Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2016

 ONDROFENITORI

Wi pruberi fu teki bun eksempre

Wi pruberi fu teki bun eksempre

Wan dei Brada Izak Marais di de na Patterson, New York, bel kon na Colorado fu taki nanga mi. Mi aksi en: „Yu sabi o owru mi de?” A piki mi: „Iya, mi sabi.” Mi o fruteri unu fa a takimakandra disi bigin.

MI GEBORE na Wichita, Kansas, na Amerkankondre, tapu 10 december 1936. Mi na a moro owruwan fu fo pikin. Mi papa nanga mama, William nanga Jean, ben e anbegi Yehovah fayafaya. Mi papa ben de grupu-dinari. Na so den ben e kari brada di e teki fesi na ini a gemeente. Na mi granmama Emma Wagner studeri Bijbel nanga mi mama. A studeri nanga omeni tra sma tu, soleki Sisa Gertrude Steele, di dini leki zendeling na Porto Riko omeni yari langa. * Ala den sma disi gi mi wan moi eksempre.

MI NO FRIGITI DEN MOI EKSEMPRE

Mi papa e tanapu tapu wan uku fu wan strati e prati tijdschrift gi sma di e pasa

Wan satra neti, mi nanga mi papa ben e prati a Waktitoren nanga Consolation di wi sabi now leki Ontwaakt, gi den sma na strati. A ten dati mi ben abi feifi yari èn a kondre fu wi ben e feti na ini a Di Fu Tu Grontapufeti. Ma mi papa ben weigri fu go na ini a legre. Dati meki wan drungu datra bigin kosi en taki na fu di a frede meki a no wani go na ini a legre. A datra kon tanapu leti na fesi mi papa, ne a taki: „Naki mi nòh, yu bobo yu.” Mi ben frede, ma mi ben firi bun di mi si fa mi papa hori ensrefi. A tan prati den tijdschrift gi den sma di ben drape. Di wan srudati waka pasa, a datra bari taki: „Du wan sani nanga a bobo disi!” A srudati ben si taki a datra drungu èn dati meki a taigi en: „Go na oso, dan yu o kisi yusrefi!” Ne den ala tu gowe. Mi ben breiti srefisrefi taki Yehovah gi mi papa so furu deki-ati. Na Wichita, a ben abi tu barbershop èn a datra ben de wan fu den klanti.

Mi nanga mi papa nanga mama e go na wan kongres na Wichita na ini den yari baka 1940

Di mi ben abi aiti yari, mi papa nanga mama seri na oso nanga den barbershop, dan den bow wan pikin oso di ben abi wiel. Ne den froisi go na Colorado fu dini pe moro yepi de fanowdu. Wi ben e tan krosibei fu Grand Junction pe mi papa nanga mama ben e pionier, aladi den ben e prani sani èn kweki meti wan tu dei na ini a wiki. Fu di Yehovah  blesi a preikiwroko fu den, meki wan gemeente opo drape. Tapu 20 yuni 1948, mi papa dopu mi drape na ini wan liba fu wan bergi, makandra nanga wan tu tra sma di ben studeri Bijbel. Tu fu den ben de Billie Nichols nanga en wefi. Bakaten den go du a kringwroko. Na dati a boi fu den nanga en frow du tu.

Wi ben abi furu bun mati di ben de fayafaya Kownukondre preikiman èn wi ben gwenti taki nanga den fu sani di ben e tranga wi bribi. Spesrutu famiri Steele, Don nanga Earlene, Dave nanga Julia èn Si nanga Martha, yepi mi fu teki bun bosroiti. Den meki mi si taki te yu e poti a Kownukondre na a fosi presi, dan yu o de koloku trutru.

WI E FROISI BAKA

Di mi ben abi 19 yari, Bud Hasty, wan mati fu a famiri fu wi, aksi mi fu kon pionier nanga en na zuidsei fu Amerkankondre. Baka dati a kring-opziener aksi wi fu go dini na Ruston, Louisiana, pe wan tu Kotoigi no ben e preiki moro wan heri pisi ten kaba. Den brada taigi wi fu hori ala den konmakandra ibri wiki, awinsi furu sma no ben e kon. Wi feni wan bun presi èn wi sreka en fu hori den konmakandra. Wi ben e hori ibri konmakandra, ma wan heri pisi ten na wi tu wawan ben de na den. Te wan fu wi ben abi wan prati, dan a trawan ben e gi ala den piki. Efu wan demo ben de, dan wi ala tu ben de tapu a podium èn a zaal ben leigi. Bakaten, wan owru sisa bigin kon na den konmakandra. Te fu kaba, wan tu Bijbelstudenti nanga wan tu brada nanga sisa di no ben e preiki moro, bigin kon tu. Fosi yu denki a gemeente bigin gro.

