Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2016

Tan abi wan bun matifasi nanga Yehovah te yu e dini pe sma e taki wan tra tongo

Tan abi wan bun matifasi nanga Yehovah te yu e dini pe sma e taki wan tra tongo

„Den sani di yu taigi mi, mi kibri na ini mi ati leki wan gudu.”PS. 119:11.

SINGI: 142, 92

1-3. (a) San musu de a moro prenspari sani gi wi, awinsi na ini sortu situwâsi wi de? (b) San kan muilek gi den wan di e leri wan tra tongo èn sortu aksi e opo kon? (Luku a prenki na a bigin fu na artikel.)

NA INI a ten disi, dusundusun Kotoigi fu Yehovah e du ala san den man fu preiki a bun nyunsu gi „sma fu ala kondre, lo, tongo, nanga pipel”. Na so den e du san skrifi na Openbaring 14:6. Yu na wan fu den sma di leri wan tra tongo fu man du disi? Yu e dini leki zendeling na ini wan tra kondre, noso yu na wan preikiman di go dini pe moro yepi de fanowdu? Yu e dini now na ini wan gemeente na ini yu kondre pe den e taki wan tra tongo?

2 A moro prenspari sani gi futuboi fu Gado, na fu sorgu taki den nanga den osofamiri tan abi wan tranga bribi (Mat. 5:3). Ma fu di wi abi furu fu du, meki a muilek gi wi son leisi fu meki ten fu studeri Bijbel finifini. A moro muilek srefi gi den wan di e dini na ini wan gemeente pe den e taki wan tra tongo.

3 Boiti taki den musu leri wan tra tongo, den musu sorgu tu taki den e tan studeri den dipi sani fu Gado (1 Kor. 2:10). Fa den o man du dati efu den no man frustan a tongo fu a  gemeente fu den bun? Fu san ede Kresten papa nanga mama musu sorgu taki Gado Wortu e doro na ati fu den pikin?

FA WI KAN SORGU TAKI WI TAN ABI WAN BUN MATIFASI NANGA YEHOVAH?

4. San kan meki en muilek gi wan sma fu tan abi wan bun matifasi nanga Yehovah? Gi wan eksempre.

4 Te wi musu studeri Gado Wortu na ini wan tongo di wi no e frustan bun, dan a kan muilek gi wi fu tan abi wan bun matifasi nanga Yehovah. Sowan 500 yari Fosi Krestes, Nehemia kon si taki sonwan fu den pikin fu den Dyu di ben drai kon baka fu Babilon no ben man taki Hebrewtongo. (Leisi Nehemia 13:23, 24.) Fu di den pikin disi no ben man frustan Gado Wortu bun, meki den no ben man du san Gado wani.Neh. 8:2, 8.

5, 6. San son papa nanga mama di e dini na ini wan gemeente pe den e taki wan tra tongo kon si èn fa a sani dati du kon?

5 Son papa nanga mama di e dini na ini wan gemeente pe den e taki wan tra tongo, kon si taki a bribi fu den pikin fu den kon swaki pikinso. Fu di den pikin disi no e frustan ala san den e yere na den konmakandra, meki den leri dati no e naki den ati. Pedro [1] di froisi fu Zuid-Amerika go na Australia, e taki: „Te wi e taki fu Bijbel noso fu tra prenspari sani di abi fu du nanga na anbegi fu wi, dan a musu naki wi ati èn wi musu man frustan en bun.”Luk. 24:32.

6 Te wi e leisi wan sani na ini wan tra tongo, a no e doro wi ati so, leki te wi ben o leisi en na ini wi eigi tongo. Èn te wi musu feti fu taki wan sani na ini wan tongo di wi no sabi bun, dan wi kan kon weri so te taki wi no de nanga so furu faya moro. Sobun, aladi wi wani dini na ini wan gemeente pe den e taki wan tra tongo, wi musu meki muiti tu fu tan abi wan bun matifasi nanga Yehovah.Mat. 4:4.

DEN NO MEKI SANI PORI A MATIFASI DI DEN BEN ABI NANGA YEHOVAH

7. Fa den Babilonsma pruberi fu dwengi Danièl fu teki a kulturu fu den abra?

7 Di Danièl nanga den mati fu en ben de na ini katibo, den Babilonsma ben wani dwengi den fu teki a kulturu fu den abra. Dati meki den leri den „a tongo fu den Kaldeyasma”. Boiti dati, na edeman di ben e wroko gi a kownu, gi den man disi Babilon nen (Dan. 1:3-7). A nen di Danièl kisi, ben gersi a nen fu Bel, a moro prenspari gado fu Babilon. Kande Kownu Nebukadnesar ben wani sori Danièl na a fasi disi taki den gado fu Babilon tranga moro Yehovah, a Gado fu Danièl.Dan. 4:8.

