Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2017

Singi nanga prisiri!

Singi nanga prisiri!

„A bun fu singi prèisesingi gi wi Gado.”​—PS. 147:1.

SINGI: 10, 2

1. San singi e yepi wi fu du?

WAN pôpi skrifiman fu singi ben taki: „Den wortu fu wan singi e meki yu prakseri sani. A poku fu a singi kan abi krakti tapu den firi fu yu. Ma te yu e singi den wortu, dan dati kan naki yu ati.” Te wi e singi wi e prèise wi hemel Tata Yehovah, èn wi e sori en taki wi lobi en. A sani disi e meki wi firi taki wi abi wan bun matifasi nanga Yehovah. Dati meki wi kan frustan fu san ede singi na wan prenspari sani na ini a tru anbegi, awinsi wi de wi wawan te wi e singi, noso makandra nanga wi brada nanga sisa.

2, 3. (a) Fa son sma feni en fu singi nanga tranga sten na ini a gemeente? (b) Sortu aksi wi o luku?

2 Fa yu feni en fu singi nanga wan tranga sten na ini a gemeente? Yu e syen fu du dati? A kan taki na ini son kulturu mansma no lobi singi pe tra sma de. A denki disi kan abi krakti tapu a heri gemeente, spesrutu efu den owruman no e singi noso efu den e du tra sani te a gemeente e singi.​—Ps. 30:12.

3 Efu wi e frustan taki singi na wan prenspari sani na ini na anbegi, dan a no de fu taki dati wi no o waka gowe te a  gemeente e singi èn wi o wani de na ini a Kownukondre zaal fu man singi tu. Dati meki iniwan fu wi musu aksi ensrefi: ’Fa mi feni en fu singi na den konmakandra? San mi kan du te a muilek gi mi fu singi pe tra sma de? Èn fa mi kan singi nanga mi heri ati?’

SINGI NA WAN PRENSPARI SANI NA INI A TRU ANBEGI

4, 5. Sortu sani ben seti fu meki sma singi gi Yehovah na a tempel?

4 Langa ten kaba futuboi fu Yehovah e prèise en nanga yepi fu poku. A moi fu sabi taki te den Israelsma fu owruten ben e dini Yehovah nanga den heri ati, dan singi ben de wan prenspari sani na ini na anbegi. Fu eksempre, di Kownu David ben e sreka sani gi a tempel, dan a sorgu taki 4000 Leifisma ben e prei poku fu prèise Yehovah. Fu a grupu disi sowan 288 sma „ben kisi leri fu singi gi Yehovah . . . Den alamala ben sabi du a wroko fu den heri bun”.​—1 Kron. 23:5; 25:7.

5 Di den Israelsma gi a tempel abra na Yehovah, dan den ben singi tu èn den ben prei poku. Bijbel e taki: „Den sma di ben abi a wroko fu bro trompeti nanga den singiman ben e meki poku leki wán man fu prèise Yehovah èn fu gi en tangi. Iya, den ben e bro trompeti, den ben e naki gengen èn den ben e meki poku nanga tra pokusani. . . . A glori fu Yehovah ben furu na oso fu a tru Gado.” A no de fu taki dati na okasi disi tranga a bribi fu den Israelsma!​—2 Kron. 5:13, 14; 7:6.

6. Sortu sani Nehemia ben seti di a ben de granman fu Yerusalem?

6 Di Nehemia ben teki fesi na ini a wroko di den Israelsma ben e du fu bow den skotu fu Yerusalem, dan a orga den Leifisma fu singi èn fu prei poku. Di den gi den skotu abra na Yehovah, dan a poku di den ben e prei ben meki a pipel firi prisiri trutru. Disi leisi „tu bigi grupu fu singiman” ben de. Den singigrupu ben e waka tapu a skotu èn ibriwan fu den singigrupu ben e waka go na wan tra sei teleki den miti makandra na wan presi na tapu a skotu di ben de krosibei fu a tempel-dyari. Di den bigin singi, dan sma ben kan yere den fu farawe (Neh. 12:27, 28, 31, 38, 40, 43). A no de fu taki dati Yehovah ben breiti fu yere fa den anbegiman fu en ben e prèise en nanga singi.

7. Fa Yesus sori taki singi ben o de wan prenspari sani na ini na anbegi fu Kresten?

7 Di a Kresten gemeente seti, dan poku ben de wan prenspari sani ete na ini a tru anbegi. Luku san pasa tapu a moro prenspari dei na ini a historia fu libisma. Baka di Yesus seti na Avondmaal fu Masra, dan den alamala bigin singi prèisesingi gi Yehovah.​—Leisi Mateyus 26:30.

