleki wi lobi wan trawan aladi wi e kori a sma. Dati ben o de neleki wi e weri wan masker. Kande wi e aksi wisrefi: ’Wan sma di e hoigri kan sori lobi gi trawan?’ Nôno. Disi no ben o de trutru lobi kwetikweti, sobun, a no e tyari nowan wini kon.

7 Luku wan tu situwâsi pe sma ben e du neleki den lobi trawan. Na ini a dyari fu Eden, Satan ben e du neleki a ben abi a bun fu Eva na prakseri. Ma den sani di a du ben e sori taki a ben e denki ensrefi nomo èn taki a ben e hoigri (Gen. 3:4, 5). Na ini a ten fu Kownu David, Akitofel sori taki a no ben de wan trutru mati fu a kownu. Akitofel tron wan toriman fu di a ben denki taki a sani dati ben o tyari wini kon gi en (2 Sam. 15:31). Na ini a ten disi, a de so tu taki sma di fadon komoto na bribi èn trawan di e tyari prati kon na ini a gemeente e gebroiki „switi taki” nanga „moi wortu” fu du neleki den lobi trawan, ma fu taki en leti den e denki densrefi nomo.​—Rom. 16:17, 18.

8. San wi musu aksi wisrefi?

8 Te sma e du neleki den lobi trawan, dan  disi na wan syen sani fu di den no e sori a trutru lobi fu Gado di e suku a bun fu trawan. Kande wi o man kori trawan, ma wi no o man kori Yehovah. Fu taki en leti, Yesus ben taki dati sma di e hoigri ben o kisi „wan bun hebi strafu” (Mat. 24:51). A no de fu taki dati den futuboi fu Yehovah noiti no wani du neleki den lobi trawan. Ma a bun te wi e aksi wisrefi: ’Mi e sori trutru lobi gi trawan ala ten, sondro fu suku mi eigi bun èn sondro fu kori trawan?’ Meki wi go luku neigi fasi fa wi kan pruberi fu sori lobi gi trawan „sondro fu hoigri”.

FA WI KAN SORI TRUTRU LOBI GI MAKANDRA?

9. San wi o du te wi abi trutru lobi?

9 Wi musu prisiri fu du sani gi trawan, awansi sma no e si san wi du. Wi musu de klariklari fu du sani gi wi brada nanga sisa fu di wi lobi den èn „sma no abi fu sabi” san wi du. (Leisi Mateyus 6:1-4.) Ananias nanga Safira no du dati. Fu di den ben wani taki trawan kon sabi san den ben gi leki bijdrage, meki den lei na fesi tra sma taki den ben gi ala a moni di den ben meki. Dati meki Gado strafu den fu di den ben hoigri (Tori 5:1-10). Tra fasi leki den, trutru lobi e meki taki wi e prisiri fu du sani gi wi brada nanga sisa, sondro taki wi e meki ala sma kon sabi san wi du. Fu eksempre, den brada di e yepi a Tiri Skin fu sreka buku nanga tra sani gi a pipel fu Gado, e du dati sondro fu suku biginen gi densrefi, èn den no e fruteri trawan tu san den du.

10. Fa wi kan gi trawan grani?

10 De klariklari fu gi trawan grani. (Leisi Romesma 12:10.) Yesus ben de wan bun eksempre gi wi. A gi den apostel fu en grani di a wasi den futu fu den (Yoh. 13:3-5, 12-15). Kande wi musu du tranga muiti fu kon abi sakafasi fu man gi grani na trawan na a fasi dati. Aladi Yesus ben sori den apostel fa den ben musu sori sakafasi èn gi grani na trawan, toku den no ben e frustan ete fa den ben musu teki na eksempre fu en. Na di den kisi santa yeye, den kon frustan a sani dati moro bun (Yoh. 13:7). Wi kan gi grani na trawan te wi no e denki tumusi furu fu wisrefi fu di wi kisi heiskoro, fu di wi abi gudu, noso fu di wi abi frantwortu na ini na organisâsi fu Yehovah (Rom. 12:3). Èn na presi taki wi e dyarusu te sma e prèise trawan, wi musu breiti gi den awansi wi feni taki wi musu kisi grani tu noso taki wi yepi tu fu du a wroko di den ben du.