8. Di Danièl ben e libi na ini wan tra kondre, dan san yepi en fu tan abi wan bun matifasi nanga Yehovah?

8 Aladi den ben wani meki Danièl nyan a switi nyanyan fu Kownu, toku a „teki a bosroiti taki a no ben o doti ensrefi” nanga den nyanyan disi (Dan. 1:8). Fu di a ben e tan studeri den santa buku fu Gado di ben de na ini en eigi tongo, meki a sorgu taki a tan abi wan bun matifasi nanga Yehovah, aladi a ben de na ini wan tra kondre (Dan. 9:2). Srefi baka di a ben de na Babilon sowan 70 yari kaba, toku sma ben sabi en ete leki Danièl, a Hebrew nen fu en.Dan. 5:13.

9. Soleki fa Psalm 119 e sori, dan sortu krakti Gado Wortu ben abi tapu a psalm skrifiman?

9 A skrifiman fu Psalm 119, ben kisi tesi fu di son heihei man na ini kownu-oso ben e spotu en. Ma te a ben e leisi Gado Wortu, a ben e kisi deki-ati èn dati ben yepi en fu de tra fasi (Ps. 119:23, 61). A ben meki Gado Wortu saka go dipi na ini en ati.Leisi Psalm 119:11, 46.

 TAN ABI WAN BUN MATIFASI NANGA YEHOVAH

10, 11. (a) San wi musu hori na prakseri te wi e studeri Gado Wortu? (b) San kan yepi wi fu du dati? Gi wan eksempre.

10 Kande wi abi furu fu du na ini a gemeente noso na wi wrokope. Ma toku wi alamala musu meki ten fu studeri nanga wisrefi èn fu hori na Osofamiri Anbegi (Ef. 5:15, 16). Wi no musu leisi soso fu di wi wani klari wan tu bladzijde fu den buku fu wi noso fu Bijbel èn wi no musu sreka wisrefi nomo fu di wi wani gi piki na den konmakandra. Ma wi musu sorgu taki Gado Wortu doro wi ati èn taki a e tranga wi bribi.

11 Sobun, te wi e studeri wi no musu prakseri nomo san tra sma abi fanowdu, ma wi musu denki tu san wi abi fanowdu fu tranga wi bribi (Fil. 1:9, 10). A kan pasa taki te wi e sreka wisrefi gi a preikiwroko, gi den konmakandra, noso gi wan lezing, wi no e luku fa wi kan fiti den sani dati na ini wi eigi libi. Luku na eksempre disi: Wan sma di e bori na ini wan restaurant, e tesi a nyanyan fosi a seri en gi sma. Ma toku a nyanyan di a e tesi no kan hori en na libi. Efu a wani tan gosontu, a musu bori bun nyanyan gi ensrefi. Na so a de tu taki efu wi wani tan abi wan tranga bribi, dan wi musu abi a gwenti fu studeri Bijbel bun.

12, 13. Fu san ede son brada nanga sisa kon si taki den e kisi wini te den e studeri na ini den mamatongo?

12 Furu brada nanga sisa di e dini na ini wan gemeente pe den e taki wan tra tongo, kon si taki den e kisi wini te den e studeri Bijbel ’na ini den eigi tongo’ (Tori 2:8). Srefi zendeling kon si taki den musu studeri nanga densrefi, fu di den sani di den e yere na den konmakandra  no sari fu man tan abi wan tranga bribi.

13 Alain, di e leri taki Persiatongo sowan aiti yari kaba, e taki: „Te mi e sreka gi den konmakandra na ini Persiatongo, dan mi e si taki mi e poti prakseri na a tongo nomo. Fu di na soso a tongo mi e pruberi fu frustan, meki den sani di mi e leisi no e naki mi ati ala ten. Dati meki mi e meki ten fu studeri Bijbel nanga den tra buku fu wi na ini mi mamatongo.”

MEKI GADO WORTU DORO NA ATI FU YU PIKIN

14. San papa nanga mama musu du èn fu san ede?

14 Kresten papa nanga mama musu sorgu taki Gado Wortu e doro na ati fu den pikin èn taki den e frustan en bun. Baka di Serge nanga en wefi Muriel dini moro leki dri yari na ini wan gemeente pe den e taki wan tra tongo, den kon si taki a boi fu den di ben abi 17 yari no ben e prisiri so furu moro fu go na ini a preikiwroko. Muriel e taki: „Fosi, a ben lobi preiki na ini Fransitongo, a mamatongo fu wi, ma now a ben e fuga fu preiki na ini wan tra tongo.” Serge e taki: „Di wi kon si taki a sani disi ben e tapu a boi fu wi fu go na fesi, wi bosroiti fu froisi go baka na a owru gemeente fu wi.”

