Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2017

No meki nowan sma tapu yu fu kisi a pai

No meki nowan sma tapu yu fu kisi a pai

„No meki nowan sma . . . tapu unu fu kisi a pai.”​—KOL. 2:18.

SINGI: 122, 139

1, 2. (a) Sortu pai den futuboi fu Gado o kisi? (b) San o yepi wi fu tan du ala san wi man fu kisi a pai? (Luku a prenki na a bigin fu na artikel.)

NELEKI na apostel Paulus, salfu Kresten na ini a ten disi abi a moi howpu fu kisi „a pai fu Gado. Dati na a libi na ini hemel” (Fil. 3:14). Den o tiri makandra nanga Yesus Krestes na ini a Kownukondre fu en na hemel èn den o wroko makandra nanga en fu yepi libisma fu kon fri fu sondu (Openb. 20:6). A no de fu taki dati disi na wan moi howpu di den salfuwan abi! Den tra skapu abi wan tra howpu. Den o kisi a grani fu libi fu têgo na grontapu èn a howpu disi e meki den firi koloku trutru!​—2 Petr. 3:13.

2 Paulus ben wani yepi den salfu Kresten fu tan gi yesi na Yehovah so taki den ben kan kisi a pai. A taigi den: „Tan poti un prakseri na den sani di de na hemel” (Kol. 3:2). Den ben musu tan poti prakseri na a moi howpu di den ben abi (Kol. 1:4, 5). A tru taki te den futuboi fu Yehovah e denki dipi fu den blesi di Yehovah o gi den, dan dati o yepi den fu du ala san den man  fu kisi a pai, awansi den abi a howpu fu libi na hemel noso na grontapu.​—1 Kor. 9:24.

3. Gi sortu sani Paulus ben warskow Kresten?

3 Paulus ben warskow Kresten tu gi sani di ben o tapu den fu kisi a pai. Fu eksempre, na ini a brifi di a ben skrifi gi a gemeente na ini Kolose, a ben taki fu den falsi Kresten di ben e hori densrefi na a Wet di Gado ben gi Moses, na presi taki den ben e poti bribi na ini Yesus. Den ben e du dati fu di den ben e denki taki na so Gado ben o feni den bun (Kol. 2:16-18). Paulus ben e taki tu fu sani di kan tapu pasi gi wi na ini a ten disi fu kisi a pai. Fu eksempre, a ben sori fa Kresten kan basi den sondu lostu fu den, fa den kan lusu problema nanga den brada nanga sisa fu den èn san den kan du te den e kisi problema na ini na osofamiri. A rai di a e gi fu den sortu tori disi e yepi wi te now ete. Dati meki wi o luku wan tu fu den warskow di Paulus gi na ini a brifi fu en.

BASI DEN SONDU LOSTU FU YU

4. Fu san ede den sondu lostu fu wi kan tapu wi fu kisi a pai?

4 Baka di na apostel Paulus memre den Kresten fu a moi howpu di den ben abi, a skrifi: ’Kiri den difrenti pisi fu un skin di kan meki taki unu kisi fu du nanga hurudu, wan libi di no krin, sekslostu, takru lostu nanga bigi-ai’ (Kol. 3:5). Sondu lostu kan abi bigi krakti na wi tapu èn den kan meki taki wi lasi a matifasi di wi abi nanga Yehovah. Wan brada di ben du hurudu èn di drai kon baka na a gemeente bakaten taki dati den sondu lostu fu en ben kon tranga so te, taki a no ben man basi den moro.