11. Fu san ede wi musu prèise sma nanga wi heri ati?

11 Prèise yu brada nanga sisa nanga yu heri ati. Wi musu suku okasi fu prèise makandra, fu di Bijbel e taki dati a „bun fu gi sma deki-ati” (Ef. 4:29). Ma te wi e prèise trawan, dan wi musu du dati nanga wan krin ati. Èn te wi musu gi sma a rai di den abi fanowdu, dan wi no musu draidrai fu du dati (Odo 29:5). Efu wi e prèise wan sma aladi wi e kosi en na en baka, dan wi e hoigri. Na apostel Paulus no ben du a sani dati, ma a de wan bun eksempre gi wi te wi e luku fa a ben prèise trawan nanga en heri ati. Fu eksempre, a ben prèise den Kresten na ini Korente fu den bun sani di den ben e du (1 Kor. 11:2). Ma te den ben musu kisi piri-ai, dan a ben e gi den dati na wan switi fasi èn a ben e sori den krin san den no ben du bun.​—1 Kor. 11:20-22.

Wi kan sori lobi gi wi brada nanga sisa di de na nowtu, te wi e du bun gi den èn te wi e gi den wan switikon (Luku paragraaf 12)

12. Fa wi musu gi trawan wan switikon?

12 Gi trawan wan switikon. Yehovah e taigi wi fu du bun gi wi brada nanga sisa. (Leisi 1 Yohanes 3:17.) Toku wi musu du dati nanga wan krin ati èn noiti wi musu suku wi eigi bun. Wi kan aksi wisrefi: ’Suma na den sma di mi lobi kari kon na mi oso? Na soso bun mati, sma di abi spesrutu frantwortu, noso sma di man du bun gi mi? Noso mi e suku fu du bun gi brada nanga sisa di  mi no sabi bun, noso di no o man du wan sani baka gi mi?’ (Luk. 14:12-14) Ma kon meki wi taki dati wan Kresten de na nowtu fu di a teki don bosroiti, noso kande a no e taigi wi tangi fu di wi yepi en. Te dati de so, dan wi musu du a sani disi di Bijbel e leri: „Gi makandra wan switikon sondro fu krutukrutu” (1 Petr. 4:9). Efu yu e teki a rai disi, dan yu o de koloku fu di yu e gi sma sani nanga wan krin ati.​—Tori 20:35.

13. (a) O ten a kan muilek fu yepi den wan di swaki? (b) Sortu sani wi kan du fu yepi den swakiwan?

13 Yepi den swakiwan. A rai di Bijbel e gi wi fu ’yepi den swakiwan èn fu abi pasensi nanga ala sma’ kan sori efu wi abi trutru lobi gi trawan (1 Tes. 5:14). Aladi furu sma di swaki e kon abi wan tranga bribi bakaten, toku trawan de di wi musu tan yepi nanga pasensi. Kande wi musu fruteri den wan tu sani fu Bijbel fu gi den deki-ati, kande wi musu aksi den fu wroko makandra nanga wi na ini a preikiwroko, noso kande wi musu teki ten fu arki den. Boiti dati, wi no musu de gaw fu denki taki wan brada noso wan sisa „tranga” noso „swaki”, ma wi musu hori na prakseri taki ala sma abi bun fasi nanga swakifasi. Srefi na apostel Paulus ben taki fu en eigi swakifasi (2 Kor. 12:9, 10). Sobun, wi alamala abi yepi nanga deki-ati fanowdu fu makandra.

14. San wi musu du fu man tan na ini freide nanga wi brada nanga sisa?

14 Meki freide. Wi e du ala san wi man fu tan na ini freide nanga wi brada nanga sisa, awansi wi feni taki den no frustan wi bun, noso awansi den no libi bun nanga wi. (Leisi Romesma 12:17, 18.) Te wi du wan hati sani nanga wan sma, dan a kan yepi te wi e aksi en pardon, ma wi musu du dati nanga wan krin ati. Fu eksempre, na presi taki wi e taigi a sma „sorry taki yu e firi so”, a moro bun fu sori a sma taki yu abi fowtu tu na ini a tori. Dati meki yu kan taki „sorry taki a sani di mi taki hati yu”. Freide prenspari spesrutu na ini a trowlibi. Wan masra nanga wan wefi no musu du leki den lobi makandra te den de na mindri tra sma, ma te den de den wawan den no e taki nanga makandra, den e taigi makandra hati sani, noso kande den e feti nanga makandra.