Wan dei, mi nanga Bud miti wan fesiman fu a „Kerki fu Krestes”. A man taki fu tekst di mi no ben sabi bun. A sani disi seki mi pikinso èn a meki mi go denki dipi fu san mi e bribi. Wan heri wiki langa, mi tan na ai te neti fu feni piki tapu den aksi di a ben poti. A sani disi yepi mi fu kon frustan den tru leri fu Bijbel bun èn mi no ben man wakti fu miti wan kerki fesiman baka.

Syatu baka dati, a kring-opziener aksi mi fu froisi go na El Dorado, Arkansas, fu yepi a gemeente drape. Di mi ben drape, a legre na Colorado seni kari mi omeni leisi fu di den ben wani taki mi tron srudati. Wan leisi di mi ben e go, wan tu pionier rèi makandra nanga mi. Di wi doro Texas wan ongoloku pasa èn a wagi fu mi no ben man meki moro. Wi bel wan brada di kon teki wi tyari go na en oso èn baka dati na a gemeente. Drape den meki bekènti  taki wan ongoloku pasa nanga wi èn den brada yepi wi nanga moni. A brada di ben kon teki wi, seri a wagi fu mi tu gi 25 Amerkan dala.

Wi feni wan okasi fu go na Wichita pe wan bun mati fu mi famiri, Brada McCartney ben e pionier. Teleki now, mi nanga den twelengi boi fu en, Frank nanga Francis, na bun mati ete. Den ben abi wan owru wagi di den seri gi mi fu 25 Amerkan dala, a srefi moni di mi ben kisi gi a broko wagi fu mi. Disi ben de a fosi leisi di mi si krin fa Yehovah gi mi san mi abi fanowdu, fu di mi ben poti a Kownukondre na a fosi presi na ini mi libi. Famiri McCartney meki mi miti tu nanga wan moi sisa di nen Bethel Crane. En mama Ruth ben de wan fayafaya Kotoigi fu Wellington, Kansas. A sisa disi tan pionier, srefi di a ben pasa 90 yari. A no teki wan yari, fosi mi nanga Bethel trow na ini 1958 èn a kon pionier makandra nanga mi na El Dorado.

WI E KISI WAN TU MOI KARI

Mi nanga Bethel prakseri den bun eksempre di wi ben abi sensi wi e gro kon bigi. Dati meki wi bosroiti taki awinsi san Yehovah organisâsi e aksi wi fu du, wi ben o de klariklari fu du dati. Den seni wi go leki spesrutu pionier na Walnut Ridge, Arkansas. Baka dati, na ini 1962, wi ben breiti di den kari wi gi a di fu 37 klas fu a Gileadskoro. A moi fu a tori na taki wi nanga Don Steele ben de na ini a srefi klas. Di wi klari a skoro, den seni mi nanga Bethel go na Nairobi, na Kenia. Wi ben sari srefisrefi di wi ben e gowe libi New York, ma di wi miti nanga den brada na a opolani presi na Nairobi, wi ben breiti kefalek.

Wi de na ini a preikiwroko na Nairobi makandra nanga Mary nanga Chris Kanaiya

Fosi yu denki wi ben kon lobi Kenia èn a preikiwroko drape ben switi. Den fosi sma di teki dopu baka di wi bigin studeri Bijbel nanga den ben de Chris nanga Mary Kanaiya. Te nanga now den de na ini a furuten diniwroko na Kenia. Baka wán yari, den aksi wi fu go na Kampala, Uganda. Wi ben de den fosi zendeling drape. Den ten dati ben moi srefisrefi fu di furu sma ben wani studeri Bijbel èn den tron wi brada nanga sisa. Ma baka dri nanga afu yari di wi ben de na Afrika, wi drai go baka na Amerkankondre fu di wi ben o kisi pikin. A dei di wi gowe libi Afrika, ben hebi gi wi moro leki di wi ben gowe libi New York. Wi ben kon lobi den sma fu Afrika so te taki wi ben howpu fu drai go baka wan dei.