5. San wi kan du te wi e feni wisrefi na ini muilek situwâsi?

5 A prenspari srefisrefi taki wi e luku bun te wi de na ini situwâsi di kan meki taki wi e pasa den wet fu Yehovah. Fu eksempre, a de wan koni sani te tu sma di e hori nanga makandra e bosroiti frukufruku kaba taki den no o fasi noso bosi makandra na wan fasi di kan wiki seksfiri èn taki den no o de den wawan na presi pe dati no fiti (Odo 22:3). Tra situwâsi di kan tron wan tesi gi wan Kresten, na te a e go na tra kondre fu du bisnis. Wan Kresten brada kan kisi tesi tu te a musu wroko nanga wan uma èn wan Kresten sisa kan kisi tesi te a musu wroko nanga wan man (Odo 2:10-12, 16). Efu yu e feni yusrefi na ini so wan situwâsi, dan taigi den sma taki yu na wan Yehovah Kotoigi, tyari yusrefi na wan lespeki fasi, èn hori na prakseri taki te yu e meki trawan denki taki yu abi lobifiri gi den, dan dati kan tyari bigi problema kon. Wi musu luku bun tu te wi e firi sari noso te wi e firi leki wi de wi wawan. Kande wi wani taki wan sma gi wi a firi taki wi prenspari gi en. A firi disi kan tranga so te, taki wi o breiti te wan sma e poti prakseri na wi, awansi suma na dati. Efu dati e pasa nanga yu, dan suku yepi na Yehovah èn na a pipel fu en so taki noti no tapu yu fu kisi a pai.​—Leisi Psalm 34:18; Odo 13:20.

6. San wi musu hori na prakseri te wi e bosroiti fu luku felem?

6 Efu wi wani basi sondu lostu, dan wi no musu luku sani di kan wiki den sortu firi dati ini wi. Na ini a ten disi, furu fu den sani di wi e si na ini felem, na sani di e meki wi prakseri a libi na ini Sodom nanga Gomora fu owruten (Yud. 7). Den sma di e meki den felem disi e meki a gersi leki hurudu a no wan ogri èn taki a no e tyari takru bakapisi kon. Ma wi no kan luku ala felem di de fu si. Wi musu luku bun taki den felem di wi e luku no e tapu pasi gi wi fu kisi a pai.​—Odo 4:23.

 SORI LOBI NANGA SWITIFASI

7. Sortu problema kan opo kon na ini a Kresten gemeente?

7 Wi alamala e si en leki wan grani fu de wan memre fu a Kresten gemeente. Na den konmakandra, den sani di wi e leri fu Gado Wortu èn a deki-ati di wi e kisi fu makandra e yepi wi fu tan du ala san wi man fu kisi a pai. Ma toku sani kan pasa son leisi di e meki taki sma na ini a gemeente e mandi nanga makandra. Efu wi no e lusu den problema, dan dati kan meki taki wi e hori makandra na ati.​—Leisi 1 Petrus 3:8, 9.

8, 9. (a) Sortu fasi o yepi wi fu kisi a pai? (b) San kan yepi wi fu no hori wan brada noso wan sisa na ati te a e du wan hati sani nanga wi?

8 Te wi e hori sma na ati, dan dati kan tapu wi fu kisi a pai. Wi no musu gi pasi taki dati pasa. Paulus ben gi den Kolosesma a rai disi: „Unu na sma di Gado kari. Iya, unu santa èn a lobi unu. Dati meki un musu abi trutru sari-ati, bun-ati, sakafasi, safri-ati, nanga pasensi. Den fasi disi musu de leki wan krosi na un skin. Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu. Ma boiti den sani disi, un musu meki lobi kon de leki wan krosi na un skin, bika lobi e meki sma kon de wán trutru.”​—Kol. 3:12-14.

9 Te wi e sori lobi nanga switifasi, dan dati kan yepi wi fu gi makandra pardon nanga wi heri ati. Fu eksempre, efu wan sma taki noso du wan sani di hati yu, dan yu kan prakseri den leisi di yu taki noso du sani di trawan no ben lobi. Yu no breiti taki den sma disi ben de klariklari fu gi yu pardon? Koloku taki den ben de klariklari fu sori lobi nanga switifasi gi yu. (Leisi Preikiman 7:21, 22.) Wi de nanga tangi trutru taki Krestes e tyari sma kon na wán fu anbegi a tru Gado na ini wánfasi (Kol. 3:15). Wi alamala lobi a srefi Gado, wi e preiki a srefi boskopu èn wi alamala e kisi den srefi sortu problema. Te wi e sori switifasi èn te wi de klariklari fu gi makandra pardon, dan wánfasi o de na ini a gemeente èn noti no o tapu wi fu kisi a pai.