8. Fu san ede den fosi Kresten de wan bun eksempre gi wi te wi e luku a fasi fa den ben e singi?

8 Te wi e luku fa den fosi Kresten ben e singi prèisesingi gi Gado, dan den de wan bun eksempre gi wi. Aladi den ben e kon makandra na ini den oso fu brada nanga sisa, toku den ben e singi nanga den heri ati gi Yehovah. Na apostel Paulus ben taigi den Kresten brada nanga sisa: „Tan gi makandra leri èn tan gi makandra deki-ati nanga psalm, nanga singi di e prèise Gado èn nanga tra moi singi di abi fu du nanga Gado. Iya, singi gi Yehovah nanga un heri ati” (Kol. 3:16). Den singi na ini wi singibuku na „moi singi di abi fu du nanga Gado”. „A koni srafu di de fu frutrow” e gi wi den singi disi fu tranga a bribi fu wi.​—Mat. 24:45.

 SAN O YEPI YU FU SINGI NANGA YU HERI ATI?

9. (a) Sortu sani kan meki taki son sma no e singi na den gemeente konmakandra èn na den bigi konmakandra fu wi? (b) Fa wi musu singi prèisesingi gi Yehovah èn suma musu de wan eksempre gi a gemeente? (Luku a prenki na a bigin fu na artikel.)

9 Ma fu san ede son sma no wani singi? Kande a no de wan gwenti na ini yu famiri noso na ini yu kulturu fu singi. Noso kande yu e arki pôpi singiman tapu radio noso telefisi èn yu feni taki yu no e singi so bun leki den. Ma toku dati no musu tapu wi fu singi prèisesingi gi Yehovah, fu di ala Kresten abi a frantwortu dati. Sobun, hori yu singibuku na yu fesi, tanapu leti-opo èn singi nanga yu heri ati! (Esra 3:11; leisi Psalm 147:1.) Na ini a ten disi, furu Kownukondre zaal abi scherm pe sma kan leisi den wortu fu a singi, so taki wi alamala man singi bun. A moi fu sabi tu taki na a Kownukondre Diniwroko-skoro gi owruman, den brada o bigin now nanga singi èn den o tapu tu nanga singi. A sani disi e sori o prenspari a de taki owruman e singi na ini a gemeente so taki den brada nanga sisa kan teki na eksempre fu den.

10. San wi musu hori na prakseri te wi e frede fu singi nanga tranga sten?

10 Son sma no wani singi tranga fu di den e frede. Kande den e frede taki sma o luku den noso taki sma no o lobi a sten fu den. Ma prakseri a sani disi: Te wi e taki, dan „wi alamala e sondu furu tron” (Yak. 3:2). Toku dati no e tapu wi fu taki. Sobun, fu san ede yu no wani singi prèisesingi gi Yehovah, soso fu di yu feni taki yu sten no moi?

11, 12. Sortu sani kan yepi yu fu singi moro bun?

11 Kande wi e frede fu singi fu di wi no sabi fa fu singi. Toku wi kan du wan  tu sani di kan yepi wi fu singi moro bun. *

12 Yu kan leri fu singi nanga moro krakti te yu e bro bun. Neleki fa stroom e leti wan lampu, na so yu o man taki noso singi nanga moro krakti te yu e bro bun. Nanga a srefi sten nanga san yu e taki yu musu singi tu, noso moro tranga leki dati. (Luku den rai di gi na ini a buku Kisi wini fu a Theokrasia Diniwroko-skoro, na a pisi „Yu musu bro bun”, tapu bladzijde 181 te go miti 184.) Fu taki en leti, son Bijbeltekst e taigi den futuboi fu Yehovah fu „bari fu prisiri” te den e singi prèisesingi.​—Ps. 33:1-3.

13. Fruteri san kan yepi wi fu singi sondro fu frede.

13 Te yu e hori yu Osofamiri Anbegi, noso te yu e studeri yu wawan, dan pruberi fu du disi: Teki wan fu den singi di yu lobi na ini a singibuku fu wi. Leisi den wortu fu a heri singi nanga wan krakti sten. Baka dati, yu musu leisi ala den wortu fu wán regel fu a singi na ini wán bro. Du dati nanga a srefi krakti sten dati. Dan singi a regel nanga a srefi sten (Yes. 24:14). Te yu e du disi, dan yu sten o kon moro krakti, ma dati na wan bun sani. No frede èn no firi syen te dati e pasa!

14. (a) Te yu e opo yu mofo moro bradi, dan fa dati e yepi yu fu singi moro bun? (Luku a faki „ Sani di o yepi yu fu singi moro bun”.) (b) Sortu sani yepi yu fu singi moro bun?

14 Yu no o man singi nanga wan krakti sten te yu no e opo yu mofo bun. Dati meki wan tra sani di yu kan du, na fu opo yu mofo moro bradi leki te yu e taki. San yu musu du te yu feni taki yu sten swaki noso te yu feni taki yu sten fini tumusi? Yu kan feni bun rai gi den problema disi na ini a buku Kisi wini fu a Theokrasia Diniwroko-skoro na ini a faki „Lusu wan tu spesrutu problema” na tapu bladzijde 184.