WI KISI WAN NYUN FRANTWORTU

Wi go libi na a west-sei fu Colorado pe mi papa nanga mama ben e libi. Baka wan pisi ten, Kimberly, a fosi meisje fu wi gebore èn 17 mun baka dati wi kisi Stephany. Wi teki a nyun frantwortu fu wi seryusu èn dati meki wi ben wani du ala san wi man fu meki Gado Wortu doro na ati fu den moi meisje fu wi. Wi ben wani teki a bun eksempre di trawan ben gi wi. Aladi wi ben sabi taki a bun eksempre fu wi ben o yepi den pikin fu wi, toku dati no ben wani taki ete taki den ben o dini Yehovah te den kon bigi. Mi e taki disi fu di wan moro yongu brada nanga wan sisa fu mi gowe libi a tru anbegi. Mi howpu taki den drai kon baka èn teki a moi eksempre di wi alamala kisi.

A ben de wan prisiri sani gi wi fu kweki den tu meisje fu wi èn leki osofamiri wi ben lobi du sani makandra. Fu di wi ben e libi krosibei fu Aspen na Colorado, meki wi leri wan sport pe yu e grati na  tapu snew. Na so wi ben meki prisiri wanwan leisi èn gebroiki den okasi disi fu taki nanga den meisje fu wi. Wi ben e go koiri tu na presi pe wi ben kan seti kampu èn a ben switi fu taki tori nanga makandra te wi ben sidon lontu a kampu faya. Aladi den ben yongu, toku den ben e poti aksi soleki „San mi o du te mi kon bigi?” èn „Fa a masra di mi o trow nanga en musu de?” Wi pruberi fu leri den fu denki èn fu du sani leki fa Yehovah wani. Wi sori den tu taki a bun fu go na ini a furuten diniwroko èn fu trow soso nanga wan sma di wani du a srefi. Wi yepi den fu frustan taki a moro bun fu no trow tumusi yongu. Wi ben gwenti taki: „Wakti teleki yu doro 23 yari.”

Neleki fa wi kweki, na so wi ben e du muiti fu go na den konmakandra èn na ini a preikiwroko leki osofamiri ala ten baka. Wi ben e sorgu tu taki sma di de na ini a furuten diniwroko e kon tan na wi oso. Èn wi ben gwenti taki fu a moi ten di wi ben abi leki zendeling. Wi ben e howpu taki wan dei a heri osofamiri ben kan go na Afrika. Den meisje fu wi ben e angri fu go drape.

Ala ten wi ben e studeri leki osofamiri èn son leisi wi ben e demo sani di ben kan pasa na skoro. Wi ben e meki den meisje prei leki wan Kotoigi di e piki den aksi. Den ben e prisiri fu leri sani na a fasi disi èn den ben e kisi deki-ati fu preiki. Di den kon moro owru, dan son leisi den ben e krutu te wi ben musu hori na osofamiri studie. Wan leisi mi ati bron, dan mi taigi den fu go na den kamra èn taki wi no o studeri. Den skreki so te taki den bigin krei, ne den begi mi fu hori a studie. Na so wi kon si taki a muiti di wi ben e du fu yepi den fu kon lobi Yehovah, ben abi bun bakapisi. Den ben kon lobi a studie èn wi ben e gi den okasi fu taki fri fa den e denki. Son leisi wi ben e skreki te den ben e taigi wi taki den no e agri nanga son sani di wi e bribi. Toku dati yepi wi fu kon sabi san de na ini den ati. Te wi ben taki nanga den fu a tori èn yepi den fu si fa Yehovah e denki, dan den ben breiti nanga dati.

MORO KENKI KON NA INI WI LIBI

Fosi wi denki, den meisje fu wi kon bigi. Fu di wi teki a tiri fu Gado organisâsi, meki wi ben man yepi den fu kon lobi Yehovah. Wi ben breiti srefisrefi taki ala tu meisje bigin pionier baka di den klari middelbaar skoro èn den ben abi wan wroko fu man sorgu densrefi. Makandra nanga tu tra sisa, den go dini na Cleveland, Tennessee, pe moro preikiman ben de fanowdu. Wi ben e misi den srefisrefi, ma wi ben breiti taki den bosroiti fu go pionier. Na so mi nanga Bethel bigin pionier baka èn wi kisi tra moi grani tu. Wanwan leisi wi ben e yepi du a kringwroko èn wi ben e du wroko na den kongres.

Fosi den meisje fu wi go na Tennessee, den go koiri na Londen, Ingrisikondre èn den go luku a bijkantoro. Drape Stephany, di ben abi 19 yari, miti Paul Norton, wan yongu brada fu Betel. Wan tra leisi di den go drape, Kimberly miti Brian Llewellyn, di ben e wroko makandra nanga Paul. Di Stephany tapu 23 yari, a trow nanga Paul. Brian nanga Kimberly trow wan yari baka dati, di Kimberly ben abi 25 yari. Sobun, den wakti teleki den doro 23 yari. Wi breiti taki den trow nanga sma di lobi Yehovah.