15. Fa wi kan sori taki wi gi trawan pardon nanga wi heri ati?

15 De klariklari fu gi makandra pardon. Efu wi e gi wan sma pardon te a du wan hati sani nanga wi, dan wi no e hori a sma na ati. Bijbel e taki: „Un musu abi lobi, so taki un man frudrage makandra. Un musu libi bun nanga makandra èn un musu du ala muiti fu tan abi a wánfasi di unu kisi nanga yepi fu a santa yeye” (Ef. 4:2, 3). Te wi e du den sani disi, dan wi o de klariklari fu gi pardon na den sma di kande no sabi taki den du wan sani di hati wi. Efu wi wani gi trawan pardon nanga wi heri ati, dan wi musu basi a denki fu wi so taki wi „no e tan memre na ogri di trawan du” (1 Kor. 13:4, 5). Efu wi e tan hori sma na ati, dan a matifasi di wi abi nanga wi brada noso sisa kan pori fu ala ten. Ma a  matifasi di wi abi nanga Yehovah kan pori tu (Mat. 6:14, 15). Wi kan sori tu taki wi gi trawan pardon nanga wi heri ati, te wi e begi gi den wan di sondu teige wi.​—Luk. 6:27, 28.

16. Fa wi musu si den frantwortu di wi abi na ini na anbegi fu Yehovah?

16 No suku yu eigi bun. Te wi e kisi grani na ini na anbegi fu Yehovah, dan wi musu si den grani dati leki okasi fu sori taki wi abi trutru lobi gi trawan. Sobun, ’wi no musu tan suku wi eigi bun, ma wi musu suku a bun fu trawan’ (1 Kor. 10:24). Fu eksempre, na den kring konmakandra nanga den kongres fu wi, brada de drape fruku kaba fu du spesrutu wroko, fosi den tra brada nanga sisa e doro. Na presi taki den e si a frantwortu fu den leki wan okasi fu seti den moro bun presi gi densrefi nanga den famiri, furu fu den brada disi e bosroiti fu sidon pe presi tan abra. Den brada disi e sori lobi gi trawan fu di den no e suku den eigi bun. Fa yu kan teki na eksempre fu den?

17. Efu wan sma di du wan seryusu sondu abi trutru lobi gi trawan, dan san a o du?

17 Taki fu den sondu di yu du kibrikibri èn tapu nanga den. Son Kresten di du wan seryusu sondu e pruberi fu kibri en fu di den no wani kisi syen noso fu di den no wani meki trawan sari (Odo 28:13). Ma den sma di e du dati no e sori lobi, fu di a sani di den e du kan tyari takru bakapisi kon gi den nanga trawan. A kan tapu pasi gi a yeye fu Gado èn a kan pori a freide na ini a gemeente (Ef. 4:30). Te Kresten di du wan seryusu sondu abi trutru lobi gi trawan, dan den o fruteri den owruman fu a sondu fu den so taki den owruman kan yepi den.​—Yak. 5:14, 15.

18. O prenspari a de fu abi trutru lobi?

18 Lobi na a moro prenspari fasi di wi musu abi (1 Kor. 13:13). Te wi e sori lobi, dan sma kan si suma na den tru bakaman fu Yesus èn suma e teki na eksempre fu Yehovah, a sma pe lobi komoto (Ef. 5:1, 2). Paulus ben skrifi taki efu a „no abi lobi”, dan a „no de noti” (1 Kor. 13:2). Meki wi tan sori lobi gi trawan. Iya, „wi no musu taki nanga wi mofo nomo taki wi lobi makandra, ma nanga wan krin ati wi musu du sani fu sori taki wi lobi makandra”.