Sorgu taki Gado Wortu doro na ati fu yu pikin (Luku paragraaf 14, 15)

15. (a) San kan yepi papa nanga mama fu bosroiti efu den o go baka na wan gemeente pe den pikin e frustan a tongo bun? (b) Sortu rai Deuteronomium 6:5-7 e gi papa nanga mama?

15 San kan yepi papa nanga mama fu bosroiti efu den musu go baka na wan gemeente pe den pikin e frustan a tongo bun? Den musu luku fosi efu den abi nofo ten èn efu den abi ala san de fanowdu fu yepi den pikin fu kon lobi Yehovah, aladi den e leri den wan tra tongo tu. Kande den e si tu taki den pikin no e prisiri so furu moro fu dini na ini a gemeente pe den de, fu go na a preikiwroko noso fu go na den konmakandra. Te dati de so, dan papa nanga mama kan bosroiti fu froisi go baka na wan gemeente pe den pikin e frustan a tongo bun èn den kan tan drape teleki den pikin tron lepi Kresten.Leisi Deuteronomium 6:5-7.

16, 17. San son papa nanga mama du fu yepi den pikin fu den fu abi wan tranga bribi?

16 Ma son papa nanga mama feni wan fasi fu gi den pikin leri na ini den eigi tongo, aladi den e go na wan gemeente noso grupu pe den e taki wan tra tongo. Charles abi dri meisje fu 13, 12 nanga 9 yari èn den alamala e go na wan grupu pe den e taki Lingalatongo. Charles e taki: „Wi bosroiti fu studeri nanga den meisje fu wi na ini wi eigi tongo èn na dati wi e du tu te wi e hori na Osofamiri Anbegi. Boiti dati, wi e oefen nanga makandra fu leri taki Lingalatongo èn wi e prei sani tu so taki den pikin e prisiri fu leri a tongo.”

Du muiti fu leri a tongo fu a gemeente so taki yu kan teki prati na a konmakandra (Luku paragraaf 16, 17)

17 Kevin, wan papa di abi tu meisje fu 5 nanga 8 yari, sabi taki den pikin fu en no man frustan ala san den e yere na den konmakandra. Dati meki a e du tra sani fu yepi den. A e taki: „Mi nanga mi wefi e studeri nanga den meisje fu wi na ini Fransitongo, a mamatongo fu wi. Wi bosroiti tu fu go na wan Fransitongo gemeente wán tron wan mun èn te wi abi fakansi wi e go na den kongres di e hori na ini wi eigi tongo.”

18. (a) Sortu rai di skrifi na Romesma 15:1, 2 kan yepi yu fu luku san moro bun gi yu pikin? (b) Sortu rai tra papa nanga mama e gi? (Luku „Ete wan sani”.)

18 Ma ibri osofamiri musu luku san na a moro bun sani di den kan du fu yepi den pikin fu tan abi wan bun matifasi nanga Yehovah (Gal. 6:5). [2] Muriel, di wi ben taki fu en kaba, e taki dati aladi den ben wani tan dini na ini a gemeente pe den ben de, toku den bosroiti fu froisi  gowe baka fu di den ben wani yepi a boi fu den fu tranga a bribi fu en. (Leisi Romesma 15:1, 2.) Now Serge kon si taki den teki a yoisti bosroiti. A e taki: „Sensi di wi froisi go baka na wan Fransitongo gemeente, a boi fu wi bigin go na fesi èn a teki dopu te fu kaba. Now a de wan gewoon pionier. A e prakseri srefi fu go dini baka na ini wan grupu pe den e taki wan tra tongo.”

MEKI GADO WORTU DORO YU ATI

19, 20. Fa wi kan sori taki wi lobi Gado Wortu?

19 Fu di Yehovah lobi wi, meki a gi wi en Wortu na ini hondrohondro tongo so taki ’ala sortu sma kan kon sabi a tru leri finifini’ (1 Tim. 2:4). A sabi taki wi o man abi wan moro bun matifasi nanga en te wi e leisi Bijbel na ini wan tongo di e naki wi ati.

20 Dati meki awinsi na ini sortu situwâsi wi de, wi musu tan abi a gwenti fu studeri Bijbel so taki wi kan tranga a bribi fu wi. Te wi e tan studeri Bijbel na ini a tongo di e naki wi ati, dan wi nanga wi osofamiri o tan abi wan bun matifasi nanga Yehovah. Wi o sori taki den sani di Gado e taigi wi, de leki wan gudu na ini wi ati.Ps. 119:11.

^ [1] (paragraaf 5) Wi kenki den nen.

^ [2] (paragraaf 18) Efu yu wani sabi sortu Bijbel rai kan yepi yu osofamiri, dan luku na artikel „Fa fu kweki pikin na ini wan tra kondre—Den problema nanga den blesi”, na ini A Waktitoren fu 15 oktober 2002.