Makandra nanga Paul, Stephany, Kimberly nanga Brian na a bijkantoro fu Malawi na ini 2002

Den meisje fu wi fruteri wi taki a moi eksempre fu wi nanga di fu den granpapa nanga granmama yepi den fu gi yesi na Yesus èn fu ’tan suku a Kownukondre fosi’, srefi te den ben abi moni problema (Mat. 6:33). Ini april 1998, Paul nanga Stephany kisi kari fu go na a di fu 105 klas fu a Gileadskoro èn baka dati den seni den go na Malawi, na Afrika. Na a srefi ten, Brian nanga Kimberly kisi kari fu go wroko na Londen Betel èn bakaten den seni den go na Betel Malawi. Wi ben breiti srefisrefi fu di disi na a moro bun fasi fa yongusma kan gebroiki den libi.

WI KISI WAN TRA MOI KARI

Ini yanuari 2001, mi ben abi a takimakandra nanga a brada na a telefon, soleki fa skrifi na a bigin fu na artikel disi. Brada Marais, na opziener fu a kantoro di e yepi vertaalgrupu na heri grontapu, fruteri mi taki den brada ben e seti sani fu gi les na sma di e vertaal so taki den kan frustan Ingrisitongo moro bun. Sobun, mi na wan fu den sma di  ben musu gi a les disi, aladi mi ben abi 64 yari. Mi nanga Bethel begi fu a tori èn wi taki nanga den mama fu wi di ben kon owru kaba, fu luku fa den feni en. Den ala tu ben wani meki wi go, aladi wi no ben o man yepi den so furu moro. Ne mi bel a brada baka fu fruteri en taki wi ben o teki a moi kari disi.

Na a ten dati datra kon si taki mi mama abi kanker. Mi taigi en taki wi o tan fu yepi mi sisa Linda fu sorgu gi en. Mi mama piki mi: „Kwetikweti. Efu yu no go, mi no o firi bun.” Na so Linda ben e denki tu. A naki wi ati di wi si taki den gi wi na okasi fu go, aladi den ben sabi taki wi no ben o man de nanga den. Wi ben breiti tu taki den mati fu wi na ini a gemeente yepi wi. A dei baka di wi go na a Waktitoren Skoro Centrum na Patterson, Linda bel fu taigi wi taki mi mama dede. Wi tan du a wroko fu wi nanga wi heri ati, leki fa mi mama ben o gi wi deki-ati fu du.

A sani di gi wi furu prisiri na taki a bijkantoro fu Malawi ben de a fosi presi pe wi ben musu gi a les. Na drape den meisje fu wi nanga den masra fu den ben e dini. Wi ben breiti srefisrefi fu miti nanga makandra! Di wi komoto drape, wi go na Zimbabwe èn baka dati na Sambia. Baka di wi gi a les dri nanga afu yari, den brada aksi wi fu drai go na Malawi fu skrifi den ondrofenitori fu Kotoigi drape di kisi hebi frufolgu fu di den no ben wani teki sei na ini politiek. *

Wi nanga den granpikin fu wi de na ini a preikiwroko

Wi ben sari srefisrefi di wi ben musu drai go baka na Basalt Colorado ini 2005. Drape mi nanga Bethel e pionier teleki now. Ini 2006 Brian nanga Kimberly kon libi na ini wi birti fu kweki den tu meisje fu den, Mackenzie nanga Elizabeth. Paul nanga Stephany de ete na Malawi èn Paul na wan memre fu a bijkantoro komte. Now di mi e doro 80 yari, mi e prisiri fu si fa yongu brada di mi nanga den wroko makandra na ini den yari di pasa, abi den srefi frantwortu now di mi ben abi fosi. Now wi de koloku fu di wi teki den bun eksempre di trawan gi wi. Disi tyari wini kon gi den pikin fu wi tu nanga wi granpikin.

^ paragraaf 5 Na ondrofenitori fu famiri Steele di dini leki zendeling, de na ini De Wachttoren fu 15 yuni 1958, blz. 360-363 nanga a di fu 15 yuni 1971, blz. 379-384.

^ paragraaf 30 Fu eksempre, luku na ondrofenitori fu Brada Trophim Nsomba di kon na doro na ini A Waktitoren fu 15 april 2015, blz. 14-18.