 SINGI NANGA YU HERI ATI

15. (a) San den brada meki bekènti na a alayari konmakandra fu 2016? (b) Fu san ede den brada kenki wan tu sani na ini a singibuku?

15 Ala den sma di ben de na a alayari konmakandra fu a Waktitoren Bijbel nanga Traktaat Genootschap fu Pennsylvania na ini 2016, ben e prisiri srefisrefi di Brada Stephen Lett fu a Tiri Skin meki bekènti taki wan nyun singibuku tyari kon na doro. A singibuku dati nen Singi nanga prisiri gi Yehovah. Brada Lett taki dati wi ben abi wan nyun singibuku fanowdu fu di a Nyun-Grontapuvertaling na ini Ingrisitongo kenki. Dati meki a ben de fanowdu fu kenki wan tu singi di ben abi wortu di no de fu feni moro na ini a Nyun-Grontapuvertaling. Boiti dati, a singibuku abi nyun singi di e poti prakseri na a preikiwroko èn na a lusu-paiman. Èn fu di singi na wan prenspari sani na ini na anbegi fu wi, meki a Tiri Skin ben wani meki wan singibuku di abi a srefi steifi kafti di a Nyun-Grontapuvertaling abi now.

16, 17. Sortu kenki tyari kon na ini a nyun singibuku?

16 Na ini a nyun singibuku, den singi di abi fu du nanga a srefi tori, poti makandra na ini grupu. Fu eksempre, den fosi 12 singi abi fu du nanga Yehovah, den tra aiti singi abi fu du nanga Yesus nanga a lusu-paiman, èn so moro fara. Na a bigin fu a buku, wan lijst de di e sori san na den difrenti singi di poti makandra na ini grupu. A sani disi kan de wan yepi gi wan brada te a e suku wan singi di fiti gi a publikitaki di a o hori.

17 Fu yepi ala sma fu singi nanga den heri ati, dan den wortu fu son singi kenki, so taki sma man frustan a singi moro bun. Boiti dati, den puru wortu di sma no e gebroiki so furu moro. Den nen fu son singi kenki tu. Fu eksempre, a ben fiti fu kenki a nen fu a singi „Kibri na ati fu yu” kon tron „Wi e kibri wi ati”. Fu san ede? Fu di te sma ben e singi a singi, dan a ben de neleki den ben e taigi trawan san fu du. Nyun sma, yonguwan, nanga sisa di ben e singi a singi disi na den konmakandra fu wi, ben kan firi fruferi. Dati meki den kenki a nen nanga den wortu fu a singi dati.

Oefen den singi te yu abi Osofamiri Anbegi (Luku paragraaf 18)

18. Fu san ede wi musu leri sabi den singi fu wi nyun singibuku? (Luku a futuwortu.)

18 Furu fu den singi na ini a Singi nanga prisiri gi Yehovah singibuku na begi. Nanga yepi fu den singi disi yu kan taigi Yehovah fa yu e firi. Tra singi o yepi yu fu „gi [makandra] deki-ati fu abi lobi èn fu du bun wroko” (Hebr. 10:24). A no de fu taki dati wi wani leri sabi den poku nanga den wortu fu den singi fu wi. Te yu e oefen den singi na oso, dan yu kan leri fu singi sondro frede èn nanga yu heri ati. *

19. Na sortu fasi ala sma na ini a gemeente kan anbegi Yehovah?

19 No frigiti taki singi na wan prenspari sani na ini na anbegi fu wi. Na wan moi fasi fa wi kan sori Yehovah taki wi lobi en èn taki wi abi warderi gi den sani di a e du gi wi. (Leisi Yesaya 12:5.) Te yu e singi nanga prisiri, dan yu o gi trawan deki-ati tu fu singi sondro frede. Ala sma na ini a gemeente, yonguwan, owruwan, nanga nyunwan kan anbegi Yehovah na a fasi disi. Sobun, no frede fu singi nanga yu heri ati. Na presi fu dati, gi yesi na a rai disi fu a psalm skrifiman: „Singi gi Yehovah!” Iya, singi nanga prisiri!​—Ps. 96:1.

^ paragraaf 11 Efu yu wani sabi fa yu kan singi moro bun, dan luku a JW Broadcasting programa fu december 2014 na ini Ingrisitongo (go na a pisi di nen FROM OUR STUDIO).

^ paragraaf 18 Fosi a mamanten nanga a bakadina programa fu ibri kongres nanga kring konmakandra e bigin, wi kan arki poku sowan tin miniti langa. Disi e sreka wi fu singi nanga moro prisiri èn fu arki a programa. Dati meki wi alamala musu sidon kaba te a poku e bigin prei, so taki wi kan arki den bun.