10, 11. (a) Fu san ede a no bun fu dyarusu tapu trawan? (b) Fa wi kan sorgu taki dyarusu no e tapu wi fu kisi a pai?

10 Bijbel abi eksempre di e warskow wi taki dyarusu kan tapu wi fu kisi a pai. Fu eksempre, Kain kon dyarusu tapu en brada Abel èn a kiri en. Korak, Datan, nanga Abiram kon dyarusu tapu Moses èn den ben e gens en. Boiti dati, Kownu Saul kon dyarusu tapu David fu di sani ben e waka bun gi en èn fu dati ede a pruberi fu kiri en. Dati meki a no e fruwondru wi taki Gado Wortu e taki: „Pe dyarusu de èn pe sma lobi fu meki trobi, na drape bruya nanga ibri sortu ogri de.”​—Yak. 3:16.

11 Efu wi e du muiti fu kon abi lobi nanga switifasi na ini wi ati, dan wi no o dyarusu makriki. Gado Wortu e taki: „Lobi abi pasensi èn a abi switifasi. Lobi no e dyarusu” (1 Kor. 13:4). Efu wi no wani taki dyarusu e teki rutu na ini wi ati, dan wi musu du muiti fu si sani soleki fa Gado e si sani. Wi musu si wi brada nanga sisa leki pisi fu a srefi skin. Disi o yepi wi fu firi gi den, soleki fa Bijbel e taki: „Efu wán pisi fu a skin e kisi glori, dan ala den tra pisi e prisiri tu” (1 Kor. 12:16-18, 26). Dati meki wi no o dyarusu tapu trawan te den e kisi blesi, ma wi o breiti gi den. Luku na eksempre fu Yonatan, a manpikin fu Kownu Saul. A no ben dyarusu di David ben salfu leki kownu. Na presi fu dati, a gi David deki-ati (1 Sam. 23:16-18). Wi kan  sori a srefi lobi nanga switifasi leki Yonatan?

KISI A PAI LEKI OSOFAMIRI

12. Sortu rai na ini Bijbel kan yepi osofamiri fu kisi a pai?

12 Te osofamiri e fiti den rai na ini Bijbel, den o de koloku, den o de na ini freide èn dati o yepi den fu kisi a pai. Paulus ben gi den Kolosesma a koni rai disi di ben o yepi osofamiri: „Un wefi, saka unsrefi na ondro un masra, soleki fa a fiti bakaman fu Masra. Un masra, tan lobi un wefi èn no abi bita-ati gi den. Un pikin, gi yesi na un papa nanga mama na ala fasi, bika disi e plisi Masra. Un papa, no tanteri den pikin fu unu, so taki den no lasi-ati” (Kol. 3:18-21). A no de fu taki dati masra, wefi nanga pikin e kisi wini ete fu a rai di Paulus ben gi.

13. Fa wan Kresten sisa kan yepi a masra fu en fu tron wan anbegiman fu Yehovah?

13 Kande yu na wan sisa di abi wan masra di no e dini Yehovah. San yu o du te yu feni taki a no e libi bun nanga yu? Yu o man lusu a problema te yu e tan krutu nanga en fu a sani disi ede? Kande yu e kisi en so fara fu du san yu wani, ma dati o yepi en fu tron wan anbegiman fu Yehovah? Ma efu yu e sori lespeki gi a frantwortu di a abi leki edeman fu na osofamiri, dan yu o man yepi yu osofamiri fu de  na ini freide èn yu o gi grani na Yehovah. Kande a bun eksempre fu yu o meki srefi taki a masra fu yu o wani dini Yehovah, so taki un ala tu kan kisi a pai.​—Leisi 1 Petrus 3:1, 2.

14. San wan Kresten masra musu du te en wefi di no de na bribi no e lespeki en?

14 Kande yu na wan brada di abi wan wefi di no e dini Yehovah. San yu o du te yu feni taki a no e lespeki yu? A ben o abi moro lespeki gi yu te yu ben o bari en fu sori en suma na basi? Kwetikweti! Gado wani taki yu musu de wan lobi-ati masra di e teki na eksempre fu Yesus (Ef. 5:23). Leki edeman fu a gemeente Yesus e sori lobi ala ten èn a abi pasensi tu (Luk. 9:46-48). Wan masra di e teki na eksempre fu Yesus kan kisi en wefi so fara taki a e tron wan anbegiman fu Yehovah tu.

15. Fa wan Kresten masra e sori lobi gi en wefi?

15 Yehovah e taigi masra: „Tan lobi un wefi èn no abi bita-ati gi den” (Kol. 3:19). Wan lobi-ati masra e gi en wefi grani. Fa a e du dati? A e arki san a abi fu taki èn a e sori en wefi taki den sani di a e taki prenspari gi en (1 Petr. 3:7). Srefi efu a no kan du ala ten san en wefi e aksi fu en, toku a o man teki moro bun bosroiti te a e arki san en wefi abi fu taki (Odo 15:22). Wan lobi-ati masra no e dwengi en wefi fu lespeki en. Na presi fu dati a e tyari ensrefi na so wan fasi taki a makriki gi en wefi fu lespeki en. Te wan masra lobi en wefi nanga en pikin, dan nofo tron na osofamiri fu en de koloku èn den o man kisi a pai.

Fa wi kan sorgu taki den problema na ini na osofamiri no e tapu wi fu kisi a pai? (Luku paragraaf 13-15)

YONGUWAN NO MEKI NOTI TAPU UNU FU KISI A PAI

16, 17. San kan yepi yu leki yonguwan fu no mandi tumusi furu nanga yu papa nanga mama?

16 Kande yu na wan yonguwan di feni taki yu papa nanga mama no e frustan yu, noso taki den e poti tumusi furu wet gi yu. Kande a sani disi e meki yu mandi so te, taki yu e bigin tweifri efu yu wani dini Yehovah ete. Ma efu yu gowe libi Yehovah, dan heri esi yu o si taki nowan sma e broko den ede moro nanga yu leki yu Kresten papa nanga mama nanga a gemeente.

17 Denki a tori: Efu yu papa nanga mama no ben gi yu piri-ai noiti, dan yu ben o aksi yusrefi efu den lobi yu trutru, a no so? (Hebr. 12:8) A no de fu taki dati yu papa nanga mama e meki fowtu, sobun kande yu no lobi a fasi fa den e gi yu piri-ai. Ma no tan luku a sani dati. Na presi fu dati, pruberi fu frustan fu san ede den e du noso taki son sani. Sobun, hori yusrefi èn no mandi esi-esi te yu e kisi piri-ai. Gado Wortu e taki: „Iniwan sma di no de gaw fu taki san a e denki, koni srefisrefi. Wan sma di abi a koni fu man si sani krin, no e bruya esi” (Odo 17:27). Meki muiti fu tron wan lepi sma di no e mandi te a e kisi piri-ai èn di e fiti a rai, awinsi fa a kisi a piri-ai (Odo 1:8). Hori na prakseri taki a de wan blesi fu abi papa nanga mama di lobi Yehovah. A no de fu taki dati den wani yepi yu fu kisi a pai.

18. Fu san ede yu o du ala san yu man fu kisi a pai?

18 Awinsi wi abi a howpu fu libi fu têgo na hemel noso na grontapu, toku wan moi ten e wakti ibriwan fu wi. A howpu di wi abi o kon tru seiker, fu di wi Mekiman srefi pramisi wi dati. Gado e taki fu a Paradijs: „Heri grontapu o furu nanga a sabi fu Yehovah” (Yes. 11:9). Na a ten dati ala sma di e libi na grontapu o kisi leri fu Gado. A no de fu taki dati wi alamala wani du muiti fu kisi a pai dati. Sobun, hori na prakseri san Yehovah pramisi yu èn no meki noti tapu yu fu kisi a pai!